Latest News

Saturday, July 29, 2017

အမေရိကန်ပင်မကုန်းမြေတခုလုံးကို ပစ်နိုင်တဲ့ ဒုံးကျည်ပိုင်ထားတယ်လို့ မြောက်ကိုးရီးယားဆို

မြောက်ကိုးရီးယား စစ်ရေးပြအခမ်းအနား (ဧပြီ ၂၀၁၇)
မြောက်ကိုရီးယားနိုင်ငံအနေနဲ့ အမေရိကန်ပြည်ထောင်စု ပင်မကုန်းမြေတခုလုံးကို ပစ်နိုင်တဲ့ ဒုံးကျည်ကို ပိုင်ဆိုင်ထားတယ်လို့ ၊ မြောက်ကိုရီးယားခေါင်းဆောင် ကင်ဂျုံအွန်း စနေနေ့မှာ ပြောကြားလိုက်ပါတယ်။ မြောက်ကိုရီးယားက သောကြာနေ့ကမှာ ဒုံးကျည်စမ်းသပ်ပစ်လွှတ်ပြီးတဲ့နောက် အဲဒီလို ပြောလိုက်တာဖြစ်ပါတယ်။

ဒီဒုံးကျည်စမ်းသပ်ပစ်လွှတ်မှုအပေါ်မှာ တရုတ်နိုင်ငံကလည်း ပြစ်တင်ရှုတ်ချလိုက်ပြီး၊ အမေရိကန်၊ ဂျပန် နဲ့ တောင်ကိုရီးယားနိုင်ငံတွေ ကလည်း မြောက်ကိုရီးယားရဲ့ နျူးကလီးယားရဲ့ ရည်မှန်းချက်တွေကို ထိန်းချုပ်ဖို့ရည်ရွယ်တဲ့ ကုလသမဂ္ဂလုံခြုံရေးကောင်စီရဲ့ ဒဏ်ခတ်မှုအသစ်တွေချမှတ်နိုင်ဖို့အတွက် အတူလက်တွဲပြီး လုပ်ဆောင်သွားမယ်လို့ ပြောလိုက်ပါတယ်။

မြောက်ကိုရီးယားဟာ ကင်ဂျုံအွန်းလက်ထက်မှာ ဒုံးကျည်စမ်းသပ်တာတွေကို တိုးမြှင့်လုပ်ဆောင်လာနေပြီး၊ သောကြာနေ့က စမ်းသပ်မှုဟာ အခုလအတွင်း ဒုတိယမြောက် စမ်းသပ်မှုဖြစ်ပါတယ်။ မြောက်ကိုရီးယားအစိုးရပိုင် KCNA သတင်းအေဂျင်စီရဲ့ အဆိုအရတော့ - အခုနောက်ဆုံးစမ်းသပ်မှုဟာ အမေရိကန်ပြည်ထောင်စုအတွက် စိုးရိမ်စရာသတိပေးချက်ဖြစ်ကြောင်း၊ အမေရိကန်ပင်မကုန်းမြေတခုလုံးကို ရောက်အောင်ပစ်နိုင်တဲ့အနေအထားရောက်ပြီလို့ မြောက်ကိုရီးယား ခေါင်းဆောင် ကင်ဂျုံအွန်းက ခပ်ကြွားကြွားပြောကြားလိုက်ပါတယ်။

မြောက်ကိုရီးယားရဲ့ ဒုံးကျည်းစမ်းသပ်မှုကို တုံ့ပြန်တဲ့အနေနဲ့ အမေရိကန် နဲ့ တောင်ကိုရီးယားတို့ကလည်း တောင်ကိုရီးယားရေပိုင်နက်ထဲကို ဒုံးကျည်တွေ စမ်းသပ်ပစ်လွှတ်ခဲ့ပါတယ်။ ဒီစစ်ရေးလေ့ကျင့်မှုကို အမေရိကန် အရှေ့ဘက်ခြမ်း စံတော်ချိန် ညနေ ၅ နာရီခွဲလောက်မှာ လုပ်တာဖြစ်တယ်လို့ ကာကွယ်ရေးဝန်ကြီးဌာနတာဝန်ရှိသူတဦးက ဗီအိုအေကို ပြောပါတယ်။ မြောက်ကိုရီးယားရဲ့ လုပ်ရပ်ဟာ မဆင်မခြင် နဲ့ အန္တရာယ်ရှိတဲ့လုပ်ရပ်ဖြစ်တဲ့အတွက် မြောက်ကိုရီးယားနိုင်ငံကို အထီးကျန်စေမှာဖြစ်တယ်လို့ အိမ်ဖြူတော်က ပြောကြားလိုက်ပါတယ်။

ဗွီအိုအေ (မြန်မာပိုင်း)
https://burmese.voanews.com

No comments:

Post a Comment