ဆလိုင်းသန့်စင်| September 9, 2016 |
ငပုတောမြို့နယ် ငရုတ် ကောင်း ဒေသရှိ ဂေါ်ရင်ဂျီ ကမ်းခြေ (ဓာတ်ပုံ – ဆလိုင်းသန့်စင်/ဧရာဝတီ)
ဧရာဝတီတိုင်းဒေသကြီး၊ ငပုတောမြို့နယ်၊ ငရုတ်ကောင်း ကမ်းခြေဒေသတွင် တည်ဆောက်ရန် SIM ကုမ္ပဏီမှ အဆိုပြုထားသည့် ကမ်းလွန်ထောက်ပံ့ ပို့ဆောင်ရေးစခန်း စီမံကိန်းကို ဧရာဝတီ တိုင်းဒေသကြီး လွှတ်တော် စီမံကိန်း ကော်မတီက စစ်ဆေးသွားမည်ဖြစ်ကြောင်း သတင်းရရှိသည်။
အမေရိကန်ဒေါ်လာ သန်း ၄၀၀ ခန့် ကုန်ကျနိုင်မည့် အဆိုပါ စီမံကိန်းကို ငရုတ်ကောင်းမြို့နယ်ခွဲ၊ နံ့သာပု ကျေးရွာအုပ်စုတွင် တည်ဆောက်ရန် မြန်မာနိုင်ငံသားပိုင် SIM ကုမ္ပဏီက နေပြည်တော်ရှိ မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) ထံ အဆိုပြုတင်ပြခဲ့ရာ MIC က ဧရာဝတီတိုင်း အစိုးရထံသို့ သဘောထားမှတ်ချက် တောင်းခံခဲ့သည်။
ထို့ကြောင့် ဧရာဝတီတိုင်း အစိုးရအဖွဲ့ကိုယ်စား ၀န်ကြီး ဦးလှကျော်က လက်ရှိကျင်းပလျှက်ရှိသည့် ဒုတိယအကြိမ် ဧရာဝတီတိုင်း လွှတ်တော် ဒုတိယမြောက် ပုံမှန်အစည်းအဝေးတွင် တင်ပြခဲ့ရာ တိုင်းလွှတ်တော်၏ စီမံကိန်းနှင့် စီးပွားကုန်သွယ်ရေး လုပ်ငန်းများ ဖွံ့ဖြိုးတိုးတက်ရေး ကော်မတီက စီမံကိန်းကို ကွင်းဆင်းစစ်ဆေးရန် တိုင်းလွှတ်တော်က ဆုံးဖြတ်ခဲ့ခြင်း ဖြစ်သည်။
“စီမံကိန်းလုပ်ဖို့ အဆိုပြုထားတဲ့ ငရုတ်ကောင်းဒေသကို ကျနော်တို့ ကွင်းဆင်းစစ်ဆေးဖို့ ပြင်နေပါပြီ။ နောက်တပတ်ထဲမှာ ဆင်းဖြစ်မယ်။ အဓိကကတော့ ဒီစီမံကိန်းဟာ ဒေသခံတွေရဲ့ စီးပွားရေး၊ လူမှုရေးတွေအပေါ် ကောင်းကျိုး၊ ဆိုးကျိုး ဘယ်လောက်ရှိမလဲ၊ သဘာဝ ပတ်ဝန်းကျင်အပေါ် ထိခိုက်နိုင်မှု အခြေအနေတွေကို အဓိကထား စစ်ဆေးသွားမှာပါ” ဟု တိုင်းလွှတ်တော် စီမံကိန်း ကော်မတီ ဥက္ကဋ္ဌ ပုသိမ်မြို့နယ်၊ အမှတ် ၂ တိုင်းဒေသကြီး လွှတ်တော်ကိုယ်စားလှယ် ဦးအောင်သူထွေးက ဧရာဝတီကို ပြောသည်။
လွှတ်တော်ကော်မတီ အနေဖြင့် ကွင်းဆင်းစစ်ဆေးပြီးနောက် လေ့လာတွေ့ရှိချက်နှင့် သဘောထား မှတ်ချက် အစီရင်ခံစာကို ယခုလ ၂၈ ရက်နေ့တွင် ပြန်လည်ကျင်းပမည့် လွှတ်တော်အစည်းအဝေးတွင် တင်ပြသွားမည်ဖြစ်ကြောင်း သိရသည်။
SIM ကုမ္ပဏီအနေဖြင့် ကမ်းလွန် ရေနံတွင်းများ၏ လိုအပ်လျှက်ရှိသော ပို့ဆောင်ရေးနှင့် အခြား ၀န်ဆောင်မှုလုပ်ငန်းများ ဆောင်ရွက်ပေးရန်အတွက် နိုင်ငံတကာအဆင့်မီ ကမ်းလွန်ထောက်ပံ့ ပို့ဆောင်ရေးစခန်းတခု တည်ဆောက်ရန် ရည်ရွယ်ထားပြီး စီမံကိန်း တည်ဆောက်ရန် နံ့သာပုကျေးရွာ အုပ်စုရှိ မြေဧရိယာ ၁၈၄ ဒသမ ၃၀ ဧကကို ဒေသခံတောင်သူ ၄၆ ဦးထံမှ ၂၀၁၅ ခုနှစ်အတွင်းက ၀ယ်ယူခဲ့ကြောင်း ကုမ္ပဏီ၏ အဆိုပြုလွှာတွင် ဖော်ပြထားသည်။
