အသားမည်းပေမယ့် အသဲဖြူတဲ့ စိန်ကုလား
မြန်မာ့ဆိုရှယ်လစ်လမ်းစဉ်ပါတီခေတ်မှာ စိန်ကုလားရဲ့အမှုက ပါတီကောင်စီလူကြီးတွေကို ထိတ်လန့် ကြောက်ရွံ့စေခဲ့ပြီး လမ်းစဉ်ပါတီဥက္ကဋ္ဌကြီး ဦးနေ၀င်းကိုယ်တိုင် တရားသူကြီးတွေကို လမ်းညွှန်ခဲ့ရတဲ့ အမှုဖြစ်ပါတယ်။
အမှုဖြစ်စဉ်က အတော်အံ့သြစရာ ကောင်းပါတယ်။ တာမွေအိုးစုမှာနေတဲ့ စိန်ကုလားဟာ မဟုတ်မခံစိတ်ရှိပြီး သတိ်္တရှိတော့ ရပ်ကွက်ထဲက လူတွေက နည်းနည်းရှိန်တယ်။ ဒါပေမဲ့ စိန်ကုလားက မဟုတ်တာ မလုပ်လို့ လူချစ် လူခင်ကလည်း ပေါတယ်။ သူ့ကို စိန်ကုလားလို့သာ ခေါ်ကြတာ သူက ဗမာစစ်စစ်။ ချစ်စနိုးနဲ့ခေါ်ရင်း စိန်ကုလားဖြစ်သွားတာ။ တစ်နေ့တော့ ညီအစ်ကိုလိုခင်မင်ရတဲ့သူတစ်ယောက်က စိန်ကုလားဆီ ရောက်လာပြီး အကူအညီတစ်ခု တောင်းတယ်။
“စိန်ကုလား ... ငါ့ကို အာပီတူးတစ်ကောင်က ရန်လိုက်စနေတယ်၊ ငါ ဒီကောင်နဲ့ ရန်မဖြစ်ချင်ဘူး”
“ဘယ်ကကောင်မို့လို့လဲ”
“ဒီကောင့်ဦးလေးက တာမွေကောင်စီကလူကြီးလေ၊ ဒါကြောင့် ဒီကောင် ငစွာလုပ်နေတာ”
စိန်ကုလားက ဒီအကြောင်းကြားတော့ ခပ်ပေါ့ပေါ့ပဲ သဘောထားတယ်။ ဒါကြောင့် သူ့သူငယ်ချင်းကို ရိုးရိုးသားသားပဲ အကြံပေးလိုက်တယ်။
“ဒါဆို သူ့ဦးလေးသွားတိုင်ကွာ”
“ဟာ ငါမတိုင်ရဲဘူး”
သူငယ်ချင်းစကားကြောင့် စိန်ကုလား ထောင်းခနဲ ဒေါသထွက်သွားတယ်။ ဒါကြောင့် သူ့ပင်ကိုစရိုက်အတိုင်း ပြန်ပြောလိုက်တယ်။
“မင်း ငကြောက်ပဲ၊ ဒါဆို ငါသွားပြောမယ်”
သူငယ်ချင်းဖြစ်သူကလည်း စိန်ကုလားအကြောင်းသိတော့ မတားတော့ဘူး။ စိန်ကုလားက ခြေမြန်လက်မြန်နဲ့ ကောင်စီရုံးကို ထွက်သွားတယ်။ ရန်လိုက်စနေတဲ့ကောင်ရဲ့ ဦးလေးကို ရုံးခန်းထဲဝင်တွေ့ပြီး အကျိုးအကြောင်း ပြောတယ်။ ကံဆိုးချင်တော့ ကောင်စီလူကြီးက စိန်ကုလားကို လူကြီးစကားမပြောဘူး။ ပြောတဲ့စကားတွေက လူကြီးလူကောင်းမဆန်ဘူးလို့ စိန်ကုလား ခံစားလိုက်ရတယ်။ ကြည့်ပါဦး။
