ယနေ့ အစိုးရယန္တရားကို ကိုင်တွယ်နေသည့် လက်ရှိအစိုးရသည် ပြည်သူအများစု အစစ်အမှန် ထောက်ခံပြီး ပြည်သူ အများစု နှစ်သက် ရွေးချယ်ထားသည့် အစိုးရဖြစ်သည်ကို အစိုးရထိပ်ပိုင်းနေရာမှ တာဝန်ရှိသူတွေ အစဉ်အမြဲ သတိချပ်သင့်ပေသည်။ ရွေးကောက်ပွဲ ကာလနီးမှ ရွှန်းရွှန်းဝေအောင် ပြောဆိုစည်းရုံး၊ ရွေးကောက်ပွဲပြီး အစိုးရ ဖွဲ့နိုင်သည့် အမတ်အနေအထား ရပြီးနောက် အစိုးရလည်းဖြစ်ရော ပြည်သူ့ဆန္ဒ (ဒီနေရာမှာ ဝန်ထမ်းတွေသည်လည်း ပြည်သူဖြစ်သည့်အတွက်) ဝန်ထမ်းတွေရဲ့ ဆန္ဒကိုလည်း တလေးတစား အလေးထားဖို့ လိုပါသည်။ သာဓက အနေနှင့် ဝန်ထမ်းမြို့တော်ဖြစ်သည့် နေပြည်တော်၊ အဲဒီအထဲကမှ ဝန်ထမ်းတွေချည်း နေထိုင်သည်ဟု ပြောလို့ရသည့် ဇမ္ဗူသီရိမြို့နယ် ယခင်သမ္မတဟောင်း ဦးသိန်းစိန် ဝင်ရောက် အရွေးခံခဲ့သည့် နယ်မြေတွင် လက်ရှိ အမတ်ဖြစ်သူ ဦးဖြိုးဇေယျာသော်ကို ၂၀၁၅ ရွေးကောက်ပွဲတွင် ယင်းဝန်ထမ်း အများစုကပင် အကြောက်တရား၊ စိုးရိမ်မှုတို့ ဘေးဖယ်ထားကာ ၎င်းတို့ရဲ့ ဆန္ဒအမှန်ကို သတ္တိရှိရှိ ရဲဝံ့စွာဖြင့် ထုတ်ဖော်ပြသခဲ့သည့်အတွက် ယနေ့ လွှတ်တော်ထဲရှိ နေရာတစ်နေရာတွင် ရောက်ရှိနေပေသည်။ ဒါက သိသာထင်ရှား မြင်သာသည့်နေရာကို ပြဆိုခြင်းပင် ဖြစ်သည်။ အခြားသော မဲဆန္ဒနယ်များတွင်လည်း မင်စွန်းခဲ့သည့် ဝန်ထမ်း အများစု၏ လက်သန်းများကြောင့် ရွေးကောက်ပွဲရလဒ်တွင် သောင်ပြိုကမ်းပြို ဖြစ်ခဲ့ရသည်မှာ ငြင်းဆိုဖွယ် မရှိပေ။
ယခုတစ်ပတ်အတွင်း နိုင်ငံ့ဝန်ထမ်းများနှင့် ကုမ္ပဏီဝန်ထမ်းများအကြား လှုပ်ခတ်သွားသည့်သတင်းက မဟာသင်္ကြန် ရုံးပိတ်ရက်ရှည်ကာလကို ယခင် ၁၀ ရက် သတ်မှတ်ပေးခဲ့ရာမှ ၅ ရက်အဖြစ် ပြောင်းလဲလိုက်သည့် ပြည်ထောင်စု အစိုးရအဖွဲ့ရုံး၏ ၁၀.၃.၂၀၁၇ ရက်စွဲပါ အမိန့်ကြော်ငြာစာ အမှတ် (၃၁/၂၀၁၇) ဖြင့် ထုတ်ပြန်သည့်စာပင် ဖြစ်သည်။
