Latest News

Wednesday, September 5, 2018

မြို့ပြခရီးသွားကဏ္ဍ ကတ်စနစ်တစ်ခု ပါဝင်မှ

မြို့ပြခရီးသွားကဏ္ဍ ကတ်စနစ်တစ်ခု  ပါဝင်မှ



ကားမှတ်တိုင်တွင် ရပ်တန့်ထားသော ဝိုင်ဘီအက်စ်တစ်စီးပေါ်တက်ရင်း ယာဉ်ပေါ်မှ အသံတစ်သံကြောင့် လက်ထဲတွင် ဆုပ်ကိုင်ထားသော နှစ်ရာတန်ကို အသံရှင်၏လက်တွင်းသို့ အလိုက်သင့် ထည့်ပေးလိုက်မိသည်။ အသံရှင်က လက်ထဲတွင် တစ်ထောင်တန် ငွေစက္ကူ
ကို လက်တွင်ကိုင်ရင်း မိမိနောက်မှ ကားပေါ်လိုက်တက်လာသူထံမှ ငွေနှစ်ရာကျပ်ကို   ထပ်မံတောင်းယူလိုက်သည်။
ဤကား ဝိုင်ဘီအက်စ်ကို  နေ့စဉ်စီးနေသူတို့   ကြုံတွေ့နေရသော ငွေအကြွေအခက်အခဲပင်ဖြစ်သည်။
ဝိုင်ဘီအက်စ်၏ ရပ်တည်မှုက အချိန်ကာလတစ်ခုရောက် သည့်တိုင်အောင် ငွေအကြွေပြဿနာက အခက်အခဲရှိနေဆဲပင် ဖြစ်သည်။ ကြိုတင်ငွေပေးချေမှုကတ်စနစ်က ယနေ့ထက်တိုင် အကောင်အထည်မပေါ်သေးပေ။    ရန်ကုန်တိုင်းဒေသကြီး၏ သယ်ယူပို့ဆောင်သွားလာရေးတွင်   ငွေအကြွေရှားပါးမှုက ဖြေရှင်းရန်ကြန့်ကြာနေသော ပုစ္ဆာတစ်ပုဒ်နှယ်။
''ရန်ကုန်မြို့မှာ တစ်ချိန်က ဘီအမ်ကားတွေ၊ တကယ့်ကို ဂျုံးဂျုံးကျနေတဲ့   ကားစုတ်တွေ၊    လက်ယာကပ်မောင်းမှာ    ဘယ်ဘက်က ဆင်းနေရတဲ့ တံခါးပေါက်တွေကို ပြန်ပိတ်ပြီး လက်ယာဘက်ကို အပေါက်သစ်တွေ ဖောက်ထားရတဲ့ ကားမျိုး တွေကိုတော့ တဖြည်းဖြည်း ရန်ကုန်မြို့ရဲ့မြင်ကွင်းတွေထဲကနေ လျော့ပါးသွားနေတယ်ဆိုတာကတော့ လက်တွေ့ပြသနေတာပဲ ဖြစ်ပါတယ်။   ဒီအခြေအနေတွေကို  တိုးမြှင့်ဆောင်ရွက်နိုင်ဖို့ ကြိုးပမ်းဆောင်ရွက်နေပါတယ်။ ဒီ့အပြင် သယ်ယူပို့ဆောင်ရေး စနစ်နဲ့ ပတ်သက်ပြီး ရန်ကုန်မြို့တွင်း အများပြည်သူသွားလာနိုင် ရေးအတွက် သယ်ယူပို့ဆောင်ရေး လုပ်ငန်းကဏ္ဍနယ်ပယ်ကို တိုးမြှင့်ဆောင်ရွက်နိုင်ဖို့အတွက်   ကြိုးပမ်းဆောင်ရွက်နေပါ တယ်''ဟု သြဂုတ် ၂၄ ရက်က ကျင်းပသည့် ရန်ကုန်တိုင်းဒေသကြီး အစိုးရအဖွဲ့၏ ဒုတိယ(၁)နှစ်တာ ဆောင်ရွက်ချက်များ သတင်း စာရှင်းလင်းပွဲတွင် တိုင်းဒေသကြီးဝန်ကြီးချုပ်က ပြောကြား ခဲ့သည်။
