ပြုပြင်ပြောင်းလဲရေးဆောင်ရွက်ခဲ့မှုများ
မြေလတ်ဒေသ၊ အညာမြေဒေသ၊ ဖန်ခါး မြေဟုခေါ်ဆိုသည့် မကွေးတိုင်းဒေသကြီးသည် မြန်မာနိုင်ငံ အလယ်ပိုင်းဒေသတွင် တည်ရှိသည်။ ဧရာဝတီမြစ်နှင့် မုန်းချောင်း၊ မန်းချောင်း၊ စလင်းချောင်း၊ ယောချောင်း၊ ပင်းချောင်း၊ မြစ်သာမြစ်တို့ဖြင့် ဆည်ငယ်၊ ကန်ငယ်နှင့် ဘက်စုံရေလှောင်တမံကြီးများဖြင့် စိုက်ပျိုးရေးလုပ်ငန်းများ အောင်မြင်ဖြစ်ထွန်း လျက်ရှိသည့် တိုင်းဒေသကြီးဖြစ်သည်။
တစ်နေ့တခြား ဖွံ့ဖြိုးလာ
မြေပြန့်ဒေသဖြစ်သည့် အားလျော်စွာ အချက်အချာကျသည့် လမ်းပန်းဆက်သွယ်ရေးကို ယခင်ကထက် အဆင့်တိုးမြှင့် ဆောင်ရွက်ပေးမှုများကြောင့် ကုန်စည်ပို့ဆောင်မှု တို့နှင့်အတူ လူမှုရေး၊ စီးပွားရေး၊ ပညာရေး၊ ကျန်းမာရေးကဏ္ဍများသည်လည်း တစ်နေ့တခြား ဖွံ့ဖြိုးတိုးတက်လာလျက်ရှိသည်။
''မကွေးတိုင်းဒေသကြီးအစိုးရအဖွဲ့ဟာ အုပ်ချုပ်ရေးအတွေ့အကြုံ လုံးဝမရှိပါဘူး။ သို့သော်လည်း ဒီလိုမရှိတဲ့ကြားထဲက မကွေး တိုင်းဒေသကြီးရဲ့ အေးချမ်းသာယာရေး၊ ဖွံ့ဖြိုး တိုးတက်ရေး၊ တရားဥပဒေစိုးမိုးရေးအတွက် ကိုယ်စွမ်းဥာဏ်စွမ်းရှိသရွေ့ ကြိုးပမ်းဆောင် ရွက်လျက်ရှိပါတယ်။ ယခင့်ယခင် အစိုးရတွေ လက်ထက်က မလုပ်သင့်ဘဲနဲ့လုပ်ခဲ့တဲ့အတွက် ဖြစ်ခဲ့တဲ့ပြဿနာ၊ လုပ်သင့်ပါလျက်နဲ့ မလုပ်ခဲ့ တဲ့အတွက် ဖြစ်တဲ့ပြဿနာ၊ အဲဒီပြဿနာ တွေကို ဖြေရှင်းပေးနေရတာကိုက ကျွန်တော် တို့ တိုင်းဒေသကြီးအစိုးရအတွက် တကယ့်ကို တာဝန်ကြီးတစ်ခု၊ လုပ်ငန်းကြီးတစ်ခုလို ဖြစ်နေပါတယ်။ ဒါတွေဖြေရှင်းလို့ ကုန်မယ့်အချိန်တွေ၊ ငွေတွေကို ဒီပြင့်နေရာ ဖွံ့ဖြိုးရေးတွေမှာ သုံးလို့ရတာပေါ့။ မြန်မာနိုင်ငံဟာ ကမ္ဘာပေါ် မှာရှိတဲ့ နိုင်ငံတွေအနက် တရားဥပဒေစိုးမိုးမှု အညံ့ဖျင်းဆုံးထဲမှာ ပါနေပါတယ်။ ပြည်သူ တစ်ရပ်လုံးလည်း ဒါကို သိစေချင်ပါတယ်။ အုပ်ချုပ်မှုယန္တရားကရော နိုင်ငံတော် အကြီးအကဲတွေ၊ ဝန်ကြီးချုပ်တွေ ဘယ်လောက် ကြိုးစားဆောင်ရွက်နေတယ်ဆိုတာကို သိစေချင်တယ်။ အခက်အခဲတွေ ဘယ်လိုကြုံနေ တယ်ဆိုတာကိုလည်း ပြည်သူလူထု သဘော ပေါက်စေချင်တယ်''ဟု မကွေးတိုင်းဒေသကြီး ဝန်ကြီးချုပ် ဒေါက်တာအောင်မိုးညိုက ပြောသည်။
တင်ဒါပိုလျှံငွေကျပ် ၁ဝ ဒသမ ၂၇ ဘီလီယံ
မကွေးတိုင်းဒေသကြီးတွင် ဆောက်လုပ် ရေးတင်ဒါ ပိုလျှံငွေများကိစ္စသည် တိုင်းသိ ပြည်သိ ဖြစ်သည်။ လုပ်ငန်း၏အရည်အသွေးကို လည်းကောင်း၊ လုပ်ငန်းအရေအတွက်ကို လည်းကောင်း၊ လုပ်ငန်း၏ပမာဏကို လည်း ကောင်း ထိခိုက်ခြင်းမရှိစေဘဲ စိစစ်လိုက်သည့်အခါ ဆောက်လုပ်ရေးဌာနမှ တင်ဒါပိုလျှံငွေ ကျပ် ၁ဝ ဒသမ ၂၇ ဘီလီယံ (ကျပ်ငွေ သန်း ပေါင်း တစ်သောင်းကျော်) ပိုထွက်လာခဲ့သည်။ လျှပ်စစ်ကဏ္ဍတွင်လည်း ကျပ်ငွေ သိန်း ၃ဝဝဝ ခန့်ပိုလျှံခဲ့သည်ဟု သိရသည်။
