ရန်ကုန်၊ မန္တလေး၊ မကွေး၊ ပဲခူး၊ ကရင်၊ မွန် နဲ့ ဧရာဝတီ စတဲ့ တိုင်းဒေသကြီးနဲ့ ပြည်နယ်တွေက ထောင်နဲ့ချီတဲ့ အလုပ်သမားတွေဟာ နှစ်စဉ် သင်္ကြန်နှစ်သစ်ကူးပိတ်ရက် ၁ဝ ရက် ရရှိရေး အတွက် ရန်ကုန်မြို့ မြို့တော်ခန်းမရှေ့မှာ ဒီနေ့ ဆန္ဒပြတောင်းဆိုကြပါတယ်။
အရင်အတိုင်း လုပ်ခလစာအပြည်နဲ့ ပိတ်ရက် ၁ဝ ရက်ရရှိဖို့ ဆန္ဒပြတာ ဖြစ်တယ်လို့ ဆန္ဒပြပွဲ ဦးဆောင်စီစဉ်သူ မြန်မာနိုင်ငံလုံးဆိုင်ရာ အလုပ်သမားသမဂ္ဂများ အဖွဲ့ချုပ် က ကိုမင်းမင်းလတ် က ပြောပါတယ်။
" နှစ်စဉ်ဆက်တိုက်ပေါ့ သင်္ကြန်နှစ်သစ်ကူးပိတ်ရက်ပေါ့၊ ယခင်အတိုင်း လုပ်ခလစာအပြည့်နဲ့ ပိတ်ရက်ကို ၁၀ ရက်ရရှိရေး၊ အဲဒါကို ကျနော်တို့ တောင်းတယ်၊ အခုနှစ်ကစပြီး နောင်နှစ်တွေရော ဆက်တိုက် ၁၀ ရက်ကို ပြန်ပေးဖို့ဥစ္စာ တစ်ချက်တောင်းတယ်၊ မြို့တော်ခန်းမရှေ့မှာပဲ ကျနော်တို့ စုရပ်လုပ်ပြီး ဆန္ဒပြတာပါ"
စက်မှုဇုန်က အလုပ်သမားတွေကို ဒီနှစ် သင်္ကြန်ပိတ်ရက်ကို အရင်အတိုင်း ၁၀ ရက် ပိတ်ပေးမှာဖြစ်ပေမယ့် ၅ ရက်စာကို အလုပ်အစားပြန်ဆင်းပေးတာ၊ ခွင့်ရက်တွေနဲ့ ချေတာ၊ အချိန်ပိုဆင်းပေးတာ၊ လစာမဲ့ခွင့်ပေးတာ စတာတွေကို သက်ဆိုင်ရာအလုပ်ရှင်တွေနဲ့ ညှိနှိုင်းပြီး လုပ်ပေးရမှာဖြစ်ပါတယ်။
ဒါကြောင့် အလုပ်သမားတွေက ပုံမှန်အတိုင်း ပိတ်ရက် ၁၀ ရက် အပြည့်အ၀ ခံစားခွင့်ရရှိဖို့ တောင်းဆိုကြတာဖြစ်ပါတယ်။
ဒါ့အပြင် နှစ်စဉ်ဆက်တိုက် သင်္ကြန်နှစ်သစ်ကူးရုံးပိတ်ရက် ၁၀ ရက်ပြန်လည်ရရှိရေးအတွက် အလုပ်သမား ၆ ထောင်လောက်က စုပေါင်းလက်မှတ်ရေးထိုး တောင်းဆိုထားတဲ့စာကို နိုင်ငံတော်သမ္မတရုံးထံ ပေးပို့သွားဖို့ စီစဉ်နေတယ်လို့ သိရပါတယ်။
နှစ်သစ်ကူးရုံးပိတ်ရက်ရှည်တာဟာ နိုင်ငံတကာနဲ့ ဆက်သွယ်ဆောင်ရွက်ရာမှာ အခက်အခဲ ဖြစ်ပေါ်စေပြီး ကုန်စည်စီးဆင်းမှု ကြန့်ကြာစေတာကြောင့် ပိတ်ရက်ကို ၅ ရက်အဖြစ် လျှော့ချသတ်မှတ်ဖို့ ပြည်ထောင်စုအစိုးရအဖွဲ က ပြီးခဲ့တဲ့မတ်လ ၁၀ ရက်နေ့မှာ ကြေညာချက်ထုတ်ပြန်ခဲ့တာဖြစ်ပါတယ်။
ဒီနေ့ ဆန္ဒပြရာမှာ အလုပ်သမားရေးရာကိစ္စတွေ ဆုံးဖြတ်တဲ့အခါ အလုပ်သမားသမဂ္ဂအဖွဲ့ချုပ်နဲ့ ဆွေးနွေး ညှိနှိုင်းကြဖို့၊ ပြည်တွင်း ရွှေ့ပြောင်းအလုပ်သမားတွေ သင်္ကြန်ပိတ်ရက်တွေမှာ နေရပ်ပြန်နိုင်ဖို့၊ အလုပ်သမားရေးရာမူဝါဒ ရေးဆွဲရာမှာ အလုပ်သမားတွေ ပါဝင်ရေးဆွဲနိုင်ဖို့နဲ့ အလုပ်သမားတွေရဲ့ဘ၀ မြှင့်တင်ပေးဖို့ တို့ကိုလည်း တောင်းဆိုခဲ့ကြပါတယ်။
Photo: Ctum Myanmar/ Facebook
No comments:
Post a Comment