စစ်ခွေးတိုက်ကနေ ဆေးရုံကို ရောက်နေတဲ့ ကျော်သူကို အပြတ်ရှင်းဖို့ စိတ်ကူးယဉ်တဲ့လူက ယဉ်နေပြီ၊ စီမံချက်ဆွဲတဲ့သူက ဆွဲနေကြပြီ။ ထောင်ဆိုတာကလည်း ပြဿနာတစ်ခုဖြစ်ရင် အမြဲ ဘက်နှစ်ဖက် ရှိကြစမြဲပဲ။ အခုလည်း စိုးမြတ်ကြီးခေတ် ပြီးဆုံးသွားတဲ့နောက် သူ့ရဲ့ လက်ရင်းလက်ငုတ်တွေကို ရှင်းလင်းဖို့ ကြံစည်သူတွေနဲ့ ခုခံဖို့ ကြံစည်သူဆိုပြီး နှစ်ဖက်လုံးမှာ ရှိလာတယ်။ ကျော်သူ့ကိုရှင်းဖို့ ကြံစည်တဲ့ သူတွေထဲမှာတော့ တာမွေအိုးစုက စိန်ကုလားနဲ့ ရန်ကုန် ဆေးရုံကြီးအုပ်စုက စိန်ဝင်းတို့က သတင်းအထွက်ဆုံး ဆိုတာ ရှေ့မှာပြောခဲ့ပြီးပါပြီ။ ဒီအခြေအနေမှာ အကာအကွယ်မဲ့နေတဲ့ ကျော်သူ့ကို အဆောင်ကနေ စိတ်ပူနေတဲ့ သူငယ်ချင်း ရောင်းရင်းတွေလည်း ရှိတယ်။ သူတို့တွေထဲမှာ (၁)ဆောင်က သူတွေက အစိုးရိမ်ဆုံးပဲ။ သူတို့က ကျော်သူ့ဆီကို လှမ်းဆက်သွယ်ပြီး စိန်ဝင်းတို့ စိန်ကုလားတို့က သတ်ဖို့ ကြံစည်နေတယ်ဆိုတာကို သတင်းကြိုပို့လိုက်တယ်။ ပြီးတော့ သူတို့ရန်က ကာကွယ်ရှောင်ထွက်ဖို့ကိုလည်း အကြံပေးထားတယ်။ (၁) ဆောင်က ဇိုးတွေက ကျော်သူ့အပေါ် သံယောဇဉ်ရှိတယ်။ ဘာလို့လဲဆိုတော့ ကျော်သူက စိုးမြတ်ကြီးရဲ့ အကူအညီနဲ့ (၁)ဆောင်မှာ နှစ်ရှည်လများ အနေကြာခဲ့လို့ပါပဲ။ ဒါ့အပြင် (၁)ဆောင်ကလူတွေ ပါးစပ်ဖျားထဲမှာ “ကျော်သူ ကျော်သူ”ဆိုပြီး တဖွဖွပြောခဲ့ရတဲ့ အဖြစ်အပျက် တစ်ခုကလည်း ကျန်ရစ်ခဲ့တာကိုး။
ဒီအဖြစ်အပျက်က ၁၉၈၉ ခုနှစ်မှာ ဖြစ်ခဲ့တာပါ။ မြန်မာ့ဆိုရှယ်လစ်လမ်းစဉ်ပါတီ ပြုတ်အကျ နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ဆိုပြီး တပ်မတော်က အာဏာသိမ်းပြီးစအချိန်မှာ ဥပဒေစိုးမိုးရေးနဲ့ လုံခြုံရေးအတွက် အပြည့်အ၀ မဆောင်ရွက်နိုင်ခဲ့ပါဘူး။ ဒီအခွင့်အရေးကို အိမ်နီးချင်း ထိုင်းနိုင်ငံက အမိအရယူပြီး မြန်မာ့ပင်လယ်ရေပိုင်နက်ထဲမှာ ငါးဖမ်းလှေတွေ ထောင်ချီခိုးဝင်ပြီး စိတ်ကြိုက် ငါးခိုးဖမ်းခဲ့ပါတယ်။ ရေတပ်က တတ်နိုင်သမျှ ဖမ်းဆီးတဲ့အချိန်မှာတော့ မြန်မာ့ရေပိုင်နက်ထဲ ခိုးဝင်တဲ့ ထိုင်းတံငါသည်တွေ ရာချီပြီး ထောင်တွေကို ရောက်လာပါတယ်။ အင်းစိန်ထောင်မှာလည်း ထိုင်းငါးဖမ်းသမားတွေ ရာချီပြီး ရှိနေပါတယ်။ သူတို့တွေကို မြန်မာအကျဉ်းသားတွေနဲ့ ပြဿနာတက်မှာစိုးလို့ အင်းစိန်ထောင်မကြီးမှာ မထားဘဲ သီးသန့်ထောင်၊ (၁) ဆောင်နဲ့ (၂) ဆောင် အပေါ်ထပ်တွေမှာ အာဏာပိုင်တွေက နေရာချထားပေးတယ်။ တစ်ရက်မှာ ထိုင်းအကျဉ်းသားတွေနဲ့အတူ ပါလာတဲ့ ပသျှူးလူမျိုး “ပဲ့နင်း”တစ်ယောက်နဲ့ ထိုင်းတွေ ရန်ဖြစ်ပြီး ပြဿနာတက်ကြတယ်။ အမှန်တကယ်တော့ အဲဒီပသျှူးက မွေ့ထိုင်းလက်ဝှေ့သမား။ ထိုင်းသူဌေးက သူ့အလုပ်သမားတွေကို ငြိမ်အောင်ထိန်းဖို့အတွက် သူ့ကို ပဲ့နင်းရာထူးပေးပြီး မြှောက်စားထားခဲ့တာ။ သူက ထောင်ထဲမှာ ဗိုလ်ကျလွန်းတော့ ထိုင်းတွေက မခံနိုင်ဘဲ ထချကြတာ။ နောက်ဆုံး ပသျှူးကို ခြေကျင်းခတ်ပြီး အင်းစိန်ထောင်မကြီးထဲ ပို့လိုက်တယ်။ ထောင်မကြီးရောက်တော့ လက်ဝှေ့ဝါသနာပါတဲ့ စိုးမြတ်ကြီးက သူနေတဲ့ (၁) ဆောင်ကို ခေါ်ထားလိုက်တယ်။ ခြေကျင်းကိုတော့ ဖြုတ်မပေးသေးဘူး။ စားရေးသောက်ရေး မခက်ခဲအောင်တော့ စီစဉ်ပေးထားလိုက်တယ်။ ဒီတော့ ပသျှူးက စိုးမြတ်ကြီးကို အရမ်းကျေးဇူးတင်နေတယ်။ စိုးမြတ်ကြီးကလည်း အားတဲ့အချိန်မှာ ပသျှူးဆီက မွေ့ထိုင်းပညာကို သင်တယ်။ လက်ဝှေ့ ၀ါသနာပါတဲ့ အခြားလူမိုက်တွေလည်း ပသျှူးဆီက လာသင်ကြတယ်။ တစ်ရက်တော့ စိုးမြတ်ကြီးက ပသျှူးကို သူနဲ့ တစ်ပွဲတစ်လမ်းထိုးဖို့ ပြောတယ်။ ဒါပေမဲ့ ပသျှူးက အသည်းအသန် ငြင်းတယ်။ တစ်ထောင်လုံးက ကြောက်ရွံ့ခယနေရတဲ့ စိုးမြတ်ကြီးနဲ့ ထိုးလို့ နိုင်ရင်လည်း အန္တရာယ်ရှိမှန်း၊ ရှုံးရင်လည်း အန္တရာယ်ရှိမှန်း ပသျှူးလက်ဝှေ့သမားက ကောင်းကောင်းသိတယ်။ ခန္ဓာကိုယ်အရပ်အမောင်း