ပိုလျှံငွေများဖြင့် ကျေးလက်ဒေသဖွံ့ဖြိုး ရေး၊ လျှပ်စစ်မီးရရှိရေးကို တိုင်းဒေသကြီးတစ်ခု လုံး လိုအပ်သည့်နေရာများတွင် တိုင်းအင်ဂျင် နီယာနှင့် ညှိနှိုင်းပြီးခွဲဝေပေးခဲ့ကြောင်း၊ မကွေး တိုင်းဒေသကြီး ဆေးရုံကြီး၊ သင်ကြားရေးဆေးရုံ နှင့် ပခုက္ကူဆေးရုံတို့တွင်လည်း ငွေကျပ် သန်း ၄ဝ စီ ရေအိမ်များဆောက်လုပ်ရန် အသုံးပြု ခဲ့ကြောင်း၊ မြို့တိုင်းမြို့တိုင်းတွင် ကျေးရွာချင်း ဆက်လမ်းများ၊ သောက်ရေကန်များ ပြုပြင် ထိန်းသိမ်းရန်အတွက် ယန္တရားများကို ကျပ်ငွေ သန်းပေါင်း ၁၂၂၈ သန်းဖိုး ဝယ်ယူခဲ့ကြောင်း သိရသည်။
ထို့ပြင် ကျန်းမာရေးဌာန မိခင်နှင့်ကလေး ကျန်းမာရေးစောင့်ရှောက်ရေးတွင် ပညာပေးရန်အတွက် သန်း ၁ဝဝ၊ ကိုယ်ဝန်ဆောင် မိခင်များ၊ ကလေးများအတွက် အားဆေး သန်း ၄ဝဝ ဖိုး ဝယ်ယူခဲ့ကြောင်း၊ လမ်းတိုးချဲ့ ဖောက်လုပ်ပေးခဲ့သည့်အတွက် သန်း ၁ဝဝဝ ခန့် ကုန်ကျခဲ့ကြောင်း၊ ပြည်တော်သာလမ်း နိုင်လွန်ကတ္တရာလမ်းခင်းခြင်းတွင် ကျပ်ငွေ သန်း ၁ဝဝဝ ကျော်အသုံးပြုခဲ့ကြောင်း၊ မကွေး တိုင်းဒေသကြီး ဆေးရုံရှေ့လမ်းကို နိုင်လွန် ကတ္တရာခင်းခြင်းအတွက် ကျပ်ငွေ သန်း ၂ဝဝ အသုံးပြုခဲ့ကြောင်း၊ အထက (၁)လမ်း နိုင်လွန် ကတ္တရာခင်းခြင်းတွင် ကျပ်ငွေ သန်း ၈ဝဝ သုံးခဲ့ကြောင်း၊ ထိုငွေများသည် ပြည်ထောင်စု အစိုးရမှလည်းကောင်း၊ တိုင်းဒေသကြီး ဘတ် ဂျက်ကို လည်းကောင်း ထပ်ပြီးတောင်းခံခြင်း မဟုတ်ဘဲ တင်ဒါမှပိုသည့်ငွေဖြင့် စီမံခန့်ခွဲပြီး လုပ်ခဲ့ခြင်းဖြစ်ကြောင်း မကွေးတိုင်းဒေသကြီး ဝန်ကြီးချုပ်က ပြောသည်။
လမ်းများအဆင့်မြှင့်တင်
အစိုးရသစ်တစ်နှစ်တာသက်တမ်းကာလအတွင်း မကွေးတိုင်းဒေသကြီးအ တွင်း သိသာထင်ရှားသည့် ပြောင်းလဲမှုတစ်ခုမှာ တိုင်းဒေသကြီး မြို့တော်ဖြစ်သည့် မကွေးမြို့ကို မြို့တော်၏အင်္ဂါရပ်များနှင့်အညီ ဖြစ်စေရန် မြို့တွင်းရှိ အဓိကလမ်းမကြီးများကို မူလ ကတ္တရာလမ်းမှ အေစီကတ္တရာကွန်ကရစ်လမ်း များအဖြစ် အဆင့်မြှင့်တင်ဆောင်ရွက်ပေးနေ ခြင်း ဖြစ်သည်။
မကွေးမြို့၏ တိုးတက်များပြားလာသည့် လူဦးရေနှင့် ယာဉ်စီးရေတို့ကြောင့် ယာဉ်များ သွားလာမှုကျပ်တည်းလာခြင်း၊ ယာဉ်မတော် တဆမှုများ တိုးပွားလာခြင်းများမှ ကာကွယ် နိုင်ရန်နှင့် မြို့နေပြည်သူလူထု အဆင်ပြေ ချောမွေ့စွာ အချိန်တိုအတွင်း သွားလာနိုင်စေရန် ရည်ရွယ်ပြီး ဗိုလ်ချုပ်လမ်း၊ ပြည်တော်သာ လမ်း၊ ဆေးရုံလမ်းနှင့် အထက (၁) လမ်းတို့ကို မူလ ၁၈ ပေ၊ ၂၄ ပေမှ ၃၆ ပေ၊ ပေ ၄ဝ ရရှိ အောင် လမ်းအကျယ်ချဲ့ခင်းပြီး ကတ္တရာ ကွန်ကရစ်လမ်းအဖြစ် အဆင့်မြှင့်တင်ဆောင် ရွက်လျက်ရှိသလို မဲထီးလမ်းနှင့် မြို့မဈေး ရှေ့လမ်းတို့ကိုလည်း မူလ ၁၆ ပေ အကျယ်မှ ပေ ၃ဝ အကျယ်ချဲ့ခင်းပြီး ကတ္တရာထပ်ပိုးလွှာ ခင်းခြင်းတို့ကို မကွေးတိုင်းဒေသကြီး လမ်း ဦးစီးဌာနမှ နေ့ညမပြတ် ဆောင်ရွက်လျက် ရှိသည်။
