မဲရုံသို့ မျက်မမြင်များ ကိုယ်တိုင်သွားရောက်မဲပေးနိုင်ရေး လုပ်ဆောင်ထားမှုကို အမေရိကန်သံအမတ်ကြီး မာစီရယ်က ချီးကျူးပြောကြားလိုက်သည်။
ရန်ကုန်တိုင်း အမျိုးသားလွှတ်တော်မဲဆန္ဒနယ်အမှတ်(၆) တွင်ပါဝင်သော ကြီးမြင့်တိုင်မြို့နယ်ရှိ ကြည့်မြင်တိုင်မျက်မမြင်ကျောင်းဝင်းအတွင်း၌ ကျင်းပသော မဲရုံသို့ သံအမတ်ကြီး လာရောက်လေ့လာပြီးနောက် ယခုကဲ့သို့ ချီးကျူးပြောကြားလိုက်ခြင်းဖြစ်သည်။
" အခုလေ့လာမိသလောက် လာကြည့်ရတဲ့အထဲမှာ လုပ်ပေးထားတာတွေ အားလုံးကို အထင်ကြီး လေးစားမိပါတယ်။ မြန်မာနိုင်ငံမှာ မဲပေးတဲ့ လူတွေထဲမှာ အခုလို မသန်စွမ်းတွေကအစ မဲပေးနိုင်အောင် သေချာလေးစီစဉ်ထားတာတွေ့ရတဲ့အတွက် အဲဒီလိုလုပ်နိုင်အောင် အလုပ်တွေ အများကြီးလုပ်ထားတာ မြင်ရလို့လည်း ကျေနပ်ဝမ်းမြောက်မိပါတယ်" ဟု သံအမတ်ကြီးက မီဒီယာများ ဘာသာပြန်မှ တစ်ဆင့် ပြောကြားသည်။
မြန်မာနိုင်ငံသားများ ဒီမိုကရေစီ၏ အနှစ်သာရဖြစ်သော မဲပေးခြင်း ပြုလုပ်နေကြသည်ကို မြင်ရ၍ စိတ်ချမ်းသာကြောင်းနှင့် မြန်မာနိုင်ငံတွင် ရွေးကောက်ပွဲများ ဖြစ်ပေါ်လာရေးအတွက် ဘက်ပေါင်းစုံက လုပ်ဆောင်နေသူများအား အပြည့်အ၀ ထောက်ခံအားပေးမှု ဆက်လုပ်ဖော်ပြသွားမည်ဟု ၄င်းကဆိုသည်။
"ဒီရွေးကောက်ပွဲက တရားမျှတမှု ရှိမရှိ ဆုံးဖြတ်ဖို့က မဲပေးတဲ့သူတွေရဲ့ တာဝန်ဖြစ်ပါတယ်။ သူတို့ မဲပေးရတာ လွတ်လပ်မှုရှိမရှိကို သူတို့ကိုယ်တိုင်ပဲ ဆုံးဖြတ်ကြပါတယ်" ဟု သံအမတ်ကြီးက ပြောသည်။
ယခုကြားဖြတ်ရွေးကောက်ပွဲတွင် ကြည့်မြင်တိုင်မျက်မမြင်ကျောင်းရှိ မျက်မမြင် ၈၀ ကျော် ၄င်းတို့ကိုယ်တိုင် မဲပေးခဲ့ကြသည်။
"မျက်မမြင်တွေ သူတို့ကိုယ်တိုင်မဲပေးနိုင်အောင် တန်းပလိတ်လေးတွေ စီစဉ်ထားပါတယ်။ သူတို့ရဲ့ သင်္ကေတနဲ့ ဖောက်ပေးထားပါတယ် မဲပေးတဲ့အခါမှာ သူတို့ကိုယ်တိုင် စမ်းပြီးတော့ သူတို့ ပေးချင်တဲ့ ပါတီကို ပေးလုိ့ရအောင် ပါ" ဟု ကြည့်မြင်တိုင်မျက်မမြင်ကျောင်း ကျောင်းအုပ်ဆရာမ ဒေါ်စုစုမာက ပြောသည်။
အသက် ၁၉ နှစ်အရွယ် မျက်မမြင်ကျောင်းသူ မငြိမ်းချမ်းမေက " အခုလို မဲပေးတဲ့နေရာမှာ ပါဝင်ရတဲ့ ၀မ်းသာပါတယ်။ ပထမဆုံးအတွေ့အကြုံဆိုတော့ စိတ်လှုပ်ရှားတယ်။ မဲမပေးခင် တစ်ရက်ကြိုပြီးတော့ လေ့ကျင့်ပေးပါတယ်။ မဲပေးတဲ့နေရာမှာ အခက်အခဲမရှိအောင် ဘယ်လိုမျိုးသွားရမယ် ဘယ်လိုမဲပေးရမယ်ဆိုတာမျိုး စနစ်တကျ သင်ကြားပေးပါတယ်။ အဲဒါကြောင့် မဲပေးတာ အခက်အခဲမရှိပါဘူး။ လွတ်လွတ်လပ်လပ် ကိုယ်ပေးချင်တဲ့ သူကို မဲပေးခွင့်ရတဲ့အတွက် ၀မ်းသာတယ်။ အရင်ကတည်းက သတင်းတွေ နားထောင်ထားတယ်။ သတင်းတွေနားထောင်ပြီးတော့ ဘယ်သူ့ကို ပေးရင်အဆင်ပြေမလဲဆိုတာ ကိုယ့်ဟာကို စဉ်းစားပြီး ရွေးချယ်ခဲ့တာပါရှင့်" ဟု ပြောသည်။
သတင်း - ငြိမ်းချမ်း၊ အောင်ဇော်ထွန်း
ဓာတ်ပုံ - ငြိမ်းချမ်း( 7Day News )
No comments:
Post a Comment