Latest News

Friday, March 31, 2017

တန်ဖိုးမသိသော ကျောက်ရိုင်းများ

တန်ဖိုးမသိသော ကျောက်ရိုင်းများ


တစ်ခါက လူငယ်လေးတစ်ဦးရဲ့ မိဘနှစ်ပါးဟာ တစ်ပြိုင်နက်တည်း ဆုံးပါးသွားခဲ့ကြတယ်။ အဲဒီလို မိဘနှစ်ပါး ဆုံးပါးသွားတဲ့အခါ လူငယ်လေးဟာ ခိုကိုးရာမဲ့တဲ့ မိဘမဲ့ဘ၀ကို အလိုအလျောက်ရောက်လာတယ်။ အဲဒီအပြင် နဂိုကတည်းက ဆင်းရဲနုံချာလှတဲ့သူ့ဘ၀ဟာ မိဘနှစ်ပါးမရှိတဲ့အတွက် ပိုမိုပြီး စိတ်ဆင်းရဲစရာကောင်းလာခဲ့တယ်။

ကန္တာရ ထဲက ဆူးပင်လို သူ့ဘ၀ဟာ အထီးကျန် သိမ်ငယ်လာတယ်။ သူဟာ ဆင်းရဲလှတဲ့အပြင် သူလုပ်သမျှ အရာတိုင်းဟာလည်း ကံမရှိ၊ ဥာဏ်ရှိတိုင်းမွဲခဲ့ပြန်တယ်။ အဲဒါကြောင့်လည်း နေ့စဉ်စားသောက်ဖို့တောင် အင်မတန်ခက်ခဲ ပင်ပန်းလာတယ်။

အလှူအတန်း၊ မင်္ဂလာဆောင်လိုနေရာမျိုးတွေမှာ သူ့ကို အဖက်လုပ်မယ့်၊ တန်းတူ စကားပြောမယ့်သူ ရှားပါးလာတယ်။ အဲဒီအပြင် သူနေထိုင်ရာရွာရဲ့ ရွာသူရွာသားတွေကလည်း “ဒီကောင် အလကားကောင်” “အရည်အချင်းမရှိတဲ့ကောင်ပါကွာ” “အလကားကျောမွဲ” စသဖြင့် သူတို့ထင်မြင်ရာ မှတ်ချက် အမျိုးမျိုးကို ချမှတ်ကြပြန်တယ်။

အဲဒီအခါမှာတော့ လူငယ်လေးရဲ့ စိတ်ဓါတ်ဟာ အ၀ီစိ က ခြေသုတ်ခုံအထိ နိမ့်ဆင်းလာတယ်။ စိတ်ဓါတ်ဟာ အ၀ီဇိအထိကျသလို နေ့ရက်တိုင်းဟာလည်း သူ့အတွက် ငရဲကျသလို ပူလောင်လာပြန်တယ်။ သူကိုယ်တိုင်တောင် မိဘနှစ်ပါး သွားခဲ့တဲ့သေရွာကို လိုက်ဖို့အကြိမ်ကြိမ်တွေးမိပြန်တယ်။

လူတွေပြောတဲ့ “အလကားလူအကြောင်း၊ ကျောမွဲတွေအကြောင်းနဲ့၊ အရည်အချင်းမဲ့ခြင်း” တွေအကြောင်းကိုပါ သူအပြန်ပြန် အလှန်လှန် တွေးမိလာတယ်။ အလကားလူ မဖြစ်ဖို့အတွက်၊ တန်ဖိုးကြီးသူဖြစ်အောင် သူလုပ်ဖို့လိုမယ်။ ကျောမွဲမဖြစ်ဖို့အတွက်၊ သူ့ကျောပေါ်မှာ တောက်တောက်ပြောင်ပြောင်တွေဝတ်ဆင်နိုင်သူ ဖြစ်ဖို့လိုမယ်။

