အင်းစိန်ထောင်အတွင်းမှ ဂန္တ၀င် လူမိုက်ကြီးများ အပိုင်း (၁၂) - ဇော်သက်ထွေး

Labour Strike နဲ့ ရောက်လာတဲ့ ၅ (ည)တွေကို ဗိုလ်ကံကတော့ ဦးကျိုးအောင် ရေရေလည်လည် နွှာနေပါတယ်။ ဗိုလ်ကံရဲ့ အစီအစဉ်ကို အကောင်အထည် ဖော်ပေးရသူ နှစ်ယောက်ကတော့ စောစောပိုင်းကပြောသလို ကျော်သူနဲ့ တင်ဟန်ပါပဲ။ နေ့တိုင်း တစ်ယောက်တစ်လှည့်စီ ၅(ည)တွေကို ပုံစံကြီးပေးလိုက်၊ အိပ်မရအောင် မောင်းလိုက် လုပ်ရတယ်။ ၅(ည) တွေကလည်း ပျော့သယောင်နဲ့ မာကျောတယ်။ ပုံစံကြီးကို ကြံ့ကြံ့ခံ ဖြတ်သန်းတယ်။ ထောင်က ၅(ည) တွေ ဦးကျိုးပြီး လက်လျှော့လာမယ့် အခြေအနေကို စောင့်စားနေပေမယ့် မျှော်လင့်ထားသလို ဖြစ်လာမယ့်ပုံမပေါ်ဘူး။ ဒီကြားထဲမှာ ၅ (ည)တွေရဲ့ စည်းရုံးရေးဗျူဟာက သူတို့ကို များများနှိပ်စက်လေ ပိုပြီး သဘောထားကြီးပြလေပဲ။ သူတို့က တင်ဟန်နဲ့ ကျော်သူကို ဒေါသမထွက်ဘဲ ပြေပြေလည်လည်ဆက်ဆံတော့ ကျော်သူ့စိတ်ထဲမှာ ထူးဆန်းလာတယ်။ မနေနိုင်လို့ လေဘာခေါင်းဆောင်တစ်ဦးဖြစ်တဲ့ စက်မှုတက္ကသိုလ်ကျောင်းသား ဇော်ရဲဝင်းကို မေးကြည့်တော့ “ခင်ဗျားတို့က ကျွန်တော်တို့နဲ့ ရန်သူတွေမှမဟုတ်တာ။ ဘ၀တူ အကျဉ်းသားတွေပဲ။ ဗိုလ်ကံ ခိုင်းသမျှ စိတ်ပါသည်ဖြစ်စေ မပါသည်ဖြစ်စေ လုပ်နေတာကို ကျွန်တော်တို့က နားလည်တယ်” လို့ ပြောတော့ လူမိုက်ကြီး ကျော်သူ ရေရေလည်လည် ကြွေသွားတယ်။ ဒီလိုအမျိုးအစားတွေကို သူ့ဘ၀ တစ်လျှောက်မှာ မတွေ့ခဲ့ဖူးပါဘူး။
စစ်ခွေးတိုက်မှာ အနေကြာလာတော့ ကျော်သူက ၅(ည)တွေကို ကရုဏာသက်လာတယ်။ နောက်ပိုင်း ကျော်သူက တင်ဟန်ထက်စာရင် ၅(ည)တွေကို “အထာ”ထားလိုက်တယ်။  ဗိုလ်ကံက ငါးခါလောက် မောင်းခိုင်းရင် နှစ်ခါလောက်ပဲ လုပ်တော့တယ်။ ဗိုလ်ကံကြားအောင် “သတိ”ဆိုတဲ့ အသံကို အကျယ်ကြီးအော်ပြီး နောက်မှ “အေးစေ”ကို ခပ်တိုးတိုး အော်ကာ ၅(ည)တွေ သက်သောင့် သက်သာနေနိုင်အောင် ပါးပါးနပ်နပ် လုပ်သွားတယ်။ ဗိုလ်ကံ စစ်ခွေးတိုက်အပြင်သွားရင် ၀ါးဆစ်ပိတ်တုတ်နဲ့ တိုက်နံရံကိုခေါက်ပြီး အချက်ပေးတဲ့အတွက် ၅(ည)တွေ အေးအေးဆေးဆေး အနားယူခွင့်ရတယ်။ တစ်နည်းအားဖြင့် နှိပ်စက်ညှဉ်းပန်းမှုကို ကြံ့ကြံ့ခံဖို့ အားပြန်ဖြည့်ခွင့်ရတာပေါ့။ ပြန်လာရင်လည်း ၀ါးဆစ်ပိတ်တုတ်နဲ့ နံရံရိုက်ပြီးအချက်ပေးတယ်။ ဒီလိုနည်းနဲ့ ပုံစံကြီးမရပ်မနား အပေးခံနေရတဲ့ ၅(ည)တွေ နည်းနည်း အသက်ရှူချောင်သွားတယ်။ ကျော်သူနဲ့ ၅(ည)တွေ အဆင်ပြေနေတာကို စစ်ခွေးတိုက်မှာရှိတဲ့ Criminal(အကျဉ်သား) တွေက သိပ်မကြည်ဘူး။ ဒါပေမဲ့ ၅(ည)တွေက အင်အားများလို့ ဘာမှမလှုပ်ရှားဘဲ အခြေအနေ စောင့်ကြည့်နေတယ်။

