ထိုင်းနိုင်ငံ လူကုန်ကူးခြင်းခံရပြီး ပြန်လည်ရောက်ရှိလာသူများကို တွေ့ရစဉ်
ထိုင်းနိုင်ငံ ငါးဖမ်းစက်လှေများတွင် လူကုန်ကူးခြင်းခံရပြီး၊ ထိုင်းနိုင်ငံ လူမှုဖွံ့ဖြိုးတိုးတက်ရေးနှင့် လူသားလုံခြုံရေးဝန်ကြီးဌာန လက်အောက်ရှိ ဂေဟာအသီးသီးတွင် စောင့်ရှောက်ထားသော မြန်မာနိုင်ငံသား ၃၈ ဦးအား ဒီဇင်ဘာ ၂၀ ရက် နံနက် ၉ နာရီ မိနစ် ၃၀ ခန့်က မြန်မာနိုင်ငံ မြ၀တီမြို့သို့ ပြန်လည်ပို့ဆောင်ပေးခဲ့ကြောင်း သိရသည်။
ထိုင်းနိုင်ငံ တာ့ခရိုင် မဲဆောက်မြို့ လ၀က ဦးစီးမှူး Mr.Sakchai Sawangsalla ဦးဆောင်သော အဖွဲ့မှ လာရောက် ပို့ဆောင်ခြင်းဖြစ်ပြီး မြ၀တီခရိုင်မှ တာဝန်ရှိသူများက လွှဲပြောင်း လက်ခံခဲ့ခြင်းဖြစ်သည်။
ထိုင်းနိုင်ငံသို့ သွားရောက် လုပ်ကိုင်ကြသည့် မြန်မာနိုင်ငံသားများအနက် လူကုန်ကူးခံရပြီး ငါးဖမ်းစက်လှေများတွင် ရောင်းစားခံထားရကြောင်း မြ၀တီမြိုခရိုင် လူကုန်ကူးမှု တားဆီးရေးရုံးမှ တာဝန်ရှိသူများက သိရှိခဲ့ပြီးနောက် ထိုင်းနိုင်ငံအတွင်း လူမှုကူညီရေးအဖွဲ့ လူကုန်တားအဖွဲ့များနှင့် ချိတ်ဆက်ကာ ပြန်လည်ကယ်တင်ပြီး ဂေဟာများတွင် ၁၀ လ ကျော်ကြာ စောင့်ရှောက်ထားပြီးမှ ပြန်လည် ပို့ဆောင်ပေးခြင်းဖြစ်ကြောင်း သိရသည်။
အဆိုပါ ပြန်လည် ရောက်ရှိလာသည့် မြန်မာနိုင်ငံသားများအား မြ၀တီခရိုင် အလုပ်သမား ညွှန်ကြားမှုဦးစီးဌာနမှ ဦးစီးအရာရှိ ဒေါ်အေးမြစန္ဒာဝင်းက ထိုင်းနိုင်ငံသို့ သွားရောက် လုပ်ကိုင်ကြမည့် မြန်မာနိုင်ငံသားများ အနေဖြင့် တရားဝင် သွားရောက် လုပ်ကိုင်ကြရန် လိုအပ်ကြောင်း ပြန်ရောက်လာသူများကို အားပေးစကား ပြောကြားခဲ့သည်။
ဧရာဝတီတိုင်း လပွတ္တာမြို့နယ်မှ ထိုင်းနိုင်ငံ ငါးဖမ်းစက်လှေတွင် လုပ်အားခမရဘဲ လုပ်ကိုင်ခဲ့ရသူ တစ်ဦးဖြစ်သည့် ကိုလင်းလင်းက “ထိုင်းမှာ အလုပ်ကောင်းတယ်ဆိုပြီး ကော့သောင်းလမ်းက ပွဲစားခေါ်သွားတာ။ ဟိုရောက်တော့ ငါးဖမ်းစက်လှေမှာ လုပ်တယ်။ လမ်းစရိတ်မပေးခဲ့ရဘူး။ သုံးလလုပ်ဆပ်ရမယ်ပြောတယ်။ ပထမစရောက်တုန်းက အခန်းထဲမှာ ဘယ်မှမထွက်ရထားတာပါ။ တစ်လကျော်လောက် လှောင်ပိတ်ထားတယ်။ ပြီးတော့ လှေထွက်ရတယ်။ အသက်အန္တရာယ်များတဲ့ အလုပ်က ထွက်ပြေးချင်နေချိန် ဦးကျော်သောင်းတို့ အဖွဲ့က လာကယ်လို့ လိုက်လာခဲ့တာပါ” ဟု ဆိုသည်။