အရည်အချင်း မရှိသူအဖြစ်က လွတ်မြောက်ဖို့အတွက်၊ အရည်အချင်းတွေလိုမယ်လို့ သူတွေးပြန်တယ်။ ဒါပေမယ့်လည်း လူတွေပြောပြောနေတဲ့ “တန်ဖိုးနဲ့ အရည်အချင်း”တွေဟာ ဘာလဲ ဆိုတာကို သေချာမသိဘဲ ဖြစ်နေပြန်တယ်။ “တန်ဖိုးဆိုတာကို ငါသိအောင်လုပ်ရမယ်” လို့ လူငယ်လေးစဉ်းစားလိုက်တယ်။ သူဟာ တန်ဖိုးကို ရှာဖွေသူဖြစ်လာတယ်။

အဲသည်လိုနဲ့ လူငယ်ကလေးဟာ ဘ၀တန်ဖိုးကို သိဖို့အတွက် ခရီးထွက်လာခဲ့တယ်။ သူဟာ ဖိနပ်ဗလာသော ခြေထောက်နဲ့ တောလမ်းခရီးကို ဖြတ်သန်းပြန်တယ်။ ပြန်စရာမရှိတဲ့ သူ့အတွက် ဦးတည်ရာဟာ သူ့အတွက် နေအိမ်လည်း ဖြစ်တယ်။

စားစရာမရှိတဲ့သူ့အတွက် လမ်းခရီးက ချိုအေးသော သစ်သီးတွေသည် နတ်သဒ္ဓါဖြစ်တယ်။ အဲဒီလိုနဲ့ အင်မတန် အရိပ်ကောင်းလှတဲ့ သစ်ပင်ကြီးတစ်ပင်အောက်ကို သူရောက်လာတယ်။ အဲဒီအပင်အောက်မှာ အနားယူဖို့ သူဟန်ပြင်နေတုန်းမှာပဲ အပင်အောက်မှာ တရားထိုင်နေတဲ့ ဂုရုကြီးတစ်ပါးကို သူတွေ့လိုက်တယ်။

“အို.. ဂုရုကြီးတစ်ပါးပါလား၊ ဒီဂုရုကြီးသွင်ပြင်ဟာ အင်မတန်အေးချမ်းတယ်၊ ငါသိချင်တဲ့အဖြေကို သူ့ကို မေးမယ်” လို့ လူငယ်လေးတွေးထင်လိုက်တယ်။ အဲဒီနောက်သူဟာ ဂုရုကြီးရှေ့မှာ ထိုင်ပြီး အရိုအသေပေးလိုက်တယ်။ အဲဒီနောက် သူက ဒီလိုမေးခဲ့တယ်။

“ဂုရုကြီး၊ လူတွေက ကျွန်တော့်ကို တန်ဖိုးမရှိတဲ့ အလကားလူလို့ပြောနေကြတယ်။ သူတို့ပြောနေကြတဲ့တန်ဖိုးကဘာလဲ ဘဝတန်ဖိုး ဆိုတာ ဘယ်လိုဆုံးဖြတ်ရမလဲ”

အဲဒီလိုမေးလိုက်တဲ့အခါ ဂုရုကြီးက သူကို ကြင်နာစွာကြည့်တယ်။ အဲဒီနောက် မှာပဲ ဂုရုကြီးဟာ ခါးထဲမှာ လိမ်ထားတဲ့ ကျောက်တုံးတစ်တုံးကို ထုတ်ယူလိုက်တယ်။ အဲဒီနောက်ဒီလိုပြန်ပြောတယ်

“မင်းရဲ့ မေးခွန်းကို အဖြေမပေးခင် မင်း အဲ့ဒီကျောက်တုံးကို ယူပြီး ဈေးထဲကို သွားချည့်၊ တန်ဖိုးဘယ်လောက်ရှိတယ်ဆိုတာ စုံစမ်းလာခဲ့ချည်၊ အဲ.. ရောင်းတော့မရောင်းပစ်ခဲ့နဲ့”

