အိမ်ငှားခွန်များ ပေးရတော့မည်

အိမ်ငှားခွန်များ ပေးရတော့မည်

ရွှေ့ပြောင်း အလုပ်သမား များစွာရှိသည့် မန္တလေးမြို့တွင် အိမ်ငှားသည့် လုပ်ငန်းသည် နှစ်ဦးနှစ်ဖက် အဆင်ပြေသည့် လုပ်ငန်းတစ်ခု ဖြစ်သည်။ ထိုလုပ်ငန်းများသည် ခေတ်အဆက်ဆက် အိမ်ရှင်နှင့်  အိမ်ငှားသဘောတူလျှင် အထမြောက်သည့် လုပ်ငန်းဖြစ်ပြီး ယခုမူ လုပ်ငန်းလိုင်စင် ပြုလုပ်ကြရတော့မည် ဖြစ်သည်။

အိမ်ငှားသူများ အငှားအိမ်ငှားပိုင်ခွင့် လုပ်ငန်းလိုင်စင် ပြုလုပ်ကြရန်အတွက် မန္တလေးမြို့တော် စည်ပင်သာယာရေး ကော်မတီက မတ်လ ဒုတိယပတ်အတွင်းက ကြေညာလိုက်သည်။

“အိမ်တစ်ခုလုံးဖြစ်စေ၊ အခန်းတစ်ခုချင်းဖြစ်စေ ငှားရမ်းတဲ့သူတွေ အကုန်လုံး အကျုံးဝင်တယ်”ဟု မန္တလေးမြို့တော် စည်ပင်သာယာရေး ကော်မတီ၊ သန့်ရှင်းရေးဌာန ဌာနစုမှူး ဒေါ်ဝင်းမင်းသန်းက ရှင်းပြသည်။

ယင်းသို့ ကြေညာခဲ့ခြင်းသည် ယခုမှတော့ မဟုတ်။ ၂၀၁၆ ခုနှစ် အောက်တိုဘာလ အတွင်းကလည်း ယခုကဲ့သို့ အသိပေး ကြေညာချက် ထုတ်ခဲ့ဖူးသည်။ ထိုစဉ်က ၂၀၁၇ ခုနှစ် မတ်လတွင် စတင် လျှောက်ထားရမည်ဟု ဆိုသော်လည်း စိတ်ဝင်စားသူ မရှိခဲ့ကြ။ ယခု ဒုတိယအကြိမ် ကြေညာချက် ထုတ်ပြန်သောအခါ အချိန် သတ်မှတ်ချက်ရွှေ့ပြီး ဧပြီလမှ ဇွန်လအထိ ပညာပေးကာလ သတ်မှတ်ထားပြီး ယင်းနောက်တွင် လိုင်စင် မပြုလုပ်သူများကို အရေးယူသွားမည်ဖြစ်သည်။

မန္တလေးမြို့ စည်ပင်နယ်နိမိတ်အတွင်းရှိ မည်သည့် စီးပွားရေး လုပ်ငန်းမဆို လုပ်ငန်း လုပ်ပိုင်ခွင့်လိုင်စင်ကို သန့်ရှင်းရေးဌာနသို့ တင်ပြလျှောက်ထားရပြီး မန္တလေးမြို့တော် စည်ပင်သာယာရေး ကော်မတီ ဥပဒေပုဒ်မ ၇၆ အရလည်းကောင်း၊ မန္တလေးမြို့တော် စည်ပင်သာယာရေး ကော်မတီ၊ တည်းခိုခန်း၊ ဘော်ဒါဆောင်နှင့် အခန်းလိုက် ငှားသော အဆောက်အအုံများဆိုင်ရာ နည်းဥပဒေ ၃ အရလည်းကောင်း၊ အိမ်ပိုင်ရှင်က အငှားအိမ် ငှားပိုင်ခွင့် လုပ်ငန်းလိုင်စင်ကို ၂၀၁၇-၂၀၁၈ ဘဏ္ဍာရေးနှစ်မှစ၍ သတ်မှတ် စည်းကမ်းချက်များနှင့်အညီ လျှောက်ထားရမည်ဖြစ်ကြောင်း မြို့တော်စည်ပင်က ကြေညာချက် ထုတ်ပြန်ထားသည်။

အငှားအိမ် ငှားပိုင်ခွင့်လုပ်ငန်း လိုင်စင် သို့မဟုတ် အိမ်အငှားလိုင်စင် မန္တလေးတွင် ရှိသင့်ပြီလော။