အဆိုပါ အလုပ်သမားများမှာ ထိုင်းနိုင်ငံသို့ တရားမ၀င်ပွဲစားများ၏ ခေါ်ဆောင်မှုကြောင့် ငါးဖမ်းလှေသို့ လူကုန်ကူးခံရမှန်းကို နောက်မှသိရှိခဲ့ကြရပြီး လှေပြန်ဆိုက်ကပ်ချိန်လာခေါ်သူရှိ၍ လိုက်လာခြင်းဖြစ်ကြောင်းနှင့် ဂေဟာတွင် ၁၀ လ ကျော် နေထိုင်ခဲ့ရကြောင်း သိရသည်။
ထိုင်းနိုင်ငံအတွင်း နေထိုင်ပြီး လူကုန်ကူးခံရသူများအား နှစ်နိုင်ငံတာဝန်ရှိသူများနှင့် ချိတ်ဆက်ကာ ကူညီဆောင်ရွက်ပေးနေသည့် MAT အဖွဲ့ ဒါရိုက်တာ ဦးကျော်သောင်းက “ပထမ ဧရာဝတီတိုင်း လူကုန်တားအဖွဲ့က ဆက်သွယ်လာတယ်။ သူတို့ပေးတဲ့နာမည် တစ်ခုကို ဆက်သွယ်ရတယ်။ ထိုင်းလူကုန်တား အဖွဲ့နဲ့ ချိတ်ဆက်ပြီး ကယ်တင်ခဲ့တာ ဖြစ်ပါတယ်။ လူကုန်ကူးမှုခံရသူတွေကို ကာကွယ်ဖို့ ဒီနှစ်ထဲမှာ အခက်အခဲ ရှိပါတယ်။ ဘာလို့လဲဆိုတော့ ထိုင်းအစိုးရနဲ့ မြန်မာအစိုးရ ပူးပေါင်းဆောင်ရွက်တာ မှန်ပေမယ့် မူလနိုင်ငံဘက်က လူကုန်ကူးခံထားရသူရဲ့ အမှုဖွင့်တိုင်ကြားတဲ့စာ၊ ဖမ်းဝရမ်းတို့ကို ထိုင်းဘက်က တောင်းတဲ့အတွက် အစိုးရမဟုတ်တဲ့သူတွေအတွက် အခက်အခဲ ဖြစ်ပါတယ်။ သိသိနဲ့ လွှတ်ထားရတာရှိတယ်။ လူကုန်ကူးခံထားရသူကို ကယ်တင်ဖို့ အကျပ်ရိုက်နေတဲ့အတွက် လက်ရှိမြန်မာနိုင်ငံ အစိုးရအနေနဲ့ ကူညီဆောင်ရွက်ပေးစေ လိုပါတယ်” ဟု ပြောကြားသည်။
အဆိုပါ မြန်မာနိုင်ငံသား ၃၈ ဦးအနက် ကရင်ပြည်နယ်မှ ၂၃ ဦးကို နေရပ်သို့ တိုက်ရိုက်ပို့ဆောင်မည်ဖြစ်ကာ မွန်ပြည်နယ်၊ ရခိုင်ပြည်နယ်၊ ဧရာဝတီတိုင်းတို့မှ စုစုပေါင်း ၁၅ ဦးတို့အား မော်လမြိုင် လူမှုကယ်ဆယ်ရေး သင်တန်းကျောင်းသို့ ပို့ဆောင်ကာ ၎င်းးမှ တစ်ဆင့် မိမိနေရပ် မိဘများထံသို့ ဆက်လက် ပို့ဆောင်ပေးသွားမည်ဖြစ်ကြောင်း သိရသည်။
Writer:
ကိုရွှေသိန်း (မြ၀တီ)
Eleven Media Group
No comments:
Post a Comment