ဤကဲ့သို့ သင်္ကြန်ရုံးပိတ်ရက် ၅ ရက် လျှော့ချလိုသည့်ကိစ္စအား အစိုးရအဖွဲ့ရုံးမှ ၈.၃.၂၀၁၇ ရက်နေ့တွင် စာအမှတ် ၄/၄၆၄ အားလပ် ရက်/အဖရ (၂၀၁၇) ဖြင့် ဝန်ကြီးဌာန အဖွဲ့အစည်းများသို့ သဘောထား တောင်းရာတွင် ဝန်ကြီးဌာနများ အနေနှင့် ကြိုတင်စီစဉ်ထားသော လုပ်ငန်းများ ထိခိုက်နစ်နာမှု ရှိ မရှိ၊ အဆင်ပြေမှု ရှိ မရှိသာ မေးမြန်းထားသည်ကို တွေ့ရပြီး ဝန်ထမ်းအများစု၏ သဘောထားကို မျက်ကွယ်ပြုထားသည်မှာ လွန်စွာ ဝမ်းနည်းဖွယ်ရာ ဖြစ်ပေသည်။ ထို့ပြင် ဤကိစ္စအား ရုံးစာဦးစားပေး အဆင့်အတန်း (အမြန်) ဖြင့် ၈.၃.၂၀၁၇ ရက်နေ့ စာထုတ်ပြီး ၉ ရက်နေ့ ၁၅းဝ၀ နာရီအရောက် တောင်းခံသည်ကို ကြည့်ခြင်းဖြင့် အဘယ့်ကြောင့် ဖုတ်ပူမီးတိုက် ယခုလိုအချိန်ကျမှ ကောက်ကာငင်ကာ လုပ်ဆောင်ရသည်ကိုလည်း ဝေခွဲမရ ဖြစ်မိသည်။ ဤစာကိုရသည့် ဝန်ကြီးဌာနများ အနေနှင့်လည်း စာရလျှင်ရချင်း လက်အောက်ဌာန အသီးသီးသို့ မေးမြန်းချိန်ပင် ရမည်မထင်၊ မေးမြန်းခဲ့သည့်တိုင်အောင် အောက်ဌာနများမှလည်း ရှေးအစဉ်အလာလိုဖြစ်နေသည့် အထက်ရုံးက ဒီလို ဖြစ်စေချင်နေသည့် သဘောပါနေလျှင် လျော်ကန်သင့်မြတ်လှကြောင်းပါ၊ အခက်အခဲ မရှိပါကြောင်း၊ အဆင်ပြေပါကြောင်းတို့သာ ပြန်ကြားလိမ့်မည်ထင်သည်။
ဤသို့ဖြင့် ဝန်ကြီးဌာန အသီးသီးမှ သဘောထား မှတ်ချက်ရရှိပြီးသကာလ တိကျမြန်ဆန်လွန်းလှသည့် အစိုးရ၏ လုပ်ငန်းဆောင်ရွက်မှုစနစ်ဖြင့် ၁၀.၃.၂၀၁၇ ရက်နေ့တွင် သင်္ကြန်ရုံးပိတ်ရက် ၅ ရက် သတ်မှတ်သည့်အကြောင်း အမိန့်စာတစ်ရပ်ကို လူမှုကွန်ရက် စာမျက်နှာများတွင် အချိန်နှင့်တစ်ပြေးညီ ရောက်ရှိလာပေတော့သည်။ အမိန့်စာ ထုတ်ပြန်ပြီးနောက် နိုင်ငံတော်သမ္မတရုံး Website တွင် သတင်းထုတ်ပြန်ချက်အမှတ် (၂/၂၀၁၇) ထွက်လာပြန်သည်။ ယင်းထုတ်ပြန်ချက်တွင် မဟာသင်္ကြန် ရုံးပိတ်ရက် ၅ ရက် သတ်မှတ်လိုက်သော်လည်း လျှော့ချလိုက်သည့် ၅ ရက်အား သီတင်းကျွတ်၊ တန်ဆောင်တိုင်နှင့် နိုင်ငံတကာ နှစ်သစ်ကူးရက်များတွင် အစားထိုး ဖြည့်ပေးသည့်သဘော၊ ဝန်ထမ်းများအား အနားယူချိန် ၁၀ ရက်ကဲ့သို့ ရရှိအောင် အုပ်ချုပ်မှု နည်းလမ်းဖြင့် ဆောင်ရွက်ပေးရန် စီစဉ်ထားရှိကြောင်း၊ သို့သော် ယင်းအစီအစဉ်မှာ ယခုနှစ်အတွက်သာဖြစ်ပြီး နောက်လာမည့်နှစ်များတွင် သင်္ကြန်ရုံးပိတ်ရက် ၅ ရက်သာ ရရှိတော့မည့်အကြောင်း ဖော်ပြထားသည်ကို တွေ့ရပြန်သည်။