မကွေးတိုင်းဒေသကြီးနှင့် ရခိုင်ပြည်နယ် ကို ဆက်သွယ်ထားပြီး ပြည်ထောင်စုလမ်းမကြီး တစ်ခုဖြစ်သည့် မင်းဘူး-အမ်းလမ်း စုစုပေါင်း ၁၉ မိုင် ၆ ဖာလုံအား မူလလမ်းအကျယ် ၁၂ ပေမှ ကတ္တရာလမ်းအကျယ် ၁၈ ပေ အထိ တိုးချဲ့ပြီး မျက်ကွယ်ကုန်းများကို ဖြတ်ညှိကာ ကတ္တရာလမ်းသစ်ခင်းခြင်းလုပ်ငန်းများကို ဆောင်ရွက်လျက်ရှိကြောင်း သိရသည်။
မင်းဘူးခရိုင် ပွင့်ဖြူမြို့တွင်လည်း ကန်သာကြီး-ကျောင်းတော်ရာလမ်း ကျောက် ချောခင်းခြင်း၊ လယ်ကိုင်း-ကျောင်းတော်ရာလမ်း ကတ္တရာလမ်းခင်းခြင်းတို့ကိုလည်း ဆောင်ရွက်လျက်ရှိသည့်အတွက် ခရီးသွား ပြည်သူများအနေဖြင့် ယာဉ်အန္တရာယ်၊ လမ်း အန္တရာယ်ကင်းရှင်းစွာဖြင့် လိုရာခရီးကို အချိန် တိုအတွင်းမှာ သွားလာနိုင်တော့မည်ဖြစ်သည်။
တံတားများတည်ဆောက်ပေး
နှစ်ကာလကြာရှည်ပြီး ယိုယွင်းပျက်စီးကာ လမ်းပန်းဆက်သွယ်ရေးတွင် အန္တရာယ် အခက်အခဲနှင့် ရင်ဆိုင်ကြုံတွေ့နေရသည့် လမ်း/တံတားများကို ပြုပြင်ထိန်းသိမ်း တည် ဆောက်ပေးလျက်ရှိရာမှာ ကျေးလက်ဒေသ ဖွံ့ဖြိုးတိုးတက်ရေးဦးစီးဌာနမှ မကွေးတိုင်း ဒေသကြီး ငဖဲမြို့နယ်အတွင်း အရှည်ပေ ၉၂ဝ၊ အကျယ် ၁၄ ပေရှိသည့် အိုးမြေတွင်း မန်း ချောင်းကူး သံကူကွန်ကရစ်တံတား၊ အရှည်ပေ ၅ဝဝ၊ အကျယ် ၁၄ ပေရှိသည့် ဇီးတော- ပေါင်းကလေး ကျေးရွာချင်းဆက် သံကူ ကွန်ကရစ်တံတား၊ မင်းဘူးမြို့နယ် အရှည်ပေ ၁၂ဝ၊ အကျယ် ၁၄ ပေရှိ ရေပူရိုးချောင်းကူး သံကူကွန်ကရစ်တံတားတို့ကို တည်ဆောက် ပေးနေသည့်အတွက် ဒေသခံပြည်သူများ သွားလာမှုအဆင်ပြေပြီး ကုန်စည်ပို့ဆောင်မှု များ မြန်ဆန်လာကာ စီးပွားရေးလုပ်ငန်းများ လည်း ဖွံ့ဖြိုးတိုးတက်လာမည် ဖြစ်ပါသည်။
တိုင်းဒေသကြီး ဝန်ကြီးချုပ် ဒေါက်တာ အောင်မိုးညိုက ''တိုင်းဒေသကြီးအတွင်းမှာ ကျွန်တော်တို့အစိုးရတက်လာမှ စိစစ်တော့ ကာ အသက် (၁ဝ) နှစ်ပြည့်တဲ့ကလေးက ၅၆ဝဝဝ၊ အသက် (၁၈)နှစ်အထက်က ၆၆ဝဝဝ ဟာ နိုင်ငံသားစိစစ်ရေးကတ်တွေ မရသေး ဘူးဆိုတာ သိရတဲ့အတွက် ပြီးခဲ့တဲ့နိုဝင်ဘာ လကစပြီး လဝကနဲ့ပူးပေါင်းပြီးတော့ ဆောင်ရွက်တဲ့အတွက် ၄၅ဝဝဝ(၃၅ ရာခိုင်နှုန်းကို) နိုင်ငံသားစိစစ်ရေးကတ်တွေ ပေးနိုင်အောင် ကြိုးစားခဲ့ပါတယ်။ ကျွန်တော်တို့တတ်နိုင် သလောက် ကြိုးပမ်းဆောင်ရွက်နေတဲ့အထဲမှာ ကျွန်တော်တို့အစိုးရ တက်လာကတည်းက ပြောခဲ့တဲ့ မည်သူတစ်ဦးတစ်ယောက်ကိုမှ အရေးယူတာ၊ အပြစ်ပေးတာ၊ ရာထူးလျှော့ တာ၊ နယ်ပြောင်းတာတွေ မလုပ်ချင်ပါဘူးလို့ ပြောခဲ့ပါတယ်။ ပြောတဲ့ကြားထဲက အရေးယူ၊ အပြစ်ပေးခဲ့ရတာ ရှိပါတယ်။
