Latest News

Wednesday, July 12, 2017

"ကာချုပ်” ကို ဘယ်သူခန့်သလဲ

"ကာချုပ်” ကို ဘယ်သူခန့်သလဲ


“ကာချုပ်” ကို ကာချုပ်ကပဲ ခန့်တယ်။ ဘယ်သူမှခန့်လို့ မရဘူး။ လက်ရှိ ကာချုပ် ဗိုလ်မင်းအောင်လှိုင်ကို ကာချုပ်ဗိုလ်သန်းရွှေ က ခန့်ခဲ့တာပဲ။ ၁၉၈၈ စက်တင်ဘာ ၁၈ အာဏာသိမ်း (နဝတ) ဥက္ကဋ္ဌ ကာချုပ်ဗိုလ်စော မောင်ကို ကာချုပ်ဗိုလ်နေဝင်းက ခန့်တာပဲ။ ဗိုလ်စောမောင်ကို ကာချုပ်အရာကထုတ်ပယ်ပြီး ဗိုလ်သန်းရွှေကို ကာချုပ် တင်တော့လည်း ဗိုလ်နေဝင်း ကပဲ ခန့်ခဲ့တာပါ။ ဒီအကြောင်း (ဗိုလ်စောမောင်ကို ဖယ်ရှားပြီး ဗိုလ်သန်းရွှေ ကာချုပ်ဖြစ်လာပုံ) ကို ဗိုလ်ခင်ညွန့် ရဲ့ “မှော်ဝန်းသား” စာအုပ်မှာ ဖတ်ကြည့်နိုင်ပါတယ်။

၂၀၀၈ အခြေခံဥပဒေအရလည်း “ကာချုပ်”ကို သမ္မတက ခန့်လို့မရဘူး။ ကာချုပ် ကသာ “ဒုတိယသမ္မတ” တစ်ယောက် စိတ်ကြိုက်တင်နိုင်ခွင့်ရှိတယ် မဟုတ်လား။ [၂၀၀၈ အခြေခံဥပဒေ၊ ပုဒ်မ ၆၀၊ ပုဒ်မခွဲ (ခ) ပုဒ်မခွဲငယ် (၃) ကိုကြည့်ပါ] ဒီပုဒ်မက “ကာချုပ်”ကို ဒုသမ္မတလောင်း စိတ်ကြိုက်ခန့်နိုင်တဲ့ အခွင့်အာဏာ ပေးထားခြင်းဖြစ်တယ်။

၂၀၀၈ အခြေခံ ဥပဒေ၊ ပုဒ်မ ၃၄၂ အရ ကာချုပ်ကို (ကာလုံ) ရဲ့ အဆိုပြု ထောက်ခံချက်နဲ့ ခန့်အပ်နိုင်တယ်လို့ ဘယ်လိုပဲ ရေးထားပါစေ၊ ကာချုပ်သစ်ကို လက်ရှိကာချုပ်ကသာ ခန့်အပ်မှာဖြစ်ပါတယ်။ တကယ်တော့ (ကာလုံ) ဟာ ကာချုပ်ရဲ့ အဆိုပြုချက်ကို ထောက်ခံတဲ့ တံဆိပ်တုံးထုပေး ဖို့သာ ဖြစ်တယ်။ ဘာလို့လဲဆိုတော့ (ကာလုံ) ထဲမှာ ကာချုပ်အပါအဝင်နဲ့ ကာချုပ်က ခန့်ထားသူချည်း ၆ ယောက်ပါနေ တယ်မဟုတ်လား။ ၂၀၀၈ အခြေခံ ဥပဒေ ပုဒ်မ ၂၀ (ခ) နဲ့ (ဂ) ဖတ်ကြည့်ရင် စစ်တပ်နဲ့ ပတ်သက် သမျှ သွန်လိုသွန်၊ မှောက်လိုမှောက် လုပ်နိုင်တဲ့ အာဏာကုန် “ကာချုပ်” လက်ထဲ အပ်ထားတယ်ဆိုတာ သိပ်ကိုထင်ရှားပါတယ်။

