မေလ ၃၁ ရက်တွင် ကျင်းပသည့် ပြည်သူ့လွှတ်တော် အစည်းအဝေးတွင် ကျောက်တန်း မဲဆန္ဒနယ်မှ ဒေါ်အေးမြမြမျိုးက ကျောက်တန်းမြို့နယ် သစ်တောမြေဧရိယာ အတွင်းရှိ ဦးမင်းဝိုင်အား ငှားရမ်းထားသော မြေ(၁၀)ဧက အတွက် တစ်ဧက (၅၀၀)ကျပ် ဖြစ်ပါသလား၊( ၁)ဧက သိန်း(၅၀)ကျပ် ဖြစ်ပါသလား၊ မည်သည်က အမှန်ဖြစ်ပါသလဲနှင့် စပ်လျဉ်း၍ မေးမြန်းခဲ့မှုအပေါ် သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီး ဦးအုန်းဝင်းက ပြန်လည်ဖြေကြားခဲ့ခြင်း ဖြစ်သည်။
ကျောက်တန်းမြို့နယ်ရှိ ဘန့်ဘွေးကုန်း သစ်တောကြိုးဝိုင်းအတွင်း ပုဂ္ဂလိက လုပ်ငန်းရှင် ဦးမင်းဝိုင်အား ပုဂ္ဂလိက နှစ်ရှည်ရာဘာစိုက်ခင်း ၁၀ ဧက စိုက်ပျိုးရန်အတွက် စာချုပ်အမှတ်-၂/၂၀၁၂-၁၃ (၁၁-၆-၂၀၁၂)၊ သတ်မှတ် စည်းကမ်းချက်(၁၇)ချက်ဖြင့် လုပ်ထုံးလုပ်နည်းနှင့် အညီ နှစ် ၃၀ စာချုပ် ချုပ်ဆိုခွင့်ပြုထားရှိပြီး မြေငှားရမ်းခအနေဖြင့် တစ်နှစ်လျှင် တစ်ဧကအတွက် ၅၀၀ ကျပ်နှုန်း၊ ၇ နှစ်အထက်နောက်ပိုင်း တစ်နှစ်လျှင် မြေငှားရမ်းခ တစ်ဧကလျှင် ၁၀၀၀ ကျပ် နှုန်းဖြင့် ငှားရမ်းပေးထားခြင်း ဖြစ်ကြောင်း ၀န်ကြီးက ဖြေကြားခဲ့သည်။
စိုက်ပျိုးမွေးမြူရေး ကော်မတီမှ စိုက်ပျိုးခဲ့သည့် ရာဘာ(၅)ဧကနှင့် သီဟိုသရက်(၅) ဧက သည် ၂၀၀၈ ခုနှစ်၊ နာဂစ်မုန်တိုင်းကြောင့် ပျက်စီးခဲ့ပါကြောင်း၊ ပျက်စီးခဲ့သည့်စိုက်ခင်းအား ၂၀၀၉ ခုနှစ်တွင် ရာဘာ(၁၀)ဧက ပြန်လည်စိုက်ပျိုးခဲ့ပြီး ၂၀၁၂ ခုနှစ်တွင် ပုဂ္ဂလိက လုပ်ငန်းရှင် ဦးမင်းဝိုင်အား လွှဲပြောင်းပေးပြီး ဖြစ်ပါသဖြင့် ၎င်းအမည်ဖြင့် သစ်တောဦးစီးဌာနနှင့် စာချုပ်ချုပ်ဆို၍ အခွန်ပေးဆောင် ခွင့်ပြုပါရန် ဝန်ကြီးဌာနသို့ မေတ္တာရပ်ခံလာပါသဖြင့် ၃၀-၃-၂၀၁၂ ရက်နေ့တွင် ကျင်းပပြုလုပ်သည့် ဝန်ကြီးဌာန စီမံခန့်ခွဲရေးကော်မတီ အစည်းအဝေး (၅/၂၀၁၂) အစည်းအဝေး ဆုံးဖြတ်ချက်အရ ခွင့်ပြုပေးခဲ့ခြင်း ဖြစ်ပါကြောင်းလည်း ၀န်ကြီးက ထည့်သွင်း ပြောကြားခဲ့သည်။
The Ladies News
No comments:
Post a Comment