“ရန်ကုန်မှာတော့ မရှိသေးဘူး။ သူတို့ ဘာကြောင့် ဒီလို လုပ်တယ်ဆိုတဲ့ ရည်ရွယ်ချက်ကို သိဖို့လိုတယ်။ လိုင်စင်ကြောင့် အငှားဈေးကွက်ကို သိပ်ထိခိုက်မှာတော့ မဟုတ်ဘူး”ဟု ရန်ကုန်တိုင်းဒေသကြီး အိမ်၊ ခြံ၊ မြေ လုပ်ငန်းအသင်း ဥက္ကဋ္ဌ ဦးစိုင်းခွန်နောင်က ဆိုသည်။

မန္တလေးတွင်မူ ယင်းကဲ့သို့ အငှားလိုင်စင် လုပ်ရမည့်ဥပဒေက ယခင်ကတည်းက ပြဋ္ဌာန်းထားပြီးဖြစ်ကာ ယခု တစ်ဖန် အသက် ပြန်ဝင်လာအောင် ပြုလုပ်ခြင်းဖြစ်ကြောင်း ဒေါ်ဝင်းမင်းသန်းက ပြောသည်။

“စည်ပင်နယ်နိမိတ် အတွင်းမှာရှိတဲ့ လုပ်ငန်းဆိုရင် လိုင်စင်ရှိရမယ်၊ ဒါကြောင့် လုပ်ခိုင်းတာ”ဟု ၎င်းကဆိုသည်။

ယခင် မြူနီစီပယ်ခေတ်ကတည်းက အငှားလိုင်စင် လုပ်ကြရပြီး ၂၀ဝ၀ ပြည့်နှစ်ဝန်းကျင်တွင် ပျောက်ကွယ်ခဲ့ကြောင်း၊ အငှားအိမ် ငှားရမ်းပိုင်ခွင့် လိုင်စင်လျှောက်ထားရယူခြင်း မပြုဘဲ အဆောက်အအုံ ငှားရမ်းခြင်းလုပ်ငန်း လုပ်ကိုင်ပါက မန္တလေးမြို့တော် စည်ပင်သာယာရေး ဥပဒေပုဒ်မ ၁၀၉ (က) ဖြင့် အရေးယူမည်ဖြစ်ပြီး စည်ပင် တရားရုံးတွင် တရားစွဲဆိုသွားမည် ဖြစ်ကြောင်း၊ ဒဏ်ကြေးငွေ ကျပ်နှစ်သိန်းအထိ ချမှတ်နိုင်ကြောင်း ဒေါ်ဝင်းမင်းသန်းက ရှင်းပြသည်။

အငှားလိုင်စင်များ လျှောက်ထားမည့်အပေါ် အွန်လိုင်းစစ်တမ်းတစ်ခု မန္တလေး အခြေစိုက် နေထိုင်သူများကို The Voice က မတ်လ ၂၁ ရက်နေ့က ကောက်ခံခဲ့သည်။

ယင်းစစ်တမ်းကို ပြန်လည် ဖြေဆိုခဲ့သူများအနက် “အိမ်ငှားလိုင်စင်လုပ်တာ ကောင်းတာပေါ့”ဟု ယူဆသူ ခုနစ်ဦး၊ “အိမ်ငှားလိုင်စင် လုပ်တာ မကောင်းဘူး”ဟု ယူဆသူနှစ်ဦး၊ “အိမ်ငှားလိုင်စင်လုပ်တာ အိမ်ငှား နေထိုင်မယ့်သူတွေအတွက် ဈေးတွေ ပိုကြီးလာနိုင်တယ်”ဟု ယူဆသူ ခုနစ်ဦး၊ “အိမ်ငှားလိုင်စင် လုပ်တာ အိမ်ငှားရမ်းမယ့်သူတွေအတွက် အခက်အခဲနဲ့ ဝန်ပိုမှု ဖြစ်လာနိုင်တယ်”ဟု ယူဆသူ ခုနစ်ဦး၊ “အိမ်ငှားလိုင်စင် လုပ်တာ စည်ပင်အတွက် အခွန်ပိုတိုးဖို့ လုပ်တာ”ဟု ယူဆသူ သုံးဦး၊ “အိမ်ငှားလိုင်စင် လုပ်ထားရင် ငှားရမ်းသူကော၊ ငှားရမ်းမယ့်သူအတွက်ကော စိတ်အေးရမယ်”ဟု ယူဆသူ ငါးဦး၊ “အိမ်ငှားလိုင်စင် လုပ်မယ်”ဟု ယူဆသူ ငါးဦး၊ “အိမ်ငှားလိုင်စင် မလုပ်ဘူး”ဟု ယူဆသူ သုံးဦး ရှိခဲ့သည်။

စစ်တမ်းအရ အိမ်ငှားလိုင်စင်မှာ ကောင်းမွန်သော်လည်း လိုင်စင်ကြောင့် အိမ်ငှားရမ်းခ ဈေးနှုန်းကြီးလာနိုင်သည်၊ ငှားရမ်းသူတို့အတွက် အခက်အခဲနှင့် ဝန်ပိုမှု ဖြစ်လာနိုင်သည်ဟု ယူဆကြသူ  ပိုမို များပြားသည်။

