Latest News

Thursday, July 6, 2017

သတင်းသမား ၃ ဦးကိစ္စ နုိုင်ငံတော်အတုိုင်ပင်ခံပုဂ္ဂိုလ် ပြောကြား

သတင်းသမား ၃ ဦးကိစ္စ နုိုင်ငံတော်အတုိုင်ပင်ခံပုဂ္ဂိုလ် ပြောကြား

တပ်မတော် နဲ့သတင်းသမား ၃ဦးကိစ္စဟာ  တဖက်နဲ့တဖက် အပြန်အလှန် ဆန့်ကျင်နေတယ်ဆိုပြီး အမြင်ကျဉ်းမြောင်းစွာနဲ့ ကြည့်လို့မရကြောင်း ၊ ကြည့်ရမှာက   တည်ဆဲဥပဒေတွေဟာ တရားမျှတမှုရှိရဲ့လား ၊ ဒီမုိုကရေစီလမ်းကြောင်းနဲ့ကိုက်ညီမှုရှိရဲ့လား ဆိုတာဖြစ်ကြောင်း  နုိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောပါတယ်။

 ဒီနေ့  နော်ဝေနုိုင်ငံခြားရေးဝန်ကြီး Borge Brende နဲ့ နေပြည်တော်က နုိုင်ငံခြားရေးဝန်ကြီးဌာနမှာ ကျင်းပတဲ့ ပူးတွဲသတင်းစာရှင်းလင်းပွဲမှာ နိုင်ငံတော်အတိုင်ပင်ခံပုဂ္ဂိုလ်က အခုလို ဖြေကြားခဲ့တာ ဖြစ်ပါတယ်။

 “ဒီလိုကိစ္စမျိုးတွေကို အမြင်ကျဉ်းကျဉ်းနဲ့ကြည့်လို့မရပါဘူး။ သတင်းသမား ၃ ဦးဟာ တပ်မတော်ကို ဆန့်ကျင်သူတွေဖြစ်တယ်လို့ ယူဆလို့မရသလို တပ်မတော်ဟာလည်း သတင်းသမားတွေကို ဆန့်ကျင်နေတာလို့  ယူဆလို့မရပါဘူး။ တည်ဆဲဥပဒေတွေဟာ တရားမျှတမှုရှိရဲ့လား။ ဒီမိုကရေစီလမ်းကြောင်းကို အထောက်အကူဖြစ်ရဲ့လားဆိုတာနဲ့ ကြည့်ရမှာ ဖြစ်ပါတယ်။ တကယ်လို့အဲဒီလို အထောက်အကူ မဖြစ်ဘူးဆိုရင် အဲဒီဥပဒေတွေကို ပြင်ဆင်ဖို့ ဥပဒေပြုရေးဖက်ကနေ ကြိုးစားရမှာဖြစ်ပါတယ်။”

ဇွန်လ ၂၆ရက်နေ့က တအာန်းပလောင် လွတ်မြောက်ရေး TNLA က ကျင်းပတဲ့ မူးယစ်ဆေးဝါး မီးရှို့ပွဲကို သွားရောက် သတင်းယူခဲ့တဲ့ ဒီဗွီဘီက သတင်းသမား ၂ ဦး နဲ့  ဧရာဝတီက ၁ဦးကို ပုဒ်မ ၁၇ (၁) မတရားသင်းဆက်သွယ်မှု နဲ့  ဖမ်းဆီးခံထားရတဲ့အပေါ် ဥပဒေစိုးမုိုးရေးနဲ့ ဆက်စပ်ပြီး ရိုက်တာသတင်းဌာနက မေးမြန်းရာမှာ ဖြေကြားခဲ့တာ ဖြစ်ပါတယ်။

ဒါ့အပြင် နုိုင်ငံတော်၏အတုိုင်ပင်ခံပုဂ္ဂိုလ်က ဒီကနေ့ သတင်းစာရှင်းလင်းပွဲဟာ နော်ဝေနဲ့ မြန်မာနှစ်နုိုင်ငံ ဆက်ဆံရေး ကိစ္စဖြစ်တဲ့အတွက် တခြားကိစ္စတွေကို မမေးဖို့ ၂ကြိမ် တားမြစ်ပေမယ့် ရိုက်တာသတင်းဌာနက ဥပဒေစိုးမိုးရေးနဲ့ သတင်းသမား ၃ ဦးဖမ်းဆီးခံထားရတာကို မေးရာမှာ သတင်းသမား ၃ ဦးကိစ္စနဲ့ ဥပဒေတွေအကြောင်း ဆက်စပ်ပြီး ဖြေကြားခဲ့တာဖြစ်ပါတယ်။

ဆက်သွယ်ရေးဥပဒေပုဒ်မ ၆၆ဃကိုလည်း လွှတ်တော်ကနေ ပြင်ဆင်ဖို့လုပ်နေပြီဖြစ်ကြောင်းလည်း ဒေါ်အောင်ဆန်းစုကြည် က သတင်းစာရှင်းလင်းပွဲပြီးခါနီးမှာ ပြောပါတယ်။

နော်ဝေနုိုင်ငံခြားရေးဝန်ကြီးကတော့ ဖြည့်စွက်ပြောကြားရာမှာ နုိုင်ငံတော်အတုိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ သတင်းမီဒီယာသမားတွေ လွတ်လပ်ခွင့် နဲ့  လွတ်လပ်စွာပြောဆိုရေးသားခွင့်ကို အလေးထားသူဖြစ်တယ်လို့ ယုံကြည်ကြောင်း ပြောပါတယ်။

Phto: Win Ko Ko Latt/RFA

No comments:

Post a Comment

Blog Archive