“မင်းသူငယ်ချင်းကို ငါ့တူက ဘာပြဿနာမှမရှိဘဲ ရန်စပါ့မလား၊ သူတို့ကြားမှာ ပြဿနာတစ်ခုခု ရှိလို့ပေါ့ကွာ”
စိန်ကုလား စိတ်ရှည်လက်ရှည် သည်းခံနားထောင်ပါသေးတယ်။
“ဒါကြောင့် ဦးလေးကို လာတိုင်တာပေါ့၊ ဦးလေးတူကို ဦးလေး ဆုံးမထားလိုက်ရင် သူတို့ချင်း ဘာပြဿနာမှ ဖြစ်လာမှာမဟုတ်ဘူး”
ပါတီကောင်စီကို ကြောက်နေရတဲ့ခေတ်မှာ စိန်ကုလားရဲ့ ပြောပေါက်က စိတ်ဆိုးဒေါသထွက်သွားစေတယ်။ ကောင်စီလူကြီးက စိန်ကုလားကိုပါ မကြည်တော့ဘူး။
“မင်း ငါ့ကို ဆရာလာမလုပ်နဲ့၊ မင်းတို့ကောင်ကို အခုချက်ချင်း ငါ ဖမ်းခိုင်းလိုက်လို့ရတယ်”
အခြေအနေတွေက မထင်မှတ်ဘဲ တင်းမာကုန်တယ်။ စိန်ကုလားရဲ့ သတ်္တိသွေးတွေကလည်း ပွက်ပွက်ဆူလာတယ်။
“ဖမ်းချင်လည်း ဖမ်းလေဗျာ၊ ခင်ဗျားတို့က အာဏာရှိတဲ့သူတွေပဲ၊ ကျုပ်တို့ကလည်း ဒေါသရှိတဲ့လူတွေပဲ”
စိန်ကုလားက ကောင်စီလူကြီးကို ပေါ်တင်ပဲ စိန်ခေါ်ပြီး ရုံးခန်းထဲက ထွက်လာလိုက်တယ်။ ညရောက်တော့ စိန်ကုလားကို ဘယ်သူမှ လာမဖမ်းပါဘူး။ ဒါပေမဲ့ ပြဿနာရဲ့ မြစ်ဖျားခံရာ စိန်ကုလားသူငယ်ချင်းကိုတော့ တာမွေအပိုင်ရဲတွေက လာဖမ်းသွားတယ်။ ဒီသတင်းကြားတော့ စိန်ကုလားဒေါသက ငယ်ထိပ်ကို ရောက်နေပြီ။ မနေ့က စကားပြော အဆင်မပြေတဲ့ ကောင်စီလူကြီးဆီကို ထပ်သွားတယ်။ ပြီးတော့ သူ့သူငယ်ချင်းကို ဒီလောက်ထိ လုပ်ဖို့မလိုကြောင်း ရှင်းပြတယ်။ ဒါပေမဲ့ ကောင်စီလူကြီးက သူ့ရဲ့ သြဇာအာဏာကို ပိုပြလိုက်တယ်။
“ငါကိုယ်တိုင် ဖမ်းခိုင်းလိုက်တာလေကွာ၊ မင်းကဘာလုပ်ချင်လို့လဲ”
“လူငယ်ချင်း ကတောက်ကဆဖြစ်တာ ဦးလေးအနေနဲ့ ဒီလောက်ထိ အရေးယူဖို့ မလိုဘူးထင်တယ်”
“လိုလို့လုပ်တာပေါ့ကွာ၊ လိုအပ်ရင် မင်းကိုပါ အချုပ်ထဲ ထပ်ထည့်ဦးမှာ”
ကောင်စီလူကြီးစကားကြောင့် စိန်ကုလား မွှန်ထူသွားတယ်။ ဒါကြောင့် ရုံးခန်းထဲမှာပဲ ပေါ်တင်စိန်ခေါ်လိုက်တယ်။
“ကျုပ်ကို တကယ်ဖမ်းမှာလား၊ လာဖမ်းလေ၊ ဒါပေမဲ့ ဒီအတိုင်း ထောင်ထဲကိုဝင်မယ့် စိန်ကုလားမဟုတ်ဘူးဗျ”