အစိုးရအနေနှင့် ဤကဲ့သို့ ဆောင်ရွက်သည်မှာ ရုံးပိတ်ရက်ကာလ ရက်ရှည်ဖြစ်ခဲ့သည့်အတွက် နိုင်ငံတကာနှင့် ဆက်သွယ် ဆောင်ရွက်သည့် ရုံးလုပ်ငန်းများနှင့် ဘဏ်လုပ်ငန်းများ အခက်အခဲ ဖြစ်ပေါ်ကြောင်း၊ ကုန်စည်စီးဆင်းမှုများ နှောင့်နှေးကြန့်ကြာခြင်းများ ဖြစ်ပေါ်သည့်အတွက်ဟု ဖော်ပြထားသည်ကို တွေ့ရပြန်သည်။ အစိုးရ၏ ဖော်ပြချက်တွင် အကြောင်းကိုသာ ဖော်ပြထားပြီး ယင်းကဲ့သို့ ရက်ရှည်ရုံးပိတ်ရက် ဖြစ်ခဲ့သည့်အတွက် အကျိုးရလဒ် မည်ရွေ့မည်မျှ နိုင်ငံတော်အတွက် ထိခိုက်နစ်နာသည်ကို ရှင်းလင်းစွာ ဖော်ပြမထားပေ။ သေချာစွာ ကိန်းဂဏန်း အချက်အလက် စနစ်တကျ တွက်ချက်ထားလျှင် ပွင့်လင်းမြင်သာစွာ ရှင်းလင်း ပြောသင့်သည်ဟု ထင်သည်။ အကယ်၍ ယင်း ၅ ရက် အတိုင်းအတာကြောင့် နိုင်ငံတော်အတွက် ပမာဏ အတိုင်းအတာတစ်ခု နစ်နာမည်ဆိုလျှင်တောင် နှစ်တစ်နှစ်လုံး နိုင်ငံတော်အတွက် နိုင်ငံ့တာဝန်ကို ကျေပွန်စွာ ထမ်းဆောင်ခဲ့သည့် ဝန်ထမ်းများ၏ ပျော်ရွှင်မှုရလဒ်ဖြင့် ချိန်ထိုးပြီး စာနာ နားလည် စဉ်းစားပေးသင့်သည်။
လျှော့ချလိုက်သည့် ၅ ရက်ကို အခြား နေ့ထူး နေ့မြတ်များတွင် ထပ်တိုးပေးထားသည်ဟု ပျားရည်ဖြင့် ဝမ်းချထားသော်လည်း ဝန်ထမ်း အများစုသည် ဟိုလ နှစ်ရက်၊ ဒီလသုံးရက် ပိတ်ခြင်းမျိုးထက် အမှန်တကယ် လိုလားသည်မှာ တစ်နှစ်တွင် ရက်ရှည်ပိတ်ရက်၊ အထူးသဖြင့် မြန်မာနှစ်သစ်ကူး အခါသမယတွင်သာ ရယူလိုပြီး ဆွေမျိုးဉာတိများရှိရာ မိမိနေရပ်ဒေသ အသီးသီးသို့ နောက်ဆံမတင်း အေးရာအေးကြောင်း ပြန်လိုကြသည်။ ဟိုရောက်လျှင် တတ်အားသရွေ့ အလှူဒါနပြုကြမည်။ ရသည့်အချိန်လေးအတွင်း တရားဘာဝနာ အားထုတ်ကြမည်၊ သာသနာ့ဘောင်သို့ ဝင်ကြမည်။ အချို့ တစ်နယ်တစ်ကျေး ဝေးကွာနေသည့် မိသားစုများ ဤအချိန်ကို အားထား၍ ဘိုးဘွား၊ မိဘ၊ ဆွေမျိုးညီ အစ်ကိုမောင်နှမများ အားလုံး ဆုံရပ်အဖြစ် လာရောက်စုဆုံကြပြီး ပျော်ကြရွှင်ကြမည်၊ ဤသို့ အခွင့်အရေး ရရှိရန် ရည်ရွယ်ပြီး ယခင်အစိုးရမှ ချမှတ်ဆောင်ရွက်ခဲ့သည်ဟု ယုံကြည်သည်။
ယခင်နှစ်များတွင် သင်္ကြန်ကာလ ရုံးပိတ်ရက်ရှည်ရောက်တော့ မည်ဆိုလျှင် ကားဂိတ် အသီးသီး ကားလက်မှတ် ကျပ်ကြ၊ ဈေးတက်ပြီး ရောင်းချကြ၊ အချို့ဖြစ်သလို ကြပ်ညှပ်ပြီး လိုက်ပါကြရသော်လည်း မိမိ ရပ်မြေ ပြန်ရမည့်အရေး အားဆေးတစ်ခွက်ကဲ့သို့ မှတ်ယူကာ တက်ကြွနေသည့် ဝန်ထမ်းများ၏ပုံရိပ်ကို ယနေ့အစိုးရ သတိမမူခဲ့လေသလား။ အမှန်ဆို လူထုတင်မြှောက်ထားသည့် အစိုးရအနေနှင့် ဝန်ထမ်းများ ယင်းကဲ့သို့ ဌာနေပြန်ကြလျှင် ဌာနမှ သင့်တော်သည့်ယာဉ်များ စီစဉ်ပေးခြင်းဖြင့် အရင်အစိုးရက ဒီလို၊ တို့အစိုးရက ဒီလိုဟု အမှတ်တောင်ယူ၍ ရနိုင်သေးဟု အတွေးရောက်မိသည်။
ဝန်ထမ်းများအတွက် ရက်ရှည်ကာလ အနားယူလိုလျှင်လည်းကောင်း၊ ကိုယ်ရေးကိုယ်တာ ဆောင်ရွက်လိုလျှင်လည်းကောင်း နိုင်ငံ့ဝန်ထမ်း ဥပဒေအရ ခံစားခွင့်ရှိသည့် ခွင့်ရက်ရှည်ယူနိုင်သည်ဟု အစိုးရအနေနှင့် ဆင်ခြေပေးကောင်း ပေးနိုင်ဖွယ် ရှိသည်။ ထိုသို့ဆိုလာလျှင် နိုင်ငံ့ဝန်ထမ်း နည်းဥပဒေတွင် တိတိကျကျ ဖော်ပြထားခြင်း မရှိသည့် နှစ်တစ်နှစ်ကုန်ဆုံးလျှင် လုပ်သက်ခွင့် စုဆောင်းထားသည်များ ပျက်ပြယ်သည်ဟု မှတ်ယူနေခြင်းကြောင့် မတ်လကုန်သည်အထိ နိုင်ငံ့ဝန်ထမ်း တစ်ယောက်တွင် လုပ်သက်ခွင့် မည်မျှပဲ ယူ၍ရသည်ကို ယနေ့ ဝန်ထမ်းအများစု သိရှိပြီးဖြစ်ပါသည်။ လုပ်သက်ခွင့် စုဆောင်းခွင့် နှစ်လအထိ ရရှိအောင် ပြင်ဆင်သွားမည်ဟု အစိုးရသစ်၏ ရက် ၁၀ဝ စီမံကိန်းတွင် ဆိုထားသော်လည်း ယနေ့ထိ အမိန့် တစ်စုံတစ်ရာ မထွက်ရှိသေးဘဲ ကြန့်ကြာနေသည်မှာ အစိုးရသစ်အနေနှင့် နိုင်ငံ့ဝန်ထမ်းများ အကျိုးခံစားမှုအပေါ် အာရုံစိုက်မှု နည်းသည်ဟု သုံးသပ်မိသည်။
