ရခိုင်ပြည်နယ်၊ စစ်တွေမြို့နယ်၊ စက်ရုံစုရပ်ကွက်က စစ်မှုထမ်းဟောင်းအိမ်ရာ ဆောက်လုပ်မယ့် ဧရိယာထဲမှာ ပါဝင်နေတဲ့ ကျူးကျော်တဲ ၂၁၃ လုံးကို ပြည်နယ်အစိုးရအဖွဲ့အစီအစဉ်နဲ့ မနေ့ကစပြီး မင်းဂံတိုးချဲ့ရပ်ကွက်ကို ပြောင်းရွှေ့ပေးနေပါတယ်။
စစ်မှုထမ်းဟောင်းအိမ်ရာဆောက်မယ့် မြေ ၆ ဧကပေါ်မှာ ရှိနေတဲ့ ကျူးကျော်တဲတွေကို အစိုးရက ရွှေ့ပေးနေတာဖြစ်တယ်လို့ စက်ရုံစုရပ်ကွက်အုပ်ချုပ်ရေးမှူး ဦးညွန့်ဝင်း က ပြောပါတယ်။
" အရံမီးသတ်တို့ မီးသတ်ဌာနတို့က ၀ိုင်းဝန်းပြီးတော့ ပစ္စည်းတွေပြောင်းပေးတယ်၊ ကားကတော့ အစိုးရအဖွဲ့က စီစဉ်ပေးထားတာပေါ့၊ စစ်မှုထမ်းဟောင်းအိမ်ရာ ဆောက်မယ့်နေရာ ဧက ၆ ဧကပေါ်မှာ ပါဝင်နေတဲ့အတွက် အစိုးရကနေပြီးတော့ ရွှေ့ပေးရတာဖြစ်ပါတယ်ခင်ဗျ။ "
ဒီနေ့မနက်ပိုင်းအထိ တဲအလုံး ၈၀ လောက်ပြောင်းရွှေ့ပြီးပြီ ဖြစ်ပြီး အားလုံးပြောင်းဖို့အတွက် အချိန် ၄ ရက်လောက် ကြာနိုင်တယ်လို့လည်း ဦးညွန့်ဝင်း က ပြောပါတယ်။
အဲဒီကျူးကျော်တဲတွေဟာ မင်းဂံတိုးချဲ့ရပ်ကွက်မှာ မိမိတို့ဘာသာ ပြန်ဆောက်ရမှာဖြစ်ပြီး ပြည်နယ်အစိုးရက မြေအကျယ် ၂၀×၃၀ စီပြန်ပေးထားတာဖြစ်ပါတယ်။
အဲဒီ ကျူးကျော်တဲ ၂၀၀ ကျော်ဆိုတာဟာ စစ်မှုထမ်းဟောင်း အိမ်ရာဆောက်မယ့် ဧရိယာထဲပါဝင်နေတဲ့ အရေအတွက်သာဖြစ်ပြီး စက်ရုံစုရပ်ကွက်မှာ ကျူးကျော်တဲ စုစုပေါင်းဆိုရင် ၁ ထောင်ကျော်လောက် ရှိနိုင်တယ်လို့လည်း ပြောပါတယ်။
အဲလိုပြောင်းရွှေ့ပေးဖို့အတွက် ဧရိယာထဲပါဝင်နေတဲ့တဲတွေကို ပြီးခဲ့တဲ့ ၂ လလောက်ထဲက စာရင်းတွေ ကောက်ယူခဲ့ပြီး အငြင်းပွားမှုတွေ မဖြစ်အောင် နေထိုင်သူတွေကိုလည်း ဓါတ်ပုံတွေ ရိုက်ယူထားပြီး စာရင်းလုပ်ခဲ့ရတာဖြစ်တယ်လို့လည်း သိရပါတယ်။
Photo:Min Thein Aung/RFA
No comments:
Post a Comment