Latest News

Tuesday, March 21, 2017

ရွှေတိဂုံစေတီမှာ ဖိနပ်အပ်ခ တစ်ရက်ကို ကျပ်ရှစ်သိန်းခန့် ရရှိ

ရွှေတိဂုံစေတီမှာ ဖိနပ်အပ်ခ တစ်ရက်ကို ကျပ်ရှစ်သိန်းခန့် ရရှိ

ရွှေတိဂုံစေတီတော်မှာ ဖိနပ်အပ်ခနှင့် သန့်စင်ခန်းအသုံးပြုခတို့ကို အလှူငွေအဖြစ်သာ လက်ခံတော့တာ ဖြစ်ပါတယ်။

ရွှေတိဂုံစေတီမှာ ဖိနပ်အပ်ခတစ်ရက်ကို အလှူငွေကျပ်ရှစ်သိန်းခန့်ရရှိတာကြောင့် ယခင်ကကန်ထရိုက်စနစ်နဲ့ ကွာဟမှုမရှိကြောင်း သိရပါတယ်။

‘‘အခု ဖိနပ်အပ်ဝန်ထမ်းတွေ နဲ့ ဆောင်ရွက်တဲ့ အခါမှာလည်း တစ်ရက်ကို ရရှိလာတဲ့ အလှူငွေကလည်း ရှစ်သိန်းခန့်ပါပဲ။ ဝင်ငွေကတော့ မကွာပါဘူး။ ကွာသွားတာကတော့ ဝန်ထမ်းစရိတ်ကို ပေးရတာရှိပါတယ်။ ကြွပ်ကြွပ်အိတ်တွေ ဝယ်ပေးရတာရှိတယ်။ ညဘက် ၁၀ နာရီအထိ ဖိနပ်အပ် တာဝန်လုပ်ပေးတဲ့ ဝန်ထမ်းတွေကို နေရာစီစဉ်ပေးတာတို့၊ အသွားအပြန်စီစဉ်ပေးတာတို့ အုပ်ချုပ်မှုကိစ္စပိုင်းမှာ ပိုလာတာရှိတယ်။ ဝန်ဆောင်မှု စရိတ်တွေကတော့ ရှုံးပါတယ်’’ လို့ ရွှေတိဂုံစေတီတော်ဂေါပကအဖွဲ့မှ ရုံးအဖွဲ့မှူး ဦးထွန်းအောင်ငွေက ပြောပါတယ်။
ရွှေတိဂုံစေတီမှာ မတ်လ ၁ ရက်က စတင်ပြီး ဖိနပ်အပ်ခနဲ့ သန့်စင်ခန်းခ ကန်ထရိုက်စနစ်ကို ဖျက်သိမ်းခဲ့တာ ဖြစ်ပါတယ်။  လက်ရှိ ရွှေတိဂုံစေတီတော်မှာ ဖိနပ်အပ်ခနဲ့ သန့်စင်ခန်းအသုံးပြုခတို့ကို အလှူငွေအဖြစ် မတ်လ ၆ ရက်က စတင်ကာ ဝန်ထမ်းတွေက လက်ခံနေတာ ဖြစ်ပါတယ်။

‘‘ဖိနပ်အပ်ကောင်တာမှာ ကန်ထရိုက်စနစ် မရှိတော့တဲ့အတွက် ဘုရားဖူးတွေ အရမ်းစိတ်ချမ်းသာသွားတယ်။ အလှူငွေ ထည့်လာတာမှာလည်း များတာလည်း ရှိသလို နည်းတာလည်း ရှိတယ်။ အရင်လိုပုံမှန်တော့မဟုတ်တော့ဘူးပေါ့။ တစ်ရာ၊ နှစ်ရာ၊ ငါးရာ၊ တစ်ထောင်စသဖြင့် နိုင်ငံခြားသားဆိုရင် ငါးထောင်၊ တစ်သောင်းထည့်တယ်။ အိတ်နဲ့သယ်သွားမယ်ဆိုရင် အခမဲ့ပေးတယ်။ ကန်ထရိုက်စနစ်နဲ့တုန်းကတော့ စီးပွားရေးဆန်ဆန်ပေါ့။ ကန်ထရိုက်သွင်းဖို့ကို ပိုက်ဆံကို အသည်း အသန်ရှာရတဲ့ သဘောဖြစ်တယ်။ အခုကျတော့ ကိုယ်လှူတဲ့ငွေက ဘုရားအတွက်ပဲဆိုတော့ ဘုရားဖူးလာသူတွေလည်း စိတ်ချမ်းသာကြသလို ကျွန်မတို့ကလည်း ဘု ရားဝန်ထမ်းတွေဆိုတော့ ပီတီဖြစ်ရပါတယ်’’ လို့ ရွှေတိဂုံဘုရားအနောက်ဘက်မုခ်ရှိ ဖိနပ်အပ်ကောင်တာမှ ဒေါ်ကြည်ကြည်စန်းက ပြောထားပါတယ်။
ရွှေတိဂုံစေတီရှိ အရှေ့၊ အနောက်၊ တောင်၊ မြောက် စောင်းတန်းလေးခုနဲ့ ဓာတ်လှေကားသုံးခုရှိ ဖိနပ်ကောင်တာတွေမှာ ဝန်ထမ်းသုံးဦးစီထားရှိပြီး အဆိုပါကောင်တာခုနစ်ခုမှ တစ်ရက်ကို ဖိနပ်အပ်ခအလှူငွေ ကျပ်ငါးသောင်းမှ တစ်သိန်းကျော်အတွင်း ကောက်ခံရရှိတာ ဖြစ်ပါတယ်။

Source: 7Day Daily : Duwun



No comments:

Post a Comment