တစ်ခါ နည်းဥပဒေ ၈၀ တွင် “ဝန်ထမ်းတစ်ဦး၏ ပြက္ခဒိန်နှစ်အတွင်း ခွင့်စာရင်း၌ ကျန်ရှိသော လုပ်သက်ခွင့်ရက်များအတွက် ဆုကြေးအဖြစ် ပျမ်းမျှလစာဖြင့် ခံစားခွင့်ပြုရမည်”ဟု အတိအလင်း ဖွင့်ဆိုထားသည့် နိုင်ငံဝန်ထမ်းအတွက် အကျိုးခံစားခွင့်တစ်ရပ်ကို ယခင်အစိုးရရော၊ ယနေ့ အစိုးရရော ဆောင်ရွက်မပေးသည်ကို တွေ့ရသည်။ စာရင်းစစ်အဖွဲ့မှ စစ်ဆေးလျှင်လည်း ဝန်ထမ်းများ လုပ်သက်ခွင့်ယူလျှင် ယူသည့်ရက်ကို ပျမ်းမျှလစာဖြင့် ဖြတ်တောက်ပြီး ပေး မပေး၊ မပေးပါက ပြန်လည် ပေးသွင်းရန် ထောက်ပြမှုသာရှိပြီး ယင်းနည်းဥပဒေ ၈၀ အရ ဝန်ထမ်းများ ခံစားရမည့် အခွင့်အရေးကိုတော့ ပြည်ထောင်စု စာရင်းစစ်ချုပ် အဖွဲ့မှလည်း ထောက်ပြန်ရန် နှာစေးနေကြသည်။ ပြည်ထောင်စု ရာထူးဝန်မှ ဤကဲ့သို့ ပေးရန်မှာ လက်ရှိနိုင်ငံတော် ဘတ်ဂျက်အနေနှင့် အခက်အခဲရှိ၍ဟု ဆိုထားခြင်းကို ဝန်ထမ်းအများစုမှာ ဪ ... တို့အစိုးရ နှစ်တိုင်း လိုငွေပြနေရှာတာပဲဟု သိရှိနားလည်ပေးခဲ့သလို အစိုးရအနေနှင့်လည်း ဝန်ထမ်းများအား သက်သာချောင်ချိရေး မည်သည့်ဘက်မှ ပြုလုပ်ပေးမည်၊ ပျော်ရွှင်စေရေး မည်ကဲ့သို့ ဆောင်ရွက်ပေးမည်ကို ထည့်သွင်း စဉ်းစားပေးသင့်ပေသည်။
ထို့အပြင် ဦးသိန်းစိန် အစိုးရလက်ထက်က ထုတ်ပြန်ခဲ့သည့် စာတစ်စောင်ကိုလည်း ယနေ့အစိုးရ မှတ်မိကောင်း မှတ်မိအောင် ဖော်ပြလိုပေသည်။ အဘယ့်ကြောင့်ဆိုသော် ယနေ့ထိ ဤစာအပေါ် လွှမ်းမိုးပယ်ဖျက်သည့်စာ မတွေ့ရသေး၍ ယင်းစာသည် ယနေ့ချိန်အထိ သက်ဝင်နေဆဲ ဖြစ်သည်။ ၇.၁.၂၀၁၃ နေ့က ပြည်ထောင်စု အစိုးရအဖွဲ့ရုံးကပင် ထုတ်ပြန်ခဲ့သည့် ၅/၁၅၂ ဝန်ထမ်း/ အဖရ (၂၀၁၃) စာဖြစ်သည်။ ယင်းစာတွင် နိုင်ငံ့ဝန်ထမ်းများ အချိန်ပိုဆင်း ဆောင်ရွက်သည့်အခါ ဝန်ကြီးဌာနများ လိုက်နာဆောင်ရွက်ရန် အချက် ၈ ချက် ပါဝင်သည်။ ယင်းစာကို အကျဉ်းချုပ်ရသော် ဝန်ထမ်းများ အချိန်ပိုဆင်း ဆောင်ရွက်ရသည့်အခါ အချိန်ပို