Latest News

Thursday, March 29, 2018

နိုင်ငံတော်သမ္မတဦးဝင်းမြင့် ​ပြောကြားသည့်​ မိန့်​ခွန်း အပြည့်​အစုံ

နိုင်ငံတော်သမ္မတဦးဝင်းမြင့် ​ပြောကြားသည့်​ မိန့်​ခွန်း အပြည့်​အစုံ

နိုင်ငံတော်သမ္မတအဖြစ်ရွေးချယ်တင်မြှောက်ပေးကြတဲ့ ပြည်ထောင်စုလွှတ်တ်ာကိုယ်စားလှယ်များနဲ့ ဝိုင်းဝန်းအားပေးကြတဲ့ မိဘပြည်သူများအားလည်းကောင်း ပြည်ထောင်စုလွှတ်တော်ကြီးမှာ နိုင်ငံတော်သမ္မတအဖြစ် ကတိသစ္စာပြုခဲ့ရပြီးနောက် အခုလို မိန့်ခွန်းပြောကြားခွင့်ရတဲ့အတွက်လည်းကောင်း ကျေးဇူးဥပကာရအထူးတင်ရှိပါကြောင်း ဦးစွာပထမပြောကြားလိုပါတယ်။

ပြည်ထောင်စုမြန်မာနိုင်ငံတော်နိုင်ငံသူ၊နိုင်ငံသားများခင်ဗျာ

နိုင်ငံတော်၏အတိုင်ပင်ခံပုဂ္ဂိုလ်နှင့် အမျိုးသားဒီမိုကရေစီအဖွဲ့ချုပ်အပေါ် ယုံကြည်စွာနဲ့ ထောက်ခံမှုပေးအပ်ခဲ့ကြတဲ့ နိုင်ငံတဝန်းလုံးက ပြည်သူတွေအားလုံးကို အလေးအမြတ်ပြုလျှက် ကျွန်တော့်အနေနဲ့ ထမ်းဆောင်ရမယ့် တာဝန်တွေကို တော်တည့်မှန်ကန်လေးနက်တည်ကြည်စွာနဲ့ ထမ်းရွက်သွားမှာ ဖြစ်ပါတယ်။ ဒီကနေ့ကျွန်တော်တို့နိုင်ငံဟာ အဘက်ဘက်မှာလိုအပ်ချက်တွေ ဆင်းရဲနွမ်းပါးဆဲ ဖြစ်တာကြောင့် နေရာကဏ္ဍအသီးသီးမှာ အများကြီးဆက်လက်ရုန်းကန်ကြိုးပမ်းကြရဦးမှာ ဖြစ်ပါတယ်။

နိုင်ငံတကာမျက်နှာစာမှာလည်း ဖိအားပေးမှုတွေ၊ ဝေဖန်မှုတွေနဲ့ အထင်အမြင်လွဲမှားနေတာတွေလည်း ရင်ဆိုင်နေရပါတယ်။ ကျွန်တော်တို့နိုင်ငံနဲ့ ကျွန်တော်တို့ပြည်သူတွေ ဒီကနေ့တွေ့ကြုံရင်ဆိုင်နေရတဲ့ စိန်ခေါ်မှုတွေ၊ အခက်အခဲတွေကလည်း မနည်းလှပါဘူး။ အရာရာတိုင်းကို လွယ်လင့်တကူဖြေရှင်းနိုင်မှာ မဟုတ်ပေမယ့်လည်း ကျွန်တော့်အနေနဲ့ အစွမ်းကုန်ကြိုးပမ်းအားထုတ်ပြီး ဦးစားပေးကဏ္ဍအလိုက် ဖြေရှင်းဆောင်ရွက်သွားမှာ ဖြစ်ပါတယ်။

နိုင်ငံသူ၊ နိုင်ငံသားများခင်ဗျား ကျွန်တော့အနေနဲ့ ပြည်ထောင်စုအစိုးရအဖွဲ့ရဲ့ ဦးစားပေးရည်မှန်းချက်ပန်းတိုင်တွေ ဖြစ်တဲ့ ၁။ တရားဥပဒေစိုးမိုးရေးနဲ့ ပြည်သူများရဲ့ လူမှုစီးပွားဘဝတိုးတက်မြင့်မားရေး ၊ ၂။ အမျိုးသားပြန်လည်သင့်မြတ်ရေးနဲ့ ပြည်တွင်းငြိမ်းချမ်းရေး ၊ ၃။ ဒီမိုကရေစီဖက်ဒရယ်ပြည်ထောင်စုကြီးတည်ဆောက်ရေးအတွက် အခြေခံအုတ်မြစ်ဖြစ်တဲ့ ဖွဲ့စည်းပုံအခြေခံဥပဒေပြင်ဆင်ရေးတို့ကို ဦးတည်ကြိုးပမ်းဆောင်ရွက်သွားမှာ ဖြစ်ပါတယ်။