အလေးချိန်ကတော့ သိပ်မကွာဘူး။ ပသျှူးက အရပ် ၆ ပေ နီးပါးရှိတယ်။ စိုးမြတ်ကြီးကလည်း ဒေါင်ကောင်းပါတယ်။ ဒါပေမဲ့ ပသျှူးက မထိုးဘူးဆိုတော့ ပွဲကောင်းကြည့်ချင်သူတွေ စိတ်ညစ်သွားတယ်။ နောက်ဆုံး ပသျှူးက စိုးမြတ်ကြီးရဲ့ဘေးက ဧရာကြီးကို လက်ညိုးထိုးပြပြီး သူ့နဲ့ထိုးမယ်လို့ ပြောတယ်။ ဧရာကြီးကတော့ အလုံးအထည်ကြီးပေမယ့် အရပ်အတော်ပုတော့ စိုးမြတ်ကြီးက ဆိုင်ပေးဖို့ ၀န်လေးနေတယ်။ ဒါပေမဲ့ ဧရာကြီးက ပသျှူးနဲ့ ထိုးမယ်လို့ စိုးမြတ်ကိုပြောလိုက်တယ်။ ဧရာကြီးကလည်း သူ့တွက်ကိန်းနဲ့သူပဲ။ ဘာလို့လဲဆိုတော့ ပသျှူးက ခြေကျင်းမဖြုတ်ရသေးဘူး။ ဒီတော့ ထိုးကြရင် သာမန်လူလို စိတ်တိုင်းကျ လှုပ်ရှားနိုင်မှာ မဟုတ်ဘူးလို့ တွေးထားတယ်။ သူက အရပ်ပုတော့ ပသျှူးက အလွယ်တကူ လှဲနိုင်မှာ မဟုတ်ဘူး။ စိုးမြတ်ကြီးက သဘောပေါက်သွားပြီး သူတို့နှစ်ယောက် ထိုးဖို့ သဘောတူလိုက်တယ်။ အင်းစိန်ထောင်ထဲမှာ အာဏာပိုင်တွေ မသိအောင် လက်ဝှေ့ပွဲတစ်ပွဲ လုပ်ဖို့ဆိုတာ အတော်မလွယ်တဲ့ကိစ္စ ဖြစ်ပါတယ်။ လက်ဝှေ့ပွဲဖြစ်ရင်လည်း ထောင်ဝါဒါတွေ လာလေ့မရှိတဲ့ မိလ္လာဆောင်ထဲမှာ လုပ်ကြရတယ်။ ပွဲလုပ်ချိန်မှာ ရှေ့ကင်း နောက်ကင်းတွေ ချထားရတယ်။ အဆောင်မှာ တာဝန်ကျနေတဲ့ ထောင်မှူးနဲ့ အဆောင်မှူးတွေကအစ အဆင့်ဆင့် လာဘ်ထိုးထားရတယ်။ ဒီကြားထဲမှာ မထင်မှတ်ဘဲ ထောင်ပိုင်လေးတို့ ထောင်ပိုင်ကြီးတို့ ၀င်လာရင် ချက်ချင်း လူစုခွဲနိုင်အောင်လည်း စီစဉ်ထားရတယ်။
ပသျှူးနဲ့ ဧရာကြီးလက်ဝှေ့ပွဲက စိုးမြတ်ကြီးတာဝန်ခံပြီး လုပ်တဲ့ပွဲဆိုတော့ (၁) ဆောင် အဆောင်မှူးက မသိချင်ယောင်ဆောင်ပြီး မျက်စိမှိတ်နေလိုက်တယ်။ စိုးမြတ်ကြီးကလည်း ပေးကမ်းသင့်တာကို အားလုံး ပေးကမ်းထားပြီးပြီ။ (၁)ဆောင် တစ်ဆောင်လုံး ပွဲပြီးမီးသေပဲ။ အားလုံးက ပသျှူးနဲ့ ဧရာကြီးပွဲကို စိတ်ဝင်စားနေကြတယ်။ ဒါပေမဲ့ စိုးမြတ်ကြီးက