Latest News

Saturday, January 27, 2018

နယူးယောက် တိုင်းမ် က ပြောသော မြန်မာ တပ်မတော်

နယူးယောက် တိုင်းမ် က ပြောသော မြန်မာ တပ်မတော်

မြန်မာ တပ်မတော်အား လွန်ခဲ့သော ၇၆ နှစ်က သွေးမြေအကျခံ၍ စတင် ဖွဲ့စည်းခဲ့သော်လည်း ယခုထက်တိုင် သွေးများက စီးကျနေဆဲ ဖြစ်သည်။

၁၉၄၁ တွင် ဘန်ကောက်တွင် ရဲဘော် သုံးကျိပ် ဟု အမည်ပေးထားသူ များ က ငွေဖလားတခုတွင် လက်မောင်းသွေး ဖေါက်၍ သစ္စာရေ အဖြစ် သောက်ခဲ့ကျရာမှ စတင် ပေါ်ပေါက်လာခဲ့သည်။

အဆိုပါ တပ်မတောကပင် ၁၉၄၈ တွင် မြန်မာ လွတ်လပ်ရေးကို အရယူပေးနိူင်ခဲ့သည်။ ယင်းနောက်ပိုင်း တိုတောင်းလှသော အချိန်ကလေးတွင်သာ ငြိမ်းချမ်းရေး အရသာ ကို ခံစားခဲ့ရပြီး နိူင်ငံတွင်းရှိ ပြည်သူများနှင့် စစ်မက် ဖြစ်ပွားလာခဲ့သည်မှာ နှစ်ပေါင်း ၇၀ ကြာညောင်းလာခဲ့ပြီ ဖြစ်သည်။

၁၉၆၂ တွင် တပ်မတော်ကပင် အရပ်သား အစိုးရဆီမှ အာဏာ သိမ်းယူခဲ့ပြန်သည်။ ၁၉၈၈ တွင် ၎င်းတို့ လက်ဝယ်ရရှိသော အာဏာကို ဆက်လက် ဆုပ်ကိုင်နိူင်ရန် ထောင်ပေါင်းများစွာ သော ပြည်သူများကို သတ်ဖြတ်ခဲ့ကြပြန်သည်။ ၂၀၀၇ တွင် လည်း အလားတူ ပေါ်ပေါက်လာခဲ့သော ရွှေဝါရောင် တော်လှန်ရေးကို ဆက်လက်နှိမ်နှင်းခဲ့ကြသည်။

တိုင်းရင်းသား လူနည်းစုများနှင့် စဉ်ဆက်မပြတ် တိုက်ခိုက်လာမှုများကြားတွင် လူပေါင်း သန်းနှင့်ချီ၍ အိုးအိမ်မဲ့ ဖြစ်ခဲ့ကြရသော်လည်း ၎င်းတို့အဖို့ကား ကျောက်စိမ်းတွင်းများ၊ ကျွန်းသစ်များနှင့် အခြား သယံဇာတ များမှ ၀င်ငွေ ဒေါ်လာ ဘီလီယံ နှင့် ချီပြီး ရရှိခဲ့ကြသည်။ ထို့အတွက် ၎င်းတို့၏ မဟာဗျုဟာသည် တိုင်းရင်းသား လက်နက်ကိုင်များကို ရှေ့ဆက်မတိုးနိူင်အောင် ဟန့်တားထားရေး၊ ပဋိပက္ခများကို အပြစ်အခတ် ရပ်စဲရေးဆိုသည်ဖြင့် စီမံ ထိမ်းချုပ်နိူင်ရေး နှင့် မိမိတို့ တပ်တွင်း အရာရှိများကို ချမ်းသာကြွယ်ဝအောင် ပြုလုပ်ပေးနိူင်ရေး တို့ ဖြစ်လာခဲ့သည်။