မြေအသုံးချခွင့်အတွက် ကုမ္ပဏီမှ တင်ပြလျှောက်ထားခဲ့ရာ ယခင်ဝန်ကြီးချုပ် ဦးသိန်းအောင် ဦးဆောင်သည့် ဧရာဝတီတိုင်း အစိုးရအဖွဲ့ဟောင်းက ယခုနှစ် မတ်လ ၁၁ ရက်နေ့တွင် လယ်ယာမြေ အခြားနည်းသုံးစွဲခွင့် ၃၀ (ခ) ကို ခွင့်ပြုပေးထားပြီး ဖြစ်ကြောင်း သိရသည်။
အဆိုပါစီမံကိန်းတွင် ဆိပ်ခံတံတား၊ ကုန်သိုလှောင်ရုံ၊ ရေသိုလှောင်ကန်၊ စက်ပစ္စည်းသိုလှောင်ရုံ၊ အသက်မွေးဝမ်းကျောင်းမှု သင်တန်းကျောင်း၊ ဟိုတယ်နှင့် စားသောက်ဆိုင်များ တည်ဆောက်ရန် ပါရှိပြီး သင်္ဘောကမ်းကပ်သည့် ၀န်ဆောင်မှု၊ ရုံးခန်းငှားရမ်းခြင်း ၀န်ဆောင်မှု၊ အကောက်ခွန် ၀န်ဆောင်မှု၊ လုံခြုံရေးနှင့် အစောင့်ချထားသည့် ၀န်ဆောင်မှုနှင့် မီးငြှိမ်းသတ်သည့် ၀န်ဆောင်မှုများ လုပ်ဆောင်ရန် ရည်ရွယ်ထားကြောင်း အဆိုပြုလွှာတွင် ရေးသားဖော်ပြထားသည်။
“စီမံကိန်းဖော်ပြချက်က အကျဉ်းချုပ်သာဖြစ်ပြီး ကောင်းတာတွေပဲ ဖေါ်ပြထားတယ်။ ဆိုးကျိုးတွေကို ဖော်ပြမထားဘူး။ စီမံကိန်းတခုမှာ ဆိုးကျိုး ကောင်းကျိုး နှစ်မျိုးစလုံးရှိမှာ ဆိုပေမယ့် ဒေသခံ ပြည်သူတွေရဲ့သဘောထားက အရေးကြီးပါတယ်။ ဒေသခံပြည်သူကို ချပြပြီး ပြည်သူရဲ့ သဘောထားတွေ ရယူသင့်ပါတယ်” ဟု ဧရာဝတီတိုင်းဒေသကြီး လွှတ်တော် ငပုတောမြို့နယ် ကိုယ်စားလှယ် ဦးဖြိုးဇော်ရွှေက ပြောသည်။
ငရုတ်ကောင်း ကမ်းခြေဒေသတွင် ဂေါ်ရင်ဂျီကျွန်းနှင့် သဘာဝ အတိုင်းရှိနေသော တောတောင်ကမ်းခြေ များကြောင့် စက်မှုဆိုင်ရာ လုပ်ငန်းများထက် ခရီးသွားလုပ်ငန်းများနှင့် ဒေသဖွံ့ဖြိုးရေးများ လုပ်ပေးစေချင်ကြောင်း ငရုတ်ကောင်းမြို့ခံ ဦးမောင်ကံက ပြောသည်။
“ဒီစီမံကိန်းက ယခင်အစိုးရ လက်ထက်ကတည်းက လုပ်မယ်ဆိုတဲ့ ရေနက်ဆိပ်ကမ်း စီမံကိန်းကို အခုမှ ပုံစံတမျိုးနဲ့ ပြန်အကောင်အထည် ဖော်တာလို့ ထင်တယ်။ ကျနော်တို့ ဒေသခံတွေကတော့ စီမံကိန်းကြောင့် ဒေသရဲ့ လူမှုစီးပွား အခြေအနေတွေ ပျက်ပြားကုန်မှာ စိုးရိမ်ပါတယ်” ဟု သူက ပြောသည်။
ငရုတ်ကောင်းဒေသ၊ နံ့သာပုကျေးရွာအနီးရှိ ဂေါ်ရင်ဂျီကျွန်းနှင့် ဂေါ်ရင်ဂျီကမ်းခြေမှာ သာယာ လှပသည့်အတွက် ယခုနှစ်ပိုင်းအတွင်း ပြည်တွင်းပြည်ပ ခရီးသွားများအကြား ရေပန်းစားနေပြီး တနှစ်ထက်တနှစ် လာရောက်လည်ပတ် အပန်းဖြေသူ များပြားလာသည့် ဒေသတခု ဖြစ်သည်။
Irrawaddy
Monday, September 12, 2016
ငရုတ်ကောင်းတွင် တည်ဆောက်လိုသည့် ဒေါ်လာသန်း ၄၀၀ တန် စီမံကိန်းကို လွှတ်တော်ကော်မတီ စစ်ဆေးမည်
ငရုတ်ကောင်းတွင် တည်ဆောက်လိုသည့် ဒေါ်လာသန်း ၄၀၀ တန် စီမံကိန်းကို လွှတ်တော်ကော်မတီ စစ်ဆေးမည်
Reviewed by timeayeyar
on
10:40 PM
Rating: 5
Subscribe to:
Post Comments (Atom)
No comments:
Post a Comment