လူစုလူဝေးဖြစ်မှာစိုးလို့ မိလ္လာဆောင်ကို အကျဉ်းသားတိုင်း လာခွင့်မပေးဘူး။ မျက်နှာကြီးအသိုင်းအ၀ိုင်းက အကျဉ်းသားတွေပဲ လာခွင့်ပေးတယ်။ ၅(ည) တချို့လည်း လာကြည့်ကြတယ်။ ပသျှူးက ခြေကျင်းကို ခြေသလုံးမှာကပ်ပြီး အသံမမြည်အောင် ကြိုးနဲ့ စည်းထားလိုက်တယ်။ ပြီးတော့ သာမန်လူလို လက်ဝှေ့ရေးပြတယ်။ ခြေကျင်းတွေက ပါတယ်တောင် မထင်ရတော့ ဧရာကြီး မျက်နှာ တစ်ချက်ပျက်သွားတယ်။ ဒါပေမဲ့ ကြံတောသင်္ချိုင်းက ထွက်လာခဲ့တဲ့ လူမိုက်မို့ ဧရာကြီးက “ဇ” ကတော့ မသေးပါဘူး။ ဒီလိုနဲ့ ပသျှူးနဲ့ ဧရာကြီး လက်ဝှေ့ပွဲ စလိုက်တယ်။ စိုးမြတ်ကြီးကိုယ်တိုင်ပဲ ဒိုင်လုပ်တယ်။ ပွဲစတာနဲ့ ပသျှူးရဲ့ တရကြမ်းတိုက်စစ်ကို ဧရာကြီး ခံရတော့တယ်။ တော်ရုံတန်ရုံလူဆိုရင် တစ်ချီတည်း မှောက်သွားနိုင်ပေမယ့် ဧရာကြီးက မာတယ်။ ဒါပေမဲ့ ပွဲချိန်ကြာလာတာနဲ့အမျှ ပသျှူးရဲ့ လက်ဝှေ့ပညာတွေက ပိုကြွလာတယ်။ ဧရာကြီးက မိုက်သာမိုက်တာ၊ လက်ဝှေ့မှ မထိုးဖူးတာကိုး။ ပညာချင်းကွာတော့ ဧရာကြီးတစ်ကိုယ်လုံး ဖူးရောင်ပြီး မျက်ခုံးလည်း ကွဲနေပြီ။ ဒါကြောင့် စိုးမြတ်က ဧရာကြီးကို မေးလိုက်တယ်။
“ဧရာကြီး ဆက်ထိုးလို့ရသေးလား”
ဧရာကြီးက စကားတောင်ပြန် မပြောနိုင်ဘူး။ ပိတ်နေတဲ့မျက်လုံးကို ဇွတ်ဖွင့်ပြီး ခေါင်းညိတ်ပြတယ်။ ဒါကြောင့် စိုးမြတ်ကြီးက ဆက်ထိုးခွင့် ပေးလိုက်တယ်။ ထိုးခွင့်ပေးလိုက်တာနဲ့ ပသျှူးရဲ့ ဒူးတွေ တံတောင်တွေက ဧရာကြီး ခန္ဓာကိုယ်ပေါ်ကို တရစပ် ကျရောက်လာတယ်။ ပသျှူးက ဧရာကြီးကို ဖွဲအိတ်ထိုးသလို တဖုန်းဖုန်း ထိုးနေတယ်။ ပွဲကြည့်တဲ့သူတွေလည်း ငြိမ်သက်နေကြတယ်။ နောက်ဆုံး မိလ္လာဆောင်တွေထဲမှာ ကြည့်နေတဲ့ လူတွေထဲက အသံတစ်သံထွက်လာတယ်။
“ဒီပွဲကို ရပ်လိုက်”