“အေး ကြည့်ကြသေးတာပေါ့ကွာ”
စိန်ကုလား ကောင်စီရုံးခန်းထဲက ထွက်လာလာချင်း ဒေါသကြောင့် ဘာကိုမှ မမြင်တော့ဘူး။ တစ်ကိုယ်လုံး တုန်ယင်ပြီး မွှန်ထူနေတယ်။ အိမ်ကိုသွားပြီး နံရံမှာ ထောင်ထားတဲ့ ဓားပြန်ယူတယ်။ ပြီးတော့ ဘာမပြောညာမပြောနဲ့ ကောင်စီရုံးထဲဝင်ပြီး ကတောက်ကဆဖြစ်ခဲ့တဲ့ လူကြီးကို ၀င်ခုတ်ပါလေရော။ အဖြစ်အပျက်တွေက မြန်ဆန်လွန်းတယ်။ စိန်ကုလားရဲ့ ဓားချက်အောက်မှာပဲ ကောင်စီလူကြီး အသက်ပျောက်သွားတယ်။ ဒါပေမဲ့ စိန်ကုလားရဲ့ ဒေါသက ပြေမသွားဘူး။ နတ်ပူးသလို သရဲစီးသလို ဖြစ်နေတယ်။ အသက်ဝိညာဉ်မဲ့နေတဲ့ ကောင်စီလူကြီးရဲ့ အလောင်းကို စိန်ကုလားက လမ်းလယ်ကောင်ကို ဆွဲလာတယ်။ ပြီးတော့ ပါးစပ်ကလည်း တစ်ရပ်ကွက်လုံးကြားအောင် အော်ပြောနေတယ်။
“အာဏာပါဝါပြတဲ့လူ၊ အနိုင်ကျင့်တဲ့လူဆိုရင် ဒါမျိုးကြုံရမယ်ဟေ့၊ စိန်ကုလားက မတရားတာဆို လုံးဝမခံဘူးကွ၊ ကြည့်ထားကြ”
စိန်ကုလားရဲ့ လုပ်ရပ်ကြောင့် အဲဒီအချိန်က မိုက်ပါပေ့ဆိုတဲ့ လူတွေစုရာ တာမွေအိုးစုတစ်ရပ်ကွက်လုံး တိတ်ဆိတ်သွားတယ်။ နောက်ဆုံးတော့ စိန်ကုလားကို ရဲက ဖမ်းဆီးလိုက်ပြီး လူသတ်မှုနဲ့ စွဲချက်တင်လိုက်တယ်။ ဒါပေမဲ့ စိန်ကုလားက ကောင်စီလူကြီးကိုသတ်ပြီး လမ်းမပေါ်ဆွဲပြတဲ့ သတင်းက တောမီးလို ပျံ့နှံ့သွားတော့ နိုင်ငံတော်အဆင့် လူကြီးတွေ နားအထိပေါက်သွားတယ်။ နောက်ဆုံး လမ်းစဉ်ပါတီဥက္ကဋ္ဌကြီး ဦးနေ၀င်းက စိန်ကုလားကို ပြင်းပြင်းထန်ထန်အရေးမယူရင် ပါတီကောင်စီကလူတွေ အသက်အန္တရာယ် ပိုကြီးလာနိုင်တာမို့ တရားသူကြီးကိုခေါ်ပြီး စိန်ကုလား ဘယ်လိုပြစ်ဒဏ်ပေးရမယ်ဆိုတာ လမ်းညွှန်ရတဲ့အထိ ဖြစ်ခဲ့တယ်။ ဒီလိုနဲ့ စိန်ကုလားဟာ တရားရုံးရဲ့ သေဒဏ်ကြိုးမိန့်ချခြင်းကို ခံခဲ့ရတယ်။
