ယာဉ်အကူများ အလုပ်ရရှိရန် ကုမ္ပဏီဝန်ထမ်းအဖြစ် ခန့်အပ်မည်
ရန်ကုန်၊ ဇွန် ၂၆
ရန်ကုန်မြို့အတွင်း YBS တံဆိပ်တပ် ယာဉ်လိုင်းစနစ်ဖြင့် ခရီးသည် ပို့ဆောင်ရာ အလုပ်လက်မဲ့ ဖြစ်သွားသော ယာဉ်အကူများကို ကုမ္ပဏီဝန်ထမ်းအဖြစ် ခန့်အပ်မည် ဖြစ်ကြောင်း ရန်ကုန်မြို့ပြ အများပြည်သူ သယ်ယူပို့ဆောင်ရေး YUPT ကုမ္ပဏီထံမှ သိရသည်။
YBS ယာဉ်လိုင်းစနစ်သစ် စတင်ပြေးဆွဲချိန်တွင် ယာဉ်လိုင်းအချို့သည် ယာဉ်အကူမပါဘဲ ငွေပုံးများတွင် ခရီးသည်ကိုယ်တိုင်ထည့်၍ ပေးစီးရသည့်စနစ်ကို ကျင့်သုံးခဲ့သဖြင့် ယာဉ်နောက်လိုက်အချို့သည် အလုပ်လက်မဲ့ ဖြစ်ခဲ့ရသည်။
“ယာဉ်အကူတွေကို ယာဉ်ပေါ်မှာ မထားတော့ဘူး။ ဂိတ်တွေမှာ အကြွေလဲပေးတဲ့ နေရာမှာ အလုပ်ခန့်အပ်မယ်” ဟု YUPT ကုမ္ပဏီ အမှုဆောင်အရာရှိချုပ် ဦးမောင်မောင်လွင်က ဆိုသည်။
YBS ယာဉ်လိုင်းဂိတ်များတွင် အဆိုပါ ယာဉ်အကူ ဝန်ထမ်းများကို ငွေရေတွက်ခြင်း၊ ခရီးသည်များကို အကြွေလဲပေးခြင်း စသည့် တာဝန်ပေးအပ်မည်ဖြစ်ပြီး တစ်ဂိတ်လျှင် ဝန်ထမ်းလေးဦးခန့် ထားရှိမည်ဖြစ်ကြောင်း ၎င်းက ပြောကြားသည်။
YUPT ကုမ္ပဏီလက်အောက်တွင် ပြေးဆွဲနေသည့် YBS ယာဉ်လိုင်း ၂၀ ကျော်ရှိပြီး YBS ၃၊ ၄၊ ၇၊ ၂၉၊ ၃၆၊ ၅၉ စသည့် ယာဉ်လိုင်းများတွင် ယာဉ်အကူမပါဘဲ ငွေပုံးစနစ်ဖြင့် ဇူလိုင်လ ဒုတိယအပတ်တွင် စတင်ကျင့်သုံးမည် ဖြစ်ကြောင်း ၎င်းက ပြောကြားသည်။
ရန်ကုန်မြို့ပြ အများပြည်သူ သယ်ယူပို့ဆောင်ရေး YUPT ကုမ္ပဏီတွင် လက်ရှိ ယာဉ်အကူများကို ခန့်အပ်ထားပြီး ဝန်ထမ်း ၂၀၀ ခန့်ရှိပြီး ထပ်မံ၍ ဝန်ထမ်း ၁၀၀ ကျော် ခန့်အပ်ရန် လျာထားကြောင်း အဆိုပါ ကုမ္ပဏီထံမှ သိရသည်။
The Voice
Subscribe to:
Post Comments (Atom)
No comments:
Post a Comment