ရန်ကုန်တိုင်းဒေသကြီး    သယ်ယူပို့ဆောင်ရေး  ကြီးကြပ် ကွပ်ကဲမှုအာဏာပိုင်အဖွဲ့သည် ၂ဝ၁၇ ခုနှစ် ဇန်နဝါရီ ၁၆ ရက်မှ စတင်ကာ ဝိုင်ဘီအက်စ်ကို    မွေးဖွားခဲ့သည်။     တစ်ဦးချင်း ပိုင်ဆိုင်မှုကို  အခြေခံစုဖွဲ့တည်ဆောက်မှုအစား အများပိုင် ကုမ္ပဏီဖွဲ့ကာ  စနစ်တကျစီမံပြေးဆွဲနိုင်သော  စနစ်တစ်ရပ်ကို ဖော်ဆောင်ခဲ့သည်။ ဝိုင်ဘီအက်စ်စနစ်သစ် စတင်စဉ်ကာလကတစ်ဦးချင်းပုဂ္ဂလိကပိုင်ယာဉ်အများစုနှင့် ကုမ္ပဏီပိုင်ယာဉ်များ အား စုပေါင်း၍ ကုမ္ပဏီနှင့် ယာဉ်လိုင်းအဖွဲ့ပေါင်း ၂၆ ဖွဲ့ဖြင့်  ယာဉ်ခရီး စဉ်လမ်းပေါင်း (၇၆)လမ်းတွင် ယာဉ်အစီးရေ ၃၉၅၆ စီးဖြင့် ပြေးဆွဲခဲ့သည်။   ထိုစဉ်က ခရီးသည် ၁ ဒသမ ၃ သန်း ကျော် သယ်ယူပို့ဆောင်ပေးနိုင်ခဲ့သည်။
ရန်ကုန်လူထု  အဆင်ပြေချောမွေ့စွာ  သွားလာနိုင်ရေး အတွက်  လုံခြုံစိတ်ချပြီး   သက်သောင့်သက်သာဖြစ်စေမည့် ယာဉ်အစီးရေတစ်ထောင်ကျော်ကို တိုင်းဒေသကြီးအစိုးရအဖွဲ့  က ဖြည်းဆည်းပေးခဲ့သည်။ ကုမ္ပဏီပိုင်ယာဉ်များ ဖြစ်ပေါ်လာ စေရေးအတွက် အားပေးမှုကြောင့် အိုးမီနီဖိုးကတ်စ်နှင့် လူထု မိတ်ဆွေကုမ္ပဏီတို့က ယာဉ်အစီးရေတစ်ထောင် ဖြည့်တင်း ပြေးဆွဲခဲ့ကြသည်။ ဗန္ဓုလကုမ္ပဏီလီမိတက်(ပါရမီ)နှင့် အခြား ကုမ္ပဏီများကလည်း ခေတ်မီစီးတီးဘတ်ယာဉ်သစ်များ ဝယ်ယူ ပြေးဆွဲခဲ့ကြသည်။  ထိုသို့  ဝိုင်းဝန်းကြိုးပမ်းမှုကြောင့် တစ်နှစ် ကျော်ကာလအတွင်း ပုဂ္ဂလိကပိုင်ယာဉ်များနေရာတွင် ကုမ္ပဏီ ပိုင် စီးတီးဘတ်စ်ယာဉ်ကြီးများအများစုဖြင့် အစားထိုးပြေးဆွဲ နိုင်ခဲ့သည်။