၎င်းတို့အဖို့ကား တိုင်းရင်းသားများ၏ ချစ်ကြည်ကိုးစားမှု ကို ရရှိရန် မည်သည့်အခါမျှ စိတ်မကူးခဲ့၊ နိူင်ငံသားများကို အကြောက်တရားဖြင့် ခေါင်းငုံ့နေစေရေးသာ ဖြစ်ပြီး ထိုရည်မှန်းချက်အတွက်လည်း မလုပ်နိူင်တာ မရှိသလောက်ဟု ခံယူထားကြောင်း ၀ါရှင်တန်ရှိ အမျိုးသား စစ်ကောလိပ်မှ ပါမောက္ခ ဇာကာရီ အဘူဇာ (Zachary Abuza) က ပြောပြခဲ့သည်။

တဖက်တွင် ပြည်သူများကို ကာကွယ်စောင့်ရှောက်သူများအဖြစ် ခံယူထားသော်လည်း မြန်မာပြည်သူများကို နှိပ်စက်ကလူ ပြုကျင့်ခဲ့ကြသည်မှာ ကာလကြာမြင့်စွာ ကတည်းက တည်ရှိလာခဲ့သည်။

ဆယ်စုနှစ်ပေါင်းများစွာ တိုင်းပြည်ကို ကမ္ဘာနှင့် အဆက်အသွယ် ဖြတ်ကာ အုပ်ချုပ်လာခဲ့ကြသော်လည်း ၂၀၁၁ တွင် အာဏာ ဆုပ်ကိုင်ထားမှုကို စတင်ဖြေလျော့ပေးလာခဲ့ကြသည်။ ရွေးကောက်ပွဲများ ကျင်းပပေးလာခဲ့ကြပြီး အရပ်သား ခေါင်းဆောင်များ လက်ဝယ်သို့ ၀န်ထမ်းများ အပေါ် အုပ်ချုပ်ခွင့်၊ နိူင်ငံခြားရေးရာများ နှင့် စီးပွားရေး မူဝါဒများကို စီမံခန့်ခွဲခွင့် များ အပေါ် အရပ်သား ခေါင်းဆောင်များ အား ပေးအပ်ခဲ့ကြသည်။ ယင်းနှင့်အတူ အင်တာနက် နှင့် ဆဲလူလာဖုန်း အား နိူင်ငံသားများ တွင်တွင်ကျယ်ကျယ် အသုံးပြုနိူင်ရန် ခွင့်ပြုလာခဲ့သည်။

စီးပွားရေးအား မနိူင်ရင်ကာ ရုန်းကန်နေရမှုမှ ပြန်လည် ရှင်သန်လာစေရန် ရည်ရွယ်လှုပ်ရှားခဲ့မှုနှင့်အတူ နိူင်ငံအား အပေါ်ယံ ရွှေမှုန်ကြဲ ဒီမိုကရေစီအား ပေးအပ်လာခဲ့ပြန်သဖြင့် အမေရိကန် ပြည်ထောင်စုနှင့် အီးယူတို့မှ စီးပွားရေး ပိတ်ဆို့မှုများ ဖယ်ရှားပေးခဲ့သည့်အထိ ဖြစ်လာခဲ့သည်။

သို့သော် ၂၀၀၈ တွင် ပြဌာန်းခဲ့သော ဖွဲ့စည်းပုံအရ တပ်မတော်သည် အရပ်ဖက် အုပ်ချုပ်မှုအောက်တွင် မရှိပဲ လွှတ်တော်အမတ်ဦးရေ၏ လေးပုံတပုံကို တပ်မတော်သား ကိုယ်စားလှယ်များအား တဖက်သတ် ခန့်အပ်နိူင်ခဲ့ပြီး အရေးပါသော ပြည်ထဲရေး နှင့် နယ်စပ်လုံခြုံရေး ၀န်ကြီးဌာနများအား ကာကွယ်ရေး ဦးစီးချုပ်၏ လက်အောက်တွင် ထားရှိခဲ့သည်။ တိုင်းရင်းသား လူနည်းစုများ အပေါ် ရက်စက်ကြမ်းကြုတ်စွာ ဆက်ဆံမှုများက ဆက်လက် ဖြစ်ပေါ်နေမြဲ ဖြစ်သည်။

