ဆရာအတတ်သင် ပညာရေးကောလိပ်နဲ့ ဒီပလိုမာသင်တန်းတွေ ခေါ်ယူရာမှာ မသန်စွမ်းတွေ အရပ်ပုသူတွေနဲ့ LGBT တွေကို လက်မခံဘူးလို့ ပညာရေးဝန်ကြီးဌာနက ထုတ်ပြန်ထားတာကို ပြင်းထန်စွာ ကန့်ကွက်ရှုတ်ချကြောင်း ပညာရေးစနစ် ပြုပြင်ပြောင်းလဲရေး နိုင်ငံလုံးဆိုင်ရာကွန်ရက် NNER က မနေ့က ကြေညာချက်ထုတ်ပြန်လိုက်ပါတယ်။
မသန်စွမ်းတွေ၊ အရပ်ပုသူတွေနဲ့ LGBT တွေကို သင်တန်းမှာ လက်မခံတာနဲ့ပတ်သက်ပြီး ပညာရေးဝန်ကြီးဌာနကပေးတဲ့ အကြောင်းပြချက်တွေဟာ ခိုင်လုံမှုမရှိဘဲ ခွဲခြားဆက်ဆံပြီး စော်ကားရာရောက်တယ်လို့ NNER အဖွဲ့ က ကိုစိုးထွန်းက ပြောပါတယ်။
"သူတို့အကြောင်းပြချက်က ကျန်းမာရေးလေ့ကျင့်ခန်းသင်တန်းတွေ ကိုယ့်လက်လှုပ်ရှားတဲ့လေ့ကျင့်ခန်းတွေ လုပ်တဲ့အခါမှာ ဒီလိုဖြစ်နေရင် မကောင်းဘူးပေါ့ ဆရာဆရာမဆိုတာ စွယ်စုံတတ်နေစရာမလိုဘူး ဆိုင်ရာဆိုင်ရာပဲကျွမ်းကျင်ဖို့လိုတယ်။ အကြောင်းပြချက်ကလဲ မခိုင်လုံဘူး၊ ခွဲခြားဆက်ဆံပြီးနှိမ်ချလိုက်တယ် ဒါတွေက စော်ကားရာရောက်တယ်"
ပညာရေးဝန်ကြီးဌာနရဲ့ ၂၀၁၆- ၁၇ ပညာသင်နှစ်အတွက် လုပ်ငန်းခွင်အကြို ဆရာအတတ်သင်ပညာ ဒီပလိုမာတန်းဝင်ခွင့်မှာ မသန်စွမ်း၊ မိန်းမလျာ၊ ယောက်ျားလျာ၊ ပိုလီယိုရောဂါရှိသူ၊ ခြေပူးလက်ပူးပါရှိသူ၊ ခြေပွားလက်ပွားပါရှိသူ၊ မျက်စိစွေစောင်းသူ၊ ကျောက်မျက်လုံး တပ်ဆင်ထားရသူနဲ့ အရပ် ၄ ပေ ၈ လက်မအောက် ကျောင်းသား၊ ကျောင်းသူတွေကို တက်ရောက်ခွင့်မပြုကြောင်း ကြေညာထားတာ ဖြစ်ပါတယ်။
သန်စွမ်းမှု၊ မသန်စွမ်းမှု၊ လိင်သဘာဝကွဲပြားမှုတွေကို ခွဲခြားတာဟာ လူ့ဂုဏ်သိက္ခာကို စော်ကားချိုးနှိမ်ရာရောက်ပြီး နိုင်ငံသားတွေရဲ့ ပညာသင်ယူခွင့်ကို ကန့်သတ်လိုက်တာဖြစ်တဲ့အတွက် NNER အနေနဲ့ ပြင်းထန်စွာ ကန့်ကွက်ရှုံချကြောင်း NNER ရဲ့ ကြေညာချက်မှာ ပါရှိပါတယ်။
Photo: NNER FB
( ဆရာအတတ်သင် ပညာရေးကောလိပ်တွေ၊ ဆရာအတတ်ပညာ ဒီပလိုမာသင်တန်းတွေနဲ့ အစိုးရနည်းပညာ အထက်တန်းကျောင်းတွေမှာ ဝင်ခွင့်လျှောက်ထားခြင်းဆိုင်ရာမှာ ခွဲခြားဆက်ဆံဖော်ပြထားတဲ့ မူဝါဒတွေနဲ့ ပတ်သက်ပြီး NNER သဘောထားကြေညာချက် ထုတ်ပြန်စဉ် )
RFA
No comments:
Post a Comment