ထူးဆန်းတာက ရက်သတ္တပတ် သုံးပတ်ပြည့်တော့ Labour Strike ၅(ည) အုပ်စုတွေကို ထောင်အာဏာပိုင်တွေက အလျှော့ပေးပြီး အဆောင်ပြန်ပို့ပေးလိုက်တယ်။ ပြီးတော့ သူတို့တောင်းဆိုထားတဲ့ ကိုယ်ပိုင်တောင်ယာလုပ်ခွင့်ကိုလည်း အသာတကြည် ပေးလိုက်တယ်။ အရင်တုန်းက ကိုယ်စိုက်ပြီး ကိုယ်မစားရတဲ့ ဘ၀ကနေ ကိုယ်စိုက်ပြီး ကိုယ်စားရတဲ့ အတွက်ကြောင့် ၅(ည)တွေက တောင်ယာအလုပ်ကို အားကြိုးမာန်တက် လုပ်ကိုင်လာကြတယ်။ ကိုယ်ပိုင်တောင်ယာ လုပ်ခွင့်ပေးတယ်ဆိုပေမယ့် ထောင်ကခေါင်းပုံ ဖြတ်ယူတဲ့ ရာခိုင်နှုန်းက အတော်များပါတယ်။ ဥပမာ ၁၂ ဘောင်ရှိတဲ့ တောင်ယာတစ်ခုကို လုပ်ကိုင်ခွင့်ရတဲ့ ၅(ည)တွေက အကျဉ်းဦးစီးဌာန ညွှန်ချုပ်အတွက် စိုက်ပျိုးရေးသီးနှံ ၃ ဘောင်၊ ဒုညွှန်ချုပ်အတွက် ၃ ဘောင်၊ ထောင်ပိုင်ကြီးအတွက် ၂ ဘောင်၊ ထောင်ပိုင်လေးအတွက် ၁ ဘောင်၊ မိန်းဂျေးလ်အတွက် ၁ ဘောင် ပေးရတယ်။ ကျန်တာကိုမှ စိုက်ပျိုးထားတဲ့ ၅(ည)တွေ အားလုံး မျှစားရတယ်။ နိုင်ငံရေးသမားတွေကလည်း တောင်ယာကထွက်လာတဲ့ သီးနှံကို ထောင်ဝင်စာမလာတဲ့သူတွေအတွက် ဦးစားပေး ခွဲဝေပေးရပါတယ်။ အဲဒီအချိန်က ထောင်ဝင်စာ မလာနိုင်တဲ့သူတွေထဲမှာ ကံဆောင်မှုကြောင့် ထောင်ကျလာတဲ့ ဦးဇင်းလေးတွေနဲ့ ဧရာဝတီတိုင်း ဘိုကလေးဘက်က နိုင်ငံတော်ပုန်ကန်မှုနဲ့ ကျလာတဲ့ ကရင်တွေက အတော်ချို့တဲ့ကြပါတယ်။ သူတို့တွေကို စားရေးသောက်ရေး အဆင်ပြေဖို့ ၅(ည) တောင်ယာတွေက ထောက်ပံ့ရပါတယ်။ စောစောက တင်ပြခဲ့သလို ညွှန်ချုပ်၊ ညွှန်မှူး၊ ထောင်ပိုင်တွေက သူတို့အတွက် အလှည့်ကျပေးထားတဲ့ ဘောင်တွေက ထွက်တဲ့သီးနှံတွေကို အမှန်တကယ်တော့ သူတို့တွေ မစားကြပါဘူး။ ဟိုတောင်ယာက တစ်စု၊ ဒီတောင်ယာက တစ်စု၊ တောင်အပြင်တောင်ယာက တစ်စုနဲ့ သူတို့ရတဲ့ ဝေစုက အတော်များပါတယ်။ များလွန်းတဲ့အတွက် ကြောင့် သီးနှံတွေကို အင်းစိန်ဈေးမှာရောင်းပြီး ရတဲ့ငွေကို ခွဲဝေပေးရတာပါ။ ဘာပဲပြောပြော Labour Strike ကြောင့် ၅(ည)တွေ ကိုယ်ပိုင်တောင်ယာ ရသွားတာကတော့ သမိုင်းမှတ်တမ်းတစ်ခု ကျန်ရစ်ခဲ့ပါတယ်။

