ပြည်တွင်းရွှေဈေးနှုန်းက အမြင့်ဆုံး အခြေအနေအထိ ထပ်မံပြီး စံချိန်တင် မြင့်တက်လာပါတယ်။
ပြည်တွင်းရွှေဈေးနှုန်းတွေက မေလ ၁၈ ရက်နေ့မှာ အမြင့်ဆုံး အခြေအနေ အခေါက်ရွှေ ၁ ကျပ်သားကို ကျပ် ၉သိန်း ၁သောင်း ၁ထောင့် ၅ရာအထိ စံချိန်တင် ထပ်မံ မြင့်တက်လာပါတယ်။
ဒီလို ပြည်တွင်းရွှေဈေးနှုန်းတွေ စံချိန်တင် ထပ်မံ မြင့်တက်လာတာဟာ ကမ္ဘာ့ရွှေဈေးနှုန်းတွေ မြင့်တက်လာတာနဲ့အတူ မြန်မာငွေတန်ဖိုးတွေ ပိုမို ကျဆင်းလာတာကြောင့်ပါလို့ သုံးသပ်တာတွေလည်း ရှိနေပါတယ်။
ဒီလို ရွှေဈေးတွေ မြင့်တက်လာတဲ့အတွက် ပြည်တွင်းအခေါက်ရွှေ အရောင်းအဝယ် ဈေးကွက်ထဲမှာ ယခင်တပတ် ရွှေဈေး ၈သိန်း ၉သောင်း ဖြစ်ချိန်မှာ ရွှေဝယ်ယူထားသူတွေက ပြန်လည်ထုတ်ရောင်းလာတာတွေလည်း ရှိနေပါတယ်။
“မနက်ပိုင်း တက်တာကတော့ မြန်မာ့ရွှေဈေးကွက်မှာ ၁၅ ဒေါ်လာလောက် တက်သွားလို့ ၁ အောင်စကို ၁၅ ဒေါ်လာလောက် တက်သွားတာ ဖြစ်ပါတယ်။ အခု ၁၀ နာရီခွဲ ဖြစ်တာကတော့ ၉သိန်း ၁သောင်းနဲ့ ၁ထောင့် ၅ရာနဲ့ ဈေးဖွင့်ပါတယ်။ လက်ရှိအခြေအနေကတော့ ရောင်းလိုအား များပြီးတော့ ဝယ်လိုအား များနေပါတယ်။ ဈေးကောင်းတဲ့အတွက် အရင် ၉ သိန်းအောက်မှာ ၈သိန်း ၉သောင်းမှာ ဝယ်ထားတဲ့လူတွေက ဈေးကောင်းရတဲ့အတွက် ပြန်ရောင်းတဲ့အတွက် ဈေးကွက်စည်နေတာ ဖြစ်ပါတယ်” လို့ ရန်ကုန်တိုင်းဒေသကြီး ရွှေလုပ်ငန်းရှင်များအသင်း အတွင်းရေးမှူး ဦးဝင်းမြင့်က ပြောပါတယ်။
ဒီနေ့မှာရွှေဈေးက အမြင်ဆုံးထပ်မံရောက်ရှိလာတာကြောင့်ရွှေထည်ပစ္စည်း အရောင်းဆိုင် တွေမှာတော့ အရောင်းအဝယ်က ပိုအေးလာတယ်လို့ ရွှေဆိုင်ပိုင်ရှင်တွေက ပြောပါတယ်။
“ဈေးတက်တာက ဒီနေ့မှ တက်သွားတာ။ ရုတ်တရက်ကြီး တက်သွားတာပေါ့နော်။ အခုလောလောဆယ်တော့ ဈေးတက်လို့ဆိုပြီး လာရောင်းတဲ့သူတွေတော့ မလာသေးပါဘူး။ ပုံမှန်အနေအထားလောက်ပဲ။ အရောင်းအဝယ်ကတော့ ခပ်အေးအေးပဲ။ ဈေးတက်လာတော့ နည်းနည်းပိုအေးသွားတာပေါ့နော်”လို့ ရွှေဆိုင်ပိုင်ရှင် ဦးဇော်အောင်က ပြောပါတယ်။
မေလ ၁၈ ရက်နေ့မှာတော့ အခေါက်ရွှေ ၁ ကျပ်သားကို ကျပ် ၉သိန်း ၁သောင်း ၁ထောင့် ၅ရာ ပေါက်ဈေးရှိနေချိန်မှာ ကမ္ဘာ့ရွှေဈေးကလည်း ၁ အောင်စကို အမေရိကန်ဒေါ်လာ ၁၂၆၀ ပေါက်ဈေးရှိနေပါတယ်။
ရွှေဈေးနှုန်းက မေလကုန်လောက်အထိတော့ ၉သိန်း အထက်မှာပဲ အရောင်းအဝယ် ရှိနေမယ်လို့ ရွှေဈေးကွက်ကျွမ်းကျင်သူတွေက သုံးသပ်ပါတယ်။
DVB
No comments:
Post a Comment