အားလုံးက အသံလာရာဆီကို လှည့်ကြည့်လိုက်တယ်။ ဘယ်သူမှ ထင်မှတ်မထားတဲ့ ကျော်သူဖြစ်နေတယ်။ စိုးမြတ်ကြီးကလည်း ကျော်သူ့အပြုအမူကို ကြည့်ပြီး အံ့သြနေတယ်။ ဘာလို့လဲဆိုတော့ ကျော်သူက အဆောင်မှာ အေးအေးဆေးဆေး သိုသိုသိပ်သိပ်နေတတ်သူတစ်ယောက်မို့လို့ပဲ။ ကျော်သူက မတ်တတ်ထရပ်ပြီး ပသျှူးလက်ဝှေ့သမားကို ထိုင်းလိုလှမ်းပြောတယ်။ ပသျှူးက ကျော်သူ့ကိုကြည့်ပြီး ရယ်တယ်။ ကျော်သူ့ကို ထိုင်းလိုပြန်ပြောပြီးတော့ စိုးမြတ်ကြီးကို မေးငေါ့ပြတယ်။ စိုးမြတ်ကြီးက ကျော်သူ့ကို လှမ်းမေးတယ်။
“မင်းတို့ ဘာပြောတာလဲ”
“ပသျှူးကို ကျွန်တော်နဲ့ ထိုးမလားလို့ ပြောတာ၊ သူ့က ကိုစိုးမြတ်ကြီး ခွင့်ပြုရင် ရတယ်လို့ ပြောတယ်”
ကျော်သူ့စကားကြောင့် အားလုံး အံ့သြသွားကြတယ်။ ပသျှူးနဲ့ ထိုးတဲ့ ဧရာကြီးက အရပ်ပုနေလို့ မရှုမလှ ရှုံးနေတာထားတော့။ ကျော်သူလို လူ့ဗလံလေးက ပသျှူးနဲ့ ထိုးမယ်ဆိုတော့ အကျဉ်းသားတွေက ဟုတ်ပါ့မလားဆိုပြီး မယုံမရဲ ဖြစ်ကုန်တော့တယ်။ ဒီအထဲမှာ စိုးမြတ်ကြီးလည်းပါတယ်။ စိုးမြတ်ကြီးက ကျော်သူ့ကို ကြည့်ပြီး သေချာအောင်မေးတယ်။
“ကျော်သူ ... မင်း ထိုးလို့ဖြစ် ပါ့မလား”
ကျော်သူက ခပ်အေးအေးပဲ ခေါင်းညိတ်ပြတယ်။ ပြီးတော့ ပသျှူးကို ထိုင်းလိုလှမ်းပြောတယ်။ ပသျှူးက သဘောတူတဲ့အနေနဲ့ ခေါင်းညိတ်ပြတယ်။ ကျော်သူက စိုးမြတ်ကြီးကို မြန်မာလို ပြန်ရှင်းပြတယ်။
“ကျွန်တော်တို့ ထိုးရင် ကွဲတဲ့လူ အရှုံးလို့ ပြောတာကို ပသျှူးက သဘောတူတယ်”
စိုးမြတ်ကြီးက ကျော်သူ့ကို စိတ်မချဟန်နဲ့ သေချာအောင် ထပ်မေးတယ်။
“မင်းဖြစ်တယ်နော် ကျော်သူ”
“ရပါတယ်ဗျာ၊ မပူနဲ့”
စကားဆုံးဆုံးချင်း ကျော်သူ ၀ိုင်းထဲကို ၀င်လာတယ်။ ပသျှူးကတော့ ဧရာကြီးနဲ့ ထိုးထားတော့ ခဏအနားပေးရတယ်။ ဒါပေမဲ့ ပသျှူးကြည့်ရတာ ကျော်သူ့ကို လုံးဝဂရုမစိုက်တဲ့ပုံပဲ။ ဟုတ်လည်း ဟုတ်လောက်တယ်။ ပိန်ပိန်ညှက်ညှက် ခန္ဓာကိုယ်နဲ့ သူ့ကို လာစိန်ခေါ်တာကို မမှုလောက်တဲ့ပုံပဲ။ နောက်ဆုံး ပသျှူးနဲ့ ကျော်သူ့ရဲ့ တိုက်ပွဲကစပြီ။ အဆောင်က လက်ဝှေ့ပွဲကို စိတ်ဝင်စားတဲ့သူတွေ အတော်များလာတယ်။ မိလ္လာဘက်ကို လူတွေထပ်မလာအောင် စည်းကမ်းထိန်းတွေက တားဆီးထားရတယ်။