(၁၀ ဖေဖေါ်ဝါရီ) ဘီဘီစီ သတင်းမှာ “ကာချုပ်နဲ့ ဒုကာချုပ် ပင်စင် သက်တမ်း ၆၅ နှစ်အထိတိုးမြှင့်” ဖို့ ၄ လပတ် အစည်းအဝေးမှာ ဆုံးဖြတ်တဲ့အကြောင်းသိရတယ်။ ဒါ့ပြင် ၂၀၁၅ ခုနှစ်က မီဒီယာကောင်စီနဲ့ ကာချုပ် တွေ့ဆုံတော့ မီဒီယာကောင်စီဝင် တစ်ဦး က ၂၀၁၆ မှာ ကာချုပ် အငြိမ်းစားယူမှာလား မေးတာကို ဘေးမှာရှိတဲ့ စစ်ဥပဒေချုပ်က ဝင်ဖြေတာက “ ကာချုပ်အနေနဲ့ စစ်ဥပဒေ အရ ဆက်ပြီး တာဝန်ဆက်ယူလို့ရတယ်” လို့ဖြေကြောင်းသိရတယ်။ ဒီတော့ ဒီလို တိုးတာ ဘာမှမဆန်းဘူး။ စစ်ဥပဒေရဲ့အထက်မှာ ကာချုပ် ထာဝစဉ်ရှိနေပြီး၊ ၂၀၀၈ အခြေခံဥပဒေရဲ့အထက်မှာလည်း “ကာချုပ်” ရှိနေပါတယ်။

• သမိုင်းကိုပြန်ကြည့်ပါ။

၁၉၆၂ အာဏာ သိမ်းပြီးနောက် (၁၉၇၂ ကနေ ၂၀၁၁ အထိ) ကာချုပ် ၅ ယောက် ရှိခဲ့ပါတယ်။ အဲဒီ့ ကာချုပ် ၅ ယောက် စလုံးကို ဗိုလ်နေဝင်း စိတ် ကြိုက်ခန့်ခဲ့တာပါ။ ဒီအထဲမှာ ကာချုပ် ရာထူးက ဖယ်ရှားခံရတဲ့ ကာချုပ် ၂ ယောက် ရှိပါတယ်။ ကာချုပ် ဗိုလ်ချုပ်ကြီးတင်ဦး ( ဒီချုပ် နာယကကြီး ဦးတင်ဦး ) နဲ့ ကာချုပ် ဗိုလ်ချုပ်မှုးကြီး စောမောင်တို့ပဲ ဖြစ်တယ်။

နေပြည်တော်က “စစ်သမိုင်းပြတိုက်သစ် ဖွင့်ပြီ”ဆိုတဲ့ ကြော်ငြာ တွေ့ရတယ်။ အဲဒီမှာသွားကြည့်တဲ့အခါ အစဉ်အဆက် ကာချုပ် ဓါတ်ပုံတွေထဲမှာ ဗိုလ်တင်ဦးနဲ့ ဗိုလ်စောမောင်ပုံ ချိတ်ထားသလားလို့ ကြည့်ခဲ့ကြစမ်းပါ။ ဗိုလ်နေဝင်းပုံတော့ ချိတ်ဆွဲထားမှာ သေချာပါတယ်။

“အာဏာရှင်စနစ် ပြန်လည် ထွန်းကားမလာရေးအတွက် အရေးကြီးတဲ့ တပ်မတော် ကာကွယ်ရေး ဦးစီးချုပ်တွေဟာ အချိန်တန်ရင် အနားယူရ မယ်” တဲ့ (အနားမယူချင်လို့ ပင်စင်သက်ကို ၆၀ ကနေ ၆၅ ပြောင်းပါတယ်ဆိုမှ) စည်သူအောင်မြင့် မြှောက်ပင့် ပေးတဲ့အတိုင်းသာဆိုရင်တော့ သွားလေသူ စစ်အာဏာရှင် ဗိုလ်နေဝင်းကို အမှတ်ပေးရတော့မှာပါပဲ၊ ဗိုလ်နေဝင်းဟာ (၁၉၄၉ ဖေဖေါ်ဝါရီ လ ၁ ရက်မှ ၁၉၇၂ ဧပြီလ ၂၀ ရက်ထိ)ကာချုပ်လုပ်ခဲ့ပြီး ၁၉၇၂ ခု၊ ဧပြီလ ၂၀ အသက် ၆၁ နှစ် မှာ ကာချုပ်ကနေအနားယူပါတယ်။ ဗိုလ်စန်းယုကနေ ဗိုလ်သန်းရွှေအထိ သူ့စိတ်ကြိုက် “ကာချုပ်” တွေ တစ်ယောက်ပြီးတစ်ယောက် တင်ခဲ့ပါတယ်။ ဗိုလ်နေဝင်း ကိုယ်တိုင် ၁၉၇၄ အခြေခံဥပဒေအရ သမ္မတကြီးလည်း ဖြစ်ခဲ့တာပဲလေ။ ကာချုပ် ဗိုလ်စန်းယုလည်း နိုင်ငံတော်သမ္မတကြီး ဖြစ်ခဲ့တာပဲလေ။

