ပြီးခဲ့တဲ့ အစိုးရ လက်ထက်မှာ ကွာဟခဲ့တဲ့ ဒေသဖွံဖြိုးရေး ရန်ပုံငွေတွေထဲက ငွေကျပ်သန်းပေါင်း ၃၀၀ ကို ဒီကနေ့မှာ ၀န်ကြီးချုပ်ဟောင်း ဦးဘုန်းမော်ရွှေက မကွေးတိုင်း အစိုးရ ထံ သွားပေးခဲ့ပြီး မနက်ဖြန်မှာ ကျပ်သန်း ၅၀၀ လာပေးဖို့ ရှိတယ်လို့ လက်ရှိ ၀န်ကြီးချုပ် ဒေါက်တာ အောင်မိုးညိုက ဗွီအိုအေကို ပြောပါတယ်။ သမ္မတရုံးက ပြန်လည် ပေးအပ်ဖို့ ညွှန်ကြားထားတဲ့ ကျပ်သန်းပေါင်း ၃၀၀၀ ထောင်ကျော်ထဲက ကျပ်သန်း ၅၀၀ ကို မေလ ပထမအပတ် အတွင်းမှာ ပြန်ပေးမယ်လို့ ၀န်ကြီးချုပ် ဟောင်းက အစောပိုင်းမှာ စာပို့ အကြောင်းကြား ထားတာပါ။ အပြည့်အစုံကိုတော့ ဗွီအိုအေ မြန်မာပိုင်း သတင်းထောက် ကိုထက်အောင်က တင်ပြပေးမှာပါ။
ဒေသဖွံဖြိုးရေး ရန်ပုံငွေတွေ ကွာဟမှုကြောင့် ဝေဖန် ခံနေရတဲ့ မကွေးတိုင်း ၀န်ကြီးချုပ်ဟောင်း ဦးဘုန်းမော်ရွှေ ဟာ ဒီကနေ့မှာတော့ ငွေသန်းပေါင်း ၃၀၀ ကို လက်ရှိ တိုင်းအစိုးရထံ ပထမအရစ်အနေနဲ့ ပြန်ပေး လိုက်တာပါ။ မနက်ဖြန်မှာတော့ ကျန်ရှိနေသေးတဲ့ ငွေတွေထဲက ကျပ်သန်း ၅၀၀ ကို ပြန်ပေးဖို့ ရှိတယ်လို့ လည်း လက်ရှိ မကွေးတိုင်း ၀န်ကြီးချုပ် ဒေါက်တာ အောင်မိုးညိုက ဗွီအိုအေကို ပြောပါတယ်။
“ကျနေ်ာတို့ အထွေထွေ အုပ်ချုပ်ရေးဦးစီးက အကြောင်း ကြားတာကတော့ ဒီနေ့ သိန်း ၃၀၀၀ ပေးတယ် မနက်ဖြန် ကျရင် သိန်း ၅၀၀၀ ပေးမယ်လို့ပြောတယ် ဆိုတော့ အားလုံးပေါင်း သိန်း ၈၀၀၀ ရမှာပေါ့ ကျနော်တို့ ဒီတပတ် အတွင်းမှာ ကျနော်တို့ အစိုးရ အဖွဲ့ရဲ့ တိုင်းမင်းကြီး ပေါ့နော်၊ မကွေးတိုင်း ဒေသကြီး တိုင်းအစိုးရ အဖွဲ့ရဲ့ တိုင်း အတွင်းရေးမှူး ဦးဝေဇင်ထွန်း တိုင်း အထွေထွေ အုပ်ချုပ်ရေးဌာန တိုင်းဦးစီးမှူး တိုင်းမင်းကြီး ပေါ့နော် ဦးဝေဇင်ထွန်း ကိုလာပေးတာ။”
တိုင်းအစိုးရကတော့ ဒီငွေတွေကို ဘဏ်တစ်ခုမှာ အပ်နှံထားပြီး ၂၀၁၇ - ၂၀၁၈ ဘဏ္ဍနှစ် နောက်ပိုင်းမှာ လိုငွေပြလာရင် ထုတ်ယူသုံးစွဲသွားမယ်လို့ ဒေါက်တာအောင်မိုးညိုက ပြောပါတယ်။
