Latest News

Wednesday, June 28, 2017

စားသုံးသူတွေရဲ့ တိုင်ကြားမှုကို လက်ခံဆောင်ရွက်ရေးစင်တာတွေ ဖွင့်လှစ်ထား

စားသုံးသူတွေရဲ့ တိုင်ကြားမှုကို လက်ခံဆောင်ရွက်ရေးစင်တာတွေ ဖွင့်လှစ်ထား

စားသုံးသူတွေရဲ့ ထိခိုက်နစ်နာတာတွေကို ဖြေရှင်းဆောင်ရွက်ပေးနိုင်ဖို့ စားသုံးသူ သတင်းပြန်ကြားရေးနဲ့ တိုင်ကြားမှု လက်ခံဆောင်ရွက်ရေးစင်တာတွေကို တိုင်းဒေသကြီး နဲ့ ပြည်နယ်တွေအပြင် ခရိုင်ရုံးတွေပါ ဆက်လက်ဖွင့်လှစ်နိုင်ဖို့ ဆောင်ရွက်နေတယ်လို့ စားသုံးသူရေးရာဦးစီးဌာန၊ ဒုတိယညွှန်ကြားရေးမှူး ဦးစိုးအောင် က ပြောပါတယ်။

စားသုံးသူတွေရဲ့ အခွင့်အရေးချိုးဖောက်ခံရမှုတွေ စားသုံးသူအကျိုးစီးပွားနစ်နာမှုတွေကို  တိုင်ကြားနိုင်ဖို့ စင်တာတွေကို တိုင်းနဲ့ပြည်နယ်တွေမှာဖွင့်လှစ်ခဲ့ပြီး ခရိုင် ၅၆ ခုမှာ ဆက်ပြီး ဖွင့်လှစ်သွားမယ်လို့ ဦးစိုးအောင်က ပြောပါတယ်။

"စားသုံးသူတွေက ကုန်စည်နဲ့ဝန်ဆောင်မှုတွေကို အခွင့်အရေးချိုးဖောက်ခံရရင် ဥပမာဆိုရင် အင်ဖော်မေးရှင်းမသိရဘူး၊နောက်တစ်ခုက ရွေးချယ်ခွင့်မရှိဘူးဆိုရင် ဒါအခွင့်အရေးချိုးဖောက်ခံရတဲ့ဟာတွေပါ။နောက်တစ်ခုက ရုပ်ပိုင်းဆိုင်ရာမှာ ကိုယ့်ကျန်းမာရေးထိခိုက်သွားတာမျိုး ဒါမှမဟုတ်ရင် ကိုယ့်ပစ္စည်းပျက်စီးသွားတာမျိုး ဒါတွေက ရုပ်ပိုင်းဆိုင်ရာ ထိခိုက်မှုတွေဖြစ်ပါတယ်၊နောက်ဆုံးကတော့ ဝန်ဆောင်မှုတွေနဲ့ပတ်သက်ရင် စိတ်ပိုင်းဆိုင်ရာထိခိုက်မှုတွေကိုလည်းတိုင်ကြားလို့ရပါတယ်"

စားသုံးသူတွေအနေနဲ့ နစ်နာထိခိုက်တဲ့အကြောင်းတွေကို သက်သေအထောက်အထားတွေနဲ့ တိုင်ကြားနိုင်ပြီး စင်တာအနေနဲ့ ဖြေရှင်းဆောင်ရွက်နေတာတွေကို တိုင်ကြားသူထံ ၄၈ နာရီအတွင်းမှာ အကြောင်းပြန်ပေးသွားမှာဖြစ်တယ်လို့ သိရပါတယ်။

စားသုံးသူရေးရာ ဦးစီးဌာနအနေနဲ့ ဖေ့ဘုတ်လူမှုကွန်ယက်မှာလည်း Consumer Information and Complaint Center - CICC -(Nay Pyi Taw)ဆိုတဲ့ ပေ့ခ်ျတစ်ခုကို ဖွင့်လှစ်ထားပြီး တိုင်းနဲ့ပြည်နယ်အလိုက် ဖွင့်လှစ်ထားတဲ့ စင်တာတွေကို ဆက်သွယ်တိုင်ကြားနိုင်တဲ့ ဖုန်းနံပါတ်တွေကို ဖော်ပြပေးထားပါတယ်။

Photo: CICC (Mandalay) Facebook

RFA

No comments:

Post a Comment