စိန်ကုလား ကံကောင်းတဲ့အချက်ကတော့ သူ့ရှေ့က ကြိုးသမားတချို့ကို ကြိုးပေးပြီး သေဒဏ်စီရင်နေချိန်မှာပဲ “မြဂေါင်” ကိစ္စပေါ်လာတယ်။ မြဂေါင်ကို ကြိုးပေးမယ့်အစီအစဉ် နှောင့်နှေးနေတော့ သူတို့အလှည့်ကလည်း နောက်ရောက်သွားတယ်။ ထပ်ပြီးကံကောင်းတာက ကြိုးသမားတွေကို အစဉ်လိုက်အတိုင်း ကြိုးပေးဖို့ စီစဉ်နေတဲ့အချိန်မှာပဲ အပြင်မှာ ငွေစက္ကူအရေးအခင်း၊ ကျောင်းသားအရေးအခင်းတွေ ဖြစ်ပွားပြီး ပြည်သူလူထုတစ်ရပ်လုံးက အုပ်ချုပ်သူ မဆလအစိုးရကို အုံကြွဆန္ဒပြတာတွေ ဖြစ်ပေါ်လာတယ်။ နောက်ဆုံး ရှစ်လေးလုံး အရေးတော်ပုံကြီးပေါ်လာပြီး မဆလအစိုးရ ပြုတ်ကျသွားတယ်။ တပ်မတော် ကျောထောက်နောက်ခံပြုတဲ့ န၀တအစိုးရ ပေါ်ပေါက်လာတယ်။ န၀တအစိုးရက တက်တက်ချင်း ကြိုးသမားတွေကို တစ်သက်တစ်ကျွန်း ပြစ်ဒဏ်ပြောင်းပြီး ကျန်တဲ့အကျဉ်းသားတွေကိုလည်း နှစ်အပိုင်းအခြားအလိုက် လွတ်ငြိမ်းချမ်းသာခွင့် ပေးလိုက်တယ်။ ဒီအထဲမှာ စိန်ကုလားတို့လည်း ပါသွားပြီး သေဒဏ်ကနေ ကျွန်းပြောင်းသွားတယ်။ ဒါကြောင့် သေဒဏ်ကြိုးလွတ် စိန်ကုလားတို့က မဆလအစိုးရကို ဆန္ဒပြတဲ့ ကျောင်းသားတွေ၊ နိုင်ငံရေးသမားတွေကို ထောင်ထဲကနေ အရမ်းကျေးဇူးတင်နေတယ်။
နောက်တော့ န၀တအစိုးရက ဒီမိုကရေစီလိုလားတဲ့ ကျောင်းသားတွေ၊ နိုင်ငံရေးသမားတွေကို အစုလိုက်အပြုံလိုက်ဖမ်းပြီး အင်းစိန်ထောင်ထဲ ထည့်ထားတယ်။ နိုင်ငံရေးသမားတွေက များလွန်းလို့ တစ်ထောင်လုံးက တိုက်တွေ၊ အဆောင်တွေကို နေရာမျှပြီးထိန်းသိမ်းထားတယ်။ နိုင်ငံရေးအစဉ် အလာကြီးတဲ့သူတွေကိုတော့ လူအများကြီးနဲ့ တွေ့ခွင့်မပေးချင်လို့ တိုက်တွေထဲမှာ ဖမ်းထားတယ်။ ကြိုးတိုက်ထဲကို နာမည်ကြီး နိုင်ငံရေးသမားတချို့ ရောက်လာတယ်။ ဒီအထဲမှာ သီပေါဘုရင်ရဲ့မြစ်တော်ဖြစ်တဲ့ တော်ဘုရားလေး ဦးအောင်ဇေ (တော်တော်)နဲ့ အဓိပတိ ဒေါက်တာဘမော်ရဲ့ သမက်ဖြစ်သူ ဦးရဲထွန်းတို့လည်း ပါလာတယ်။ သူတို့တွေကို ၁၀(က)ပုဒ်မနဲ့ ထိန်းသိမ်းထားတာကြောင့် မိသားစုနဲ့ တွေ့ခွင့်မရဘူး။ အစားအသောက်ကလည်း အင်မတန်ဆင်းရဲတယ်။ ဒီအချိန်မှာ ကြိုးသမားတွေက နေ့စဉ် ကြက်ဥ၊ ပေါင်မုန့်၊ နွားနို့ ရတယ်။ နေ့စဉ် အသားစားရတယ်။ ရိုးရိုးအကျဉ်းသားက တစ်ပတ်တစ်ကြိမ်ပဲ အသားစားရတယ်။ ဒါကြောင့် အစားအသောက်တွေ အလျှံပယ်ဖြစ်နေတဲ့ စိန်ကုလားတို့က နိုင်ငံရေးသမားတွေကို တတ်နိုင်သလောက် ကျွေးမွေးစောင့်ရှောက်တယ်။ သူ့မှာ ရှိနေတဲ့ အသားတွေကို ထောင်ထဲမှာ မရှိမဖြစ်လိုအပ်တဲ့ “ကျားမသန်းဌေး” ဆေးပေါ့လိပ်နဲ့ လဲလှယ်ပြီး ဆေးလိပ်ကြိုက်တဲ့ နိုင်ငံရေးသမားတွေကို ဝေပေးတယ်။ ဒါကြောင့် အိမ်နဲ့မတွေ့ရတဲ့ နိုင်ငံရေးသမားတွေအတွက်တော့ စိန်ကုလားက အရေးပါနေတာပေါ့။ ဒီကြားထဲ တော်ဘုရားလေး ဦးအောင်ဇေ (တော်တော်)က အသက်အရွယ်ရလာလို့ လူကြီး ရောဂါတွေရှိတယ်။ သူပုံမှန်စားရတဲ့ ဆေးတွေရှိပေမယ့် ထောင်နဲ့ ထောက်လှမ်းရေးက ညစ်ပြီး သွင်းမပေးဘူး။ ထောင်ဆေးရုံကဝေတဲ့ ဆေးမြီးတိုတွေပဲ သောက်နေရတော့ ရောဂါက ပိုတိုးလာတယ်။ ဒီအခြေအနေမှာ စိန်ကုလားက ကြိုးတိုက် တာဝန်ကျ ၀န်ထမ်းတချို့နဲ့ အပေးအယူလုပ်ပြီး အဘတော် လိုချင်တဲ့ဆေးကို အင်းစိန် အပြင်ဆေးခန်းက ၀ယ်ပြီးသွင်းပေးလိုက်တယ်။ သူကလည်း နိုင်ငံရေးသမားတွေကို ဒီနည်းနဲ့တုံ့ပြန် ကျေးဇူးဆပ်ရလို့ ကျေနပ်ပျော်ရွှင်နေတယ်။ ဒါပေမဲ့ ဒီအပျော်က ရေရှည်မခံပါဘူး။ သေဒဏ်တွေကို ကျွန်းပြောင်းပြီးတဲ့နောက် ထောင်အာဏာပိုင်တွေက သေဒဏ်ကြိုးလွတ်တွေကို အုပ်ချုပ်ရေးမှာ အသုံးချဖို့ ကြံစည်တယ်။ ဒါကြောင့် ကြိုးတိုက်ကနေ အဆောင်တွေကို တန်းစီး၊ အခန်းလူကြီး၊ စည်းကမ်းထိန်း ရာထူးတွေနဲ့ ပို့လိုက်တယ်။ စိန်ကုလားက ကြိုးတိုက်ထဲက နိုင်ငံရေးသမားတွေရဲ့ စားဝတ်နေရေးကြောင့် အဆောင်ကို မသွားချင်ဘူးဆိုပြီး တင်ပြပေမယ့်လည်း အခြေအနေကို ရိပ်စားမိတဲ့ ထောင်ပိုင်က စိန်ကုလားကို နိုင်ငံရေးသမားတွေနဲ့ ဝေးအောင် အဆောင်ပို့လိုက်တယ်။ အဆောင်မှာကတော့ တိုက်ထဲမှာထက် ပိုပြီးအနေအစား ချောင်ပါတယ်။ စိန်ကုလားလို အရှိန်အ၀ါရှိတဲ့ သေဒဏ်ကြိုးလွတ် အကျဉ်းသားကိုလည်း နေရာကောင်းကောင်း