ရန်ကုန် ၊ မတ် ၂၄ ။ ။ လယ်ယာကဏ္ဍ တိုးတက်ရန် အတွက် ရင်းနှီးမြှုပ်နှံမှု တစ်ခုအနေဖြင့် ရန်ကုန်တိုင်း အစိုးရက ဦးဆောင်ပြီး အဆင့်မြှင့် လယ်ယာ စီမံကိန်းကို အကောင်အထည် ဖော်ရန် ဘတ်ဂျက်များ ချထားပေးရာ၌ ပုဂ္ဂိုလ်စွဲ နယ်မြေစွဲ ကင်းရှင်းကြောင်း ရန်ကုန်တိုင်း ဒေသကြီး ၀န်ကြီးချုပ် ဦးဖြိုးမင်းသိန်း က ပြောဆိုခဲ့သည်။
အစိုးရမှ ရင်းနှီးမြှုပ်နှံငွေ ကျပ် ၈ ဘီလျံ သုံးစွဲသွားမည့် အဆင့်မြှင့် လယ်ယာ စီမံကိန်းတွင် ၀န်ကြီးချုပ် ဦးဖြိုးမင်းသိန်း ၏ မဲဆန္ဒနယ် လှည်းကူးမြို့နယ်မှ လယ်မြေဧက ၁၅၅၅ ဒဿမ ၂၉ ဧက အတွက် ဘတ်ဂျက်၏ ၄၀ ဒဿမ ၈၁ ရာခိုင်နှုန်း ရရှိခဲ့ပြီးနောက် တိုင်းလွှတ်တော် ကိုယ်စားလှယ်များ အကြား ဝေဖန် ပြောဆိုမှုများ ပေါ်ထွက်လာခြင်း ဖြစ်သည်။
"ကျွန်တော်တို့ရဲ့ ဆောင်ရွက်မှုဟာ စေတနာနဲ့ ဆောင်ရွက်ရမှာ ဖြစ်ပါတယ်၊ အဲ့ဒီ စေတနာ ဆိုတာ လူပုဂ္ဂိုလ် အစွဲအလမ်း နယ်မြေ အစွဲအလမ်း ပါလို့ မရပါဘူး၊ တကယ်ကို အကျိုး ဖြစ်ထွန်းမယ့် နေရာကိုပဲ ဆောင်ရွက်ရမှာ ဖြစ်ပါတယ်" ဟု ဦးဖြိုးမင်းသိန်း က ဆိုသည်။
ယနေ့ မတ်လ ၂၄ ရက်က ရန်ကုန်တိုင်း ဒေသကြီး အစိုးရ အဖွဲ့ရုံးတွင် ကျင်းပသည့် သတင်းစာ ရှင်းလင်းပွဲတွင် ယင်း အဆင့်မြှင့် လယ်ယာ စီမံကိန်းနှင့် ပတ်သက်ပြီး ၀န်ကြီးချုပ် က အထက်ပါ အတိုင်း ပြောဆိုခဲ့ခြင်း ဖြစ်သည်။
ဆိပ်ကြီးခနောင်တို မဲဆန္ဒနယ် အမှတ် (၁) တိုင်းဒေသကြီး လွှတ်တော် ကိုယ်စားလှယ် ဒေါ်စန္ဒာမင်းက လှည်းကူးမြို့နယ် တစ်ခုတည်းမှ ဘတ်ဂျက်၏ ၄၀ ရာခိုင်နှုန်း ရရှိမှု အပေါ် ယမန်နေ့က မေးခွန်း ထုတ်ခဲ့သည်။
"စပါး စိုက်ပျိုးတဲ့ မြို့နယ်တွေ အားလုံးကိုတော့ အချိုးကျ အညီအမျှ ခွဲဝေခြင်း မဟုတ်ဘဲ လှည်းကူးမြို့နယ် ကတော့ ၄၀ ဒဿမ ၈၁ ရာခိုင်နှုန်းကို ယူပြီး ကျန်တဲ့ ၇ မြို့နယ် ကိုတော့ အနည်းငယ်စီ ခွဲပေးခဲ့တာကို တွေ့ရှိခဲ့ ပါတယ်၊ ဒါဟာ ဖွံ့ဖြိုးမှု အနည်းဆုံး ဖြစ်တဲ့ မြို့နယ်တွေကို အမှန်တကယ် ဖွံ့ဖြိုး တိုးတက်စေဖို့ စေတနာ ရှိရဲ့လား ဆိုတာ မေးခွန်းထုတ်စရာ ဖြစ်နေပါတယ်" ဟု ဆိပ်ကြီးခနောင်တို မဲဆန္ဒနယ် အမှတ် (၁) တိုင်းဒေသကြီး လွှတ်တော် ကိုယ်စားလှယ် ဒေါ်စန္ဒာမင်းက ယမန်နေ့က ကျင်းပခဲ့သည့် လွှတ်တော်၌ ဝေဖန် ပြောဆိုခဲ့သည်။
သို့သော် ၀န်ကြီးချုပ် ဦးဖြိုးမင်းသိန်း က "မြို့သစ် စီမံကိန်းကြီး ဆောင်ရွက်မယ့် နေရာကို နှစ်သီးစား သွားလုပ်ရင် ဒီငွေတွေက ဆုံးရှုံးသွားမှာ ဖြစ်ပါတယ်၊ ဒါကြောင့်မို့ ဆောင်ရွက်မှု အားလုံးဟာ ပုဂ္ဂိုလ်စွဲ၊ ၀ါဒစွဲ၊ အယူအဆစွဲ ကင်းပြီးတော့ တကယ်ကို ပြည်သူကို ဗဟိုပြုပြီး တောင်သူ လယ်သမားတွေရဲ့ ဘ၀ကို ရှေးရှုပြီး ဆောင်ရွက် သွားကြရမှာ ဖြစ်ပါတယ်" ဟု ယနေ့ သတင်းစာ ရှင်းလင်းပွဲတွင် ပြောဆိုခဲ့သည်။ ( Mizzima )
No comments:
Post a Comment