မွေ့ထိုင်းလက်ဝှေ့ကျော် ပသျှူးက သူ့ရဲ့ထုံးစံအတိုင်း ဒူးတွေ၊ တံတောင်တွေသုံးပြီး တရကြမ်း တိုက်စစ်ဆင်လာတယ်။ ကျော်သူနဲ့ဧရာကြီး ကွာတာက ပသျှူးရဲ့ တိုက်ကွက်တွေအားလုံးကို ကျော်သူက မထိအောင် ရှောင်နိုင်တယ်။ သူ့ဘက်က ပြန်ထိုးလို့ ပသျှူးကို ထိရင်လည်း ခပ်ပျော့ပျော့ပဲ။ ဒီတော့ စသလို နောက်သလို ဖြစ်နေတာပေါ့။ ပွဲချိန်ကြာလာတော့ ပသျှူးက ဒေါသထွက်ပြီး စိတ်ဆိုးလာတယ်။ ဒီလောက် လူ့ဗလံလေးကို လဲအောင်ကွဲအောင် မသိပ်နိုင်တော့ ရှက်တာလည်း ပါမှာပေါ့။ ပသျှူးကထိုးလေ ကျော်သူက ရှောင်လေ။ နှစ်ယောက်လုံး ချွေးတွေက ရေချိုးထားသလို ရွှဲရွှဲနှစ်နေပြီ။ အမှတ်မထင် ကျော်သူက အားလုံးထင်မှတ်မထားတဲ့ တိုက်ကွက်ကို တိုက်ပြလိုက်တယ်။ ပသျှူး သူ့ကို လိုက်ထိုးပြီးမောနေတဲ့ အချိန်ရောက်မှ နောက်ပြန် ဘက်ကစ်နဲ့ ပသျှူးမျက်နှာကို ကန်လိုက်တာပါ။ ချက်ချင်းပဲ ပသျှူး နှုတ်ခမ်းကွဲပြီး သွေးတွေ ဖြာခနဲကျလာတယ်။ ပသျှူးက မွှန်ပြီး သွေးတွေကို လက်ခုံနဲ့သုတ်လို့ ကျော်သူ့ကို တရကြမ်းလိုက်ထိုးတယ်။ ကျော်သူ့ကို ချုပ်မိသွားပြီး ထိုးတော့မယ့် အချိန်မှာ စိုးမြတ်ကြီးနဲ့ အခြားသူတွေက ကမန်းကတန်း ကြားက၀င်ပြီး ပွဲထိန်းလိုက်ရတယ်။ ကျော်သူက ပသျှူးကို စည်းကမ်းမှာကွဲတဲ့သူ အရှုံးမို့လို့ မင်းရှုံးသွားပြီလို့ ထိုင်းလို လှမ်းပြောလိုက်တယ်။ ပသျှူးက လက်မခံဘဲ ချုပ်ထားတဲ့သူတွေ လက်ကနေ ရုန်းကန်နေတယ်။ စိုးမြတ်ကြီးက ပသျှူးဆီသွားပြီး လက်မကို အောက်စိုက်ပြလိုက်တယ်။ ဒီတော့မှ ပသျှူးလည်း အခြေအနေမှန်ကို နားလည်သဘောပေါက်ပြီး ခေါင်းငိုက်စိုက် ကျသွားတော့တယ်။