ဒါ့အပြင် ဒီနေ့ဒီအချိန်ခါဟာ ဒီမိုကရေစီကျင့်စဉ်နဲ့အညီ ခေတ်ပြောင်း၊စနစ်ပြောင်းကာလဖြစ်ပါတယ်။ ဒီမိုကရေစီအသွင်ကူးပြောင်းရေးကာလရဲ့ အစပဲရှိပါသေးတယ် ။ ဒီပြောင်းလဲမှု ဖြစ်စဉ်ကြီး  အောင်မြင်ချောမွေ့ စေရန် ပြည်သူပြည်သားများနဲ့ နိုင်ငံဝန်ထမ်းများ ၊ ပြည်သူ့ဝန်ထမ်းများအားလုံးရဲ့ ပုံစံကျနေတဲ့ အတွေးအမြင်တွေ ၊ ပုံသေကားချပ် အလေ့အထတွေအားလုံးကို ပြုပြင်ပြောင်းလဲပေးကြရန် အထူးလိုအပ်ပါတယ် ။

ပြုပြင်ပြောင်းလဲမှု နှောင့်နှေးနေတဲ့ ဌာနဆိုင်ရာအဖွဲ့အစည်းများကို ကြပ်မတ်ရပါလိမ့်မယ် ။ ယိမ်းယိုင်နေတဲ့ တရားစီရင်ရေးကို တည့်မတ်ရပါလိမ့်မယ် ။ အဂတိလိုက်စားမှုကို ပိုမို တိုက်ဖျက်ရပါလိမ့်မယ် ။ လူ့အခွင့်အရေးချိုးဖောက်ခံရခြင်းများကို မြှင့်တင်ကာကွယ်ရပါလိမ့်မယ် ။ မူးယစ်ဆေးဝါးကို ပိုမို နှိမ်နင်းရပါလိမ့်မယ် ။

 ပြည်သူ့ဘဏ္ဍာငွေများအလေအလွင့်ဆုံးရှုံးမှု မရှိစေရန် စီမံခန့်ခွဲရပါလိမ့်မယ် ။ ဥပဒေမဲ့ သိမ်းဆည်းခံခဲ့ရတဲ့ လယ်ယာမြေများပြန်လည်ရရှိရေး ၊လျော်ကြေး နစ်နာကြေးရရှိရေးတို့ကို ဥပဒေနဲ့အညီ ဆောင်ရွက်ရပါလိမ့်မယ် ။ တောင်သူလယ်သမားများရဲ့ လူနေမှု ဘဝမြင့်မားတိုးတက်ရေး၊ အလုပ်သမားများရဲ့ ဘဝသာယာစိုပြေရေး ၊ ကျောင်းသားလူငယ်များ အဆင့်မြင့်ပညာရပ်များ ဆည်းပူးခွင့်ရရှိရေးစသည်တို့ကို ဖော်ဆောင်ရပါလိမ့်မယ် ။

နိုင်ငံသူ ၊  နိုင်ငံသားများခင်ဗျာ

ကျွန်တော်တို့အနေနဲ့ အခြေခံဥပဒေအရ အပ်နှင်းထားတဲ့အခွင့်အာဏာကို တတ်နိုင်သမျှ ပိုင်းခြားကျင့်သုံးနေကြတဲ့ မဏ္ဍိုင်ကြီးသုံးရပ်အကြားမှာ အပြန်အလှန်လေးစားမှု ၊ အပြန်အလှန်နားလည်မှု ၊ အပြန်အလှန်ယုံကြည်မှုတွေနဲ့ ပြည်သူ့တွေအကျိုးအတွက် ပူးပေါင်းဆောင်ရွက်သွားကြဖို့ တိုက်တွန်းပြော ကြားလိုပါတယ်။