Labour Strike ၄၄ ယောက် အဆောင်ပြန်သွားပေမယ့် စစ်ခွေးတိုက်မှာတော့ မုန်တိုင်း စနေပါပြီ။ ဒီမုန်တိုင်းကတော့ ကျော်သူ့ကိုကြည့်မရတဲ့ “ဇိုး” တွေက ဗိုလ်ကံကို အကြီးအကျယ် အချွန်နဲ့ မလို့ တိုက်ခတ်လာတဲ့ မုန်တိုင်းဖြစ်ပါတယ်။ သူတို့က ကျော်သူဟာ ၅(ည)တွေကို တကယ်ပုံစံကြီးမပေးဘဲ ဗိုလ်ကံ ကျေနပ်အောင် ဟန်ပြ “ရုပ်ရှင်ရိုက်” ခဲ့တာလို့ ကုန်းချောပါတယ်။ ဗိုလ်ကံက မယုံလို့ ကျော်သူ့ကိုမေးကြည့်တော့ ကျော်သူက ဟုတ်တယ်လို့ ၀န်ခံလိုက်တယ်။ အဲဒီမှာတင် ဗိုလ်ကံ အကြီးအကျယ် ပေါက်ကွဲတော့တာပါပဲ။ ကျော်သူ့ကို ထိုင်ရာကထပြီး ပါးတွေရိုက်၊ လက်သီးနဲ့ ထိုးတယ်။ ကျော်သူက ဖွဲအိတ်တစ်အိတ်လို ပေပြီးခံတယ်။

“ကျော်သူ...မင်းက ငါမွေးထားတဲ့ ခွေးတွေလောက်တောင် ငါ့အပေါ် သစ္စာမရှိဘူး။ ငါကတော့ မင်းကို တော်တော်ယုံကြည် အားထားခဲ့တယ်။ ဒါပေမဲ့ မင်းက သစ္စာဖောက်တယ်”

ဗိုလ်ကံရဲ့ဒေါသက ဒီလောက်နဲ့ ရပ်မသွားဘူး။ ခါးက ခါးပတ်ကို ချွတ်ပြီးရိုက်တဲ့အပြင် ကျော်သူ့ကို ဒေါက်ခြေကျင်းခတ်ပြီး တိုက်ပိတ်လိုက်တယ်။

“ငါ့ကို သစ္စာဖောက်တဲ့ကောင် ... မင်းသိပ်ချစ်တဲ့ ၅ (ည)တွေ ခံစားရသလို ခံစားကြည့်လိုက်ပေါ့ ကွာ”

