UWSP "၀" အဖွဲ့က ဦးဆောင်ပြီး တိုင်းရင်းသားလက်နက်ကိုင်အဖွဲ့၇ ခုက တစ်နိုင်ငံလုံး အပစ်အခတ်ရပ်စဲရေးစာချုပ် NCA လမ်းကြောင်းကမဟုတ်ဘဲ လမ်းကြောင်းသစ် ဖော်ဆောင်ပြီးသွားမယ်ဆိုတဲ့ ထုတ်ပြန်ချက်နဲ့ ပတ်သက်ပြီး အစိုးရကို တရားဝင်ပေးပို့ထားတာ မရှိသေးတဲ့အတွက် သဘောထားမှတ်ချက်ပေးဖို့ စောနေသေးတယ်လို့ နိုင်ငံတော်အတိုင်ပင်ခံရုံး ညွှန်ကြားရေးမှူးချုပ် ဦးဇော်ဌေး က ပြောပါတယ်။
ပြီးခဲ့တဲ့ ဧပြီလ ၁၉ ရက်နေ့က "၀"ဒေသ ပန်ခမ်းမြို့မှာပြုလုပ်တဲ့ ဆွေးနွေးပွဲက ထုတ်ပြန်ချက်မှာ ဘယ်အချက်တွေပါသလဲဆိုတာ တရားဝင် မသိရသေးသလို သူတို့ရဲ့ ရပ်တည်ချက် သဘောထားဟာ ဘာလဲဆိုတာကို မသိရသေးတဲ့အတွက် ပြောဖို့ စောသေးတယ်လို့ ဦးဇော်ဌေး
က ပြောပါတယ်။
"ဒီမူဝါဒ ရပ်တည်ချက်စာတမ်းဆိုတာ ဘာပါမှန်းမသိဘူး။ အစိုးရဆီပို့မယ်တဲ့ ကျနော်တို့ဆီတော့ ခုချိန်ထိမရသေးဘူး။ အဲစာတမ်းမှာ ဘာတွေပါလို့ ဘာတွေမှန်းလဲမသိဘူး၊ အဲဒီမှာပါတဲ့ ၇ဖွဲ့ဆိုတာ UNFC မှာပါတဲ့ အဖွဲ့တွေလည်းပါနေတယ်။ အဲတော့ UNFC က ဟိုတလောကပဲ NCA လမ်းကြောင်းအတိုင်း သွားမယ်ဆိုပြီးတော့ ချင်းမိုင်မှာ ဆုံးဖြတ်ထားတာ ကျနော်တို့ သိရတယ်။အဲဒီအဖွဲ့တွေရဲ့ သဘောထားလဲ ကျနော်တို့က မသိရဘူး၊ အဲဒီအဖွဲ့တွေရဲ့ မီဒီယာကိုပြောတာကော၊ တဆင့်ထုတ်ဖော်ပြောကြားတာရော ရှင်းရှင်းလင်းလင်း မသိရသေးဘူး၊ ဒီလိုရှင်းရှင်းလင်းလင်း မသိတဲ့အနေအထားမှာ အစိုးရရဲ့ တရားဝင်ရပ်တည်ချက်သဘောထားဆိုတာကို ပြောဖို့စောတယ်။ ပြောဖို့မှတ်ချက်ပေးဖို့ ခက်ပါတယ်ဆိုတာ ပြောထားတာဖြစ်ပါတယ်"
ဒါ့အပြင် အဲဒီ ၇ ဖွဲ့ရဲ့ ထုတ်ပြန်ချက်မှာပါတဲ့ KIA ၊ SSPP တို့ဟာ UNFC အဖွဲ့ဝင်တွေလည်းဖြစ်ပြီး အစိုးရနဲ့ NCA လမ်းကြောင်းအတိုင်းဆက်သွားဖို့ အချက် ၈ ချက်ကို တင်ပြထားတဲ့အဖွဲ့တွေဖြစ်တာကြောင့် သူတို့ရဲ့ ရပ်တည်ချက်သဘောထားကို ရှင်းရှင်းလင်းလင်းမသိရသေးဘူးလို့ ဦးဇော်ဌေးက ပြောပါတယ်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း ငြိမ်းချမ်းရေးတံခါးကို ပိတ်မထားဘူး၊ ဖွင့်ထားဆဲဖြစ်တယ်လို့ အစိုးရရဲ့ သဘောထားကို ထုတ်ပြန်ပြီးဖြစ်ကြောင်း ဦးဇော်ဌေး က ပြောပါတယ်။
အလားတူ UNFC အဖွဲ့က တင်ပြထားတဲ့ အချက် ၈ ချက် အပေါ်မှာ မူအားဖြင့် အစိုးရက သဘောတူပြီးဖြစ်သလို နိုင်ငံရေးဆွေးနွေးရေးမူဘောင်နဲ့ JMC လို့ ခေါ်တဲ့ တပ်ပိုင်းဆိုင်ရာနေရာချထားရေးကိစ္စတွေကို အသေးစိတ်ထပ်ဆွေးနွေးသွားဖို့ ငြိမ်းချမ်းရေးကော်မရှင်က ညှိနှိုင်းနေတယ်လို့ ပြောပါတယ်။
"၀" အထူးဒေသ ပန်ခမ်းမြို့မှာ ငါးရက်ကြာကျင်းပခဲ့တဲ့ တိုင်းရင်းသားလက်နက်ကိုင်အဖွဲ့ ၇ ဖွဲ့ရဲ့ အစည်းအဝေးမှာ "ပြည်ထောင်စု နိုင်ငံရေး ဆွေးနွေးညှိနှိုင်းရေးကော်မတီ" ကို ဖွဲ့စည်းခဲ့ပြီး အစိုးရနဲ့ တွေ့ဆုံဆွေးနွေးဖို့တစ်ဖွဲ့ချင်းစီမဟုတ်ဘဲ UWSP "၀" ဦးဆောင်တဲ့ အဲဒီကော်မတီနဲ့သာ ဆွေးနွေးဖို့ဆုံးဖြတ်ခဲ့ပါတယ်။ RFA
No comments:
Post a Comment