ဒါအပြင် ပြည်သူတွေရဲ့နားတွေ ၊မျက်စိတွေဖြစ်တဲ့ သတင်းမီဒီယာတွေရဲ့အခန်းကဏ္ဍကို အလေးအနက်ထားကြဖို့ ကျွန်တော်တို့ အလုပ်အကျွေးပြုရမယ့် နိုင်ငံသူ ၊ နိုင်ငံသားတွေရဲ့ ပြည်သူ့ မဏ္ဍိုင်ကိုအလေးအမြတ်ပြုကြဖို့ တဆက်တည်းမှာပဲ တိုက်တွန်းပြောကြားလိုပါတယ်။

ကျွန်တော်တို့ရဲ့ နိုင်ငံသူ၊နိုင်ငံသားတွေ မျှော်လင့်တောင့်တနေတဲ့ လိုအင်ဆန္ဒတွေကိုအတတ်နိုင်ဆုံးဖြည့် ဆည်းပေးနိုင်ဖို့ မဏ္ဍိုင်ကြီးတွေအလိုက် ကျွန်တော်တို့ အားလုံး ဆထက်တပိုး ကြိုးပမ်းကြရဦးမှာဖြစ်ပါတယ်။

အလားတူ နိုင်ငံတကာ အသိုင်းအဝိုင်းရဲ့အလယ်မှာ ကျွန်တော်တို့နိုင်ငံရဲ့ပုံရိပ် ပြန်လည်တောက်ပမြင့်မားလာ အောင် ကျွန်တော်တို့နိုင်ငံသူနိုင်ငံသားတွေရဲ့ ဂုဏ်သိက္ခာ ပို၍ ပို၍ မြင့်တက်လာအောင် ကျွန်တော်တို့အားလုံး  ဆက်လက်ပြီး ကြိုးစားကြရဦးမှာဖြစ်ပါတယ်။

ကျွန်တော်တို့ပြည်သူတွေအတွက် ဝန်ထုပ်ဝန်ပိုးဖြစ်စေတဲ့ ကြိုးနီစနစ်တွေ ကျွန်တော်တို့လု့အဖွဲ့အစည်း အတွင်း လှိုက်စားနေတဲ့ အဂတိလိုက်စားမှုတွေစနစ်တကျ တိုက်ဖျက်သွားကြဖို့ နောက်ပြီး ကျွန်တော်တို့ နိုင်ငံ သူ နိုင်ငံသားတွေရဲ့ စာရိတ္တမဏ္ဍိုင်ကို ခိုင်မာအောင်  ကြိုးပမ်းဆောင်ရွက်သွားကြရမှာဖြစ်ပါတယ်။

ကျွန်တော်တို့ရဲ့ ပြည်ထောင်စုအစိုးရအဖွဲ့အနေနဲ့ ကျွန်တော်တို့ တွေ့ကြုံခဲ့ရတဲ့ အတိတ်က အဖြစ်အပျက်တွေ ၊ ကျော်လွှားဖြတ်သန်းခဲ့ရတဲ့ အကျပ်အတည်းတွေ ၊ ရင်ဆိုင်ခဲ့ရတဲ့ အခက်အခဲတွေကို သင်ခန်စာယူပြီး ပစ္စုပ္ပန်နဲ့ အနာဂတ်အတွက် မိဘပြည်သူများလိုလားတောင့်တနေကြတဲ့ ဒီမိုကရေစီနဲ့ လူ့အခွင့်အရေးကို မျက်ခြေပြတ်မခံဘဲ အဂတိတရားကင်းရှင်းစွာနဲ့ ကိုယ်စွမ်းဥာဏ်စွမ်းရှိသရွှေ့ ကြိုးပမ်းဆောင်ရွက်သွားမှာဖြစ်ပါတယ်။

နိုင်ငံသူ ၊ နိုင်ငံသားများခင်ဗျာ

နိဂုံးချုပ်အနေနဲ့ ကျွန်တော်အနေနဲ့ ပြည်သူတွေ မြင်ချင်တွေ့ချင်တဲ့ အပြောင်းအလဲတွေကို မျက်ဝါးထင်ထင်တွေ့မြင်နိုင်အောင် ကျွန်တော်တို့ရဲ့ ပြည်သူတွေနဲ့အတူ မမှိတ်မသုန် ကြိုးပမ်းဆောင်ရွက်သွားမှာဖြစ်ကြောင်း အလေးအနက် ကတိပြု ပြောကြားရင်းနိဂုံးချုပ်အပ်ပါတယ်။

Than Win

No comments:

Post a Comment