“အိမ်ငှားလိုင်စင်ကို လွယ်လွယ်ကူကူ လုပ်ခွင့်ရမယ်။ အိမ်ရှင်အိမ်ငှား ဖြစ်ပေါ်လာမယ့် ပြဿနာကို တာဝန်ယူ ဖြေရှင်းပေးမယ်ဆိုရင် ကောင်းတာပေါ့”ဟု မန္တလေး ဒေသခံ ဦးအောင်လတ်ဝင်းက သူ့အမြင်ကို ဆိုသည်။

အငှားလိုင်စင် ပြုလုပ်လိုက်ခြင်းသည် ကောင်းမွန်ပြီး စည်းကမ်းတကျ ဖြစ်လာမည်ဟု ယူဆကြောင်း ပြောလာသူက ဖိုးလမင်း အိမ်၊ ခြံ၊ မြေ အကျိုးဆောင်ပိုင်ရှင် ဦးဝဏ္ဏစိုးဖြစ်သည်။

ယင်းလိုင်စင်အတွက် ပေးဆောင်ရမည့် လိုင်စင်ကြေးမှာ ငှားရမ်းခ၏ ၅ ရာခိုင်နှုန်း ဖြစ်၍ စီးပွားဖြစ် ငှားရမ်းကြသူတို့အတွက် ပြဿနာ မဖြစ်သော်လည်း ဝမ်းရေးအတွက် ငှားရမ်းကြရသူတို့ အတွက်မူ ဝန်ထုပ်ဝန်ပိုး ဖြစ်စေနိုင်ကြောင်း ၎င်းက သုံးသပ်သည်။

“ဆယ်စုနှစ် အတွင်းလောက်မှာ အငှားဈေးကွက်က အတက်ဘက်ပဲ ရှိတယ်။ အရောင်းတွေက ဈေးမြင့်တဲ့အတွက် အငှားတွေ ပိုဖြစ်တယ်ပေါ့။ လိုင်စင်ကြောင့်တော့ အငှားဈေးကွက် ထိခိုက်မယ်မထင်ဘူး”ဟု ဦးဝဏ္ဏစိုးကပြောသည်။

ယင်းကဲ့သို့ လိုင်စင်ကြောင့် အငှားဈေးကွက်ကို ထိခိုက်မည် မဟုတ်သော်လည်း ဈေးအနည်းငယ် ကြီးမြင့်ခြင်းတို့  ဖြစ်နိုင်ကြောင်း မန္တလေးတိုင်းဒေသကြီး အိမ်၊ ခြံ၊ မြေ ကိုယ်စားလှယ်များ ဖွံ့ဖြိုးတိုးတက်ရေး အသင်းဥက္ကဋ္ဌ ဦးတင်မောင်က ဆိုသည်။

“ဝယ်မသုံးနိုင်လို့ ငှားသုံးကြတယ်ပေါ့။ ဈေးကွက်ကတော့ သူ့နေရာနဲ့သူတော့ ဖြစ်နေပါတယ်။ ကိုယ်ပေးနိုင်တဲ့ဈေးကို မူတည်ပြီး အငှားတွေဖြစ်တယ်”ဟု  ဦးတင်မောင်က ပြောဆိုသည်။

အငှားလိုင်စင် ပြုလုပ်လျှင် ပေးဆောင်ရမည့် လိုင်စင်ကြေးမှာ ငှားရမ်းခ၏ ၅ ရာခိုင်နှုန်းဖြစ်သည်။ လိုင်စင်သက်တမ်းမှာ တစ်နှစ်ဖြစ်သော်လည်း လိုင်စင်ကြေးကိုမူ သုံးလငှားရမ်းလျှင် သုံးလစာ၏ ၅ ရာခိုင်နှုန်း၊ ခြောက်လ၊ တစ်နှစ် ငှားရမ်းလျှင်လည်း ခြောက်လ၊ တစ်နှစ်စာအတွက် ၅ ရာခိုင်နှုန်းပင် ဖြစ်သည်။ ယင်းအပြင်  နှစ်ထပ်အိမ်ကို အပေါ်ထပ်နှင့် အောက်ထပ် ငှားရမ်းဈေးနှုန်း မတူညီလျှင်လည်း ထိုမတူညီသည့်အတိုင်းပင် အခွန် ပေးဆောင်ရမည်ဖြစ်သည်။

အငှားလိုင်စင်သည် စင်စစ်စည်ပင် ဘဏ္ဍာ တိုးတက်စေရန် ပြုလုပ်ခြင်းဖြစ်ကြောင်း သန့်ရှင်းရေးဌာန တာဝန်ရှိသူ တစ်ဦးက ပြောသည်။