လုပ်အားခ ပေးရမည်ဟု ဖော်ပြသော်လည်း ယနေ့ နေပြည်တော် အပါအဝင် တိုင်းဒေသကြီး ပြည်နယ်များတွင် အချိန်ပိုဆင်း ဆောင်ရွက်သည့်ဝန်ထမ်းများ အချိန်ပိုကြေးဆိုသည်မှာ ဘာမှန်းပင် မသိလောက်အောင် ဖြစ်နေသည့် အခြေအနေတစ်ရပ်ကို သတိရမိစေရန် အစဖော်ပေးခြင်း ဖြစ်သည်။ စင်စစ် ဦးသိန်းစိန်အစိုးရလက်ထက်တွင် ဝန်ထမ်းများနှင့် ပြည်သူအများစုအပေါ် သိသာအောင် မပြောင်းလဲနိုင်ခဲ့သော်လည်း အထိုက်အလျောက် ဆောင်ရွက်ပေးခဲ့သည်များ ရှိခဲ့၏။ နေပြည်တော် ဝန်ထမ်းများအတွက် မြေနေရာ ချထားပေးခြင်း၊ လစာများ တစ်ကြိမ်ထက်မက တိုးပေးခဲ့ခြင်း၊ မိုဘိုင်းလ်ဖုန်း ဆင်းမ်ကတ်များ ဈေးနှုန်း လျှော့ချပေးခြင်း၊ မော်တော်ယာဉ်ဈေးနှုန်းများ ယခင်ကထက် သိသာစွာ လျော့ကျလာခြင်း စသည်များကိုကြည့်ခြင်းဖြင့် NLD အစိုးရအနေနှင့် ယင်းထက်ပို၍ စီမံဆောင်ရွက်မပေးနိုင်သည်ထားဦး ဒီအောက်တော့ စွမ်းဆောင်နိုင်မှု မကျစေချင်ပေ။
အစိုးရတိုင်း ပြောလေ့ရှိသည်မှာ ဝန်ထမ်းကောင်းမှ နိုင်ငံကောင်းမည်ဟု ဆိုပါသည်။ ဝန်ထမ်းကောင်းနိုင်ဖို့ရာမှာ အဓိက အခြေခံလစာ လုံလောက်မှု၊ လုပ်ငန်းခွင်အတွင်း ဝန်နှင့်အား မျှတစွာ ဆောင်ရွက်နိုင်မှု၊ ဘက်လိုက်မှု ကင်းသော ရာထူးတက်လမ်း ဖန်တီးပေးမှု၊ အနာဂတ် ရပ်တည်ရန် အာမခံချက် ကောင်းမွန်မှု၊ အထက်အောက် ဖိနှိပ်ခြင်း ကင်းရှင်းမှု စသည့်စသည့်အချက်များအား သက်ဆိုင်ရာ ထိပ်ပိုင်းတာဝန်ရှိသူများမှ အဂတိကင်းရှင်းစွာ ဆောင်ရွက်ပေးပြီးသကာလ ဝန်ထမ်းများအတွက် ဥပဒေအရသော်လည်းကောင်း၊ ညွှန်ကြားချက်အရသော်လည်းကောင်း ပေးထားသည့် အခွင့်အရေးကို အပြည့်အဝ ရရှိအောင် စဉ်ဆက်မပြတ် စောင့်ကြည့်ပြီး ဌာနအသီးသီးအား တွန်းအားပေးမှသာ ရိုးသားဖြောင့်မတ်သော အမိနိုင်ငံ ဝန်ထမ်းကောင်းများ ပေါ်ထွက်လာပြီး နိုင်ငံ၏ ပုံရိပ်သည်လည်း ကမ္ဘာ့အလယ် မျက်နှာပန်းလှ တင့်တယ်မည်ဖြစ်ပါကြောင်း။
ကိုစကားဝါ
The Voice
No comments:
Post a Comment