Latest News

Monday, February 27, 2017

မန္တလေးမြို့ အောင်မြေသာစံမြို့နယ်တွင် တပ်မတော်မှ ဗိုလ်ကြီးတစ်ဦး ဆွဲကြိုးချသေဆုံးမှု ဖြစ်ပွား

မန္တလေးမြို့ အောင်မြေသာစံမြို့နယ်တွင် တပ်မတော်မှ ဗိုလ်ကြီးတစ်ဦး ဆွဲကြိုးချသေဆုံးမှု ဖြစ်ပွား



တပ်မတော်မှ ဗိုလ်ကြီးတစ်ဦးဖြစ်သူ နေအိမ်တွင် ဆွဲကြိုးချသေဆုံးမှုတစ်ခု မန္တလေးမြို့ အောင်မြေသာစံမြို့နယ် အနှိပ်တော် ရပ်ကွက်၌ ဖေဖော်ဝါရီ ၂၆ ရက်က ဖြစ်ပွားခဲ့ကြောင်း တိုင်းရဲတပ်ဖွဲ့မှူးရုံးမှ သတင်းရရှိ သည်။

ဖြစ်စဉ်မှာ ဆွဲကြိုးချသေဆုံးကြောင်း သတင်းအရ သက်ဆိုင်ရာ ရဲတပ်ဖွဲ့က သွားရောက်စစ်ဆေးရာ အောင်မြေသာစံမြို့နယ် အနှိပ်တော်ရပ်ကွက် အကွက် (၂) တွင် အမျိုးသားတစ်ဦးသည် နေအိမ်အပေါ်ထပ် အိပ်ခန်းအတွင်း ထုပ်တန်း၌ ပုဆိုးဖြင့် ဆွဲကြိုးချ သေဆုံးနေခြင်း ဖြစ်သည်ဟု သိရသည်။

စစ်ဆေးချက်အရ သေဆုံးသူသည် ကြည်း-၆၃၃၁၉ ဗိုလ်ကြီးမိုးကျော် (ခမရ-၅၇၆၊ ကျိုင်းတောင်း၊ ရှမ်း/တောင်) (၃၃နှစ်)ဖြစ်ပြီး ၎င်းသည် မိဘဖြစ်သူ၏ နေအိမ်သို့ ပြန်ရောက်နေသည်မှာ ၁၅ ရက်ခန့် ရှိပြီဖြစ်ကြောင်း၊ လက်နက်ခဲယမ်း ဆက်စပ်ပစ္စည်းများကို ပင်မစစ်လက်နက်ပစ္စည်းတပ်တွင် အပ်ရန် တာဝန်ဖြင့် စေလွှတ်ထားသူ ဖြစ်ကြောင်း၊ ဖေဖော်ဝါရီ ၂၅ ရက်က ဆက်စပ်ပစ္စည်းအပ်ရန် ပြင်ဦးလွင်သို့ ဆိုင်ကယ်ဖြင့် ထွက်ခွာသွားပြီး ည ၁၀ နာရီခန့်တွင် အိမ်သို့ပြန်ရောက်ခဲ့ကြောင်း၊ ဖေဖော်ဝါရီ ၂၆ ရက် မွန်းလွဲ ၂ နာရီ တွင် နေအိမ်ထုပ်တန်းတွင် ဆွဲကြိုးချ သေဆုံးနေသည်ကို တွေ့ရခြင်းဖြစ်ကြောင်း ရဲမှတ်တမ်းတွင် ဖော်ပြထားသည်။

အဆိုပါဖြစ်စဉ်နှင့် ပတ်သက်၍ အောင်မြေသာစံမြို့နယ် အမှတ် (၁) နယ်မြေရဲစခန်းသို့ မေးမြန်းခဲ့ရာ စခန်းမှူး ရဲအုပ်နေလင်းကိုကိုက “ဆွဲကြိုးချသေဆုံးမှုကို ဓမ္မတာအတိုင်း ဟုတ်၊ မဟုတ် စစ်ဆေးနေပါတယ်။ လတ်တလော သူ့မိသားစုကို စစ်ဆေးရသလောက် သတ်သေလောက်တဲ့ လူမှုရေးပြဿနာ ဘာမှမရှိဘူး။ သူကလည်း လူလွတ်တစ်ယောက်ပါ။ တခြားသူ တစ်ယောက်ပဲသိတဲ့ စိတ်ခံစားချက် ရှိရင်တော့ မသိဘူး။ လုပ်ငန်းခွင် ပြဿနာ ရှိ၊ မရှိကတော့ ကျွန်တော်တို့အနေနဲ့ သူ့တပ်ကို လှမ်းမေးဖို့ အလှမ်းမမီပါဘူး။ ကျွန်တော်တို့ ရဲတပ်ဖွဲ့စစ်ဆေးလို့ ရသလောက်က ဒါပဲရှိပါတယ်” ဟု ပြောကြားသည်။

အဆိုပါ ဆွဲကြိုးချသေဆုံးသည့် တပ်မတော်အရာရှိ နေအိမ်မှ ၎င်းကိုင်ဆောင်သည့် ပစ္စည်းများကို တပ်မတော်မှ သိမ်းဆည်းသွားခဲ့ပြီး အလောင်းကို ဆေးရုံကြီးသို့ပို့ကာ အမှတ် (၁)နယ်မြေစခန်းတွင် သေမှုသေခင်း အမှတ်စဉ် (၃/၂၀၁၇) ဖြင့် စစ်ဆေးလျက်ရှိကြောင်း သိရသည်။                                  


ယဉ်မျိုးသွယ်



Eleven Media Group

No comments:

Post a Comment