နေပြည်တော်၊ ဇွန် ၇
ယနေ့ ဇွန် ၇ ရက်တွင် ရန်ကုန်-မြိတ်-ဘုတ်ပြင်း-မြိတ်-ရန်ကုန် ခရီးစဉ်အတိုင်း တပ်မတော်သားများနှင့် မိသားစုများအတွက် သက်သာချောင်ချိရေး ပို့ဆောင်ကြိုဆိုသော တပ်မတော်သယ်ယူပို့ဆောင်ရေးလေယာဉ် (Y-8 200 F အမျိုးအစား၊ လေယာဉ်အမှတ်-၅၈၂၀) သည် စစ်သည်/မိသားစု ၁၀၈ ဦးနှင့် လေယာဉ်အမှုထမ်း ၁၄ ဦးအပါအ၀င် ကုန်တန်ချိန် ၂.၄ တန်ခန့်သယ်ဆောင်၍ မွန်းလွဲ ၁ နာရီ ၆ မိနစ်တွင် မြိတ်မြို့မှ ရန်ကုန်မြို့သို့ စတင်ထွက်ခွာပျံသန်းခဲ့သည်။ အဆိုပါလေယာဉ်သည် အမြင့်ပေ ၁၈၀၀၀ မှ ပျံသန်းခဲ့ရာ မွန်းလွဲ ၁ နာရီ ၃၅ မိနစ်တွင် ထားဝယ်မြို့၏ အနောက်တောင်ဘက် ၁၉၅ ဒီဂရီ၊ အကွာအဝေးအားဖြင့် ၄၃ မိုင်ခန့်အရောက်၌ ထားဝယ်လေဆိပ်နှင့် အဆက်အသွယ်ရရှိပြီးနောက်ပိုင်း ဆက်သွယ်မှုပြတ်တောက်သွားခဲ့သည်။
ထိုသို့အဆက်အသွယ်ပြတ်တောက်ပြီးနောက် မွန်းလွဲ ၂ နာရီမှစတင်၍ တပ်မတော်(လေ)မှ လေယာဉ်များ၊ တပ်မတော်(ရေ)မှ ရေယာဉ်များ၊ မြေပြင်တပ်များဖြင့် အဆိုပါလေယာဉ်နှင့် နောက်ဆုံးအဆက်အသွယ် ရရှိခဲ့သည့် မြောက်လတ္တီတွဒ် ၁၃.၄၈ ဒီဂရီ၊ အရှေ့လောင်ဂျီတွဒ် ၉၈.၀၂ ဒီဂရီ နေရာတစ်ဝိုက်နှင့် လေယာဉ်ပျံသန်းရာ လမ်းကြောင်းတစ်လျှောက် ရှာဖွေကယ်ဆယ်ရေး လုပ်ငန်းများအား ဆောင်ရွက်ခဲ့သည်။ ဖြစ်စဉ်ဖြစ်ပွားသည့်အချိန်တွင် ပင်လယ်ပြင်လှိုင်းလေအတန်ငယ်ရှိသော်လည်း ညနေ ၆ နာရီခန့်တွင် ရာသီဥတုကောင်းမွန်သွားသဖြင့် ဒေသခံရေယာဉ်များပါ ပူးပေါင်း၍ ရှာဖွေခြင်းလုပ်ငန်းများ ဆောင်ရွက်လျက်ရှိသည်။ လက်ရှိတွင် ရှာဖွေကယ်ဆယ်ရေးလုပ်ငန်းများအား တပ်မတော်(ရေ)မှ စစ်ရေယာဉ် ၉ စီး၊ တပ်မတော်(လေ)မှ လေယာဉ် ၃ စီးနှင့် မြေပြင်တပ်များ နေရာဖြန့်ခွဲ၍ ဒေသခံရေယာဉ်များနှင့်ပါ ၀ိုင်းဝန်း ပူးပေါင်းလုပ်ဆောင်လျက်ရှိသည်။
အဆိုပါ Y-8 200 F လေယာဉ်မှာ ၂၀၁၆ ခုနှစ်၊ မတ်လတွင် နောက်ဆုံးရောက်ရှိခဲ့သည့် လေယာဉ်ဖြစ်ပြီး တပ်မတော်(လေ)တွင် ၈၀၉ နာရီ ပျံသန်းအသုံးပြုခဲ့ပြီးဖြစ်သည်။ ယခုခရီးစဉ်တွင် လေယာဉ်ပျံသန်းမှု အတွေ့အကြုံများရှိသည့် လေယာဉ်မှူးကြီး ယာယီဒုတိယဗိုလ်မှူးကြီး ငြိမ်းချမ်း(လေယာဉ်မောင်းနှင်ပျံသန်းချိန် ၃၁၆၂ နာရီ)၊ တွဲဖက်လေယာဉ်မှူး ယာယီဒုတိယဗိုလ်မှူးကြီး စိုးသူဝင်း(လေယာဉ်မောင်းနှင်ပျံသန်းချိန် ၃၁၆၁ နာရီ)နှင့် တွဲဖက်လေယာဉ်မှူး ဗိုလ်မှူး သန့်ဇင်ဌေး(လေယာဉ်မောင်းနှင်ပျံသန်းချိန် ၂၄၀၃ နာရီ)၊ ပျံသန်းရေး အင်ဂျင်နီယာ ဗိုလ်ကြီး ကျော်စိုး တို့က တာဝန်ယူပျံသန်းမောင်းနှင်ခဲ့ခြင်းဖြစ်ပြီး လေယာဉ်အမှုထမ်း စုစုပေါင်း ၁၄ ဦးပါရှိသည်။ လေယာဉ်ဖြင့် လိုက်ပါလာသည့် ခရီးသည်များမှာ အရာရှိ/စစ်သည် ၃၅ ဦးနှင့် မိသားစုဝင် ကလေး ၁၅ ဦး၊ လူကြီး ၅၈ ဦးတို့ဖြစ်ပြီး စုစုပေါင်း ၁၀၈ ဦးပါရှိကြောင်း သတင်းရရှိသည်။
တပ်မတော်ကာကွယ်ရေးဦးစီးချုပ်ရုံး
No comments:
Post a Comment