နိုင်ငံတော်အစိုးရ၏ တစ်နှစ်တာကာလအတွင်း တိုင်းပြု ပြည်ပြု ကြိုးပမ်းဆောင်ရွက်ခဲ့မှုအပေါ် အမျိုးသားဒီမို ကရေစီအဖွဲ့ချုပ်နာယက သူရဦးတင်ဦး၏ သဘောထားအမြင်များကို သိရှိနိုင်ရန် သွားရောက်တွေ့ဆုံမေးမြန်းခဲ့ပါသည်။
မေး။ ။ အစိုးရအဖွဲ့အနေနဲ့ အခုဆိုရင် တစ်နှစ် သက်တမ်းပြည့်မြောက်ခဲ့ပါပြီ။ ဒီတစ်နှစ်တာကာလအပေါ် ဘဘအနေနဲ့ ဘယ်လိုများ သုံးသပ်ချင်ပါသလဲ။
ဖြေ။ ။ အောင်မြင်တိုးတက် ကောင်းမွန်တာတွေရှိသလို ဆောင်ရွက်ရမယ့် ကိစ္စတွေထဲမှာ အခုထိမဆောင်ရွက်နိုင်သေးတာလေးတွေ၊ ကျန်နေတာလေးတွေ ရှိနေသေးတယ်။ တိုးတက်အောင်လုပ်ဖို့လည်း ရှိတာပေါ့၊ သဘောကတော့ အခါလည်သားလေးကို ရည်မှန်းချက်ရောက်အောင် ပြေးစမ်းဆိုတဲ့ သဘောမျိုးဖြစ်နေတယ်။
တစ်နှစ်ဆိုတော့ တစ်နှစ်သားလောက်ပဲ လုပ်နိုင်မှာပဲ။ ဘာလို့လဲဆိုတော့ ရာစုနှစ်ထက်ဝက်လောက်က စစ်အုပ်ချုပ်ရေးဆန်ဆန် တစ်ပါတီဦးစီးစနစ်နဲ့ အုပ်ချုပ်တဲ့ စနစ်၊ နောက်ပြီးတော့ တပ်ကနေများသောအားဖြင့် ကိုင်တွယ်အုပ်ချုပ်တဲ့စနစ်နဲ့ တောက်လျှောက်လာခဲ့တာ။ အခုကျမှ ပြည်သူလူထုက ရွေးချယ်လိုက်တဲ့အခါ လုပ်ရကိုင်ရမယ့် စိန်ခေါ်မှုတွေက သိပ်များနေခဲ့တာပေါ့။ သူ့ရဲ့အရင်းအမြစ်ကိုရှာပြီး တစ်ခုစီတစ်ခုစီ ဆွဲထုတ်ပြီးတော့ ပြီးစီးအောင် လုပ်ကိုင်သွားဖို့ဆိုတာက အချိန်ယူရမှာပေါ့။ အချိန်ယူရမယ်ဆိုတာကလည်း သတ်သတ်မှတ်မှတ် အကန့်အသတ်နဲ့ အချိန်ပေးမှ ပြည်သူလူထုက ပိုပြီးတော့ အားရှိမှာပေါ့။
မေး။ ။ တစ်နှစ်တာ လျှောက်လှမ်းခဲ့တဲ့ မြန်မာ့ငြိမ်းချမ်းရေး ဖြစ်စဉ်မှာ ပါဝင်ပတ်သက်နေသူတွေကို ဘာများပြောချင်ပါသလဲ။
ဖြေ။ ။ လက်နက်ကိုင်ပဋိပက္ခက တောက်လျှောက် ယနေ့ထိတိုင် ဖြစ်နေတာပေါ့၊ ဒီအပေါ်မှာ သင်ခန်းစာကောင်းတွေ ယူပြီးတော့ အပစ်အခတ်ရပ်စဲကြပါ။ တိုင်းရင်းသားလက်နက်ကိုင်တွေ အားလုံးပါတော့ ကောင်းတာပေါ့၊ အားလုံးပါဖို့ လိုတာပေါ့။ သစ္စာရှိရှိ၊ မေတ္တာနဲ့ မှန်မှန်ကန်ကန်၊ ရင်းရင်းနှီးနှီး လုပ်တာတွေက ပိုပြီးထိရောက်ပုံရပါတယ်။