ချက်ချင်းပေးတယ်။ ထောင်ထဲကို အမှုအမျိုးမျိုးနဲ့ ရောက်လာတဲ့ အိုးစုသားတွေ၊ မအူကုန်းသားတွေကလည်း သူတို့အပိုင်သားခေါင်းဆောင်ဆိုပြီး အရာပေးတယ်။ ဒီတော့လည်း စိန်ကုလားက အလိုက်အထိုက် နေရတော့တာပေါ့။ ဒါပေမဲ့ စိန်ကုလားရဲ့သမိုင်းမှာ အင်းစိန်ထောင်ကို ရောက်လာတဲ့ ဘယ်နိုင်ငံရေးသမားကိုမှ အနိုင်ကျင့်တာ၊ နှိပ်စက်တာ မရှိခဲ့ပါဘူး။ တစ်ဖက်မှာတော့ ထောင်ထဲမှာ “ကျစ်နည်း” မျိုးစုံနဲ့ ကလိမ်ကကျစ်ကျတတ်တဲ့ မ,တစ်ရာသားတွေနဲ့ ဆက်ဆံရတာပေါ့။ သူ့ကို နေရာပေးတဲ့အထဲမှာ သူ့ရဲ့အပိုင်သားဖြစ်တဲ့ မအူကုန်း မူဆာလည်းပါတယ်။ အဲဒီအချိန်မှာ မူဆာကလည်း အင်းစိန်ထောင်ထဲမှာ ဘုန်းမီးနေလ တောက်ပနေတယ်။သူ့ကိုလည်း အပိုင်သားချင်းဆိုပြီး စောင့်ရှောက်တယ်။
ဒီလိုနေလာခဲ့ရာကနေ မူဆာကို ကျော်သူက ချွတ်နဲ့ထိုးပြီး ရဲဘက်မထွက်ရအောင် “ရင်း” လိုက်တာကို မျက်မြင်ကိုယ်တွေ့ တွေ့လိုက်ရတယ်။ မူဆာကို အပြင်ဆေးရုံပို့ပြီး ဆေးကုတဲ့အခါ အိုးစုသားတွေရဲ့ ခေါင်းဆောင်ဆိုလို့ စိန်ကုလားပဲ ကျန်ခဲ့တော့တယ်။ ဒီတော့ ကျန်တဲ့အပိုင်သားတွေက စိန်ကုလားကို ပေါက်ပေါက်ဖောက်တာပေါ့။ မူဆာအတွက် ပြန်ပြီးကလဲ့စားချေပေးဖို့ ပြောကြတယ်။ အိုးစုသားတွေရဲ့ သိက္ခာကို စိန်ကုလားက ဆယ်ပေးဖို့တောင်းဆိုကြတယ်။ အမှန်တကယ်တော့ စိန်ကုလားက ကျော်သူနဲ့ ထိပ်တိုက် ဘာဇယားမှမရှိဘူး။ ဒါကြောင့် ကျော်သူ့ကို ပြန်လုပ်ဖို့ကိစ္စနဲ့ ပတ်သက်ပြီး သွေးအေးနေတယ်။ ကျော်သူ့ကို တုံ့ပြန်ဖို့ တွေဝေတွန့်ဆုတ်နေတဲ့ စိန်ကုလားကို သူ့အပိုင်သားတွေက အားမရကြဘူး။ ဒါကြောင့် တစ်နေ့တော့ အားလုံးလူစုပြီး စိန်ကုလားကို ခေါ်ဆွေးနွေးတယ်။ ဆေးရုံကို ရောက်နေတဲ့ ကျော်သူ့ကို ဘယ်လိုသတ်ပေးမလဲပေါ့။ အခြေအနေက အကျပ်အတည်းကို ရောက်နေတယ်။ စိန်ကုလားကလည်း ပွင့်ပွင့်လင်းလင်းသမားဆိုတော့ အပိုင်သားတွေကို နှစ်မသိမ့်ချင်ဘူး။ ဒါကြောင့် ဟောဟောဒိုင်းဒိုင်းပဲ ပြောလိုက်တယ်။