လူငယ်လေးဟာ ဂုရုကြီးပေးတဲ့ကျောက်တုံးကို ယူပြီး အနီးဆုံးသော မြို့တစ်မြို့ကို သွားရောက်ခဲ့တယ်။ မြို့ရဲ့ဈေးထဲကို သွားပြန်တယ်။ သူဈေးထဲကို ရောက်ချိန်မှာတော့ သစ်သီး၊ သားငါး၊ ဟင်းသီးဟင်းရွက်သည်တွေ အများကြီးကို သူတွေ့လိုက်ရတယ်။ သူဟာ အနီးဆုံးမှာရှိတဲ့ သစ်သီးသည်တစ်ယောက်ဆီမှာဒီလိုမေးလိုက်တယ်။

“ဒီကျောက်တုံး ဘယ်လောက်တန်ကြေးရှိမလဲဗျ”သစ်သီးသည်ဟာ စူးစမ်းသူယူလာတဲ့ ကျောက်တုံးကို ကြည့်လိုက်တယ်။ ကျောက်တုံးရဲ့ တောက်ပြောင်တဲ့ အသွေးအရောင်ကို သူမြင်တွေ့သွားတယ်။ “ကျောက်တုံးက အရောင်လေးတွေလက်နေပါလား” လို့ သစ်သီးသည်က စဉ်းစားတယ်။ အဲဒီနောက်သူက ဒီလိုပြောတယ်

“ခင်ဗျား လိမ္မော်သီး ဆယ့်နှစ်လုံးယူသွားလိုက်၊ ကျွန်တော့်ကို ဒီကျောက်တုံးပေး၊ လိမ္မော်သီးဆယ့်နှစ်လုံးစာလောက်တော့ တန်မယ်ထင်တာပဲ”အဲဒီအခါ လူငယ်က ဂုရုကြီးရဲ့အမှာစကားအတိုင်း ကျောက်တုံးကို ရောင်းချဖို့ ငြင်းပယ်လိုက်တယ်။

ကျောက်တုံးကို ပြန်လည် တောင်းယူပြီး သူဆက်လက်ထွက်ခွာလာတယ်။ လူငယ်ဟာ ဆန်၊ ဆီ၊ ဆား ၊ ငရုတ်၊ ကြက်သွန်၊ အာလူး စတဲ့ စားသောက်ကုန်တွေရောင်းချတဲ့ ကုန်စုံဆိုင်တန်းကို ရောက်လာပြန်တယ်။ သူဟာ အနီးစပ်ဆုံးကုန်စုံဆိုင်တစ်ခုကို ၀င်လိုက်ပြန်တယ်။

အဲဒီနောက်သူက ဆိုင်ရှင်ကို ဒီလိုမေးပြန်တယ်။”အစ်ကိုကြီး ဒီကျောက်တုံးနဲ့ ကျွန်တော် ဈေးဝယ်မယ်ဆိုရင်၊ ဘယ်လောက်တန်ဖိုးရှိတာတွေရမလဲ”အဲဒီအခါ ဆိုင်ရှင်က ကျောက်တုံးကို ကြည့်ရှုပြန်တယ်။ “အရောင်ထွက်နေတဲ့ ကျောက်တုံးပါလားဟ” လို့ တွေးပြန်တယ်။ အဲဒီနောက်မှာလည်း သူက ဒီလိုပြောတယ်။

“ခင်ဗျားဒီကျောက်တုံးကို ရောင်းမယ်ဆိုရင်တော့ အာလူးတစ်အိတ်လောက်တော့ရမယ်။ ခင်ဗျားအာလူးတစ်အိတ်ယူသွား၊ ကျောက်တုံးထားခဲ့လိုက်”ဒီတစ်ခေါက်မှာလည်းသူဟာ ကျောက်တုံးကို ရောင်းချဖို့ငြင်းဆန်တယ်။ လူငယ်လေးရဲ့ဦးနှောက်ဟာ တူညီသော ကျောက်တုံးအတွက် ကွဲပြားသောတန်ဖိုးတွေကို စဉ်းစားတွေးတောတယ်။