''ဥပမာအားဖြင့် ကျွန်တော်တို့အစိုးရ လက်ထက်မှာ မြို့နယ်အုပ်ချုပ်ရေးမှူး တစ်ယောက်ကို အလုပ်ကဖြုတ်ပစ်လိုက်ရတယ်။ ထုတ်ပယ်လိုက်ရတယ်။ နောက်တစ်ခါ အထောက်အထားအခိုင်အလုံနဲ့ ပြည်သူလူထုက တင်ပြလာတဲ့အတွက်ကြောင့် ပြည်ထောင်စုအဆင့် အဂတိလိုက်စားမှုတိုက်ဖျက်ရေး ကော်မရှင်ကို တင်ပြမှဖြစ်တော့မယ်ဆိုပြီး တင်ပြခဲ့ပါတယ်။ တင်ပြလို့ စုံစမ်းစစ်ဆေးတယ်။ အပြစ်ရှိတယ်။ အရေးယူ အပြစ်ပေး ခံရမှာသိလို့ ထွက်ပြေးတိမ်းရှောင်နေတဲ့ အရာရှိတွေလည်း ရှိတယ်။ ဥပမာအားဖြင့် မြို့နယ်တရားသူကြီးတစ်ယောက်၊ ခရိုင်ပညာ ရေးမှူးတစ်ယောက်၊ အဂတိလိုက်စားမှုတိုက် ဖျက်ရေးကော်မရှင်ရဲ့ စုံစမ်း စစ်ဆေးခံရပြီးတော့ အရေးယူခံရမှာသိလို့ ထွက်ပြေး တိမ်းရှောင်နေပါတယ်။ ဒါတွေကို ပြောရတာ စိတ်မချမ်းသာဘူး''ဟု ပြောသည်။
စိတ်ချမ်းမြေ့စွာ ပညာသင်ကြား
မကွေးတိုင်းဒေသကြီး ပညာရေးဦးစီး ဌာနမှ မကွေးမြို့ပေါ်ရှိ ရန်အောင်ရပ် အခြေခံ ပညာမူလတန်းကျောင်းခွဲမှာ ပေ ၉ဝ၊ ပေ ၃ဝ အုတ်ညှပ် နှစ်ထပ်ကျောင်းဆောင်သစ်နှင့် စိုင်ကျကျေးရွာ အခြေခံပညာအလယ်တန်း ကျောင်းခွဲမှာ ပေ ၆ဝ၊ ပေ ၃ဝ အုတ်ညှပ် တစ်ထပ် ကျောင်းဆောင်သစ်တို့ကို တိုးချဲ့ ဆောက်လုပ်ပေးနိုင်ခဲ့တဲ့အတွက် အချိန်မရွေး အန္တရာယ်ကျရောက်နိုင်ပြီး ဥပဓိရုပ်မကောင်းတော့သည့် စာသင်ဆောင်အဟောင်းများနှင့် ပညာသင်ကြားနေရသည့် ကျောင်းသား ကျောင်းသူများ စိတ်ချမ်းမြေ့စွာဖြင့် ပညာသင်ကြားနိုင်ပြီ ဖြစ်သည်။
ထို့ပြင် တိုင်းဒေသကြီးအတွင်း အခြေခံပညာကျောင်းနှင့် ရုံးပေါင်း ၃ဝဝ ကျော် အသစ်ဆောက်လုပ်ပေးနိုင်ခဲ့ပြီး အခြေခံပညာ ကျောင်း ၃၅၂ ကျောင်းတွင် စာသင်ခုံ နိမ့်မြင့် အစုံ တစ်သောင်းကျော်နှင့် အခြေခံပညာ ကျောင်း၊ ရုံးပေါင်း ၆၉၂ ဆောင်အား ပြင်ဆင် တိုးချဲ့ဆောင်ရွက်ပေးနိုင်ခဲ့သည်။
ထို့ပြင် မင်းဘူးမြို့နယ် ရွာသာယာကျေးရွာတွင် မကွေးတ်ိုင်းဒေသကြီးအ စိုးရနှင့် စက်မှုဝန်ကြီးဌာနတို့ ပူးပေါင်းစီစဉ်သည့် စက်မှုနှင့် အသက်မွေးပညာ ရွေ့လျားသင်တန်း (အခြေခံ သံဂဟေဆက်သင်တန်း)ကို ဖွင့်လှစ်ပေးနိုင်ခဲ့သည့်အတွက် ကျေးလက်နေ ပြည်သူများသည် အခြေခံစက်မှုပညာရပ်များ ကို ကိုယ့်နေရပ်ဒေသ အနီးဝန်းကျင်တွင်ပင် သင်တန်းကြေးပေးသွင်းရန်မလိုဘဲ ကာလတိုအတွင်း စနစ်တကျသင်ယူခွင့်ရရှိနိုင်သည့်အပြင် အလုပ်အကိုင်အခွင့်အလမ်းများနှင့် လူမှုစီးပွားဘဝ ဖွံ့ဖြိုးတိုးတက်ရန်အတွက် တစ်ဖက်တစ်လမ်းမှ အထောက်အကူရရှိစေ မည်ဖြစ်သည်။
လေလွင့်မှုမရှိစေရေး
မင်းဘူး(စကု)မြို့နယ်ရှိ တောင်မန်း မြောင်းမကြီးသည် ၁၈ မိုင်ရှည်လျားပြီး မြောင်းအောက်ခြေအကျယ်သည် ၂၅ ပေရှိ သည်။ စိုက်ပျိုးရေးလုပ်ငန်းတွင် အဓိကကျသည့် ရေအရင်းအမြစ်များ လေလွင့်မှုမရှိစေ ရန်အတွက် တိုင်းဒေသကြီး ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနမှ မင်းဘူးမြို့နယ် အိုင်းမရေလွှဲဆည်၊ တောင်မန်း မြောင်းမကြီးရေလွှဲတွင် ဇကော ရေတံ လျှောက်နှင့် စစ်စလီရေတံလျှောက်တို့ကို ယခင် စက်ဝိုင်းခြမ်းပုံစံ ရေတံလျှောက်များအစား ထောင့်မှန်စတုဂံရေတံလျှောက်များကို ပြောင်းလဲတည်ဆောက်တပ်ဆင်လျက် ရှိသည်။
