တကယ်တော့ အခိုက်အတန့်လေးပါပဲ။ ဟုတ်တယ်။ အဲဒီအခိုက်အတန့်လေးမှာ အရာအားလုံး ဖြစ်သွားခဲ့ကြတယ်။ ပြီးတော့အရာအားလုံး ပျက်သွားခဲ့ကြတယ်။ တကယ့်ကို အခိုက်အတန့်လေးပဲ။ မထင်မှတ်တဲ့ အမှတ်တမဲ့တွေ ပျော်ဝင်စီးဆင်းနေတဲ့ အခိုက်အတန့်ပေါ့။ ဟောဒီမှာကြည့် ဘယ်သူမှသတိမထားမိတဲ့အချိန်မှာ အခိုက်အတန့်ပေါ်လာတယ်။ ပြီးနောက် အားလုံးမေ့တိမေ့လျော့ ဖြစ်နေတုန်းအခိုက်အတန့် ပျောက်သွားတယ်။ သေချာတယ်။ ဘယ်သူမှမထင်ထားတဲ့ အချိန်အခိုက်အတန့် ရောက်လာဦးမှာပဲ။ လိုက်ဖမ်းတော့ ပျောက်ကွယ်ပြီး မဖမ်းတဲ့အချိန်ရှိနေတာ အခိုက်အတန့်ပဲ။ ပြောနေတုန်းရောက်လာပြီး ပြောပြီးချိန် ပျောက်သွားတာ အခိုက်အတန့်ပဲ။ ဘယ်လိုလဲ အခိုက်အတန့်။ ဘယ်မှာလဲ အခိုက်အတန့်။ ဘာလဲအခိုက်အတန့်။ အခိုက်အတန့်ဘာလဲ။
အခိုက်အတန့်အကြောင်း ပြောနေတုန်း ၀ုန်းခနဲအသံကြားလိုက်တယ်။ လှည့်ကြည့်လိုက်တော့ ဆိုင်ကယ်တစ်စီး လမ်းမပေါ်မှာလဲလို့။ ဆိုင်ကယ်သမားက မှောက်လျက်ငြိမ်လို့။ အခိုက်အတန့်လေးမှာ ဖြစ်ပျက်သွားတာ။ ဘာမှမကြာလိုက်ဘူး။ အခိုက်အတန့်လေးပဲ။ အဲဒီအခိုက်အတန့်မှာ လူတွေစုပြုံရောက်လာကြတယ်။ ပြီးခဲ့တဲ့ အခိုက်အတန့်လေးမှာ ဖြစ်ပျက်သွားတဲ့အကြောင်းကို တစ်ယောက်တစ်ပေါက် ပြောကြတယ်။ အတိတ်မှာ ကျန်ရစ်ခဲ့တဲ့ အခိုက်အတန့်ကို စကားလုံးတွေနဲ့ ပုံဖော်နေကြတယ်။ တကယ့်ကို အခိုက်အတန့်လေးဗျာ။ ဟုတ်တယ် ၀ုန်းခနဲအသံကြားလို့ လှည့်ကြည့်တဲ့ အခိုက်အတန့်မှာ ဖြစ်သွားတာ။ အဲဒီအချိန်မှာ အခိုက်အတန့်ဟာ လူအုပ်ကြားထဲက တိုးထွက်လို့ ပျောက်ကွယ်သွားခဲ့ပြီ။ အခိုက်အတန့်မှာ ကိုယ်ပျောက်ဝတ်စုံရှိထားပုံပဲ။ ဘယ်သူမှ အခိုက်အတန့်ကိုမမြင်ရဘူး။ ပြီးတော့ အခိုက်အတန့်က အသံလည်းမထွက်ဘူး။ အခိုက်အတန့်ရဲ့ ခြေသံကိုဘယ်သူမှမကြားရဘူး။ တကယ်တော့ အခိုက်အတန့်မှာ ရောက်လာတတ်တဲ့ အခိုက်အတန့်ပါပဲ။
