သရုပ်ဆောင် နန်းခင်ဇေယျာနဲ့ တွေ့ဆုံပြီး အမြန်လမ်းပေါ်က ဖြစ်ရပ်မှန်တွေအကြောင်းကို ရိုက်ကူးပြထားတဲ့ သန်းခေါင်ယံ ခရီးသည်များ ရုပ်ရှင်ရိုက်ကွင်းမှာ ကြုံတွေ့ရတဲ့ ဖြစ်ရပ်များအကြောင်း၊ ထူးခြားတဲ့ အတွေ့အကြုံများ အကြောင်းနဲ့ အနုပညာ လောကမှာ လက်ရှိ ရပ်တည်ခွင့် ရနေတဲ့ အနေအထားအပေါ် သုံးသပ်ချက်တွေကို The Voice က မေးမြန်းဖော်ပြ ထားပါတယ်။
Voice : သန်းခေါင်ယံ ခရီးသည်များ ရုပ်ရှင်က ဘယ်လို ဇာတ်လမ်းမျိုးဖြစ်မလဲ။
NKZY : ဒီကားက အမြန်လမ်းပေါ်မှာ ဖြစ်ပျက်ခဲ့တဲ့ဟာတွေကို ရိုက်ကြတာပါ။ အမြန်လမ်းပေါ်မှာ ကားမီးလောင်တဲ့အကြောင်းတွေ၊ တခြား စိတ်ဝင်စားစရာ အဖြစ်အပျက်တွေကို ရိုက်ပြထားတာပါ။ အမြန်လမ်းပေါ်မှာ တကယ်ဖြစ်ခဲ့တဲ့ နေရာတွေမှာ သွားရိုက်ထားတာပါ။ ဇာတ်ကား မရိုက်ခင်မှာ အနှောင့်အယှက် တစ်စုံတစ်ရာ မရှိအောင် နတ်ပွဲတွေ ဘာတွေ ပေးပြီးမှ ရိုက်ကြတာပါ။
Voice : ရိုက်ကွင်းပေါ်မှာ သရုပ်ဆောင် အချို့ကို ဝင်ပူးခံရတယ်ဆိုပြီး သတင်းတွေ ကြားရတယ်။ နန်းခင်ရဲ့ Facebook မှာလည်း မှတ်တမ်း ဗီဒီယိုဖိုင်လေး တင်ထားတာလည်း တွေ့ရတယ်။ အဲ့ဒါက တကယ်ပဲလား။
NKZY : အဲ့ဒါက ဇာတ်ကား ရိုက်ပြီးလို့ သုံးရက်မြောက်နေ့လောက်မှာ ဖြစ်တာပါ။ အဲဒီနေ့က ရိုက်တဲ့အခန်းက အမြန်လမ်းပေါ်မှာ ယောက်ျားတစ်ယောက်က ကားကို မီးရှို့ပြီးတော့ သူ့ရဲ့မိသားစုကို ချန်ခဲ့တဲ့အခန်းကို ရိုက်ကြတာပါ။ အဲ့ဒီအခန်းကို ရိုက်ပြီးလို့ ပြန်ကြည့်မယ်လုပ်တော့ လုံးဝ ဖွင့်လို့မရဘူး။ အဲ့ဒီလူရဲ့ မိန်းမနဲ့ကလေးက အပြင်မှာ ဝိညာဉ်အဖြစ် ကျန်ခဲ့တာကို ရိုက်ကွင်းပေါ်က ကျန်တဲ့လူတွေ အကုန်မြင်တယ်။ နန်းခင်နဲ့ ကင်မရာသမားက မမြင်ဘူး။ အဲ့ဒီအခန်း ရိုက်ပြီးတော့ နောက်တစ်ကတ် ရိုက်တဲ့အခါမှာ သရုပ်ဆောင်တွေထဲက ပထမတစ်ယောက်ကို အရင် စပူးတယ်။ အဲ့ဒီတစ်ယောက်ကလည်း သူအရမ်း ကြောက်တယ်။ မရိုက်တော့ဘူး ဆိုပြီး ပြောတယ်။
Voice : အဲ့ဒီလိုတွေ ကြုံရတော့ ကိုယ်တိုင်ရော ဘယ်လောက်အထိ စိတ်လှုပ်ရှားခဲ့ရလဲ။