• ၂၀၀၈ အခြေခံဥပဒေအရ

“ကာချုပ်သစ်”ကို လက်ရှိကာချုပ်က စိတ်ကြိုက်ခန့်နိုင်ပါတယ်။

သမ္မတလောင်းလျာ တစ်ယောက်ကိုပင် ကာချုပ်က စိတ်ကြိုက်ရွေးတင် နိုင်ပါတယ်။

ကာချုပ်နဲ့စစ်တပ်ကို နိုင်ငံသားအားလုံးရဲ့အထွတ်အထိပ် နေရာ ရရှိထားတယ်ဆိုတဲ့ သမ္မတနဲ့ အမြင့်ဆုံး ဥပဒေပြုရေး မဏ္ဍိုင် လို့ဆိုကြတဲ့ ပြည်ထောင်စုလွှတ်တော်က ဝင်ရောက် စွက်ဖက်ပိုင်ခွင့် မရှိပါဘူး။

Standard Army ဖြစ်ဖို့ အရင်းခံအကျဆုံး အချက်က ၂၀၀၈ အခြေခံဥပဒေကို ဖျက်သိမ်းရမယ်။ (၂၀၀၈ အခြေခံဥပဒေ ဆိုတာ စစ်အာဏာရှင် စနစ်ကို ဒီမိုကရေစီ အရေခြုံပေးထားတဲ့ ဥပဒေဖြစ်တယ်။ ကာချုပ်နဲ့ စစ်တပ်က ထင်ရာစိုင်းနိုင်တဲ့ ဥပဒေဖြစ်တယ် )

ဒုတိယ အချက်က လက်ရှိ စစ်တပ်ကို စစ်အုပ်စုက ခါးပိုက်ဆောင်တပ် အဖြစ် လုပ်ထားတဲ့ အနေအထားကနေ ပြုပြင်ပြောင်းလဲ ယူရမယ်။ စစ်တပ်ကို ပြုပြင်ပြောင်းလဲရမယ် ဆိုတာက စစ်တပ်ဟာ ကာကွယ်ဝန်ကြီးဌာန အောက်မှာရှိရမယ်။ သမ္မတ၊ အစိုးရနဲ့ လွှတ်တော်ကို နာခံရမယ်။“သမ္မတ၊ လွှတ်တော်နဲ့ အခြေခံဥပဒေတို့ကို ကာချုပ်နဲ့ စစ်တပ်က ဗိုလ်ကျလွှမ်းမိုးထား ချုပ်ကိုင်တဲ့အနေအထား”ကို ပြောင်းလဲ ပစ်ရလိမ့်မယ်။

အရင်းရှင်စနစ် နိုင်ငံတော်မှာပဲဖြစ်ဖြစ်၊ ဆိုရှယ်လစ်စနစ်၊ ကွန်မြူနစ်စနစ် နိုင်ငံတော်မှာပဲဖြစ်ဖြစ် စစ်တပ်နဲ့ ကာချုပ်ဟာ သမ္မတနဲ့ လွှတ်တော်ရဲ့ အမိန့်ကို နာခံကြရတယ် မဟုတ်လား။

ညွန်း
မြဝင်း - တပ်မတော်ခေါင်းဆောင်များ သမိုင်းအကျဉ်း (၁၉၄၈ ခုနှစ်မှ ၁၉၉၀ ပြည့်နှစ်အထိ)

-တူမောင်ညို
မိုးမခ၊ (၂၀၁၆ ဖေဖေါ်ဝါရီ ၁၆ )

မိုးမခ မှကူးယူဖော်ပြပါသည်။

Burmademocracy

Cartoon Saw Ngo (2010)

No comments:

Post a Comment