အဲဒီအခိုက်အတန့်မှာပဲ မိုးကဝေါကနဲ ရွာချလိုက်တယ်။ မိုးရွာတဲ့အခိုက်အတန့်မှာ လူတွေပြာယာခတ်ကုန်ကြတယ်။ အဲဒီအခိုက်အတန့်မှာ ထီးဖွင့်သူဖွင့် အမိုးအကာ အောက်ပြေးသူပြေး။ လှုပ်လှုပ်ရှားရှား ဖြစ်သွားတဲ့အခိုက်အတန့်ပါပဲ။ ရွာချလိုက်တဲ့ မိုးစက်တွေနဲ့အတူ အခိုက်အတန့် တစ်ကိုယ်လုံး ရွှဲရွှဲစိုသွားတယ်။ အခိုက်အတန့်က မိုးစက်တွေကို ခါချလိုက်တယ်။ လွင့်စဉ်သွားတဲ့ မိုးစက်တွေထဲမှာ အခိုက်အတန့်။ ‘အ’ တစ်လုံး၊ ‘ခိုက်’ တစ်လုံး၊ ‘အ’ တစ်လုံး၊ ‘တန့်’ တစ်လုံးတကွဲတပြားစီ လွင့်စင်ထွက်သွားကြတယ်။ အဲဒီအခိုက်အတန့်မှာပဲ အခိုက်အတန့်လေးလုံး ပြန်လည်စုစည်းလိုက်ကြတယ်။ နောက်မိုးရေထဲပြေးထွက် အခိုက်အတန့် ပျောက်ကွယ်သွားတယ်။ အဲဒီအခိုက်အတန့်မှာပဲ မိုးက ဗြုန်းခနဲရပ်သွားတယ်။ မိုးတိတ်သွားတဲ့ အခိုက်အတန့် အမိုးအကာအောက်ထဲက ထွက်လာကြတယ်။ ထီးပိတ်ပြီး လမ်းဆက်လျှောက်ကြတယ်။ အခိုက်အတန့်ကတော့ သူတို့နောက်ကို တကောက်ကောက်လိုက်လို့ပေါ့။ အခိုက်အတန့်ကို ဘယ်သူမှမမြင်ဘူး။ အခိုက်အတန့်က ရယ်တယ်။ ဘယ်သူမှမကြားဘူး။ တကယ်မလွယ်တဲ့ အခိုက်အတန့်ပဲ။
ကြည့်ရတာ အခိုက်အတန့်က တစ်နေရာရာကနေ ချောင်းကြည့်နေသလိုပဲ။ တစ်နေရာရာမှာ တစ်ခုခုဖြစ်ပြီဆို အခိုက်အတန့်ရောက်လာပြီ။ အဲဒီအခိုက်အတန့်မှာ အခိုက်အတန့်ကို ကြည့်ရင်မြင်ရလေမလား။ ပြောမယ့်သာပြောတာ အခိုက်အတန့်ရောက်လာမယ့်အချိန်ကို ဘယ်သူမှကြိုမသိနိုင်ဘူး။ ကဲရောက်လာပါပြီတဲ့ အခိုက်အတန့်မှန်း ဘယ်လိုသိနိုင်မလဲ။ ဘယ်လိုမှမသိနိုင်ဘူး။ အခိုက်အတန့်ကို အခိုက်အတန့်ပဲ သိနိုင်မယ်။ မြင်နိုင်မယ်။ တော်တော်စားတဲ့ အခိုက်အတန့်ပဲ။ အဲဒီအခိုက်အတန့်မှာ အခိုက်အတန့်က တစ်ကိုယ်တည်းပြုံးပြီး တွေးနေတယ်။ တော်တော်တုံးတဲ့လူတွေပဲ။ ငါကသူတို့အနားမှာ အချိန်တိုင်းရှိနေတာ မသိကြဘူး။ ပုံသဏ္ဌာန်အမျိုးမျိုးနဲ့ အခိုက်အတန့်ရှိနေတာကို လူတွေမသိကြဘူးတဲ့။ ဒါဆိုအခိုက်အတန့်ဟာ ကာလစားသတ္တ၀ါလား။ ဒေသမှားနေထိုင်သူလား။ ဒါမှမဟုတ်...ဒါမှမဟုတ်...။