NKZY : သရဲတွေက နန်းခင်တို့ကားကို ဘေးကနေ လိုက်ပြီး ခြောက်တဲ့အခန်း ရိုက်တဲ့အခါမှာ ဇာတ်ပို့ တစ်ယောက်ကို အရင်စပူးတယ်။ နောက်ထပ်ပြီးတော့ ဒုတိယတစ်ယောက်ကို ဆက်ပူးတယ်။ သူ့ကို အကြောက်ပြေအောင် ဘုရားစာ ရွတ်ပေးတယ်။ ရေတိုက်တယ်။ သိပ်မကြာဘူး သူ့နောက်ခုံက တစ်ယောက်ကိုပါ ဆက်ပူးတယ်။ သုံးယောက်လောက် ဒီလိုမျိုးတွေ ကြုံလာရတော့ နန်းခင်တို့က ဇာတ်ကားကို ဘယ်လိုမှ ဆက်ရိုက်လို့ မရတော့ဘူး။ ည ဆယ့်နှစ်နာရီကျော်လောက်မှာ ရိုက်ကွင်းသိမ်းပြီး ပြန်လာရတယ်။ ဇာတ်ကား မရိုက်ခင် ပွဲတွေလည်း ပေးထားတော့ ဒီလိုမျိုးတွေ ကြုံရမယ်လို့ မထင်ဘူးလေ။ အပူးခံထားရတဲ့ မိန်းကလေး သုံးယောက်လုံးကလည်း သူတို့ ဆက်မရိုက်တော့ဘူးလို့ ဒါရိုက်တာကို ပြောတယ်။
Voice : အမြန်လမ်းပေါ်မှာ ခရီးသွားရင်း ကြုံရတဲ့ အဖြစ်အပျက်တွေကို ရိုက်ပြထားတာလား။
NKZY : အမြန်လမ်းပေါ်မှာ တကယ်ဖြစ်ခဲ့တဲ့ မတော်တဆ ဖြစ်ရပ်တွေ၊ ယာဉ်တိုက်မှုတွေ အကြောင်းကို ရိုက်ပြထားတာပေါ့။ ဒီကားမှာ နန်းခင်နဲ့ ပိုင်တံခွန်က သမီးရည်းစားတွေပေါ့။ နှစ်ယောက်အတူ ခရီးသွားဖို့ ကားနဲ့ လိုက်လာတယ်။ အမြန်လမ်းပေါ် အရောက်မှာ ဝိညာဉ်ဖြစ်နေတဲ့ မိန်းမတစ်ယောက်က နန်းခင်ကို သူ့ရဲ့ ယောက်ျားက သူ့ကို သတ်သွားပါတယ်။ အမှုကို ဖော်ထုတ်ပေးပါဆိုပြီး ကိုယ့်ကို အိပ်မက်လာပေးတာပေါ့။ ရှေ့မှာလည်း နန်းခင် သရဲကား ရိုက်ဖူးပါတယ်။ အဲ့ဒီကားကျတော့ တကယ့်ဖြစ်ရပ် မဟုတ်ဘဲ ဇာတ်လမ်းဆင်ပြီး ရိုက်တာပေါ့။ ဒီကားကကျတော့ တကယ့် ဖြစ်ရပ်မှန်တွေကို ရိုက်တာဆိုတော့ စီးတယ်လို့ပဲ ထင်တယ်။
Voice : ကိုယ်တိုင်ရော ဘယ်လို ထူးထူးခြားခြား ဖြစ်ရပ်တွေ ကြုံခဲ့ရတာမျိုးရှိလဲ။