ထို့ပြင် မင်းဘူးခရိုင် ဆည်တော်မြို့နယ် အနီးတွင် မြောင်းကူး သံကူကွန်ကရစ်တံတား တည်ဆောက်ခြင်း၊ မဲဇလီကျေးရွာအနီးတွင် မြောင်းကူး သံကူကွန်ကရစ်တံတား တည်ဆောက်ခြင်းများအပြင် ဆည်တော်ကျေးရွာအနီးတွင် ရေဆိုးထုတ်သံကူကွန်ကရစ် တည်ဆောက်ခြင်းဖြင့် တောင်ကုန်းမြောင်းမကြီး ပျက်စီးမှုမှ ကာကွယ်ပေးနိုင်ခဲ့သည်။
မကွေးတိုင်းဒေသကြီး စိုက်ပျိုးရေးဦးစီး ဌာနမှ ပွင့်ဖြူမြို့နယ် မျိုးစေ့ဌာနခွဲ မျိုးသန့် စိုက်ပျိုးရေးခြံတွင် အဆင့်မြင့်လယ်ယာမြေများ ဖော်ထုတ်နိုင်ခဲ့ပြီး ယခင် မိုးစပါဧက ၁၁ဝ မှ ဧက ၁၂ဝ အထိ၊ ဆောင်းသီးနှံ ကုလားပဲမျိုးစေ့ ထုတ် ဧက ၃ဝ မှ ဧက ၅ဝ အထိ စိုက်ပျိုး ထုတ်လုပ်နိုင်ခဲ့ပြီး ဒေသခံတောင်သူများထံ ဖြန့်ဖြူးပေးလျက်ရှိသည်။ ထို့ပြင် ရေကြီး နစ်မြုပ်ဒေသရှိ တောင်သူများအား စိုက်ပျိုး ရေးဦးစီးဌာနမှ ကမ္ဘာ့စားနပ်ရိက္ခာအဖွဲ့ (FAO)နှင့်ပူးပေါင်းပြီး မင်းဘူးမြို့နယ်နှင့် ပွင့်ဖြူမြို့နယ်များတွင် ကျေးရွာပေါင်း ၄၄ ရွာ ရှိ အိမ်ထောင်စု ၂၈၂၅ စု အား ကုလားပဲ၊ မတ်ပဲနှင့် ဓာတ်မြေသြဇာနှင့် ဟင်းသီးဟင်းရွက် မျိုးစေ့ အိတ် ၂၈၂၅ အိတ်တို့ကို ကျေးရွာ များအရောက် ထောက်ပံ့ပေးအပ်နိုင်ခဲ့သည်။
သိမ်းဆည်းခံမြေများ
''သိမ်းဆည်းခံလယ်မြေကို တချို့လည်း လိုအပ်ချက်အရ သိမ်းထားတယ်။ လုံခြုံရေးအရ သိမ်းထားတယ်။ ပြန်လွှဲမပေးနိုင်သေး ဘူးဆိုတာရှိပါတယ်။ ကျွန်တော်တို့လည်း နိုင်ငံတော်က၊ ဝန်ကြီးဌာနက လိုအပ်ချက်အရ သိမ်းသင့်တာသိမ်းပါ။ သို့သော် စွန့်လွှတ်နိုင် သမျှ စွန့်လွှတ်ဖို့ အမြဲတမ်းတင်ပြပါတယ်။ နဂို သိမ်းခဲ့တုန်းကမပါဘူး။ တကယ်တော့ လယ်သမားက နိုင်ငံတော်က သိမ်းတယ်။ ဝန်ကြီးဌာနက သိမ်းတယ်။ တပ်မတော်က သိမ်းတယ်လို့ ထင်နေတယ်။
''ဒါပေမယ့် ပြန်ပြီးပေးတဲ့အခါ ၂ဝဝဝ ပြည့်နှစ်က သိမ်းတယ်။ ၂ဝ၁၃ မှာ ပြန်စွန့် လွှတ်တယ်။ မပါလာဘူး။ ဘာကြောင့် မပါ သလဲလို့စိစစ်တော့ ကျေးရွာဥက္ကဋ္ဌလုပ်တဲ့ သူက သက်ဆိုင်ရာကသိမ်းတဲ့ပုံစံ အယောင်ပြပြီး လုပ်ထားတယ်။ မနေ့တစ်နေ့ကမှ သူတို့ ကို ပုံစံ (၇) ထုတ်ပေးနိုင်တယ်။ ဒါ အလိမ် အညာတွေ။ ဒါတွေကို ကျွန်တော်တို့ ကြိုးစားပြီး တတ်နိုင်သမျှပြန်ပေးနိုင်အောင် ကျွန်တော်တို့ ကြိုးစားတယ်။ ဝမ်းနည်းဖို့ ကောင်းပါတယ်။ တရားဥပဒေမစိုးမိုးတဲ့ကာလ မှာ သိမ်းလိုက်တယ်။ ပြန်စွန့်လွှတ်လိုက်ပြီ။ မူလလယ်သမားပိုင်ရှင်ဆီ ရောက်မသွားဘူး။ အာဏာရှိတဲ့ သူက ဒါတွေကို ခွဲဝေစားတယ်။ အကွက်ရိုက်ရောင်းတယ်။ ဒါတွေနဲ့ ပြဿနာတွေ ဖြေရှင်းနေရတာတွေရှိပါတယ်။
