ကလေးငယ်တွေကို ညှင်းပန်းနှိပ်စက်တာတွေ လိင်ပိုင်းဆိုင်ရာ စော်ကားမှုတွေပြုလုပ်နေတယ်လို့ သတင်းပျံ့နှံ့နေတဲ့ လပွတ္တာမြို့နယ်က မိဘမဲ့ပရဟိတ ကျောင်းမှ ဦးဆောင်ဆရာတော်တွေကို မိဘတွေက တိုင်ချက်ဖွင့်လိုက်ပြီဖြစ်ပါတယ်။
လပွတ္တာ မြို့နယ် တူးမြောင်းရဲစခန်းမှာ တိုင်ချက်ဖွင့်ထားတာဖြစ်ပြီးရိုက်နှက်ခံရတဲ့ အသက် ၁၂ အရွယ် ကျောင်းသားရဲ့မိခင် ဒေါ်ကေသွယ်မိုးက တရားလိုလုပ် တိုင်ကြားထားတာဖြစ်ပါတယ်။
“ကလေးတွေကို နှိပ်စက် ရာကျတဲ့ သဘောဖြစ်တယ်။မကျေနပ်လို့ တိုင်တာပေါ့။”လို့ ဒေါ်ကေသွယ်မိုးက ပြောပါတယ်။
သည်ကနေ့ ညနေမှာတော့ မြို့နယ်ရဲတပ်ဖွဲ့ က ကလေးတွေနဲ့ တွေ့ဆုံပြီး စစ်ဆေးမေးမြန်းတာတွေ ပြုလုပ်ခဲ့ပါတယ်။
လောလောဆယ်မှာတော့ ရိုက်နှက်ခံရတဲ့ကလေးငယ်တွေရဲ့ ဆေးစစ်ချက်တွေမရရှိသေးတာမို့ ဘယ်ပုဒ်မတွေနဲ့ အရေးယူသွားမယ်ဆိုတာကို ပြောလို့မရသေးဘူးလို့ မြို့နယ်ရဲတပ်ဖွဲ့မှ တာဝန်ရှိသူတစ်ဦးက ပြောပါတယ်။
သည်အမှုနဲ့ပတ်သတ်ပြီး ကလေးငယ်တွေကို ကူညီဆောင်ရွက်ပေးနေသူတစ်ဦးဖြစ်တဲ့ ဦးသိန်းငွေကတော့ ဆေးစစ်ချက်ရရှိလာမယ်ဆိုရင် ဥပဒေအကြံပေးတွေနဲ့ ညှိနှိုင်းပြီး တရားစွဲဆိုဖို့လည်း စီစဉ်သွားမယ်လို့ ပြောပါတယ်။
” ကျောင်းမအပ်ခင်ကတည်းက မိဘတွေကို ကြိုပြောတယ်။ ပြီးတော့မှ လက်ခံတာပါ”လို့ ဦးဆောင်ဆရာတော်တစ်ပါးဖြစ်တဲ့ ဆရာတော်ပညာနန္ဒက ပြောပါတယ်။ ကျောင်းစည်းကမ်းတွေကို စာရွက်နဲ့ ကြိုပြီးပြခဲ့တယ်လို့ ဆရာတော်က ပြောပါတယ်။ ဒါပေမယ့် ကျောင်းထွက်ရင် အရိုက်ခံရမယ်လို့တော့ ထည့်သွင်းရေးထားခြင်း မရှိဘူးလို့ သိရပါတယ်။ နှုတ်သဘောအနေနဲ့ပဲ ပြောခဲ့တယ်လို့ သိရပါတယ်။ ရိုက်နှက်ခံရတဲ့ ကလေးငယ်လေးဦး နဲ့ အတူမိဘတွေကိုတော့ လပွတ္တာမြို့မှာ လွှတ်တော်ကိုယ်စားလှယ်တွေ၊ ကလေးသူငယ်စောင့်ရှောက်ရေးအဖွဲ့မှတာဝန်ရှိ ပုဂ္ဂိုလ်တွေက နေရပ်ကို ပြန်လည်ပို့ဆောင်ပေးနေကြပါတယ်။
လွန်ခဲ့တဲ့ ၃ လ လောက်ကလည်း အဆိုပါ ကျောင်းမှ ကလေးတစ်ချို့ ထွက်ပြေးတာတွေ ရှိခဲ့ပါတယ်။ အဲ့ဒီအတွက် မေလ ၁၁ရက်နေ့ညက ဦးဆောင်ဆရာတော်တစ်ပါးက အိမ်ကိုပြန်ချင်တဲ့ ကလေးတွေ မတ်တပ်ရပ်လို့ ပြောခဲ့ပါတယ်။ ကလေး ၁၅ယောက်က အိမ်ကို ပြန်ချင်တဲ့အတွက် မတ်တပ်ရပ်ခဲ့ကြပါတယ်။ အဲ့ဒီအတွက် အိမ်ကိုပြန်မယ့်ကျောင်းသားတွေကို ကျောင်းရဲ့ စည်းကမ်းချက်လို့ ဆိုကာ ကျောင်းသားတစ်ယောက်ကို ဥပဒေပေးတဲ့အနေနဲ့ ဝါးစိမ်းတုတ်နဲ့ ၂၉ ချက် ရိုက်ခဲ့တယ်လို့ ကလေးငယ်တွေကို ကူညီပေးနေသူတွေက ပြောဆိုထားပါတယ်။
ဒါ့အပြင် လပွတ္တာမြို့နယ် ကျောက်တန်းလေးကျေးရွာက ၁၃နှစ်အရွယ် မိန်းကလေးကိုလည်း လိင်ပိုင်းဆိုင်ရာကျူးလွန်တာတွေရှိတယ်လို့ သိရတဲ့အတွက် ကလေးသူငယ်ကူညီစောင့်ရှောက်ရေးအဖွဲ့တွေက စစ်ဆေးမှုတွေ ပြုလုပ်နေတယ်လို့သိရပါတယ်။
ဧရာဝတီတိုင်းဒေသကြီး လပွတ္တာမြို့နယ် ရေဆိုင်ပြင်ကျေးရွာကတဲ့ YGW ပရဟိတမိဘမဲ့ကျောင်းဟာ မိဘမဲ့ကျောင်းသားတွေသာမကငွေကြေးမပြည့်စုံတဲ့ လပွတ္တာမြို့နယ်နဲ့ နီးစပ်တဲ့ ကျေးရွာတွေက ကလေးတွေကို ကျောင်းထားပေးမယ်လို့ဆိုကာ စုဆောင်းထားတာဖြစ်ပါတယ်။အဲ့ဒီကျောင်းမှာ ကျောင်းတက်နေတဲ့ ကလေးငယ်ပေါင်း ၁၄၅ယောက် ရှိပါတယ်။
ချမ်းသာ၊အောင်လေး(Kumudra)
No comments:
Post a Comment