ဗိုလ်ကံက ကျော်သူ့ကို နေ့ရော ညရော အနားမရအောင် ပုံစံကြီးမောင်းခိုင်းတယ်။ စစ်ခွေးတိုက်မှာရှိတဲ့ လူမိုက်တွေကလည်း ခွင်ကြုံရတာနဲ့ ကျော်သူ့ကို အမဲဖျက်သလို ၀ိုင်းဖျက်ကြတယ်။ ဒီကြားထဲ ဗိုလ်ကံက အခန်းထဲမှာ ပိတ်ထားတဲ့ ကျော်သူ့ကို တိုက်ခန်းအပြင်ကနေ “ကုန်းသီး” နဲ့ ပစ်တယ်။ ကုန်းသီးဆိုတာက လောက်လေးခွထဲမှာ သံမူလီထည့်ပြီး ပစ်တာပါ။ တစ်ချက်ထိလိုက်တာနဲ့ ချက်ချင်းကွဲပြီး သွေးတွေ ရဲခနဲ ဖြာကျလာတယ်။ ကျော်သူက သတ်္တိကောင်းတယ်။ ကြောက်တဲ့အသံ တစ်ချက်မှ မထွက်ဘူး။ ဒါကို မြင်လေ၊ ဗိုလ်ကံ ဒေါကန်လေပဲ။ ခြေထောက်ကို ဒေါက်ခတ်ထားတဲ့ ကျော်သူ့ကို ကုန်းသီးနဲ့ ပစ်လိုက်၊ ပုံစံကြီး ထိုင်ခိုင်းလိုက်နဲ့ မောင်းနေတယ်။ ကျော်သူကလည်း သွေးအလိမ်းလိမ်းကြားထဲက ပုံစံကြီး ထိုင်ရတယ်။ ရက်ကြာလာတော့ ကျော်သူ့ အခြေအနေက မကောင်းတော့ဘူး။ အခန်းထဲမှာ ခွေပြီးလဲနေတဲ့ ကျော်သူ့ကို ထောင်ဆရာဝန်က လာစစ်ဆေးပြီးတဲ့ နောက်မှတော့ ဗိုလ်ကံကို Tature တွေ ရပ်ခိုင်းလိုက်တယ်။ ဒါပေမဲ့ ကျော်သူက ခေါင်းပြန်ထောင်မလာနိုင်ဘူး။ နောက်ဆုံးတော့ ထောင်ဆေးရုံတင်ဖို့ အမိန့်ပေးလိုက်တော့တယ်။
ဒီအချိန်မှာ ကျော်သူ ဘာဆက်ဖြစ်မလဲဆိုတာကို နားစွင့်နေတဲ့ အုပ်စုတွေ ရှိနေတယ်။ သူတို့တွေက စိုးမြတ်ကြီးနဲ့ ကျော်သူ ခေတ်ကောင်းစဉ်ကာလက “ငုပ်” နေရတဲ့ လူမိုက်အုပ်စုတွေပဲ။ အခုတော့ ထောင်ဆေးရုံကို ကျော်သူ ရောက်လာပြီဆိုတဲ့ သတင်းက တစ်ထောင်လုံးကို ပြန့်သွားတယ်။ ကျော်သူ့အတွက် မြွေပူရာ ကင်းမှောက်ဆိုသလို သူနဲ့ ရန်သူတော်ဖြစ်ခဲ့တဲ့ “မူဆာကြီး” ကလည်း အပြင်ဆေးရုံကနေ လွတ်မြောက်သွားပြန်သတဲ့။ ကျော်သူကလည်း အရာအားလုံးကို တွက်ဆထားပါတယ်။ စစ်ခွေးတိုက်ဟာ ကံတရားအရ သူ့အတွက်အလုံခြုံဆုံး ဖြစ်ခဲ့ပေမယ့် လူပေါင်းထောင်ချီ ရှိနေတဲ့ အဆောင်တွေဆီကို ပြန်ရောက်သွားရင် သူ့ကို အမှုန့်ချေမယ့်လူ၊ လက်စားချေမယ့်လူ၊ အပျောက်ရှင်းမယ့်လူတွေ အနည်းနဲ့အများ ရှိနေတယ်ဆိုတာကို နားလည်ထားပြီး ဖြစ်ပါတယ်။ ဒါပေမဲ့ ကံဆိုးမိုးမှောင်ကျပြီး စစ်ခွေးတိုက်ကနေ ဗိုလ်ကံက ကန်ထုတ်လိုက်တဲ့ အပေါ်မှာ လုံးဝနောင်တမရပါဘူး။ လူမိုက်တွေရဲ့ ထုံးတမ်းအစဉ်အလာအရ လာမယ့်ဘေး ပြေးတွေ့ရုံပဲ ရှိပါတော့တယ်။

ကျော်သူ ထောင်ဆေးရုံ ရောက်လာတာကို အခြားသူတွေထက် ပိုပြီးစိတ်ဝင်စားတဲ့ လူနှစ်ယောက် ပေါ်လာတယ်။ တစ်ယောက်တော့ တာမွေအိုးစုက “စိန်ကုလား” ဖြစ်ပြီး နောက်တစ်ယောက်တော့ ဆေးရုံကြီး လူမိုက်အုပ်စုထဲက ဇရှိတဲ့ “စိန်ဝင်း” တို့ ဖြစ်ပါတယ်။
ဇော်သက်ထွေး
http://www.tomorrow.com.mm/?q=articles/3433