တပ်မတော်သည် နောင်တတရား မရရှိပဲ ပြန်လည်တည်ဆောက်ခြင်းလည်း မရှိပဲ ၎င်းတို့၏ အူတိုင် အဖြစ် ကျင့်သုံးနေသော ရုန့်ရင်းကြမ်းတမ်းသော အပြုအမူများက ဆက်လက်ရှိနေဆဲ ဖြစ်သည်ဟု ရန်ကုန်ရှိ လေ့လာဆန်းစစ်ရေး သမား ဖြစ်သူ ဒေးဗစ် မက်သီဆန် (David Mathieson) က ဆိုသည်။

ရခိုင်ရှိ ရိုဟင်ဂျာ ဆိုသူများ အရေး ပေါ်ပေါက်လာခဲ့ပြီး အမေရိကန် ပြည်ထောင်စု နှင့် ကုလသမဂ္ဂ တို့မှ လူမျိုးရေး သန့်စင်မှု အဖြစ် ရှုတ်ချခဲ့ကြသည်။ လူ့အခွင့်အရေး အဖွဲ့များကလည်း အဆိုပါအရေးတွင် လူသားများ အပေါ် ကျုးလွန်ခဲ့သော ပြစ်မှုများ အတွက် တပ်မတော်အား စုံစမ်းစစ်ဆေးအရေးယူရန် ဟိတ်ဂ် ရှိ နိူင်ငံတကာ တရားရုံးအား တောင်းဆိုသည်အထိ ပြုလုပ်လာခဲ့ကြသည်။

စစ်တပ်နှင့် အစိုးရမှ အဆိုပါ အခင်းဖြစ်ဒေသအား လွတ်လပ်သော စုံစမ်းစစ်ဆေးရေး အဖွဲ့များနှင့် ကြားနေလေ့လာရေးသမား များအား လှည့်လည် ကြည့်ရှု့ခွင့်ပေးရန် ပိတ်ဆို့ခဲ့ကြသည်။ ဗိုလ်ချုပ်မှုးကြီး မင်းအောင်လှိုင်မှလည်း ဘင်္ဂါလီများအပေါ် မည်သည့်နည်းနှင့်မျှ ရက်စက်ကြမ်းကြုတ်စွာ ပြုမူခဲ့ခြင်း မရှိဟု လည်း ငြင်းဆိုသွားခဲ့သည်။

သို့သော် နောက်ပိုင်းတွင် ဖိအားများ တိုးမြှင့်လာမှုကို မလူးသာ မလွန့်သာ အခြေအနေများ ရင်ဆိုင်လာခဲ့ရသည့် လက္ခဏများ တွေ့လာခဲ့ရသည်။

သို့အတွက် ၎င်းတို့၏ လုံခြုံရေး တပ်ဖွဲ့ဝင် လေးဦးက ဘင်္ဂါလီ ဆယ်ဦး အား သတ်ဖြတ်ခဲ့ပြီး ကျင်းကြီးတခုတွင် မြုတ်နှံခဲ့သည်ဟု ယခုလအတွင်း ဗိုလ်ချုပ်ကြီး မင်းအောင်လှိုင်က ၀န်ခံခဲ့ကြရသည်။

ရခိုင်ပြည်နယ်အတွင်းရှိ စစ်ဆင်ရေးများကို ကြီးကြပ်ခဲ့ရသူ အနောက်ပိုင်းတိုင်း စစ်ဌာနချုပ် တိုင်းမှုး ဗိုလ်ချုပ် မောင်မောင်စိုး နှင့် နယ်ခြားစောင့်တပ်များ အကြီးအကဲ ဗိုလ်ချုပ် သူရစောလွင်အား အကြောင်းတစုံတရာ မပြပဲ ရာထူးများမှ ဖယ်ရှားခဲ့သည်။