“ပြောရရင်တော့ စည်ပင်ဝင်ငွေ တိုးဖို့ လုပ်တာပါ။ လက်ရှိ ကောက်ခံနေတဲ့ဟာတွေကို ထပ်တိုးမကောက်ချင်လို့ လစ်လပ်နေတဲ့ နေရာတွေကို ကောက်ခံတာပါ”ဟု ၎င်းကဆိုသည်။

ဘဏ်၊ သံရုံး စသည့် အချက်အချာ ကျသည့်နေရာ၊ တစ်လလျှင် သိန်းဆယ်ချီ ရရှိနေသည့် နေရာများအတွက် အခွန် ကောက်ခံခြင်းဖြစ်ပြီး ဥပဒေအတိုင်း ပြုလုပ်ရသည့်အတွက် တစ်ပိုင်တစ်နိုင် အိမ်ငှား စားရသူများ အတွက်ပါ သက်ရောက်သွားခြင်းဖြစ်ကြောင်း ၎င်းကပြောသည်။

“ဥပဒေက ခွဲခြားပြီး လုပ်လို့မှ မရတာ။ ကျွန်တော်တို့ တကယ် ရည်ရွယ်တာက အောက်ခြေ လူတန်းစားတွေ မဟုတ်ပါဘူး”

အခန်းတစ်ခန်းကို တစ်လလျှင် ကျပ်သုံးသောင်းဖြင့် ခြောက်လစာ ငှားရမ်းလျှင် ယင်းအတွက် တစ်သိန်းရှစ်သောင်း ရရှိမည်ဖြစ်ပြီး အခွန်မှာ ၅ ရာခိုင်နှုန်းဖြစ်၍ ကိုးထောင်ကျပ်သာ ပေးဆောင်ရမည်  ဖြစ်သည်။

တစ်လလျှင် ကျပ်သိန်း သုံးဆယ်ဖြင့် ခြောက်လ ငှားရမ်းထားလျှင် ကျပ်သိန်း ၁၈၀ ဖြစ်ပြီး ၁၈ သိန်း အခွန် ပေးဆောင်ရမည်ဖြစ်သည်။ ဤနည်းဖြင့် ငှားရမ်းသည့် နှုန်းထား ပိုများလျှင် အခွန်များများ  ပေးဆောင်သွားရမည်ဖြစ်သည်။

အောင်မြေသာစံမြို့နယ်အတွင်း နေအိမ် အပေါ်ထပ်ကို ငှားရမ်းထားသည့် အမျိုးသမီး တစ်ဦးကမူ လိုင်စင် ပြုလုပ်ရန်နှင့် အခွန် ပေးဆောင်ရန် စဉ်းစားထားသည်ဟု ပြောသည်။ ၎င်း၏ နေအိမ်အပေါ်ထပ်ကို တစ်လလျှင် သိန်းဂဏန်းမျှဖြင့်သာ ငှားရမ်းထားသဖြင့် အခွန်မှာ သောင်းဂဏန်းခန့်သာ ပေးဆောင်ရမည်ဟု ဆိုသည်။

“တစ်နှစ်စာလောက် တစ်ခါတည်း စာချုပ် ချုပ်ထားတယ် ဆိုရင်တော့ အခွန်ပေးရတာ မသိသာဘူး။ ကိုယ့်အတွက်လည်း ပိုအဆင်ပြေတာပေါ့။ သုံးလေးလလောက် ငှားတဲ့ဟာမျိုးဆိုရင်တော့ ခဏ ခဏ အခွန်ပေးနေရမှာ”ဟု ၎င်းက ပြောသည်။

သို့သော် စည်ပင်မှ ကြေညာချက် ထုတ်ပြန်ထားပြီး နောက်ပိုင်းတွင် လက်ရှိအချိန်ထိ အိမ်အငှားလိုင်စင် ပြုလုပ်ထားသူမှာ မရှိသလောက် နည်းပါးနေသေးသည်။ ပညာပေး ကာလကို ဧပြီလမှ ဇွန်လအထိ သတ်မှတ်ထားသဖြင့် သွေးအေးနေကြသေးခြင်းလည်း ဖြစ်နိုင်သည်။

၂၀၁၇ ခုနှစ် ဇူလိုင်လမှစတင်၍ အိမ်ငှားခွန် ပေးဆောင်ကြရတော့မည် ဖြစ်ပါသည်။

“အခုအချိန်အထိ လိုင်စင်လာလုပ်တဲ့သူက တစ်ဦးတည်းပဲ ရှိသေးတယ်”ဟု သန့်ရှင်းရေးဌာနမှ ဌာနစုမှူး ဒေါ်ဝင်းမန်းသန်းက ပြောဆိုလေသည်။

မြတ် (ကလေး)

The Voice