လာမည့် မန္တလေး သင်္ကြန်ကာလတွင် ရုပ်ရှင် မင်းသားကြီး ကျော်သူ ဦးဆောင်ကာ ပရဟိတလူမှု ကူညီရေး အဖွဲ့များကို စုစည်းပြီး သင်္ကြန် သံချပ်အဖွဲ့ ထွက်မည် ဖြစ်ကြောင်း သာသနာ့ ပါလ ပရဟိတ လူမှု ကူညီရေး အသင်းမှ ဒုတိယ ဥက္ကဋ္ဌ ကိုဇော်သီဟက ပြောသည်။
မန္တလေးမြို့မှ ပရဟိတ အဖွဲ့ ၁ဝ ဖွဲ့ကျော်ကို စုစည်းကာ သင်္ကြန်ရက် များတွင် မြို့တွင်း၌ လှည့်လည် ဖျော်ဖြေ သွားမည် ဖြစ်ပြီး ယခုအခါ သံချပ် စာသားများနှင့် သီချင်းများကို စတင် လေ့ကျင့်နေပြီ ဖြစ်ကြောင်း ကိုဇော်သီဟ က ပြောသည်။
''ကျော်သူကွန်ရက် အနေနဲ့ ဒါပထမဆုံး လုပ်တာပါ။ သံချပ်လည်း စတိုက် နေပါပြီ။ ဦးကျော်သူ ကိုယ်တိုင် ကျွန်တော်တို့ သံချပ် အဖွဲ့တွေနဲ့ လိုက်ပါမယ်။ သံချပ် အဖွဲ့ကို ဖိတ်ချင်တဲ့ သူတွေလည်း ဖိတ်နိုင်အောင် လက်ကမ်း စာရွက်တွေ ဝေဖို့ စီစဉ်ထားပါတယ်။ ရတဲ့ အလှူ ငွေတွေကို ကျော်သူ ပရဟိတ ကွန်ရက်ရဲ့ လူမှု ကူညီရေး လုပ်ငန်းတွေမှာ အသုံးပြု သွားမှာပါ'' ဟု ကိုဇော်သီဟ က မတ် ၂၂ ရက်တွင် ပြောသည်။
လက်ရှိတွင် သံချပ် နှစ်ပုဒ်နှင့် သီချင်း သုံးပုဒ်ကို ဇာတ်တိုက် လေ့ကျင့်နေပြီး သံချပ်အဖွဲ့ကို 'ချိတ်' ဟု အမည် ပေးထားကြောင်း ပြောသည်။
''ကျွန်တော်တို့က အတွေ့အကြုံ မရှိသေးတဲ့ သူတွေ ဆိုပေမဲ့ လက်ရှိ ဇာတ်တိုက်နေတဲ့ အနေအထား အရ ဒီလောက် လုပ်နိုင်တာကို ကျေနပ်ပါတယ်။ သံချပ်လှည့်ဖို့ ကားတွေ၊ လိုအပ်တဲ့ စက်ပိုင်း ဆိုင်ရာတွေ အတွက် ချိတ်ဆက် ပြီးပါပြီ'' ဟု ကိုဇော်သီဟ က ပြောသည်။
ရွှေဥယျာဉ် လူရိုင်းလေးများ ပရဟိတ အဖွဲ့မှ တာဝန်ခံ ဦးမြင့်အောင် က သံချပ် စာသားများ ခွင့်ပြုရေး အတွက် ယခုလကုန်တွင် စည်ပင်သာယာမှ တာဝန်ရှိသူများ ထံသို့ တင်ပြမည် ဖြစ်ကြောင်း၊ သင်္ကြန် အကြိုနေ့ အပါအဝင် သင်္ကြန်လေးရက် လှည့်လည် ဖျော်ဖြေသွားမည် ဖြစ်ကြောင်း မတ် ၂၂ ရက်တွင် ပြောသည်။( မြန်မာတိုမ်း )
No comments:
Post a Comment