ဒီနေ့ ကျွန်တော်တို့ ခေါင်းဆောင်ကလည်း တိုင်းရင်းသားတွေကို တွေ့ဆုံပြီး အပစ်အခတ်ရပ်စဲဖို့ကိုပဲ ဇောက်ချပြီးတော့ လက်တွေ့ကိုင်တွယ်ဖြေရှင်းနေတာဖြစ်ပါတယ်။ အချင်းချင်းယုံကြည်မှုရအောင်၊ ကိုယ့်ဘက်ကလည်း ယုံကြည်မယ့်စကား၊ ယုံကြည်မယ့် လှုပ်ရှားမှု၊ တစ်ဖက်ကလည်း အလားတူယုံကြည်မယ့်စကား၊ ယုံကြည်မယ့် လှုပ်ရှားမှုတွေနဲ့ မှန်ကန်တဲ့လမ်းပေါ် ရောက်သွားရင်တော့ ဒါတိုင်းပြည်ရဲ့ ရှေ့ရေးကောင်းမွန်မှုနဲ့ ကံကြမ္မာ ကောင်းကိုဖြစ်မယ်လို့ ယူဆတယ်။ အဲဒါဖြစ်အောင်လည်း တစ်တိုင်းပြည်လုံး အားလုံးက အဲဒီသဘောထားနဲ့ လုပ်ကိုင်သွားကြမှဖြစ်မယ်လို့ ပြောချင်ပါတယ်။
မေး။ ။ NLD အစိုးရရဲ့တစ်နှစ်တာသက်တမ်းအတွင်းမှာ စီးပွားရေးကဏ္ဍနဲ့ပတ်သက်ပြီး ဝေဖန်မှုအချို့ ရှိခဲ့ပါတယ်။ ဘဘအနေနဲ့ရော ဘယ်လိုရှုမြင်သုံးသပ်ချင်ပါသလဲ။
ဖြေ။ ။ နှစ်ပေါင်းရာစုတစ်ဝက်လောက် ဖြစ်ခဲ့တဲ့ စီးပွားရေးစနစ်တွေနဲ့ပတ်သက်ပြီး တစ်နှစ်၊ အခါလည်သားမှာတော့ အများကြီးသိပ်မှန်းလို့ မရသေးဘူးပေါ့။ စိန်ခေါ်မှုတွေကို စည်းကမ်းတကျ၊ စနစ်တကျ ကြိုးစားဖော်ထုတ်ပြီးတော့ ဆောင်ရွက်သွားမယ်ဆိုရင်တော့ ဒါဟာ အခြေအနေကောင်းတစ်ခုကို ရောက်မှာပါ။ တော်လှန်ရေး ကောင်စီတက်တုန်းက ပါလီမန်ဒီမိုကရေစီခေတ်ကနေ လုပ်လာခဲ့တဲ့ စီးပွားရေးစနစ်ကြောင့် ကျတဲ့ဘက်ကို ရှိနေမယ်လို့ မှန်းဆရပါတယ်။ အခုလည်းဒီလိုပဲ၊ အကျိုးသက် ရောက်မှုတွေကတော့ ရှိမှာပဲ။ ဒီဘက်သက်တမ်းက လုပ်တဲ့ အကျိုးသက်ရောက်မှုက ဟိုဘက်ကျမှ မြင်ရမယ်။ ဒီလို သဘောပေါက်တယ်။