အဲဒီနေ့က လက်ဝှေ့ပွဲဟာ အင်းစိန်ထောင်က အကျဉ်းသားတွေအတွက် ပြောစမှတ်တွင်ရစ်ခဲ့တယ်။ (၁) ဆောင် တစ်ဆောင်လုံးလည်း “ကျော်သူ ကျော်သူ” နဲ့ ဖြစ်ကုန်ကြတာပေါ့။ စိုးမြတ်ကြီးကလည်း အားရကျေနပ်လွန်းလို့ ပွဲခံနေတယ်။ ပသျှူးလက်ဝှေ့ကျော်က ကျော်သူနဲ့သူ့ကို နောက်တစ်ပွဲ တည်ပေးဖို့ စိုးမြတ်ကြီးကို မရမကပူဆာနေသေးတယ်။ ဒါပေမဲ့ ကျော်သူက ထောင်ထဲမှာ နောက်ထပ် ဘယ်တော့မှ လက်ဝှေ့မထိုးတော့ဘူးလို့ အပြတ်ငြင်းလိုက်တယ်။ ဒီလိုအစဉ်အလာရှိတဲ့ ကျော်သူဟာ စိုးမြတ်ကြီး ထောင်ပြောင်းသွားမှ အရာကျသွားတာပါ။ အခုလည်းသူ့ကို အပြတ်ရှင်းဖို့ ကြံစည်နေကြသူတွေကြားမှာ သူ့ကိုချစ်တဲ့သူတွေကလည်း သံယောဇဉ်နဲ့ အသက်အန္တရာယ် မဖြစ်အောင် နေထိုင်ဖို့ လှမ်းသတိပေးနေတာပါ။
အင်းစိန်ထောင်ရဲ့ လူမိုက်တွေ အပြောင်းအလဲနဲ့အတူ အင်းစိန်ထောင်အာဏာပိုင် အပြောင်းအလဲကလည်း တစ်ဆက်တည်း ဖြစ်လာပါတယ်။ အင်းစိန်ထောင်ကို အထူးအရာရှိအဖြစ် ဦးဘိုကြည် ရောက်လာတော့ ဦးဘိုကြည်က ထောင်ထဲမှာ သူ့လူတွေကို မွေးတယ်။ အဲဒီအထဲမှာ ဆေးရုံကြီးအရေးအခင်း လူသတ်ခေါင်းဖြတ် အမှုတွဲထဲက စိန်ဝင်းက အရှိန်အ၀ါ အကြီးဆုံးပဲ။ စိန်ဝင်းကလည်း အင်းစိန်ထောင်ကို ငါ့ဆရာရောက်လာပြီဆိုပြီး ကျန်တဲ့သူတွေကို အစွမ်းကုန် “ဖြဲ” တယ်။ ဒါကို အရင် စိုးမြတ်ကြီးရဲ့လူတွေက မခံချင်ဘူး။ ဒီတော့ စိန်ဝင်းကို ခံတန်တန်လုပ်တယ်။ ဒီအုပ်စု ငြိမ်သက်သွားအောင် စိုးမြတ်ကြီး အုပ်စုထဲက ကျော်သူ့ကို ရှင်းပစ်လိုက်မှဖြစ်မယ်လို့ စိန်ဝင်းကတွေးတယ်။ ဒါကြောင့် ဆေးရုံရောက်နေတဲ့ ကျော်သူ့ကို အပြတ်ရှင်းဖို့ အစီအစဉ်ဆွဲတယ်။
သူ့လိုပဲ ကျော်သူ့ကို ရှင်းချင်တဲ့သူက တာမွေအိုးစု ဂန္ထ၀င်လူမိုက်ကြီး စိန်ကုလားပဲ ဖြစ်ပါတယ်။ စိန်ကုလား ပုံစံက ပိန်ပိန်ကျစ်ကျစ်၊ အရပ်မနိမ့်မမြင့် လက်မောင်းမှာ အရုပ်တွေ ထိုးထားတယ်။ သူက ကျော်သူနဲ့ ရန်ငြိုးရန်စတော့ မရှိပါဘူး။ ကျော်သူ ရဲဘက်မထွက်ချင်လို့ ချွတ်နဲ့ထိုးလိုက်တဲ့ မူဆာက သူ့ရဲ့ အပိုင်သားဖြစ်နေတော့ ဒီအကြွေးကို ပြန်ဆပ်ချင်လို့ ကျော်သူ့ကိုရှင်း ချင်နေတာဖြစ်ပါတယ်။ စိန်ကုလားဟာ ၁၉၈၈ မတိုင်ခင်က သေဒဏ်ကျခံခဲ့ရပြီး န၀တရဲ့ လွတ်ငြိမ်းချမ်းသာခွင့်အမိန့်ကြောင့် ကြိုးလွတ်ပြီး တစ်သက်တစ်ကျွန်း ပြစ်ဒဏ်ကို ပြောင်းလဲသွားခဲ့ရသူ ဖြစ်ပါတယ်။ သေဒဏ်က ပြောင်းလဲသွားပေမယ့် သူ့ကို ကြိုးတိုက်မှာပဲ ဆက်ထားခဲ့တယ်။ အဲဒီတုန်းက ကြိုးတိုက်မှာ နာမည်ကြီး ကြိုးသမားတွေဖြစ်တဲ့ မြန်မာအသံဝင်းကို လောင်ချာနဲ့ထုတဲ့ မန်းငွေအောင် အမှုတွဲတွေဖြစ်တဲ့ ရစ်ချက်၊ ရစ်ကီ၊ တွက်ကီ၊ ရခိုင်ပြည်နယ် မင်းပြားမြို့က ဘဏ်ကို ၀င်စီးပြီး ငွေတွေထုတ်ယူခဲ့တဲ့ ရခိုင်သောင်းကျန်းသူအဖွဲ့၊ ပဲခူးရိုးမမှာ တပ်မတော်ရဲ့ ပိတ်ဆို့ဖမ်းဆီးခြင်းကို ခံခဲ့ရတဲ့ KNU အဖွဲ့၊ ထားဝယ်အောင်ထွန်းနဲ့အဖွဲ့၊ ကျောင်းထိုင်ဘုန်းကြီးကိုသတ်ပြီး ကထိန်အလှူပွဲက ငွေပဒေသာပင်တွေကို လုယူခဲ့တဲ့ နာနီနဲ့ အငယ်လေး၊ ဘိုကလေးမှာ ဖဲရှုံးလို့ ကြံရာမရဖြစ်ပြီး လှေပေါ်မှာတင် ကျောင်းသူလေးကို လှော်တက်နဲ့ရိုက်သတ်ပြီး နားကပ်ချွတ်ယူခဲ့တဲ့ ကျောင်းဆရာ စတဲ့သူတွေ အများကြီးရှိပါတယ်။ ကံကောင်းတာ န၀တအစိုးရ လက်ထက်မှာ သေဒဏ်အတည်ပြုဖို့ နိုင်ငံတော်သမ္မတ မရှိတာကြောင့် ဘယ်သူ့ကိုမှ ကြိုးမပေးခဲ့ပါဘူး။ နောက်ဆုံး နှစ်တွေကြာလာတဲ့အခါ လွတ်ငြိမ်းချမ်းသာခွင့်နဲ့ ကြိုးကနေ တစ်သက်တစ်ကျွန်းကို ပြောင်းပြီး လျှော့ပေါ့ ခံစားခွင့်တွေနဲ့ လွတ်မြောက်သွားကြရတာပဲ ဖြစ်ပါတယ်။ ဒီကြိုးတိုက်ထဲက ကြိုးသမားတွေရဲ့ ကြောက်ရွံ့စက်ဆုပ်ဖွယ်ရာ အမှုပေါင်းစုံထဲက စိန်ကုလားရဲ့အမှုကတော့ လမ်းစဉ်ပါတီခေတ် အုပ်ချုပ်သူ အာဏာပိုင်တွေအတွက် အရမ်းတုန်လှုပ်ချောက်ချားခဲ့ရတဲ့ အမှုဖြစ်ပါတယ်။
(ဆက်လက်ဖော်ပြပါမည်)
ဇော်သက်ထွေး
http://www.tomorrow.com.mm/?q=articles%2F3460
No comments:
Post a Comment