“တစ်ယောက်က လိမ္မော်သီးဆယ့်နှစ်လုံး၊ နောက်တစ်ယောက်က အာလူးတစ်အိတ်” လို့ မှတ်သားရေရွတ်တယ်။ အဲဒီနောက်မှာတော့သူဟာ ရွှေ၊ ငွေ၊ ရတနာတွေရောင်းချတဲ့ ရွှေဆိုင်တန်းကို ရောက်လာတယ်။ ခါတိုင်းလိုပဲသူဟာ အနီးဆုံးသော ရတနာဆိုင်ကို ၀င်ရောက်လိုက်တယ်။

အဲဒီနောက်တော့သူဟာ ရတနာကုန်သည်ကြီးကို ကျောက်တုံးကို ပြလိုက်တယ်။ အဲဒီနောက်တော့ကျောက်တုံးရဲ့တန်ကြေးကို သူမေးမြန်းပြန်တယ်။ အဲဒီအခါ ရတနာကုန်သည်ကြီးက ကျောက်တုံးကို သေချာစွာအကဲခတ်ပြန်တယ်။ ကုန်သည်ကြီးရဲ့မျက်နှာဟာ ကျောက်တုံးကို အကဲခတ်နေစဉ်မှာပဲ အံ့သြတကြီး အမူအရာ အဖြစ် ပြောင်းလဲလာတယ်။

အဲဒီနောက်တော့ အနီရောင်ကတ္တီပါစတစ်ခုနဲ့ ကျောက်တုံးကို ညင်သာစွာပွတ်တိုက်လိုက်တယ်။ ကျောက်တုံးကို ဂရုတစိုက်မယူပြီး ကျောက်တုံးကို ကြည့်လိုက်၊ ယူဆောင်လာသူ လူငယ်ကို ကြည့်လိုက်နဲ့ဝေခွဲမရဖြစ်နေပြန်တယ်။ ကုန်သည်ကြီးဟာ အခန်းတစ်ပတ်လည်ကို ခေါက်တုံ့ခေါက်ပြန်လမ်းလျှောက်တွေးတောပြန်တယ်။ အဲဒီနောက်တော့ သူကဒီလိုပြောခဲ့တယ်။

“ကျွန်တော့်မှာရှိသမျှ စည်းစိမ်တွေအားလုံး၊ ဒီမြို့မှာရှိသမျှလူတွေရဲ့စည်းစိမ်တွေအားလုံး၊ ကုန်ကုန်ပြောရရင် ခုနှစ်ပြည်ထောင်စည်းစိမ်တွေနဲ့ချိန်စက်ပြီးဝယ်ရင်တောင် ခင်ဗျားရဲ့ ပတ္တမြားကို ၀ယ်နိုင်မှာမဟုတ်ဘူး။ ဒီလောက်အဖိုးတန်ပတ္တမြားကို ခင်ဗျားဘယ်က ယူဆောင်လာခဲ့တာလဲ”

လူငယ်လေးဟာ အင်မတန်အံ့သြသွားပြန်တယ်။ သူ့အဖြစ်သနှစ်ကို ကုန်သည်ကြီးကို ပြောပြနှုတ်ဆက်ခဲ့ပြီး ဂုရုကြီးဆီကို အပြေးပဲပြန်လာခဲ့တယ်။ အဲဒီနောက်မှာလည်း သူတွေ့ခဲ့သမျှ တန်ဖိုးတွေအကြောင်းကို ဂုရုကြီးကို မချွင်းမချန်ပြောပြလိုက်တယ်။ အဲဒီနောက်မှာလည်း သူဟာ သူ့ရဲ့ နဂိုမေးခွန်းကို ပြန်လည်မေးမြန်းပြန်တယ်။

