ရွှေတိဂုံစေတီတော်မှ ဗိုလ်တထောင် ဘုရားအထိ လျှောက်လမ်းစနစ် ဖော်ဆောင်ရန် အဆိုပြုထားကြောင်း ရန်ကုန်မြို့ပြ အမွေအနှစ် ထိန်းသိမ်း စောင့်ရှောက်ရေးအဖွဲ့ (YHT) မီဒီယာပြန်ကြားရေး တာဝန်ခံ မနိုနိုအောင်ထံမှ သိရသည်။ ''လျှောက်လမ်းစနစ်ဆိုတာ အဓိကအားဖြင့် လမ်းလျှောက်သွားတဲ့သူတွေ၊ စက်ဘီးနဲ့ သွားတဲ့သူတွေ အဆင်ပြေအောင်လို့ပါ။ အဓိကက ရန်ကုန်မြို့မှာ စက်ဘီးသီးသန့်လမ်းမရှိဘူး။ နောက်ပြီး လူသွားဖို့ ပလက်ဖောင်းတွေကလည်း အဆင်မပြေဘူး။
ဒါကြောင့် လျှောက်လမ်းစနစ် ဖော်ဆောင်ဖို့ ရန်ကုန်တိုင်း ဒေသကြီး အစိုးရအဖွဲ့ကို အကြံပြုထားပါတယ်''ဟု မနိုနိုအောင်က ပြောသည်။ လျှောက်လမ်းစနစ်ကို ရွှေတိဂုံစေတီတော် (တောင်ဘက်မုခ်)မှ ရွှေတိဂုံဘုရားလမ်းအတိုင်း အလံပြဘုရား၊ အလံပြဘုရားမှ ဗိုလ်ရာညွန့်လမ်းနှင့် ယောမင်းကြီးလမ်း ပတ်ဝန်းကျင်၊ ထိုမှတစ်ဆင့် ဗိုလ်ချုပ်အောင်ဆန်းဈေးကိုဖြတ်ကာ ရွှေဘုံသာလမ်းတစ်လျှောက်၊၎င်းနောက် ဆူးလေဘုရား ဝန်းကျင်ရှိ ဗိသုကာလက်ရာများကို မဟာဗန္ဓုလပန်းခြံလမ်း၊ ဘဏ်လမ်း၊ ပန်းဆိုးတန်း အောက်လမ်း အတိုင်းကြည့်ရှုနိုင်ပြီး ကမ်းနားလမ်းအတိုင်း ဗိုလ်တထောင်ဘုရားအထိ သွားလာနိုင်ရန် လျာထားသည်။
ရန်ကုန်မြို့ပြ အမွေအနှစ် ထိန်းသိမ်း စောင့်ရှောက်ရေးအဖွဲ့အနေဖြင့် ၂ဝ၁၆ ခုနှစ်က ရန်ကုန်မြို့ပြအမွေအနှစ် မဟာဗျူဟာကို စတင်ရေးဆွဲခဲ့ပြီး ယင်းမဟာဗျူဟာ၌ ရန်ကုန်မြို့ပြကိစ္စရပ်များနှင့် ပတ်သက်၍ အကြံပြုလိုသည်များရှိပါက ပါဝင်အကြံပြုတင်ပြပေးရန် စီမံကိန်းစတင် ရေးဆွဲစဉ်မှစ၍ ထည့်သွင်းရေးဆွဲ ထားခဲ့ခြင်းဖြစ်သဖြင့် ယခုကဲ့သို့ လျှောက်လမ်းစနစ်ကိုလည်း ဖော်ဆောင်ရန် အဆိုပြု တင်ပြထားခြင်းဖြစ်ကြောင်း သိရသည်။
ယင်းလျှောက်လမ်းစနစ် ဖော်ဆောင်နိုင်ရန် အဆိုပြုထားခြင်းများနှင့် ပတ်သက်၍ ပိုမိုကောင်းမွန်အောင် လုပ်ဆောင်နိုင်မည့် အကြံပြုချက်များရှိပါက ပြည်သူများအနေဖြင့် ရန်ကုန်မြို့ပြ အမွေအနှစ် ထိန်းသိမ်း စောင့်ရှောက်ရေးအဖွဲ့သို့ ပေးပို့နိုင်ကြောင်း သိရသည်။(MWD)
No comments:
Post a Comment