ရန်ကုန်၊ မတ် ၂၈ ။ ။ ရှေ့နေ ဦးကိုနီနှင့် အငှား ယာဉ်မောင်း ကိုနေဝင်းတို့ အသတ်ခံခဲ့ရသည့် အမှုနှင့် ပတ်သက်၍ လွတ်မြောက် နေသည့် ကွင်းဆက် တရားခံ အောင်ဝင်းခိုင် အား ဖမ်းဝရမ်း ထုတ်ပေးရန် ခရိုင်မှ ပယ်ချခဲ့သည့် အမိန့်အပေါ် ရန်ကုန်တိုင်း ဒေသကြီး တရား လွှတ်တော်သို့ မတ် ၂၈ ရက်တွင် ရာဇဝတ် ဆိုင်ရာ ပြင်ဆင်မှု တင်သွင်းခဲ့ကြောင်း တရားလိုများ ဘက်မှ ဆောင်ရွက် နေသော တရားလွှတ်တော် ရှေ့နေ ဦးနေလက မဇ္ဈိမသို့ ပြောသည်။
ဦးကိုနီအား လုပ်ကြံ သတ်ဖြတ်မှု ကွင်းဆက် တရားခံ ဖြစ်သည့် အောင်ဝင်ခိုင် အား ဖမ်းဝရမ်း ထပ်မံ ထုတ်ပေးရန် ရန်ကုန် မြောက်ပိုင်းခရိုင် တရားရုံးရှိ ခုံရုံးသို့ တင်ပြမှုကို မတ်လ ၁၇ ရက်က ပယ်ချလိုက်ခြင်း ဖြစ်သည်။
“ပြင်ဆင်မှု တင်သွင်းရတာ ကတော့ အမှန်တကယ် ပျောက်ဆုံးခဲ့တဲ့ နေရာကို ရှာဖွေ ဖမ်းဆီးခြင်း မပြုခဲ့တဲ့၊ ဖမ်းဝရမ်း မထုတ်ပေးခဲ့တဲ့ အချက်က အဓိကပါပဲ။ အဓိက ရည်ရွယ်ချက် ကတော့ အမှုတွဲထဲမှာ အမှန်တကယ် ရှာဖွေ ဖမ်းဆီးဆိုတဲ့ စာရွက်စာတမ်း ပြည့်ပြည့်စုံစုံ ပါစေချင်တာလည်း ပါပါတယ်” ဟု ဦးနေလက ဖမ်းဝရမ်း အမိန့် ပယ်ချခဲ့သည့် အပေါ် ပြင်ဆင်မှု တင်သွင်းရခြင်းနှင့် ပတ်သက်ပြီး ရှင်းပြသည်။
ကွင်းဆက် တရားခံ အောင်ဝင်းခိုင်ကို ဖမ်းဆီးရန် ပထမအကြိမ် ဖမ်းဝရမ်းကို အောင်ဝင်းခိုင် နေထိုင်ခဲ့သည့် ရန်ကုန်တိုင်း ဒေသကြီး၊ ဒေါပုံမြို့နယ်ရှိ နေအိမ်ကိုသာ ထုတ်ပေးခဲ့ခြင်း ဖြစ်ပြီး မတ်လ ၁၇ ရက်တွင် ခရိုင် တရားရုံး၌ ရဲအရာရှိ ကိုယ်တိုင် လာရောက် ထွက်ဆိုချက် အရ အောင်ဝင်းခိုင်မှာ နေပြည်တော်ရှိ ဘယဥယျာဉ် ရှေ့တွင် လွတ်မြောက် သွားကြောင်း ထွက်ဆိုချက်ခဲ့သည့် အတွက် ဖမ်းဝရမ်း ထပ်မံ ဆင့်ထုတ်ပေးရန် တင်ပြမှုကို ခရိုင်မှ ပယ်ချခဲ့ခြင်း ဖြစ်သည်။
ရှေ့နေ ဦးကိုနီ လုပ်ကြံမှုနှင့် ပတ်သက်၍ လာမည့် မတ်လ ၃၁ ရက်တွင် ရာဇသတ်ကြီး ပုဒ်မ ၃ဝ၂/၃၄/၂၁၂ သက်ဆိုင်သည့် ထွက်ပြေး လွတ်မြောက် နေသည့် အောင်ဝင်းခိုင် အပါအဝင် ကြည်လင်း၊ အောင်ဝင်းဇော်၊ ဇေယျာဖြိုး၊ အောင်ဝင်းထွန်း တို့ ၅ ဦး အမှုကို စတင် စစ်ဆေးသွားမည် ဖြစ်သည်။
အဆိုပါ ဖြစ်စဉ်မှာ ၂ဝ၁၇ နှစ်၊ ဇန်နဝါရီ ၂၉ ရက်၊ ညနေ ၅ နာရီ အချိန်ခန့်၌ ရန်ကုန် အပြည်ပြည် ဆိုင်ရာ လေဆိပ်တွင် အမျိုးသား ဒီမိုကရေစီ အဖွဲ့ချုပ် ဥပဒေ အကြံပေး ဦးကိုနီ အား အနီးကပ် သေနတ်ဖြင့် ပစ်ခတ် လုပ်ကြံခဲ့ပြီး ပြစ်မှု ကျူးလွန်သူအား ဖမ်းဆီးရမိရေး ဆောင်ရွက်ပေးခဲ့သော အငှားယဉ်မောင်း ကိုနေဝင်းပါ သေနတ်ထိမှန် သေဆုံးခဲ့ခြင်း ဖြစ်သည်။
ရဲနိုင်(လောက်ကိုင်) မဇ္ဈိမ
No comments:
Post a Comment