ရှမ်းပြည်နယ်တောင်ပိုင်း မိုးဗြဲမြို့မှာ တပ်လုံခြုံရေးအတွက် ဆိုပြီး သိမ်းယူထားတဲ့ ယာမြေဧက ၄ဝဝ နီးပါးကို ပြန်လည်စွန့်လွှတ်ဖို့ တိုင်းတာမှုတွေ ဒီနေ့ ပြုလုပ်ခဲ့ပါတယ်။
၁၉၉၂ ခုနှစ်က အမှတ် ၄၂၂ ခြေမြန်တပ်ရင်းက သိမ်းယူခဲ့တာဖြစ်ပြီး ယာမြေ ၃၇၇ ဧကကို တပ်မတော်၊ ရဲတပ်ဖွဲ့ နဲ့ ဒေသခံတွေ ၃ ပွင့်ဆိုင် ကွင်းဆင်းတိုင်းတာမှုတွေ ပြုလုပ်ခဲ့တယ်လို့ ဒေသခံတောင်သူ ဦးအောင်မျိုးခန့် က ပြောပါတယ်။
"အမှတ် ၄၂၂ ခြေမြန်တပ်ရင်း မိုးဗြဲပေါ့၊ ၁၉၉၂ ခုနှစ်ထဲက သိမ်းထားတာပေါ့၊ သူတို့ သိမ်းသွားတုန်းကတော့ တပ်လုံခြုံရေးအတွက်ဆိုပြီးမှပေါ့နော် သိမ်းသွားတာပေါ့၊ ၃၇၇ ဧကကို သူတို့က ပြန်လည်စွန့်လွှတ်ဖို့ဆိုပြီးမှ ဒီနေ့ ရဲရယ်၊ တပ်ရယ်၊ ကျနော်တို့ တောင်သူတွေရယ်ပေါ့နော်၊ ၃ ပွင့်ဆိုင် သွားရောက်ကွင်းဆင်း တိုင်းတာ, တာပေါ့နော်။"
တပ်မတော်က သိမ်းယူခဲ့ချိန်က ဧက ၁ ထောင်ကျော်သိမ်းယူထားတာဖြစ်ပြီး အခုပြန်လည်စွန့်လွှတ်လိုက်တဲ့ လယ်မြေတွေအပြင် ဧက ၈ဝဝ ကျော်ကျန်ရှိနေသေးတယ်လို့လည်း ဒေသခံတွေက ပြောပါတယ်။
ပြန်လည်စွန့်လွှတ်မယ့် ယာမြေတွေရဲ့ မူလပိုင်ရှင်တောင်သူတွေကို ပုံစံ ၇ ရရှိဖို့ ဆောင်ရွက်ပေးသွားမယ်လို့ တာဝန်ရှိသူတွေက ပြောသွားကြောင်း ဦးအောင်မျိုးခန့် က ပြောပါတယ်။
အဲဒီယာမြေတွေမှာ ပြောင်း၊ ပဲစင်းငုံ၊ စပါး၊ ပြောင်းကောက် စတာတွေ စိုက်ပျိုးခဲ့တာ ဖြစ်ပါတယ်။
စွန့်လွှတ်မယ့် မြေတွေမှာ ယာမြေတွေအပြင် ပြီးခဲ့တဲ့နှစ်က တပ်က ထပ်မံသိမ်းယူဖို့ဆိုပြီး တိုင်းတာခဲ့တဲ့ ရွာမြေတွေလည်း ပါဝင်တယ်လို့ သိရပါတယ်။
Photo: Kayan Hlawunn Facebook
RFA
No comments:
Post a Comment