အဲဒီအခိုက်အတန့်မှာပဲ အခိုက်အတန့်က အနားကနေ ဖြတ်သွားတယ်။ အ၀တ်စတချို့ကို အခိုက်အတန့်က ပွတ်သပ်သွားတယ်။ မမြင်ရတဲ့ လက်တစ်စုံနဲ့ အခိုက်အတန့်။ ကြောင်လိုလို ကျားလိုလို ဘယ်လိုပုံသဏ္ဌာန်မှန်းမသိတဲ့ အခိုက်အတန့်။ ဟောကိုယ်ခန္ဓာအနှံ့ ရွစိရွစိနဲ့ တရွေ့ရွေ့တက်လာတဲ့ အခိုက်အတန့်။ ကြည့်စမ်း မွေးညှင်းပေါက်တွေထဲမှာ ၀င်ချည်ထွက်ချည် အခိုက်အတန့်။ ခါချလိုက်တဲ့ အခိုက်အတန့်မှာ ကွာကျမသွားတဲ့ အခိုက်အတန့်။ အဲဒီအခိုက်အတန့်မှာ တစ်ခုခုဖြစ်သွားနိုင်တဲ့ အခိုက်အတန့်။ လှည်းနေလှေအောင်း မြင်းဇောင်းမကျန် လျှောက်သွားနေတဲ့ အခိုက်အတန့်။ အမှိုက်ကောက်သမားရဲ့ ကောက်တံမှာ ငြိတွယ်ပါလာတဲ့ အခိုက်အတန့်။ ပယင်းကောင်လဲ့လဲ့ ဖန်ကလပ်ထဲမှာ ကူးခတ်ပျော်ပါးနေတဲ့ အခိုက်အတန့်။ တိုနံ့နံ့စကပ်လေးနောက်ကို တကောက်ကောက်လိုက်ပါသွားတဲ့ အခိုက်အတန့်။ ၀င်လေနဲ့ထွက်လေကြားက အခိုက်အတန့်။ သုတေသနခန်းမှာ စမ်းသပ်ခံနေရတဲ့ အခိုက်အတန့်။ ရှစ်လွှာမြောက်တိုက်ခန်းပေါ်က ခုန်ချလိုက်တဲ့ အခိုက်အတန့်။ ဘာရယ်မဟုတ် ငေးမိငေးရာ ငေးကြည့်နေတဲ့အခိုက်အတန့်။ တစ်ခုခုပြောမလို ပါးစပ်ပြင်လိုက်တဲ့ အခိုက်အတန့်။ အိုမင်းရင့်ရော်ခြင်းကို ရောဂါဘယတွေနဲ့ ဆွဲဆန့်ထားရတဲ့ အခိုက်အတန့်။ အကုသိုလ်ကို အတိုးရောအရင်းပါ ပေါင်းထည့်နေတဲ့ အခိုက်အတန့်။ ဆင်းရဲမွဲတေမှုက မွေးရာပါလို စွဲကပ်နေတဲ့ အခိုက်အတန့်။ ခိုကလေးတွေကို အစာကျွေးနေတဲ့ အခိုက်အတန့်။ ညောင်သီးလည်း စားလေးသံလည်း နားစွင့်နေတဲ့ အခိုက်အတန့်။ အဲဒီအခိုက်အတန့်မှာပဲ အခိုက်အတန့်ဟာ အခိုက်အတန့်တွေကို တတိတိကိုက်ဝါးလို့ အခိုက်အတန့်ကြီး ရှင်သန်လာခဲ့ရပြီ။ အခိုက်အတန့် သန်မာလာခဲ့ရပြီ။
အဲဒီအခိုက်အတန့်မှာပဲ မမျှော်လင့်ဘဲ ‘အခိုက်’ နဲ့ ‘အတန့်’ ကွဲကွာသွားကြတယ်။ ‘အခိုက်’ ကရှေ့ရောက်ပြီး ‘အတန့်’ ကနောက်မှာပြတ်ကျန်ခဲ့တယ်။ ဒါပေမဲ့ ‘အတန့်’ ကအသည်းအသန် ပြေးလိုက်လာလို့ မကြာခင်မှာ ‘အခိုက်’ နဲ့ ‘အတန့်’ ပြန်လည်ပူးပေါင်းပြီး အခိုက်အတန့် ဖြစ်သွားကြတယ်။ အံ့သြစရာကောင်းတာက အခိုက်အတန့်နောက်ကို တခြားအခိုက်အတန့်တစ်ခုက ကပ်လိုက်လာခြင်းပဲ။ သေချာကြည့်တော့မှ အဲဒီအခိုက်အတန့်နောက်ကို တခြားတခြားသော အခိုက်အတန့်တွေ တသီတတန်းကြီး ကပ်လိုက်လာကြပါလား။ မဆုံးနိုင်တဲ့ အခိုက်အတန့်တန်းကြီးဟာ တရွေ့ရွေ့ခရီးနှင်နေကြပါတော့တယ်။ အဲဒီအခိုက်အတန့်ခရီးကြီး ဘယ်တော့ပြီးဆုံးမလဲ။ ဘယ်သူမှ သေချာမပြောနိုင်ကြပါဘူး။ ချီးကျူးဖို့ကောင်းတာက အဲဒီအခိုက်အတန့်တွေဟာ စည်းကမ်းရှိကြပါတယ်။ အခိုက်အတန့်အချင်းချင်း ခွကျော်ခြင်း၊ နေရာလုခြင်း၊ ရန်ဖြစ်ခြင်း မရှိကြပါဘူး။ ရှေ့ကစီနီယာအခိုက်အတန့်ကို နောက်ကဂျူနီယာအခိုက်အတန့်က လေးလေးစားစား အသိအမှတ်ပြုပါတယ်။ ဒါဟာအခိုက်အတန့်အချင်းချင်း Respect ထားတဲ့သဘောပါပဲ။
အဲဒီလိုတရွေ့ရွေ့သွားနေတဲ့ အခိုက်အတန့်တန်းကြီးကို ကြည့်ရင်းစဉ်းစားမိတယ်။ အခိုက်အတန့် တစ်ခုနဲ့တစ်ခုကြား ဘယ်လောက်အကွာအဝေးရှိမလဲ။ ‘အခိုက်’ နဲ့ ‘အတန့်’ ကြားမှာရော ဘယ်လောက်ကွာခြားမလဲ။ အဲဒီလိုပဲ ‘အ’ နဲ့ ‘ခိုက်’ ကြား၊ ‘အ’ နဲ့ ‘တန့်’ ကြားမှာရော ဘယ်လောက်ကွာမလဲ။ ‘အခိုက်အတန့်’ ဆိုတာတိုတောင်းတဲ့အချိန်ကာလလို့ ပြောကြတယ်။ ဒါဆိုရင်လူတွေဟာ အခိုက်အတန့်တွေကြားထဲမှာ ရှင်သန်ရုန်းကန်နေရတဲ့သူတွေလို့ ပြောရတော့မှာပေါ့။ ထို့အတူ ‘အခိုက်’ နဲ့ ‘အတန့်’ ကြားမှာရှင်သန်နေရသူတွေ။ ‘အ’ နဲ့ ‘ခိုက်’ ကြား ‘အ’ နဲ့ ‘တန့်’ ကြားမှာ ရုန်းကန်နေရသူတွေလို့လည်း ပြောလို့ရပါတယ်။
အချိန်နဲ့တည်ဆောက်ထားတဲ့ လူသားတွေအဖို့ ‘အခိုက်အတန့်’ ဟာမလွဲမသွေ ဖြတ်သန်းရမယ့် ‘နယ်မြေ’ တစ်ခုပါပဲ။ လူတွေဟာ တစ်ခါတစ်ရံ အဲဒီအခိုက်အတန့်ကို တံတားလုပ်ပြီး လျှောက်တယ်။ တစ်ခါတလေ လေဟုန်ခိုပြီးစီးတယ်။ တစ်ခါတစ်ခါကျတော့ အဲဒီအခိုက်အတန့်ထဲ ကျွမ်းထိုးမှောက်ခုံလဲ ကျသွားတယ်။ တစ်ခါတလေကျတော့ ကံဆိုးမိုးမှောင်ကျကာ အဲဒီအခိုက်အတန့်ထဲမှာ အသက်ပျောက်သွားရှာတယ်။ တကယ်တော့ အခိုက်အတန့်ဟာ ‘ကတ္တား’ လည်းမဟုတ်သလို ‘ကံ’ လည်းမဟုတ်ပါဘူး။ လူသားတွေ ဖြတ်သန်းတဲ့ခရီးလမ်းမှာ အမှတ်အသားပြထားတဲ့ မိုင်တိုင်လေးတွေလိုပါပဲ။ တစ်ခုပဲကွာခြားပါတယ်။ ‘အခိုက်အတန့်’ ဆိုတာ ထင်ထင်ရှားရှား သိသိသာသာ အတိအကျ စာနဲ့ရေးမှတ်ထားတာမဟုတ်တဲ့အတွက် မျက်လုံးနဲ့မမြင်နိုင်တဲ့ ‘အချိန်မှတ်တိုင်’ တစ်ခုပါပဲ။
မောင်ကြည်
Eleven Media Group
No comments:
Post a Comment