ဝါရှင်တန်မှလည်း ဗိုလ်ချုပ် မောင်မောင်စိုး အား အမေရိကန်ပြည်ထောင်စုမှ စီးပွားရေးအရ ပိတ်ဆို့ အရေးယူခဲ့သည်။ ထို့အတွက် ရခိုင်ပြည်နယ် အကြမ်းဖက်မှု နှင့် ပါတ်သက်၍ အမေရိကန် ပြည်ထောင်စုမှ အရေးယူခံရသော မြန်မာပြည်မှ တဦးတည်းသော အရာရှိ ဖြစ်လာခဲ့ရသည်။

တပ်မတော်က တော့ ၎င်းတို့၏ အတိတ်သမိုင်းကို လွန်စွာ ဂုဏ်ယူလျက်ရှိပြီး နေပြည်တော်အနီးတွင် ပြတိုက်ကြီး တခု အဖြစ် ဂုဏ်ယူဝင့်ကြွားစွာ တည်ဆောက် ပြသထားခဲ့သည်။

ထိုပြတိုက်ကြီးထဲတွင် ရဲဘော်သုံးကျိပ် သစ္စာရေ သောက်ရာတွင် သုံးခဲ့သော ဆေးထိုးအပ် နှင့် ငွေဖလားကို ပြသထားခဲ့သည်။

ရဲဘော် သုံးကျိပ်၏ ခေါင်းဆောင် အဖြစ် အောင်ဆန်းကို တင်မြှောက်ခဲ့ကြပြီး နိူင်ငံ၏ လွတ်လပ်ရေး ဖခင်ကြီးအဖြစ် နောက်ပိုင်း ပေါ်ထွန်းလာခဲ့ရသည်။

လွတ်လပ်ရေး ရပြီး နောက်ပိုင်း ရဲဘော်သုံးကျိပ် အဖွဲ့ဝင်တဦး ဖြစ်သော ဗိုလ်ချုပ်နေ၀င်းမှ အာဏာ သိမ်းယူခဲ့ပြီး နောက်ပိုင်း စစ်အစိုးရက တိုင်းပြည်ကို အပြင်လောကနှင့် အဆက်အသွယ်ဖြတ်ကာ နိူင်ငံရေး အတိုက်အခံများအား အကျဉ်းချခြင်း၊ တက္ကသိုလ်များအား ဖွင့်လိုက်ပိတ်လိုက် ဖြင့် ထားရှိခဲ့ပြီး လူထုကိုလည်း အင်တာနက် သုံးစွဲခွင့်ကို ပိတ်ပင်ထားခဲ့ကြသည်။ အတိုက်အခံများကို ဦးဆောင်ခဲ့သူ ငြိမ်းချမ်းရေး နိူဘဲလ်ဆုရှင် ဒေါ်အောင်ဆန်းစုကြည်အား ဆယ့်ငါးနှစ်ခန့် အကျယ်ချုပ် ဖြင့် ဖမ်းဆီး ထိမ်းသိမ်းထားခဲ့ကြသည်။

တပ်မတော်မှ ခေါင်းဆောင်များနှင့် ပတ်သက်၍ ပုဂ္ဂိုလ်ရေး ဆည်းကပ်ကိုးကွယ်မှု ဖြစ်ပေါ်အောင် ကြိုးပမ်းခဲ့ခြင်း မရှိသေးသော်လည်း တပ်မတော်အား သီးခြားရပိတည်သော အဖွဲ့အစည်း အဖြစ် ရပ်တည်နိူင်ရန် ဖန်တီးခဲ့ပြီး ကိုယ်ပိုင် တက္ကသိုလ်များ၊ ဆေးရုံများ၊ ကိုယ်ပိုင် တရားစီရင်ရေး စနစ်နှင့် ကိုယ်ပိုင် စီးပွားရေး လုပ်ငန်းကြီးများ တည်ထောင်လာခဲ့ကြသည်။