အရင် ကြံခိုင်ရေး အစိုးရလက်ထက်မှာ မကွေးတိုင်း အတွင်း ဒေသဖွံဖြိုးရေး ရန်ပုံငွေ အများအပြား ကွာဟတာကြောင့် ပြည်သူ့လွှတ်တော်တွင်း မေးမြန်းပြီးတဲ့ နောက် အထူးစုံစမ်းစစ်ဆေးရေးအဖွဲ့က ကိုင်တွယ် စစ်ဆေးခဲ့တာမှာ ကျပ်ငွေသန်းပေါင်း ၇ ထောင်ကျော် ပျောက်ဆုံးနေတာကို တွေ့ရှိခဲ့တာပါ။ အဲဒီ့ထဲကမှ ကြံခိုင်ရေး ပါတီကို လှုဒါန်းခဲ့တဲ့ ငွေကျပ် သန်းပေါင်း ၁၇၀၀ နဲ့ မော်တော်ယာဉ်တွေ၊ ပဲ့ထောင် ရေယာဉ်တွေ အပါအ၀င် ရွှေသုခ အသေးစား ငွေရေးကြေးရေး လုပ်ငန်းကို လွှဲပြောင်းပေးခဲ့တဲ့ ငွေကျပ် သန်းပေါင်း ၁၅၀၀ ကိုပဲ လက်ရှိ မကွေးတိုင်း အစိုးရထံကို ပြန်လည်ပေးအပ်ဖို့ သမ္မတရုံးက ညွှန်ကြားခဲ့ပါတယ်။ ကျန်ရှိနေသေးတဲ့ ငွေကျပ်သန်းပေါင်း ၄၀၀၀ ထောင်ကျော်နဲ့ ပက်သက်လို့ တိတိကျကျ ရှင်းရှင်း လင်းလင်း သိရဖို့ အထူး စုံစမ်း စစ်ဆေးရေး အဖွဲ့ထံကို မကွေးတိုင်းအစိုးရက စာပို့ မေးမြန်း ထားပါတယ်။ အဲဒါနဲ့ ပတ်သက် လို့ လက်ရှိ အချိန် ထိတော့ စစစ ဖက်ကကော ပြည်ထောင်စု အစိုးရဖက် ကပါ တစ်စုံတစ်ရာ မပြောသေးပါဘူး။ ဒီ့အပေါ်မှာ ၀န်ကြီးချုပ် ဒေါက်တာ အောင်မိုးညိုက
“ဖြစ်နိုင်တာကတော့ ပြည်ထောင်စု အစိုးရကလည်း အဲဒါနဲ့ ပတ်သက်ပြီးတော့ ဘာမှ ကျနေ်ာတို့ကို မညွန်ကြားတော့ ဒီသန်း ၄၀၀၀ သည် ယေဘုယျအားဖြင့် သူတို့ ဖွံ့ဖြိုးရေး အတွက် သုံးတယ်ဆိုတာကို ပြည်ထောင်စု အစိုးရက လက်ခံထားတဲ့ သဘောရှိတယ်။ ဘယ်လို သုံးတယ် ဆိုတာကတော့ ကျနော်တို့က စာရင်းဇယား အတိအကျရမှ ကျနော်တို့က လမ်းဖောက်တာသုံးမလား ဆေးရုံဆောက်တာ သုံးမလား ၊ လမ်းလား၊ တံတားလား ဘာလား ဆိုတာကို အကုန်သိရမှာ ဥပမာအားဖြင့် ဒါတွေသည် မေးကြည့်လို့မှ သူတို့ပြောထားတဲ့ ဖွံ့ဖြိုးရေး လုပ်တယ် ဆိုတဲ့ဟာတွေက ဒါတွေက ဒီမှာ တကယ် သုံးခဲ့တာ မဟုတ်ဘူး ပြည်ထောင်စု ဘားဂျက်နဲ့ကို သုံးထားတာ စတဲ့ဟာတွေကိုလည်း စစ်ရဆေးရမှာပေါ့နော် စုံစမ်းရမှာပေါ့။ ဒါတွေက အခုက ဘာမှမသိရသေးဘူး။
မေး။ ။ တကယ်လို့ စသုံးလုံးဘက်က တစုံတရာ အကြောင်းပြန်တာမျိုး မရှိဘူးဆိုရင်ကော ဘာဆက်လုပ် သွားဖို့ရှိပါသလဲ ။