မေး။ ။ နိုင်ငံရေးလောကရဲ့ ဓလေ့ထုံးစံအတိုင်း အမျိုးသားဒီမိုကရေစီအဖွဲ့ချုပ် အစိုးရသစ်ရဲ့ တစ်နှစ်တာ ဆောင်ရွက်ချက်များအပေါ် ကြိုဆိုထောက်ခံသူတွေရော၊ ဝေဖန်ကန့်ကွက်သူအချို့ရော ရှိခဲ့ပါတယ်။ ဒါကြောင့် ဘဘအနေနဲ့ ဝေဖန်ကန့်ကွက်သူတွေအပေါ် ဘာများပြောချင်ပါသလဲ။
ဖြေ။ ။ အကြောင်းခြင်းရာတွေနဲ့ပတ်သက်ပြီး ဝေဖန်တာတွေက အများကြီးပေါ့။ ပြည်သူလူထုဘက်ကနေ မြင်တာတွေကို ပြောရဲလာတယ်ပေါ့၊ အဲဒါတွေကို အကောင်း မြင်ရမယ်။ မပြောရဲတာတွေကို ပြောရဲလာကြတယ်။ အဲဒါက တိုးတက်လာတဲ့ သဘောရှိတယ်။ တချို့နေရာတွေမှာ လုပ်တဲ့ကိုင်တဲ့အခါ အစိုးရအနေနဲ့ ဝေဖန်ခံရ တာတွေရှိတယ်။ အစိုးရဖြစ်ရင် ဝေဖန်ခံရမှာပဲလေ။ တဖြည်းဖြည်းနဲ့ ဆောင်ရွက်သွားမယ်ဆိုရင်တော့ ပြည်သူလူထုရဲ့ဆန္ဒကို ဦးထိပ်ပန်ပြီးတော့ ဝိုင်းဝန်းလုပ်မယ်ဆိုရင် တဖြည်းဖြည်းနဲ့ ပြဿနာရပ်တွေဟာ ဖြေရှင်းနိုင်ပြီး ချောမောအောင်မြင်သွားမယ်လို့ ပြောရမှာဖြစ်ပါတယ်။
မေး။ ။ အများလေးစားခြင်းခံရတဲ့ ပုဂ္ဂိုလ်တစ်ယောက် အနေနဲ့ ဘဘကို မေးချင်ပါတယ်။ လူပုဂ္ဂိုလ်တစ်ယောက်ကို အများပြည်သူက ဘယ်အခါမျိုးမှာ လေးစားကြပါသလဲ။ ဘယ်အရည်အချင်းတွေကြောင့် လေးစားသလဲ။ ကျွန်တော်တို့နိုင်ငံမှာ လူထုအလေးစားဆုံးပုဂ္ဂိုလ်ဖြစ်တဲ့ ဗိုလ်ချုပ်အောင်ဆန်းကို ပမာပြုပြီးရှင်းပြပေးစေလိုပါတယ်။
ဖြေ။ ။ ကိုယ်ကျင့်တရားပေါ့၊ ကိုယ်ကျင့်တရား ကောင်းတာရယ်၊ နောက်ပြီး ရိုးသားဖြောင့်မတ်မှုရယ်ပေါ့။ ကိုယ်ကျင့်တရားကောင်းဖို့ဆိုတာက ယုံကြည်မှုစွမ်းပကား ပေးတယ်လို့ ဆိုရမှာပါ။ ကိုယ်ကျင့်တရားနဲ့ပတ်သက်လို့ လက်မခံနိုင်စရာ အကြောင်းရှိတဲ့သူကိုတော့ ခေါင်းဆောင် တစ်ယောက်အနေနဲ့ လူတွေရဲ့လေးစားဖို့ဆိုတာ အင်မတန် ခက်တာပေါ့။