မှန်မှန် ကန်ကန် စုံစမ်းစစ်ဆေးပေးဖို့၊ အင်မတန်ကို မဟုတ်တာလုပ်ရင် အင်မတန်အကုသိုလ်ကြီး တဲ့အကြောင်း ကျွန်တော်ပြောပါတယ်''ဟု မြေသိမ်းဆည်းရေးကိစ္စများနှင့်ပတ်သက်၍ တိုင်းဒေသကြီးဝန်ကြီးချုပ်က ပြောသည်။
အမည်သစ်သီးနှံစံပြစိုက်ခင်း
သစ်တောများ ပြုန်းတီးမှုကြောင့် ရာသီ ဥတုဖောက်ပြန်မှုဒဏ်ကို မြန်မာနိုင်ငံ အလယ်ပိုင်း မိုးနည်းရေရှား အပူပိုင်းဇုန်ဒေသနေ ပြည်သူများက ပိုမိုခံစားကြရပါသည်။ ထို့ကြောင့် ရာသီဥတုပြောင်းလဲမှုနှင့် လိုက်လျော ညီထွေဖြစ်စေသည့် စိုက်နည်းစနစ်များ ဖော်ဆောင်ပြီး ဆင်းရဲနွမ်းပါးမှုလျှော့ချရေးအတွက် မကွေး-နတ်မောက်ကားလမ်းရှိ တောင်သူ ဒေါ်မြင့်မြင့်ခင်၏ယာမြေတွင် စိန်တလုံး သရက်ပင်နှင့် သစ်တော ရောနှောစိုက်ခင်း ၃ ဒသမ ၅ ဧကနှင့် မင်းဘူး(စကု)မြို့နယ်ရှိ တောင်သူ ဦးဖြိုးဝေစိုး၏ အမည်သစ် သီးနှံစံပြ စိုက်ခင်း ခုနစ်ဧကတို့ကို တိုင်းဒေသကြီးအစိုးရ အဖွဲ့၏ ရန်ပုံငွေ၊ စိုက်ပျိုးရေးဦးစီးဌာန၏ နည်းပညာပံ့ပိုးမှုတို့ဖြင့် အကောင်အထည်ဖော် ဆောင်ရွက်ခဲ့ပါသည်။
တောင်သူများ လက်ရှိစိုက်ပျိုးနေသည့် လယ်ကွက်များသည် အရွယ်အစားပုံသဏ္ဌာန် အမျိုးမျိုး၊ ရေသွင်းရေထုတ်မြောင်းမရှိခြင်း၊ မြေအနိမ့်အမြင့် မညီညာ၊ ရေလေလွင့်မှုများ ပြားခြင်း၊ သီးနှံအထွက်နှုန်းကျဆင်းခြင်း၊ လယ်ယာလုပ်သားရှားပါးခြင်း စသည့် အခက် အခဲများကို ကျော်လွှားနိုင်ရန်အတွက် စက်မှု လယ်ယာဦးစီးဌာနအနေဖြင့် မင်းဘူး (စကု)မြို့နယ် ကုလားဘားကျေးရွာအုပ်စု ကုလား ဘားကျေးရွာတွင် စနစ်ကျလယ်ယာဧက ၂ဝဝ ကို ရှေ့ပြေးအနေဖြင့် စက်ယန္တရားကြီးများ အသုံးပြုပြီး ဖော်ထုတ်ဆောင်ရွက်လျက်ရှိသည်။
မကွေးမြို့မှ ဗိုလ်ချုပ်အောင်ဆန်း မြင်းစီးကြေးရုပ်ကြီး
သမိုင်းလက်ဆင့်ကမ်းခွင့်ရသည့် ကလေးငယ်များ၏ မေးခွန်းကြောင့် ဗိုလ်ချုပ်မြင်းစီး ရုပ်ကြီးသည် ပိုပြီးအသက်ဝင်နေသည်။ ဗိုလ်ချုပ်ကို ချစ်မြတ်နိုး၊ တန်ဖိုးထားသည့် မကွေးမြို့နယ်အတွင်းရှိ ပြည်သူများသည် အိမ်တွင်ရှိသည့် ကြေးထည်များကို ဝိုင်းဝန်း လှူဒါန်းခဲ့ကြပြီး စုဆောင်းရရှိသည့် ကြေးများဖြင့် မြင်းစီးကြေးရုပ်ကြီးကို သွန်းလုပ်ခဲ့ကြခြင်း ဖြစ်သည်။
လွတ်လပ်ရေးကိုပုံဖော်ပေးခဲ့သူ၊ အာဇာနည် စိတ်ဓာတ်ဖြင့် သမိုင်းကို အသက်သွင်းခဲ့သူ၊ တပ်မတော်၏ ကျစ်လျစ်ခိုင်မာမှုတန်ဖိုးကို သက်သေပြခဲ့သူ အမည်နာမပေါင်း၊ ဂုဏ်ဒြပ်ပေါင်း အမှတ်ရစရာပေါင်းများစွာတို့ဖြင့် ကိုယ်စားပြယုဂ်တစ်ခုသည် အစိုးရသစ်နှင့် အတူ ပြန်လည်အသက်ဝင်လာခဲ့သည်။
အကျိုးကျေးဇူးရ