တပ်မတော် အကယ်ဒမီ ၏ ဆောင်ပုဒ်က “အနာဂါတ်၏ အောင်ပွဲခံ သားကောင်း ရတနာများ” ဟူ၍ ဖြစ်သည်။ အောင်ပွဲခံသည် အခံသည်တော့ အပထား အရှေ့တောင်အာရှတွင် အချမ်းသာဆုံး နိူင်ငံ အဖြစ်မှ ၎င်းတို့ အုပ်ချုပ်နေသည့် နှစ်ပေါင်း ခြောက်ဆယ် အတွင်း အဆင်းရဲဆုံး နိူင်ငံ အဖြစ် ပြောင်းလဲသွားခဲ့ရသည်ကတော့ အမှန်ပင် ဖြစ်သည်။

၂၀၁၀ တွင်တော့ ၎င်းတို့အဖို့ တိုင်းပြည်ကို တံခါးဖွင့် ပေးရန်မှအပ အခြား ရွေးချယ်စရာ မကျန်တော့။ နိူင်ငံခြားရင်းနှီးမြုပ်နှံမှု ရရှိနိူင်ရေး အတွက် ၎င်းတို့၏ စီးပွားရေးတွင် လက်ဝါးကြီးအုပ်မှုများကို ဖြေလျော့ပေးလာခဲ့ရသည်။ သို့သော်လည်း စစ်တပ်အတွက် အကာအကွယ်အရံအတား များစွာ ထည့်သွင်းထားသည့် ဖွဲ့စည်းပုံကိုတော့ ပြဌာန်းပေးခဲ့ပြန်သည်။

ထိုအထဲတွင် ၂၀၁၁ ခုနှစ် အရပ်သား အစိုးရအား အာဏာ မလွှဲပြောင်းမီ ကာလက တပ်မတော်မှ ကျူးလွန်ခဲ့သော ရာဇ၀တ်မှုများအတွက် တရားစွဲဆိုခြင်းမှ ကင်းလွတ်ခွင့် ကို ထည့်သွင်းထားခဲ့သည်။ တပ်မတော်အနေဖြင့် ၎င်းတို့ အဖွဲ့ဝင်များ ကျုးလွန်သော အမှုများအတွက် ကိုယ်တိုင် စစ်ဆေးခွင့်ရရှိခဲ့ပြီး စစ်ခုံရုံးမှသာ စီရင်ပိုင်ခွင့် ရရှိခဲ့ပြန်သည်။

ထိုကဲ့သို့ စစ်တပ်အား တရားစွဲဆိုခွင့်မှ ကင်းလွတ်ခွင့် ပြုခဲ့ခြင်းသည် နိူင်ငံအတွင်း တရားဥပဒေစိုးမိုးရေး အတွက် ကြီးမားသော အဟန့်အတား ဖြစ်လာခဲ့ရသည်ဟု ရန်ကုန်ရှိ International Commission for Jurist အတွက် ဥပဒေ အကြံပေး ဖြစ်သော ရှောင် ဘိန်း (Sean Bain) က ဆိုသည်။

ရခိုင်ပြည်နယ်တွင် ဖြစ်ပွားခဲ့သော အရေးအခင်းတွင် ထိုဒေသ၌ တပ်မတော်အနေဖြင့် သယံဇာတ ပစ္စည်းများ ထုတ်ယူနိူင်စရာ မယ်မယ်ရရ မရှိသော်လည်း ၎င်းတို့အဖွဲ့အစည်းသည် မြန်မာ ဗုဒ္ဓဘာသာ လူများစုကြီးအတွက် ရှေ့တန်းမှ ကာကွယ်ပေးသူ အမျိုးသား ရေး အောင်ပွဲအဖြစ် ပုံဖေါ်နိူင်ခဲ့သဖြင့် သိသာသော အကျိုးကျေးဇူးများ ရရှိလာခဲ့သည်။

တိုင်းရင်းသား လူနည်းစုများနှင့် စစ်ပွဲများ ဆက်လက်ဆင်နွှဲနိူင်ခွင့် ရရှိနေပြန်သဖြင့် စီးပွားရေးတွင် အကျိုးအမြတ် အရ အရေးသာလာခဲ့ပြန်သည်။ တိုင်းရင်းသား လူနည်းစုများ နေထိုင်ရာ ဒေသများသည် တောတောင် ထူထပ်သည့် နယ်စွန်နယ်ဖျားများတွင်ရှိနေပြီး ကျောက်စိမ်း၊  အခြား ကျောက်မျက်ရတနာမျာှးနှင့် ကျွန်းသစ် အစရှိသော သယံဇာတ ပစ္စည်းများ ထွက်ရှိရာ ဒေသ လည်း ဖြစ်နေပြန်သည်။

လွတ်လပ်ရေး ရရှိပြီးနောက် ကိုယ်ပိုင်အုပ်ချုပ်ခွင့်ရရှိရန် ကြိုးပမ်းလာကြသော လက်နက်ကိုင် အဖွဲ့များကို စစ်ရေး အရ အစွန်အဖျားသို့ တွန်းပို့ နိူင်ခဲ့ကြသည်။

ယင်းနှင့်အတူ ဖြတ်လေးဖြတ်ဟု ခေါ်သော သောင်းကျန်းသူ တိုက်ဖျက်ရေး မဟာဗျုဟာ အဖြစ် ၎င်းတို့အပေါ် ပံပိုးမှုများ မပေးနိူင်စေရန် တိုင်းရင်းသား အားလုံးအပေါ် ရက်စက်စွာ ကျင့်သုံးခဲ့ကြပြန်သည်။

၂၀၁၁ တွင် အရပ်သားတပိုင်း အစိုးရ တာဝန် ယူပြီးနောက်ပိုင်း ငြိမ်းချမ်းရေးရရန် ကြိုးပမ်းမှုများ ရှိခဲ့သော်လည်း တိုင်းရင်းသားများနှင့် လက်နက်ကိုင်တိုက်ပွဲများ တိုးတက် ဖြစ်ပေါ်လာခဲ့ရသည်။ ထိုင်းနိူင်ငံနှင့် မြန်မာရှိ ဒုက္ခသည်များ စခန်းတွင် နေထိုင်ရသူ ၃၄၀,၀၀၀ ခန့် ရောက်ရှိလာခဲ့ရသည်။

တပ်မတော်အဖို့လည်း ပဋိပက္ခများ ဆက်လက်ဖြစ်ပွားနေသရွေ့ မရေရှာသော အနေအထားများ ဆက်လက်ထိမ်းသိမ်းနိူင်ခဲ့သဖြင့် အဆိုပါ ဒေသများတွင် ၎င်းတို့ သဘောရှိ လွတ်လပ်စွာ လှုပ်ရှားနိူင်ခွင့် ရရှိနေခဲ့သည်။ အချို့နေရာများတွင် သယံဇာတ များ ပေါများသော ဒေသများကို ထိမ်းချုပ်နိူင်ခဲ့ပြီး အချို့နေရာများတွင် ဒေသခံ အုပ်စုများနှင့် အပြစ်အခတ် ရပ်စဲရေးကို ပြုလုပ်နိူင်ခဲ့သည်။

ငြိမ်းချမ်းရေး သဘောတူညီချက်မရရှိသော အဖွဲ့များ ၏ ဒေသများ တွင် ၎င်းတို့ ဆက်လက် တည်ရှိနေမှုများက တရားမျှတ သယောင် ဖြစ်စေပြီး အခိုင်အမာ ထိမ်းချုပ် ထားနိူင်ခွင့် ရရှိနေခဲ့သည်။

တပ်မတော်၏ ချည်းကပ်မှုများအား ဟိုနိူလူလူရှိ East-West Centre မှ ဧည့်ပညာရှင် ကဲဗင် ၀ုဒ် က ceasefire-capitalism အပြစ်ရပ် အရင်းရှင်ဝါဒ ဟု ခေါ်ဝေါ်ခဲ့သည်။