ရန်ကုန်မြို့တော်ကြီး၏     သယ်ယူပို့ဆောင်ရေးကဏ္ဍတွင် ဝိုင်ဘီအက်စ်စနစ်ပြောင်းလဲပြီး တစ်နှစ်ကျော်ကာလဖြစ်သည့် ၂ဝ၁၈ ခုနှစ် မတ်လ၌ ကုမ္ပဏီနှင့် ယာဉ်လိုင်းအဖွဲ့ပေါင်း ၂၅ ဖွဲ့မှ နေ့စဉ်ယာဉ်အစီးရေ ၄၅ဝဝ ခန့်ဖြင့် ခရီးစဉ်လမ်းပေါင်း  ၁ဝ၃ လမ်းတွင် တစ်လလျှင် ခရီးသွားပြည်သူ ၅၂ သန်းကျော်၊ ခရီးသွား ပြည်သူ ၁ ဒသမ ၇ သန်းအား သယ်ယူပို့ဆောင်ပေးလျက်ရှိသည်။  ဝိုင်ဘီအက်စ်စနစ်သစ်တွင် ယာဉ်အိုယာဉ်ဟောင်းများကို အများ ပြည်သူသယ်ယူပို့ဆောင်မှုအခန်းကဏ္ဍမှ လျှော့ချခဲ့ရာ ၂ဝ၁၈ ခုနှစ် ဧပြီ ၁ ရက်မှစ၍ ၁၉၉၆၊ ၁၉၉၇၊ ၁၉၉၈ ခုနှစ် ထုတ်လုပ်   သော ခရီးသည်တင်မော်တော်ယာဉ်များအား ယာဉ်လိုင်းများ တွင် ပြေးဆွဲခြင်းမှ ရပ်ဆိုင်းခဲ့သည်။
မြို့တော်ရန်ကုန်ရှိ ခရီးသည်တင်ယာဉ်ကြီးများ မောင်းနှင် သွားလာမှုတွင် ထိန်းသိမ်းကြပ်မတ်ရန် နေရာပြစနစ်တပ်ဆင်၍ ရန်ကုန်ဘတ်စ်အော်ပရေတာများက ယာဉ်များစည်းကမ်းတကျ ရှိရေး ကြီးကြပ်နိုင်ခဲ့သည်။ ယာဉ်ပေါ်တွင် စီစီတီဗွီများ တပ်ဆင် ခြင်းဖြင့် ခရီးသွားများအတွက် ပိုမိုကောင်းမွန်သော လုံခြုံရေး ဝန်ဆောင်မှုကို ပေးနိုင်ခဲ့သည်။ ထို့ပြင် အသံဖိုင်စနစ်တပ်ဆင်၍ ရောက်ရှိမှတ်တိုင်အသိပေးခြင်းကို       စမ်းသပ်လျက်ရှိသည်။ တိုင်ကြားမှုလက်ခံဌာနဖွင့်လှစ်၍ ပြည်သူများ၏ အခက်အခဲများ ကို ဖြေရှင်းဆောင်ရွက်ပေးနိုင်ခဲ့သည်။ မော်တော်ယာဉ်အသုံးပြု စစ်ဆေးရေးအဖွဲ့ သုံးဖွဲ့၊ ယာဉ်ထိန်းရဲတပ်ဖွဲ့နှင့် ရန်ကုန်တိုင်း ဒေသကြီး သယ်ယူပို့ဆောင်ရေးကြီးကြပ်ကွပ်ကဲမှု အာဏာပိုင် အဖွဲ့မှ ဝန်ထမ်းများပါဝင်သော စစ်ဆေးရေးအဖွဲ့ ၁ဝ ဖွဲ့ဖြင့်လည်း စည်းကမ်းဖောက်ဖျက်မှုများအား အရေးယူခဲ့သည်။
ရန်ကုန်မြို့တွင် ကုန်သေတ္တာတင်ကာ မောင်းနှင်သွားလာ နေသည့် ကုန်တင်ယာဉ်ကြီးများနှင့် ပတ်သက်၍ ''သယ်ယူ ပို့ဆောင်ရေးနဲ့ ပတ်သက်ပြီး ကုန်သေတ္တာကားတွေကို ညဘက် မှာထွက်ဖို့အတွက်လည်း ဆောင်ရွက်ခဲ့ပါတယ်။ တစ်ခါတုန်းက   ရန်ကုန်မြို့ထဲမှာ  ကုန်သေတ္တာကားတွေဟာ နေ့ခင်းပိုင်းကိုပါ ဝင်ထွက်သွားလာနေတာဖြစ်တဲ့အတွက် ယာဉ်ကြောပိတ်ဆို့မှု