ပြည်သူများ၏ အခြေခံလိုအပ်ချက်များစွာကို အဆင်ပြေချောမွေ့အောင် တစ်နေရာတည်းတွင် အချိန်တိုအတွင်း ဆောင်ရွက်ပေးနေသည့် ပြည်သူ့ဝန်ဆောင်မှုရုံးများကို မြို့နယ်တိုင်းတွင် ၂ဝ၁၅ ခုနှစ် သြဂုတ်လမှ စတင်ပြီးဖွင့်လှစ်ခဲ့သည်။ OSS ရုံးများ ဖွင့်လှစ် ခြင်းကြောင့် ဌာနအသီးသီးမှ ထောက်ခံစာများ တစ်နေရာတည်းတွင် ရရှိနိုင်သည့်အတွက် ပြည်သူများ အချိန်ကုန်ငွေကုန်သက်သာခြင်း၊ ဌာနအသီးသီးမှ ဝန်ထမ်းများ တစ်ဦးနှင့်တစ်ဦး တွေ့မြင်နေရသည့်အတွက် ဝန်ဆောင်မှု အရည်အသွေးများ တိုးတက်လာစေပြီး လာဘ်ပေးလာဘ်ယူမှုများ ကျဆင်းသွားစေနိုင်ခြင်း၊ မတူညီသည့်ဌာနများ အတူတကွ ပူးပေါင်းဆောင်ရွက်နေသည့်အတွက် ဌာနဆိုင်ရာ ဝန်ထမ်းများက ပြည်သူများအပေါ် စီမံခန့်ခွဲအုပ်ချုပ်မှုဆိုင်ရာ ဝန်ထုပ်ဝန်ပိုးများလျော့နည်းပပျောက် သွားစေနိုင်ခြင်း စသည့်အကျိုးကျေးဇူးများလည်း ရစေနိုင်မည်ဖြစ်သည်။
ယုံကြည်မှုများရလာ
စတင်ဖွင့်လှစ်ခဲ့သည့်နေ့မှစပြီး ၂ဝ၁၇ ခုနှစ် ဖေဖော်ဝါရီလအထိ အခြေခံလိုအပ်ချက် စုစုပေါင်း ၁၈၂၅ ကျော် ဝန်ဆောင်မှုပေး နိုင်ခဲ့သည့်အတွက် လူငယ်များမှစပြီး ပြည်သူ့ ဝန်ဆောင်မှုရုံးများကို တစ်နေ့ထက်တစ်နေ့ ယုံကြည်မှုများရလာပြီ ဖြစ်သည်။
တိုင်းဒေသကြီး ကျန်းမာရေးဦးစီးဌာနမှ တိုင်းဒေသကြီးအတွင်း ဝန်ထမ်းအိမ်ရာ တစ်ခု၊ ကျေးလက်ကျန်းမာရေးဌာန ငါးခု၊ ကျေးလက် ကျန်းမာရေးဌာနခွဲ ၄၉ ခု တိုးချဲ့တည်ဆောက် ပေးနိုင်ခဲ့သည်။ ဒေသခံပြည်သူများ၏ ကျန်းမာရေးစောင့်ရှောက်မှုလုပ်ငန်းများ ပိုမိုလွှမ်းခြုံ မှုပေးနိုင်ရန်အတွက် မင်းဘူးခရိုင် စလင်းမြို့ နယ်တွင် ခုတင်(၁ဝဝ)ဆံ့ RCC နှစ်ထပ်ဆေးရုံကြီးကို လက်ရှိအစိုးရသစ်လက်ထက်တွင် ဆက်လက်တည်ဆောက်လျက်ရှိရာ ၇၅ ရာခိုင်နှုန်းခန့် ပြီးစီးနေပြီဖြစ်သည်။ ဤဆေးရုံကြီး ပြီးစီးသွားသည့်အခါ ဒေသခံပြည်သူများကို ရာနှုန်းပြည့်ကျန်းမာရေးစောင့်ရှောက်မှု ပေးနိုင်မည့်အပြင် အနီးဝန်းကျင်တွင်ရှိသည့် စေတုတ္တရာနှင့် ပွင့်ဖြူမြို့နယ်တို့အတွင်းမှ ပြည်သူများကိုလည်း ကျန်းမာရေးစောင့် ရှောက်မှုပေးနိုင်မည်ဖြစ်သည်။ တိုင်းဒေသကြီး အစိုးရတင်ဒါပိုလျှံငွေများဖြင့် ငဖဲမြို့နယ်တွင် အသက် နှစ်နှစ်အောက်ကလေး အာဟာရ ဆိုင်ရာအလေ့အကျင့်ကောင်းများ ပျိုးထောင် မှုသင်တန်းပေးခြင်းနှင့် ကိုယ်ဝန်ဆောင်မိခင် လောင်းများနှင့် ကလေးများအတွက် ဆေးဝါးများ ထောက်ပံ့ပေးခြင်းကိုလည်း ဆောင်ရွက် ပေးနိုင်ခဲ့သည်။
မကွေးတိုင်းဒေသကြီး ရေအရင်းအမြစ် ထိန်းသိမ်းကာကွယ်ရေးဦးစီးဌာနမှ မင်းလှ ခံတပ်အောက်ဘက် ရွှေဘုံသာဘုရားအနီးမှ အခြေပြုကျောက်စီမြေ ထိန်းတမံ အလျား ပေ ၂၈ဝ နှင့် ကျောက်စီမြေထိန်းနံရံ အလျား ၈၄ ပေကို တည်ဆောက်ခဲ့သည့်အတွက် ဧရာဝတီ မြစ်ကမ်းပါးပြိုကျမှုမှ ကာကွယ်နိုင်ခဲ့သည်။