စစ်ပွဲများ ဖြစ်ပွားနေသော ကချင်ပြည်နယ် မြေက်ပိုင်းဒေသတွင် စစ်တပ်၊ ကရိုနီများ နှင့် မူးယစ်ရာဇာများက အမေရိကန် ဒေါ်လာ ဘီလီယံပေါင်းများစွာကို ကျောက်စိမ်း အရောင်းအ၀ယ်မှ ရရှိနိူင်ခဲ့ကြသဖြင့် “ခေတ်သစ် သမိုင်းတွင် အကြီးမားဆုံးသော သယံဇာတ ပစ္စည်းများ လုယက်မှုကြီး” အဖြစ် ၂၀၁၅ တွင် လန်ဒန် အခြေစိုက် အကျင့်ပျက် ခြစားမှု လေ့လာရေး အဖွဲ့ကြီးဖြစ်သော Global Witness က ကင်ပွန်းတပ်ခဲ့ပေသည်။

ထို့အပြင် စစ်တပ် နှင့် လက်နက်ကိုင် တိုင်းရင်းသား အဖွဲ့များက ထိတ်တိုက်ရင်ဆိုင်တွေ့နေရမှုများကြောင့် တရုတ် နယ်စပ်တလျောက် တရားဥပဒေ စိုးမိုးမှု ကင်းမဲ့ရာ ဒေသများ ဖြစ်လာခဲ့သည်နှင့်အမျှ ကမ္ဘာပေါ်တွင် ၀င်ငွေ အကောင်းဆုံး မူးယစ်ဆေးဝါး ထုတ်လုပ်ထွက်ရှိရာ ဒေသကြီး ဖြစ်လာခဲ့ရပြန်သည်။

လှစိုး​ဝေ


ရည်ညွန်း။ ၊ ၂၀၁၈ ဇန်န၀ါရီ ၂၇ နေ့ နယူးယောက်တိုင်းမ် သတင်းစာပါ Richard C. Paddock ရေးသားသော “For Myanmar'’ Army, Ethnic Bloodletting is Key to Power and Riches"”ဆောင်းပါးကို ကောက်နှုတ် တင်ပြသည်။

No comments:

Post a Comment

Blog Archive

Tags

Accident Ad Agriculture Article Astrology Aung San Suu Kyi Bagan Beauty Bogale Book Car Cartoon celebs Crime Crony Daily Popular Danubyu Dedaye Dhamma Dr Hla Myat Thway Education ELection Entertainment Environment Foreign Affairs General General Aung San General Knowledge Gossip Gov Health Herbal Hinthada History Hluttaw Ingapu Interview Job Kangyidaunt kyaik Lat Kyangin Kyaunggon Kyonpyaw Latputta Laymyethna Lemyethna Letter Ma Shwe Moe Mahn Johnny Maubin Mawlamyinegyun Media MMP MMP 1 money Myan Aung Myanmar Idol Myaungmya Myo Min Paing News Ngapudaw Ngathaingchaung NLD Nyaung Tone Opinion Pagoda Pantanaw Party Pathein People Photo Places Poem Police Politic Political Prisoner Popular Project Pyapon Quote School Bus Song Speech Sport Sports Student SYW SYW 1 Technology Thabaung Time Ayeyar Tourism Travel U Ba Hein U Ko Ni U Kyaw Myint U Win Htay USDP Video Wakhama Weather World News Yekyi Zalun စိတ်အဟာရ ရသစာများ စိုက်ပျိုးရေး ထူးဆန်းထွေလာ ဒီရေတော နာရေး ဗဒေငျ မဘသ မုံရွာ လယ်သိမ်းမြေသိမ်း လူပုဂ္ဂိုလ်များ လူပျောက်ကြော်ငြာ အရှင်သုစိတ္တ (မော်ကျွန်း) အရှင်သုစိတ္တ (မော်ကျွန်း) ဆရာတော် အထွေထွေ ဝေဖန်ရေး ထွေအုပ် ​မော်​တင်​စွန်း နိုင်ငံရေးအကျဉ်းသား

Labels

Recent Post