ရန်ကုန်တိုင်းဒေသကြီးတွင် ၂၀၁၇-၁၈ ဘဏ္ဍာရေးနှစ်အတွင်း တည်ဆောက်မည့် လူကူးခုံးကျော်တံတား ၇ စင်း အတွက် မူလက ကျပ်သန်းပေါင်း ၇၇၀၀ သတ်မှတ်လျာထားခဲ့သော်လည်း လွှတ်တော်ကိုယ်စားလှယ်များ၏ ဝေဖန်ထောက်ပြဆွေးနွေးမှုကြောင့် ကျပ်သန်းပေါင်း ၄၀၀၀ နီးပါးပိုထွက်လာကြောင်း မတ်လ ၃၀ ရက်က ကျင်းပသော ဒုတိယအကြိမ် ရန်ကုန်တိုင်းဒေသကြီး လွှတ်တော်စတုတ္ထပုံမှန်အစည်းအဝေးမှ သိရသည်။
တံတားတစင်းလျှင် ကျပ်သန်း ၁၀၀၀ အသုံးပြုမည့် လူကူးခုံကျော်တံတား ၆ စင်းနှင့် ကျပ်သန်း ၁၇၀၀ အသုံးပြုမည့် စတုဂံ လူကူးခုံးကျော်တံတားတစင်းတို့၏ ကုန်ကျစရိတ်များ တွက်ချက်ထည့်သွင်းထားသော ၂၀၁၇-၁၈ ခုနှစ် ဘဏ္ဍာငွေအရ အသုံးဆိုင်ရာ ဥပဒေကြမ်းကို ဘဏ္ဍာရေးနှင့် စီမံကိန်းဝန်ကြီး ဦးမြင့်သောင်းမှ လွှတ်တော်တွင်တင်သွင်းခဲ့ရာ ရန်ကုန်တိုင်းဒေသကြီးအတွင်း၌ ဘဏ္ဍာငွေလျာထားချက်များ တိကျမှန်ကန်ရေး၊ ကိုယ်ကျိုးရှာအလွဲသုံးစားမှုမဖြစ်ပွားရေး၊ လျာထားချပေးထားသော ငွေကြေးများကို ထိရောက် မှန်ကုန်စွာ အသုံးပြုရေးတို့အတွက် ကိုယ်စားလှယ် ၁၁ ဦးတို့က လွှတ်တော်တွင် ဆွေးနွေးခဲ့ကြခြင်းဖြစ်သည်။
ယင်းသို့ ဆွေးနွေးရာတွင် လူကူးခုံးကျော်တံတား ၆ စင်းအတွက် တစင်းလျှင် ကျပ်သန်း ၅၀၀ နှုန်းဖြင့်လည်းကောင်း၊ စတုဂံ လူကူးခုံးကျော်တံတားတစင်းအတွက် ကျပ်သန်း ၁၀၀၀ အဖြစ်လည်းကောင်း ပြန်လည်ပြင်ဆင်သတ်မှတ်လိုက်သည့်အတွက် လူကူးခုံးကျော်တံတား ၇ စင်းအတွက် စုစုပေါင်း ကျပ်သန်းပေါင်း ၄၀၀၀ သာ သုံးစွဲသွားမည်ဖြစ်ကြောင်း ဘဏ္ဍာရေးရေးနှင့် စီမံကိန်းဝန်ကြီးဦးမြင့်သောင်းက ပြောကြားခဲ့သည်။ ခုံးကျော်တံတား ၆ စင်းမှ စိစစ်လျှော့ချငွေ ကျပ်သန်းပေါင်း ၃၀၀၀ နှင့် စတုဂံလူကူးခုံးကျော်တံတားမှ စိစစ်လျှော့ချငွေ ကျပ်သန်း ၇၀၀ စုစုပေါင်း ကျပ်သန်းပေါင်း ၃၇၀၀ ပိုထွက်လာသဖြင့် ယင်းငွေကြေးများကို ရန်ကုန်မြို့တွင်း လမ်းတံတားနှင့် ဖွံ့ဖြိုးရေးလုပ်ငန်းများအတွက် သုံးစွဲသွားမည်ဖြစ်ကြောင်းဝန်ကြီးက ပြောသည်။
၂၀၁၇-၁၈ ဘဏ္ဍာရေးနှစ်တွင် ခုံးကျော်တံတား ၇ စင်းကို ကမ်းနားလမ်းနှင့် ကမ်းနားလမ်းဟောင်း (စဥ့်အိုးတန်း သင်္ဘောဆိပ်ဝင်ထွက်ပေါက်) နေရာ၊ ကမ်းနားလမ်းနှင့် ကမ်းနားလမ်းဟောင်း (ဗိုလ်တထောင်စေတီဝင်ထွက်ပေါက်) နေရာ၊ ရွှေတိဂုံဘုရား အနောက်ဘက်မုခ်ပေါက်အနီး၊ ပြည်လမ်း အထက-၂ စမ်းချောင်းရှေ့၊ ပြည်လမ်း ၈-မိုင် ခုံးကျော်တံတား အဆင်းနေရာ၊ ပြည်လမ်း-ပညာရေး တက္ကသိုလ်ရှေ့နှင့် ဘုရင့်နောင်လမ်း (နာနတ်တောလမ်းနှင့် လှည်းတန်းလမ်းဆုံ) တို့တွင် တည်ဆောက်သွားမည်ဖြစ်သည်။
ယင်းခုံးကျော်တံတားများအား စက်လှေကားများ၊ အမိုးများပါဝင်သော ခေတ်မီလူကူးခုံးကျော်တံတားအဖြစ် တည်ဆောက်ရန် လျာထားပြီး သက်ကြီးရွယ်အိုများ၊ မသန်စွမ်းများအတွက်ပါ ရည်ရွယ်ကာ ဓာတ်လှေကားများပါ ထည့်သွင်းတည် ဆောက်ရန် လျာထားကြောင်း ၀န်ကြီးက ပြောသည်။ ယင်းအပြင် E-government အတွက် မူလလျာထားငွေ ကုန်ကျစရိတ် ကျပ်သန်း ၁၀၀၀ အား ကျပ်သန်း ၆၀၀၊ မြို့တော်ဂေါက်ကွင်းအတွက် မူလလျာ ထားငွေ ကျပ်သန်း ၅၅၀ အား ကျပ်သန်း ၄၀၀ သို့အသီးသီး စိစစ်ဖြတ်တောက်ခဲ့ရာ ပိုလျံငွေ စုစုပေါင်းကျပ်သန်း ၅၅၀ ကို လမ်းတံတားနှင့် ဖွံ့ဖြိုးရေးလုပ်ငန်းများအတွက် သုံးစွဲသွားမည်ဖြစ်ကြောင်း ၀န်ကြီးက ပြောသည်။
ရန်ကုန်တိုင်းဒေသကြီးအစိုးရအဖွဲ့၏ကိုယ်စား ၀န်ကြီးဦးမြင့်သောင်းမှ တင်သွင်းခဲ့သော ၂၀၁၇ ဘဏ္ဍာငွေအရ အသုံးဆိုင်ရာ ဥပဒေကြမ်းကို လွှတ်တော်မှ အတည်ပြုခဲ့သည်။
လင်းလင်းအောင်(News Watch)
No comments:
Post a Comment