“ကျော်သူ့ကို ရှင်းမယ်ဆို အချိန်မရွေး ငါရှင်းလို့ရတယ်။ ဒါပေမဲ့ စိုးမြတ်ကြီး ထောင်မပြောင်းခင် ကျော်သူ့ကို စောင့်ရှောက်ဖို့ ငါဆီက ကတိတောင်းသွားတယ်။ ငါတို့က လူဆိုးလူမိုက်တွေဆိုပေမယ့် အချင်းချင်းထားတဲ့ ကတိကိုတော့ ငါတည်ချင်တယ်ကွာ။ ဒါကြောင့် ကျော်သူ့ကို ငါမသတ်ချင်ဘူး”
စိန်ကုလားစကားဆုံးဆုံးချင်း တာမွေအိုးစုသမားတွေ အားလုံးစိတ်ဓာတ်ကျကုန်တယ်။ စိန်ကုလား ကျော်သူ့ကို လက်ရှောင်သွားတာ တစ်ထောင်လုံး သတင်းပြန့်သွားတယ်။ စိန်ကုလားက ကျော်သူ့ကို မသတ်ချင်ဘူးဆိုပေမယ့် ကျော်သူ့အသက်အန္တရာယ် ကင်းသွားပြီလို့ မထင်ပါနဲ့။ ကျော်သူ့ကို ရာဇ၀င်ကြွေးဆပ်ဖို့ တန်းစီနေတဲ့သူတွေထဲမှာ ဆေးရုံကြီးစိန်ဝင်းက ရှေ့ဆုံးကပါပဲ။ ဒီအချိန်မှာပဲ စိန်ဝင်းကတော့ ဘယ်သူ့အကူအညီမှမပါဘဲ ကျော်သူ့ကို ရှင်းမယ်လို့ ပေါ်ပေါ်ထင်ထင် ကြေညာလိုက်ပြီ။ ဒါကြောင့် ကျော်သူကလည်း ထောင်ဆေးရုံကနေ စိန်ဝင်းတို့ရဲ့ ခြေလှမ်းတွေကို သတိထား စောင့်ကြည့်နေတယ်။
ဂန္ထ၀င်လူမိုက်ကြီးများအကြောင်း ဇာတ်သိမ်းမရေးခင်မှာပဲ “ကျုပ်ဘ၀ သက်တမ်းတစ်လျှောက် အင်းစိန်ထောင်ရဲ့ အရှိန်အ၀ါအကြီးဆုံး လူမိုက်တွေဖြစ်တဲ့ အီဆတ်၊ စိုးမြတ်၊ ကျော်သူ၊ စိန်ဝင်း အားလုံးနဲ့ အတူနေခဲ့ဖူးတယ်။ ဒါပေမဲ့ ကျုပ်အလေးစားဆုံး လူမိုက်ကြီးကတော့ ကြည့်မြင်တိုင်က ကိုစံငြိမ်းပဲ” လို့ ပြောလာသူတစ်ယောက် ရှိပါတယ်။ သူကတော့ ထောင်ကလွတ်ပြီး ဘ၀သစ်ကို တည်ဆောက်နေသူ “ရေဘ၀ဲဘိုနီ” ပါပဲ။ သူက အင်းစိန်ထောင်ရဲ့ ဂန္ထ၀င်လူမိုက်တွေထဲမှာ မပါမဖြစ်ပါရမယ့် လူတချို့အမည်ကို လှမ်းပေးခဲ့ပါတယ်။ ဒီလူတွေအကြောင်းရေးမှ ဂန္ထ၀င်လူမိုက်စာရင်းက ပိုပြီးပြည့်စုံမှာပါ။ ဒါကြောင့် ရှေ့အပတ်မှာ ရေဘ၀ဲဘိုနီအကြောင်းကို ဆက်ရေးပါမယ်။
ဇော်သက်ထွေး
tomorrow
http://www.tomorrow.com.mm/?q=articles%2F3480
No comments:
Post a Comment