“ဂုရုကြီး ကျောက်တုံးတန်ဖိုးတော့သိပြီ။ ကျွန်တော်မေးထားတဲ့ ဘ၀တန်ဖိုးကို ဖြေပါတော့”လူငယ်ရဲ့စကားကို ကြားတဲ့အခါ ဂုရုကြီးကလူငယ်လေးကို မျက်နှာချင်းဆိုင်ပြီးသေချာစွာကြည့်တယ်။ အဲဒီနောက် သူဟာ လူငယ်လေးအတွက် အဖြေကို တစ်လုံးချင်းသေချာစွာပြောပြခဲ့တယ်

“လူကလေး.. မင်းယူသွားတဲ့ကျောက်တုံးကိုတောင်မှ သစ်သီးသည်ကတစ်မျိုး၊ ကုန်စုံဆိုင်ကတစ်မျိုး၊ ရတနာကုန်သည်က တစ်မျိုး အမျိုးမျိုးအကဲခတ်ကြသေးတာပဲ။ လူတွေဟာ တပါးသူကို အပြစ်ပြောဖို့၊ တန်ဖိုးဖြတ်ဖို့အတွက် သူတို့သိမြင်ထားသမျှ အကြားအမြင်နဲ့သာ ချိန်ထိုး ဆုံးဖြတ်ကြတာပဲ။

လိမ္မော်သီးလောက်သိတဲ့လူဟာ လိမ္မော်သီး၊ အာလူးလောက် သိတဲ့လူဟာ အာလူး ပေါ့။ လောဘသမားဟာ ငွေကြေးနဲ့ မင်းကို တန်ဖိုးဖြတ်ကြလိမ်မယ်၊ မောဟသမားဟာ အတ္တနဲ့ နှိုင်းယှဉ်တန်ဖိုးဖြတ်ကြလိမ့်မယ်၊ ဒေါသသမားဟာ မင်းလုပ်သမျှ မကောင်းမြင်လိမ့်မယ်။

ဒါတွေဟာ မင်းရဲ့ ပကတိ တန်ဖိုးလို့ မယူဆနိုင်ဘူး။ ဒါပေမယ့် မင်းရဲ့ တန်ဖိုးအတိအကျကိုတော့ မင်းကိုယ်တိုင်ပဲ သတ်မှတ်နိုင်လိမ့်မယ်။ မင်းဟာ လမ်းဘေးက ကျောက်တုံးလား၊ ပြည်တန်ပတ္တမြားလားဆိုတာတော့ မင်းကိုယ်တိုင်သာ သတ်မှတ်နိုင်လိမ့်မယ်”

ကျွန်တော်တို့တွေအားလုံးဟာ ဖုန်အညစ်အကြေးဖုံးလွှမ်းအပ်တဲ့ ကျောက်ရိုင်းတုံးတွေချည်းဖြစ်ကြတယ်။ မြေကြီးထဲက ကျောက်ရိုင်းတွေဖြစ်တဲ့အတွက်လည်း ကျွန်တော်တို့ရဲ့ အရည်အသွေးတွေဟာ တွေဝေမှု၊ တုံ့ဆိုင်းမှု၊ ပျင်းရိမှု အညစ်အကြေးတွေနဲ့ ဖုံးလွှမ်းနေတတ်ကြတယ်။

အဲဒီလို အညစ်အကြေးဖုံးလွှမ်းအပ်တဲ့ ကျောက်တုံးကို မြင်သမျှ လူတွေဟာလည်း သူတို့သန်ရာ လောဘအမြင်၊ ဒေါသအမြင်၊ မောဟအမြင်တွေနဲ့သာ ကျွန်တော်တို့တန်ဖိုးကို သတ်မှတ်ကြမှာပဲဖြစ်တယ်။

အဲဒီလို ပတ်ဝန်းကျင်ရဲ့ အမြင်တွေကို မြင်တွေ့ကြားသိရပြန်တဲ့အခါမှာလည်း “ငါဟာ အလကားလူပဲ” “ငါဒီနေရာမှာအောင်မြင်မှာမဟုတ်ဘူး” “အောင်မြင်ဖို့ဆိုတာ ပါရမီရှိမှဖြစ်တာ” ဆိုတဲ့ အရှုံးပေး တွေဝေမှု နွံထဲမှာ နစ်မွန်းကြပြန်တယ်။