တွေကို ပိုပြီးဖြစ်စေပါတယ်။ ဒါကြောင့်မို့လို့ ညဘက်မှာပဲ မြို့တွင်း မှာရှိတဲ့  ဆိပ်ကမ်းတွေကို ကုန်စည်စီးဆင်းနိုင်ဖို့ ဆောင်ရွက် ခဲ့ပါတယ်။ နေ့ခင်းမှာ အရေးပေါ်သယ်ယူဖို့ လိုအပ်တယ်ဆိုရင် လည်း ကျွန်တော်တို့ ဆောင်ရွက်ပေးခဲ့ပါတယ်။ ဒီနေ့သင်္ဘောနဲ့ မဖြစ်မနေပါမှဖြစ်မယ်။ ဒီကုန်စည်ဟာ  ဆိပ်ကမ်းကိုရောက်မှ ဖြစ်မယ်ဆိုရင်လည်း       အထူးအစီအစဉ်တစ်ရပ်အနေနဲ့ ဆောင်ရွက်ပေးခဲ့တာတွေ ရှိပါတယ်။ ရန်ကုန်မြို့ထဲမှာ အများ ပြည်သူ သွားလာဖို့  လွယ်ကူချောမွေ့နိုင်ဖို့   ကျွန်တော်တို့ ကြိုးပမ်းဆောင်ရွက်ခဲ့ပါတယ်''ဟု    ရန်ကုန်တိုင်းဒေသကြီး ဝန်ကြီးချုပ်က သြဂုတ် ၂၄ ရက်  သတင်းစာရှင်းလင်းပွဲတွင် ပြောကြားခဲ့သည်။
ယခုအခါ မြို့ပြအင်္ဂါရပ်နှင့်ညီစေရန် ဝိုင်ဘီအက်စ်မှတ်တိုင် အသစ်များကို ပြန်လည်ဆောက်လုပ်လျက်ရှိသည်။ ရန်ကုန် ဘူတာကြီး၊ လေဆိပ်၊ အဝေးပြေးကားဂိတ်များသို့ တစ်ဆက် တစ်စပ်တည်း ဝိုင်ဘီအက်စ်ဖြင့် ခရီးနှင်နိုင်နေပြီဖြစ်သည်။ ရထား  နှင့် ကားများတွင် ရန်ကုန်မြို့တော် စည်ပင်သာယာရေးဥပဒေ သစ်ကို အသံဖိုင်စနစ်ဖြင့် ဖွင့်လှစ်ပေးနိုင်ပါက မြို့ပြဥပဒေသစ် များသည် ပြည်သူ့နားသို့ အလျင်အမြန် စီးမျောဝင်ရောက်နိုင် ပေလိမ့်မည်။ တစ်စီးတလေ ကျန်ရှိသော  လက်ကျန် ဘတ်စ်ကား ဟောင်းကြီးများမှလွဲ၍       ကျန်ဝိုင်ဘီအက်စ်အားလုံးက အေးအေးလူလူဖြင့် ခရီးသွားလိုသူတို့ကို   သယ်ယူပို့ဆောင် ပေးလျက်ရှိသည်။ ရန်ကုန်မြို့ပတ်ရထားများ၊ ရန်ကုန်ဝါးတား ဘတ်စ်နှင့် ရန်ကုန်ဘတ်စ်ကားဝန်ဆောင်မှုတို့တွင် တစ်ပြေးညီ အသုံးချနိုင်သော ကြိုတင်ငွေဖြည့်ကတ်စနစ်များ ပေါ်ပေါက်လာ ပါက ရန်ကုန်မြို့ပြခရီးသွားတို့အတွက် ငွေအကြွေအခက်အခဲကို တစ်ခန်းရပ်နိုင်မည် ဖြစ်ပါကြောင်း . . .။       

ထင်ပေါ်ဝင်း၊ ဓာတ်ပုံ-တင်စိုး(မြန်မာ့အလင်း)

No comments:

Post a Comment