NKZY : ရိုက်ကွင်းမှာ ဘာတွေ မြင်ရလဲဆိုတော့ ဇာတ်ဝင်ခန်း ရိုက်ပြီးလို့ ကားအောက်ကို ဆင်းတဲ့အခါမှာ အရိပ်တွေ ဖြတ်သွားတာ မြင်ရတယ်။ ဒရုန်းနဲ့ ရိုက်တဲ့အချိန်မှာလည်း မီးအနီရောင်တွေ လိုက်လာတာတွေ တွေ့ရတယ်။ တစ်ကားလုံးမှာရှိနေတဲ့ လူတွေက ကားအောက်မှာရှိတဲ့ ဇာတ်ပို့တစ်ယောက်ကို မြင်ရတယ်။ နန်းခင်နဲ့ ကင်မရာသမားက အောက်မှာရှိတဲ့ ဇာတ်ပို့တစ်ယောက်ကို မမြင်ရဘူး။ အဲ့ဒီလိုမျိုး ထူးဆန်းတဲ့ ဖြစ်ရပ်တွေ အများကြီး ကြုံရတယ်။ ဘဝမှာလည်း တစ်ခါမှ မကြုံဖူးဘူး။ ဘယ်လိုပဲ ဖြစ်နေပါစေ ကိုယ်ယူထားတဲ့ တာဝန်တစ်ခုကိုတော့ ပြီးဆုံးအောင် လုပ်မှာပါ။
Voice : ဒီကားက ကိုယ့်အတွက် ရုပ်ရှင်ကားကြီးမှာ ခေါင်းဆောင်အနေနဲ့ ပထမဆုံး ရိုက်ခွင့်ရတာနော်။ ဘယ်လောက်အထိ အောင်မြင်မှုရဖို့ မျှော်လင့်ထားလဲ။
NKZY : ဒီကားမှာ နန်းခင် အကောင်းဆုံးတော့ ကြိုးစားထားပါတယ်။ ကိုယ်မကြုံဖူးတဲ့ ဖြစ်ရပ်တွေ ကြုံရတဲ့အတွက် ကြောက်လည်း ကြောက်တယ်ပေါ့။ တကယ်ဖြစ်ခဲ့တဲ့ ဟာတွေကို ရိုက်ပြတာဆိုတော့ သရုပ်ဆောင်ရတာ တာဝန်လည်း ကြီးပါတယ်။ ရိုက်ကွင်းမှာ သရုပ်ဆောင်အချို့က ဆက်မရိုက်ရဲလို့ နုတ်ထွက်မယ်လို့ ပြောကြပေမယ့် နန်းခင်အနေနဲ့ကတော့ ကိုယ်လက်ခံထားတဲ့ အလုပ်တစ်ခုကို တာဝန်ကျေအောင် လုပ်သွားမှာပါ။ ဒီကားပြီးရင် ပိုင်တံခွန်နဲ့ ဟာသရုပ်ရှင်တစ်ကား ဆက်ရိုက်မယ်။ နောက်ပြီး ဦးဗေလုဝနဲ့ ရုပ်ရှင်တစ်ကား ရိုက်ဖို့ ရှိသေးတယ်။
Voice : ကိုယ့်ရဲ့အနုပညာ သက်တမ်းလည်း နည်းနည်း ရလာပြီဆိုတော့ ကိုယ့်ရဲ့ လိုအပ်ချက်တွေကိုရော ဘယ်လို သုံးသပ် ပြင်ဆင်ဖြစ်လဲ။
NKZY : နန်းခင်အနေနဲ့ကတော့ ပရိသတ်လက်ခံတဲ့ သရုပ်ဆောင်ကောင်း တစ်ယောက်ဖြစ်အောင် အများကြီး ကြိုးစားရဦးမှာပါ။ ဒီအနုပညာလောကမှာ နေရာတစ်နေရာ ရဖို့အတွက် ကြိုးစားရမှာတွေ အများကြီး ရှိပါသေးတယ်။ အခုလက်ရှိ အချိန်မှာတော့ နန်းခင်တို့က အတွေ့အကြုံတွေ စုဆောင်းဆဲ၊ လေ့လာသင်ယူဆဲ အဆင့်ပဲ ရှိပါသေးတယ်။ အနုပညာ ဝမ်းစာတွေ ဖြည့်ဖို့ အများကြီး လိုနေပါသေးတယ်။ ဇာတ်ကားတစ်ကားချင်းစီမှာတော့ ကိုယ့်ရဲ့ လိုအပ်ချက်တွေကို သေချာ ပြန်သုံးသပ်ပါတယ်။
သန့်ဇင်ဦး
The Voice
No comments:
Post a Comment