ဖြေ။ ။ ဒါဆိုရင်တော့ ကျနော်တို့က ပြည်ထောင်စုကို တဆင့်တက်ပြီး ဒါနဲ့ပတ်သက်ပြီး ပြန်မေးရမှာပေါ့။ ဒါနဲ့ ပတ်သက်ပြီး ပြည်သူလူထုကသော်လည်းကောင်း သတင်းစာဂျာနယ်၊ မီဒီယာကသော်လည်းကောင်း ဒီ သန်း၄၀၀၀ ဘယ်လိုသုံးသလဲဆိုတာ သိချင်တယ်။ အဲဒီအတွက် ဖြေဖို့အတွက် ကျနော်တို့ တိုင်းဒေသကြီး အစိုးရ အဖွဲ့ကို ယုံကြည် ကိုးစားမှုရှိအောင် ပွင့်လင်း မြင်သာမှု ရှိအောင် ဒါတွေဘယ်လို သုံးထားပါတယ် ဆိုတာကို တိုင်းဒေသကြီးဘက်က မကွေးတိုင်းထဲမှာရှိတဲ့ ပြည်သူတွေကို ချပြနိုင်အောင် ဒါတွေဘယ်လို သုံးထားပါတယ် ဆိုတဲ့ အချက်အလက် အထောက်အထား လိုချင်ပါတယ်ဆိုပြီးတော့ ပြည်ထောင်စုအစိုးရကို မေတ္တာရပ်ခံ တောင်းဆိုရမှာပေါ့နော်။”
ဝန်ကြီးချုပ်ဟောင်း ဦးဘုန်းမော်ရွှေ ဖက်ကတော့ သမ္မတရုံးက ညွှန်ကြားထားတဲ့ အတိုင်း မော်တော်ယာဉ် တွေနဲ့ ပဲ့ထောင်ယာဉ် တို့ကို ဧပြီလ ၂၉ ရက်နေ့က ပြန်လည် ပေးအပ်ထားပြီး ဖြစ်သလို ကျန်ရှိနေသေးတဲ့ ငွေအများ အပြားကို ဇူလိုင်လ နောက်ဆုံးထားပြီး ပေးအပ်မှာ ဖြစ်တယ်လို့ တိုင်းအစိုးရထံ စာပို့ အကြောင်း ကြားထားပါ တယ်။ ဦးဘုန်းမော်ရွှေ ပြန်ပေးထားတဲ့ မော်တော်ယာဉ်ထဲက တစ်စီးကို လွှတ်တော် ကိုယ်စားလှယ်တွေ သွားရလာရ လွယ်ကူဖို့နဲ့ လွှတ်တော် ဆိုင်ရာ ကိစ္စရပ်တွေကို ဆောင်ရွက်တဲ့နေရာမှာ အသုံးပြုဖို့ ဒီကနေ့မှာ မကွေးတိုင်း လွှတ်တော် ဥက္ကဌထံ လွဲပြောင်း ပေးခဲ့တယ်လို့ ၀န်ကြီးချုပ်က ပြောပါတယ်။
တိုင်းဒေသကြီးတစ်ခုရဲ့ အုပ်ချုပ်သူ အကြီးအကဲ တစ်ယောက်ဟာ သူတာဝန်ထမ်းဆောင်ခဲ့စဉ်အတွင်း အစိုးရ ရန်ပုံငွေထဲက ငွေ သန်းပေါင်း များစွာ ကွာဟတဲ့ ကိစ္စ လူသိရှင်ကြား ဖြစ်လာတာ ဒါဟာ ပထမဆုံး အကြိမ် ဖြစ်ပါတယ်။ ဒီကိစ္စအပေါ်မှာ သက်ဆိုင်သူတွေကို ဘယ်လို အရေးယူ ဆောင်ရွက်သွားမလဲ ဆိုတာကိုတော့ ပြည်ထောင်စု အစိုးရ တာဝန်ရှိသူတွေဖက်က အခု အချိန်ထိ တရားဝင် ထုတ်ဖော်ပြောကြားထားခြင်း မရှိသေးပါဘူး။
ဗွီအိုအေ
No comments:
Post a Comment