နေပြည်တော်၊ မေ ၂၉ – မတူကွဲပြားမှုတွေ ကြားက စည်းလုံး ညီညွတ်မှု ဘယ်လို ရယူနိုင်မလဲ ဆိုတာကို စပြီး သင်ယူနိုင်ခဲ့ပြီ လို့ ပြည်ထောင်စု ငြိမ်းချမ်းရေး ၂၁ ရာစု ပင်လုံ အစည်းအဝေးရဲ့ နောက်ဆုံး ရလဒ် အခြေအနေကို နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် က ပြောကြားလိုက်ပါတယ်။
နိုင်ငံတော် အတိုင်ပင်ခံ ဒေါ်အောင်ဆန်းစုကြည် က
“ကျွန်မတို့ဟာ မတူကွဲပြားမှုတွေကြားက စည်းလုံး ညီညွတ်မှု ဘယ်လို ရယူနိုင်မလဲ ဆိုတာကို စပြီး သင်ယူ နိုင်ခဲ့ကြပါတယ်၊ တာတို ခရီးတွေမှာ ခွန်အားကြီးသူ တွေက သာလွန်တတ်ကြပေမဲ့ တာဝေး ခရီးတွေမှာ စိတ်ဓာတ် ခိုင်မာသူ တွေက အဓိက အောင်ပွဲ ဆင်လေ့ ရှိကြပါတယ်၊ ရှေ့ဆက် လျှောက်လှမ်း ရဦးမယ့် ငြိမ်းချမ်းရေး ခရီးရှည်ကြီးမှာ ကျွန်မတို့ အားလုံး အတွက် ဒီစိတ်ဓာတ်ဟာ ခွန်အား ဖြစ်လာပါလိမ့်မယ်၊ ဒီညီလာခံကြီးမှ ကျွန်မတို့ ရခဲ့တဲ့ အတွေ့အကြုံများက ငြိမ်းချမ်းရေး ဖြစ်စဉ်အပေါ်မှာ ရှိနေကြတဲ့ သံသယ စိတ်တွေကို ဖယ်ရှား ပေးနိုင်မယ့် စုစည်း ညီညွတ်မှု ရရှိရေး ဘက်ကို ပို့ဆောင် ပေးနိုင်လိမ့်မယ်လို့ ယုံကြည် ထားပါတယ်˘ လို့ ပြောပါတယ်။
နေပြည်တော်မှာ လက်ရှိ ကျင်းပနေတဲ့ ပြည်ထောင်စု ငြိမ်းချမ်းရေး ညီလခံ “၂၁ ရာစု ပင်လုံ၊ ဒုတိယ အစည်းအဝေးကို မတက်ရောက် နိုင်ကြသေးတဲ့ အဖွဲ့အစည်း တွေနဲ့ လူပုဂ္ဂိုလ်တွေကိုလည်း မြန်မာ့ သမိုင်းမှာ ကျန်ခဲ့မယ့် ပြည်တွင်း ငြိမ်းချမ်းရေး ရရှိရန် လုပ်ငန်းစဉ် အတွင်း အတူတကွ ပါဝင်လာရန် အလေးအနက်ထား ဖိတ်ခေါ်ကြောင်း ကိုလည်း NCA လက်မှတ် ရေးထိုးထားခြင်း မရှိသေးတဲ့ တိုင်းရင်းသား လက်နက်ကိုင် အဖွဲ့အစည်းတွေကို ရည်ညွှန်းပြီး ပြောဆို သွားတာကိုလည်း တွေ့ရပါတယ်။
■မှတ်ကျောက်တင်နိုင်ခဲ့ပြီ
မြန်မာနိုင်ငံမှာ မတူကွဲပြားတဲ့ ဘုံသဘော တူညီမှုတွေကို ယနေ့ အချိန်မှာ ငြိမ်းချမ်းစွာဖြင့် လက်တွေ့ ညှိနှိုင်း မှတ်ကျောက် တင်နိုင်ခဲ့ပြီ ဖြစ်ကြောင်းနဲ့ နိုင်ငံတကာရဲ့ တိုးတက် ပြောင်းလဲမှုတွေဟာ မြန်မာ့ ပြည်ထောင်စု မျိုးဆက်တွေကို စောင့်ဆိုင်းနေမှာ မဟုတ်ဘူး လို့လည်း ဒေါ်အောင်ဆန်းစုကြည် က ပြောသွားပါတယ်။
ဒေါ်အောင်ဆန်းစုကြည် က ‘အာဃာတတွေ၊ နာကျည်းချက်တွေ၊ အနာတရတွေကိုပဲ အာရုံထားနေမယ် ဆိုရင် ခြေထောက်မှာ သံလုံးဆွဲပြီး လမ်းလျှောက်တဲ့ သူလို ဖြစ်နေမှာပါ၊ ကျွန်မတို့ရဲ့ ခြေလှမ်းတွေကို နှေးကွေး လေးလံ ယိုင်နဲ့စေမယ့် အဲဒီအာဃာတ တရားတွေကို စွန့်ပစ်နိုင်မှသာ ကျွန်မတို့ အနေနဲ့ သွက်သွက် လက်လက် အားမန်အပြည့်နဲ့ ရှေ့ကို လျှောက်လှမ်းနိုင်မှာ ဖြစ်ပါတယ်၊ ကျွန်မတို့ ဘယ်အထိ လျှောက်ရဦးမလဲ မသိနိုင်သေးပါဘူး၊ နေ့စဉ်နေ့တိုင်း စွန့်စားမှုတွေနဲ့ ရင်ဆိုင် နေရတဲ့ ကျွန်မတို့တွေ ငြိမ်းချမ်းရေး ရရှိဖို့ ဘယ်လို စွန့်စားမှုမျိုးကို မဆို ကြောက်ပြီး နောက်တွန့်နေလို့ မဖြစ်ပါဘူး၊ ကမ္ဘာကြီးက ကျွန်မတို့နိုင်ငံကို စောင့်နေမှာ မဟုတ်ပါဘူး၊ နိုင်ငံတကာ တိုးတက် ပြောင်းလဲမှုတွေက ကျွန်မတို့ ပြည်ထောင်စုရဲ့ မျိုးဆက်သစ်တွေကို စောင့်ဆိုင်း ငဲ့ညှာနေမှာ မဟုတ်ပါဘူး” လို့လည်း ပြောပါတယ်။
ပြည်တွင်းစစ်ရဲ့ ဒဏ်ရာ ဒဏ်ချက်တွေကို မှန်ကန်တဲ့ စိတ်ဓာတ်နဲ့ ကုစား ပေးနိုင်တယ် ဆိုတာ စိတ်ကူးယဉ်တာ မဟုတ်ဘူး ဆိုတာကို သည်ကနေ့ ညီလာခံ ကိုယ်စားလှယ်ကြီး တွေက လမ်းပြပေးနိုင်ခဲ့ပြီ လို့လည်း ဒေါ်အောင်ဆန်းစုကြည် က ထည့်သွင်း ပြောကြား သွားပါတယ်။
Author မိုးမိုး
Kumudra
No comments:
Post a Comment