ကုန်သွယ်လုပ်ငန်းခွန် ၁ ရာခိုင်နှုန်းကို ၀ယ်ယူသူက ပေးဆောင်ရမှာ ဖြစ်ပါတယ်။
ရွှေဆိုင်တွေမှာ ကုန်သွယ်လုပ်ငန်းခွန်ကောက်ဖို့ အခွန်ပြေစာအမှတ်တံဆိပ်တွေ ရိုက်နှိပ်ပြီး ဧပြီလကုန်မှာ ရွှေဆိုင်တွေကို ထုတ်ပေးသွားမယ်လို့ ပြည်တွင်းအခွန်များဦးစီးဌာန ညွှန်ကြားရေးမှူးတစ်ဦးက ပြောပါတယ်။
ရောင်းရငွေအပေါ်မှာ ကုန်သွယ်လုပ်ငန်းခွန် မှန်မှန်ကန်ကန် စည်းကြပ်နိုင်ဖို့အတွက် အခွန်ပြေစာ အမှတ်တံဆိပ်တွေ ရိုက်နှိပ်ဖို့ စီစဉ်နေတယ်လို့ သိရပြီး လက်ရှိအချိန်အထိ ရွှေဝယ်ယူသူတွေဆီကနေ ကုန်သွယ်လုပ်ငန်းခွန် ကောက်ခံတာမရှိသေးဘူးလို့ ပြည်တွင်းအခွန်များဦးစီးဌာနကနေ သိရပါတယ်။
အရင်တုန်းကတော့ ရွှေဆိုင်တွေရဲ့ ရောင်းရငွေအပေါ် ကုန်သွယ်လုပ်ငန်းခွန် ၅ ရာခိုင်နှုန်း ကောက်ခံခဲ့ပြီး အဆိုပါအခွန်ကို ရွှေဆိုင်တွေက ပေးဆောင်ရကာ အခုကောက်ခံမယ့် ကုန်သွယ်လုပ်ငန်းခွန် ၁ ရာခိုင်နှုန်းကို ၀ယ်ယူသူက ပေးဆောင်ရမှာ ဖြစ်ပါတယ်။
‘‘ကောက်ခံလို့ ရတဲ့ အခွန်တွေကို နိုင်ငံတော်ကို ပြန်သွင်းရတယ်။ အဲဒီပိုက်ဆံတွေနဲ့ပဲ လမ်း၊ တံတားတွေဆောက်တယ်။ ဆေးရုံတွေဆောက်တယ်။ ဒါတွေက ပြည်သူတွေအတွက် ပြန်သုံးတာ"လို့ ပြည်တွင်းအခွန်များဦးစီးဌာန ညွှန်ကြားရေးမှူးတစ်ဦးက ပြောပါတယ်။
အရင်တုန်းက ရွှေဆိုင်တွေက အခွန်ကောက်ခံရာမှာ အခွန်စည်းကြပ်ဖို့ တင်ပြတဲ့ ပမာဏအပေါ်သာ စည်းကြပ်ရတာဖြစ်ပြီး အခုလိုအခွန်ပြေစာအမှတ် တံဆိပ်ကပ်နှိပ်တဲ့စနစ်နဲ့ ကုန် သွယ်လုပ်ငန်းခွန်ကောက်ခံရင် ရောင်းရငွေအမှန်ကို အခွန်စည်းကြပ်နိုင်မယ်လို့ ပြည်တွင်းအခွန်များ ဦးစီးဌာနကနေ သိရပါတယ်။
၂၀၁၇ ပြည်ထောင်စုအခွန် အကောက်ဥပဒေမှာ လက်ဝတ်ရတနာ၊ ကျောက်စိမ်း၊ ပတ္တမြား၊ နီလာ၊ စိန်၊ မြနဲ့ အခြားကျောက်မျက်ရတနာများအတွက် အခွန် ၅ ရာခိုင်နှုန်း၊ ရွှေထည် လက်ဝတ် ရတနာတွေအတွက် အခွန် ၁ ရာခိုင်နှုန်းနဲ့ အထူးကုန်စည်မှာ မပါဝင်တဲ့ အခေါက်ရွှေတုံးတွေအတွက် ကုန်သွယ်လုပ်ငန်းခွန် ၅ ရာခိုင်နှုန်း ပေးဆောင်ရမယ်လို့ ပြဌာန်းထားပါတယ်။
Source : 7DayDaily:Duwun
No comments:
Post a Comment