ဗိုလ်ချုပ်အောင်ဆန်းမှာရှိတဲ့ စိတ်နေသဘောထားက ဖြောင့်မတ်တယ်၊ တည်ကြည်တယ်။ ဗိုလ်ချုပ်ကို လေးစားတယ်ဆိုတာက ကိုယ်ကျင့်တရားကောင်းကောင်းနဲ့ သူ့ရဲ့ ကိုယ်ရေးကိုယ်တာကို တကယ်တမ်းစွန့်လွှတ်ပြီးတော့ တိုင်းပြည်အတွက် လုပ်ခဲ့တယ်။ နောက်ပြီး ဖြစ်နိုင်တာကိုပြောပြီး ဖြစ်အောင်လုပ်သွားနိုင်တယ်။ ဥပမာဆိုရင် တစ်နှစ်အတွင်း လွတ်လပ်ရေးရမယ် ဆိုတာပေါ့။ ဒါ ဗိုလ်ချုပ်ရဲ့စွမ်းရည်ပါပဲ။ သို့သော်လည်း ကံမကောင်းချင်တော့ အချိန်မတိုင်ခင်လေးမှာ ငယ်ငယ်ရွယ်ရွယ်နဲ့ တိုင်းပြည်အတွက် အသက်ပေးသွားတာကတော့ နှမြောဖို့ ကောင်းတာပေါ့။
မေး။ ။ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ လက်ရှိတိုင်းပြုပြည်ပြု ကြိုးပမ်းဆောင်ရွက်မှုအပေါ်ရော ဘဘအနေနဲ့ ဘယ်လောက်မျှော်လင့်ထားပါသလဲ။
ဖြေ။ ။ ဒေါ်အောင်ဆန်းစုကြည်ကို ကျွန်တော် သိပ်ယုံကြည်တယ်။ သူကပြောရင် ဖြစ်အောင်လုပ်တယ်။ တိုင်းရင်းသားစည်းလုံးညီညွတ်မှုမှာလည်းပဲ အမြဲတမ်း စည်းလုံးမှုရအောင်၊ ညီညွတ်မှုရအောင် သွားဖြစ်အောင် သွားတွေ့ လုပ်ကိုင်တာမျိုးကို သူကစွန့်စွန့်စားစား လုပ်တတ်တဲ့သဘောရှိတယ်။ ဒါကြောင့် သူ့ကိုလည်း ကျန်းမာပါစေ၊ ချမ်းသာပါစေ၊ ဘေးအန္တရာယ်ကင်းပါစေလို့ ဆုတောင်းပါတယ်။
မေး။ ။ ဖြည့်စွက်ပြောကြားလိုတာရှိရင်လည်း ပြောကြားပေးစေလိုပါတယ်။
ဖြေ။ ။ အားလုံး စည်းစည်းလုံးလုံး၊ ညီညီညွတ်ညွတ်၊ သဘောထားကြီးကြီး၊ စိတ်ဓာတ်စေတနာအမှန်နဲ့ ငြိမ်းချမ်းရေးကို အေးချမ်းတဲ့နည်းနဲ့ ဖြေရှင်းပြီးတော့ တိုင်းပြည်မှာ တိုင်းရင်းသားအားလုံး ဖွံ့ဖြိုးတိုးတက်အောင် လုပ်ကိုင်နိုင်ပါစေ။ တိုးတက်ဖွံ့ဖြိုးပါစေ။ ကျွန်တော်တို့ မသေခင်မှာပေါ့ တစ်ခုတည်းသောအကျိုးပြုမယ့်၊ ရေရှည်တည်တံ့မယ့် ငြိမ်းချမ်းရေးမျိုးတွေ့ရှိပြီးတော့ တိုင်းရင်းသားအားလုံး စည်းလုံးညီညွတ်ပြီး ဖွံ့ဖြိုးတိုးတက်အောင် ဝိုင်းဝန်းကြိုးပမ်းနိုင်ကြပါစေ။ အေးချမ်းငြိမ်းချမ်းကြပါစေ။ ဒါပဲပြောရမှာပဲ။
တွေ့ဆုံမေးမြန်း-ခင်မောင်ထွေး၊ ရီရီမြင့်၊ ဓာတ်ပုံ-ရဲထွဋ် ( ပြန်/ဆက် )
No comments:
Post a Comment