လူငယ်ဟာ ပတ်ဝန်းကျင်ရဲ့ စကားကြောင့် စိတ်ဓါတ်ကျဆင်းသလို၊ ကျွန်တော်တို့တွေဟာလည်း မိမိရဲ့ကျောက်ရိုင်းဘ၀ကနေ ပြည်တန်ပတ္တမြားဖြစ်အံ့သော အခြေအနေကို မေ့လျော့ပြီး ဘ၀ကို ရေစုန်မြောလိုက်ကြပြန်တယ်။

တစ်ရက်ချင်းစီအလျင်အမြန်ပြောင်းလဲနေတဲ့ အချိန်ရဲ့ ရေစီးကြောင်းမှာ လိုက်ပါ စီးမြောရင်း အချည်းနှီးသောဘ၀ကို သာ ယူဆောင်ထားလိုက်ကြတယ်။ တစ်နည်းအားဖြင့် ကျွန်တော်တို့ဟာ ကျောက်ရိုင်းတုံးဘ၀နဲ့သာ နိဂုံးချုပ်ကြရမှာပဲဖြစ်တယ်။

ဒါပေမယ့်လည်း လောကလူသားတွေသတ်မှတ်ထားကြတဲ့ ဘ၀တန်ဖိုးဟာ ကျွန်တော်တွေရဲ့ စစ်မှန်တဲ့ တန်ဖိုးတော့ မဟုတ်ဘူးလို့ ဆိုမယ်။ သစ်သီးသည်၊ အာလူးသည်တွေဟာ လက်လှမ်းမှီရာ အမြင်တွေနဲ့ တန်ဖိုးဖြတ်ကြသလို၊ ကျွန်တော်တို့ကို ကောင်းခြင်း/ဆိုးခြင်း ဘယ်လိုပဲ တန်ဖိုးဖြတ်စေကာမူ သူတို့ရဲ့ နှုတ်ထွက်စကားဟာ အတည်ယူလို့မရဘူးလို့ဆိုမယ်။

အညစ်အကြေးဖုံးလွှမ်းအပ်တဲ့ကျောက်ရိုင်းကို ရေနဲ့ဆေးသလို၊ ပြည်တန်ပတ္တမြားအဖြစ် ပွတ်တိုက်ပြောင်လက်စေသလို မိမိရဲ့ တွေဝေနှောင့်နှေးတုံ့ဆိုင်းခြင်းတွေကို “ကိုယ်တိုင်” ဖယ်ရှာခြင်းနဲ့သာ မိမိရဲ့ ပကတိ တန်ဖိုးကို ကျွန်တော်တို့သိနိုင်ကြမှာပဲဖြစ်တယ်။ ကျွန်တော်တို့ကိုယ်တိုင်ကသာလျင် ကျောက်ရိုင်းတုံးလား၊ ပြည်တန်ပတ္တမြားလားဆိုတာကို ဆုံးဖြတ်နိုင်စွမ်းရှိသူတွေဖြစ်ကြတယ်။ ကျွန်တော်တို့ ကြိုးပမ်းမှုအတိုင်းသာ၊ ကျွန်တော်တို့ရဲ့တန်ဖိုး ဖြစ်လာကြတယ်။

ဒါပေမယ့်လည်းWithout proper self-evaluation, failure is inevitable.ဆိုတဲ့စကားလို မိမိကိုယ်ကို “မှန်ကန်စွာ” တန်ဖိုးဖြတ်နိုင်ခြင်းမရှိရင်တော့ မလွဲမသွေကျဆုံးကြရမှာပဲဖြစ်တယ်။

မိမိတန်ဖိုးကို မှန်ကန်စွာသိနိုင်သူများဖြစ်ကြပါစေ

Credit to ဖြိုးသုတ

SearchMyanmar

No comments:

Post a Comment