မကွေးတိုင်းဒေသကြီး ကယ်ဆယ်ရေးနှင့် ပြန်လည်နေရာချထားရေး ဦးစီးဌာနမှ သဘာဝ ဘေးအန္တရာယ်စီမံခန့်ခွဲမှုကော်မတီကို ၂ဝ၁၆ ခုနှစ်တွင် ဖွဲ့စည်းခဲ့ပြီး တိုင်းဒေသကြီးအတွင်း အမျိုးမျိုးသော သဘာဝဘေးသင့်ပြည်သူများအတွက် ထောက်ပံ့ငွေစုစုပေါင်း သိန်းပေါင်း ငါးထောင်ကျော် ထောက်ပံ့ပေးနိုင်ခဲ့သည်။
မကွေးခရိုင် ချောက်မြို့၌ ရေရှားပါးမှုအား အထောက်အကူပြုစေရန်အတွက် ဂါလန် ငါးသောင်းဆံ့ အုတ်ရေကန်ကြီးကို တည်ဆောက်ပေးလျက်ရှိသည်။ ထိုရေကန်ကြီး ပြီးစီးသွားသည့်အခါ အမှတ် ၅၊ ၆၊ ၇၊ ၉ နှင့် ၁ဝ ရပ်ကွက်များမှ ပြည်သူများထံ ရေလုံလောက်စွာပေးဝေနိုင်မည့်အပြင် မီးဘေး အန္တရာယ်ကိုလည်း ကြိုတင်ကာကွယ်တားဆီး ပေးနိုင်မည်ဖြစ်သည်။
ထို့ပြင် သရက်ခရိုင် ဆင်ပေါင်ဝဲမြို့နယ် ကိုးပင်ကျေးရွာတွင် ၆၆/၁၁ KV ဓာတ်အား ခွဲရုံတည်ဆောက်ခြင်းဖြင့် ကျေးရွာ ၁၅ ရွာအား လျှပ်စစ်ဓာတ်အား ဖြန့်ဖြူးပေးနိုင်ခဲ့သည်။
တိုင်းဒေသကြီးဝန်ကြီးချုပ်က ''မကွေး တိုင်းအတွင်းမှာ မှီတင်းနေ ထိုင်ကြတဲ့အထဲမှာ မြန်မာချည်းပဲနေတာမဟုတ်ဘူး။ ချင်းတိုင်းရင်းသား ဝန်ကြီးရယ်၊ ချင်းလူမျိုးတွေလည်း ရှိတယ်။ သူတို့အတွက်လည်း ကျွန်တော်တို့က ချင်းအမျိုးသားနေ့ကို မကွေးတိုင်းဒေသကြီး အဆင့်မြို့တော်ခန်းမမှာ ခမ်းခမ်းနားနားနဲ့ ကျင်းပပေးလိုက်တယ်။ မကွေးမှာဆိုရင် ကျန်းမာရေးတက္ကသိုလ်ရှိပါတယ်။ ဆေးတက္ကသိုလ် ရှိပါတယ်။ ကွန်ပျူတာ၊ နည်းပညာတက္ကသိုလ် ရှိပါတယ်။ မကွေးတက္ကသိုလ်ရှိပါတယ်။ ဒီမှာ ပညာသင်ကြားနေတဲ့ ချင်းတိုင်းရင်းသား၊ သားငယ်သမီးငယ် ညီအစ်ကိုမောင်နှမတွေ အလွန်ကို သူတို့အသိအမှတ်ပြုတာခံရတဲ့ အတွက် ဝမ်းသာကြည်နူးနေရတာမြင်ရလို့ ကျွန်တော်တို့အတွက် အင်မတန်ပီတိဖြစ်စရာ ဖြစ်ပါတယ်။ ဒါကိုမြင်ရတာ အင်မတန်ကို စိတ်ချမ်းသာပါတယ်။
''တိုင်းရင်းသားတွေအတွက်လည်း အလေးထားဆောင်ရွက်နေပါတယ်။ အလေးအနက် တင်ပြချင်တာကတော့ ၀န်ထမ်းတွေရော၊ ပြည်သူတစ်ရပ်လုံးရော တရားဥပဒေစိုးမိုးရေးကို လေးစားကြဖို့၊ လိုက်နာကြဖို့၊ ပေးသင့် ပေးထိုက်တဲ့ အခွန်တွေ ပေးကြဖို့ဖြစ်ပါတယ်။ ကျွန်တော်တို့ကလည်း တတ်နိုင်သမျှ ကြိုးပမ်းဆောင်ရွက်ပေးမယ်။ ပြည်သူလူထုကလည်း တရားဥပဒေစိုးမိုးရေးကို ဦးဆောင်လိုက်တိုင်း လေးစားလိုက်နာကြမယ်ဆိုရင် မကွေးတိုင်း ဒေသကြီးရော ပြည်ထောင်စုမြန်မာနိုင်ငံတော်ပါ အေးချမ်းသာယာဖွံ့ဖြိုးတိုးတက်လာမှာ အမှန်ပါပဲ။
''တရားဥပဒေစိုးမိုးရေးကို ဖျက်လိုဖျက်ဆီးလုပ်နေတဲ့လူတွေ တစ်ဘို့တည်း သမားတွေအတွက်ကတော့ ဒါဟာကောင်းတဲ့ ကိစ္စမဟုတ်ပါဘူး။ နည်းမျိုးစုံနဲ့ နှောင့်ယှက် ပေးနေမှာပဲ ဖြစ်ပါတယ်။ သူတို့ ဘယ်လိုပဲ နှောင့်ယှက်နှောင့် ယှက် ကျွန်တော်တို့ကတော့ ကိုယ်စွမ်းဥာဏ်စွမ်းရှိသရွေ့ ကြိုးစားမှာပါ'' ဟု ပြောသည်။(ဖိုးသက်)ပြန်/ဆက်
No comments:
Post a Comment