ရခိုင်ပြည်နယ် ဘူးသီးတောင်မြို့နယ်နဲ့ မောင်တောမြို့နယ်မှာ တိုင်းရင်းသားစံပြကျေးရွာ ၃၆ ရွာ တည်ထောင်ထားကြောင်း နယ်စပ်ရေးရာဝန်ကြီးဌာန၊ ဒုတိယ၀န်ကြီး ဗိုလ်ချုပ်သန်းထွဋ်က အမျိုးသား လွှတ်တော်မှာ ပြောကြားခဲ့ပါတယ်။
ဒီနေ့ အမျိုးသားလွှတ်တော်မှာ ရခိုင်ပြည်နယ်၊ မဲဆန္ဒနယ်အမှတ် ၂ အမျိုးသားလွှတ်တော် ကိုယ်စားလှယ် ဦးတက်ထွန်းအောင်က ဘူးသီးတောင်နဲ့ မောင်တောမြို့နယ်တွေမှာ ရခိုင်ပြည်နယ်အနှံ့ နေထိုင်နေတဲ့ ရခိုင်တိုင်းရင်းသားတွေကို စုဆောင်းပြီး ရခိုင်တိုင်းရင်းသားကျေးရွာတွေ တည်ဆောက် ပေးဖို့ အစီအစဉ် ရှိ၊ မရှိ မေးမြန်းရာ ဒုတိယ၀န်ကြီး ဗိုလ်ချုပ်သန်းထွဋ် က ဖြေကြားခဲ့တာဖြစ်ပါတယ်။
ဘူးသီးတောင်နဲ့ မောင်တောမြို့နယ်မှာ ရခိုင်တိုင်းရင်းသားတွေ နေထိုင်မှုနည်းပါးလာတဲ့အတွက် ရခိုင်တိုင်းရင်းသားကျေးရွာတွေကို တည်ထောင်ပေးစေလိုတာဖြစ်တယ်လို့ ကိုယ်စားလှယ် ဦးတက်ထွန်းအောင်က လွှတ်တော်မှာ တင်ပြခဲ့တာဖြစ်ပါတယ်။
ဒုတိယ၀န်ကြီး ဗိုလ်ချုပ်သန်းထွဋ်က ဒေသခံတိုင်းရင်းသားတွေကို စုစည်းပြီး (နတလ) စံပြကျေးရွာတွေ ထူထောင်ပြီးနောက် ၁၉၉၉ ခုနှစ်မှာ ရန်ကုန်တိုင်းဒေသကြီးကနေ ရခိုင်ပြည်နယ် မောင်တောဒေသကို ပြောင်းရွှေ့နေထိုင်ဖို့ ဆန္ဒရှိတဲ့ တိုင်းရင်းသားမိသားစုတွေကို ပြောင်းရွှေ့ပေး ခဲ့တာ ၁၉ ကြိမ်ရှိပြီဖြစ်ကြောင်း တင်ပြခဲ့ပါတယ်။
ပြောင်းရွှေ့နေထိုင်သူတွေကို အိမ်ထောင်စုတစ်စုအတွက် နေအိမ်တလုံး၊ လယ်မြေ ၂ ဧက၊ ဥယျာဉ်ခြံမြေ ၁ ဧက၊ ဆိုက်ကား တစီး၊ အပ်ချုပ်စက် ၁ လုံး၊ အိမ်ထောင်စု လေးစုအတွက် လက်တွန်းထွန်စက် တစီး၊ တနှစ်စာရိက္ခာဆန်နဲ့ ရိက္ခာစိုတွေထောက်ပံ့ပေးခဲ့တယ်လို့ သိရပါတယ်။
ဒါ့အပြင် ဘင်္ဂလားဒေ့ရ်ှနိုင်ငံက ပြောင်းရွှေ့ရောက်ရှိလာတဲ့ အိမ်ထောင်စု ၇၄ စု၊ လူဦးရေ ၃၄၀၀ ကျော်ကိုလည်း မောင်တောနဲ့ ဘူးသီးတောင်က (နတလ)စံပြကျေးရွာတွေမှာ နေအိမ်တွေ ထပ်မံတိုးချဲ့ နေရာချထားပြီး တနှစ်စာ ရိက္ခာဆန်နဲ့ ရိက္ခာစိုတွေ ထောက်ပံ့လျက်ရှိတယ်လို့ သိရပါတယ်။
Photo: Min Thein Aung/ RFA
No comments:
Post a Comment