Latest News

Wednesday, February 15, 2017

ဦးအောင်ဝင်းဇော်၏ မွေးချင်းအချို့ကို ရဲတပ်ဖွဲ့ တွေ့ဆုံမေးမြန်း

ဦးအောင်ဝင်းဇော်၏ မွေးချင်းအချို့ကို ရဲတပ်ဖွဲ့ တွေ့ဆုံမေးမြန်း


ရန်ကုန်၊ ဖေဖော်ဝါရီ ၁၅

ဦးကိုနီ လုပ်ကြံသတ်ဖြတ်ခံရမှုမှ အဓိက သံသယတရားခံ ဦးအောင်ဝင်းဇော်၏ ညီ အစ်ကိုမောင်နှမ တော်စပ်သူအချို့ထံ ရဲတပ်ဖွဲ့က သွားရောက် တွေ့ဆုံမေးမြန်းကာ ၎င်းတို့ ကိုင်ဆောင်သည့် လက်ကိုင်ဖုန်းများကို သိမ်းယူသွားသည်။

ညီအစ်ကိုတော်စပ်သူ၏ အိမ်ကို လဆန်းပိုင်း၊ အစ်မဖြစ်သူ၏ အိမ်ကို ပြီးခဲ့သည့် ရက်သတ္တပတ်က သွားရောက် မေးမြန်းခြင်းဖြစ်ကြောင်း ၎င်းတို့ နေထိုင်ရာ ရန်ကုန် ဒေါပုံမြို့နယ်မှ ဝါဆိုရပ်ကွက် အုပ်ချုပ်ရေးမှူးဖြစ်သူ ဦးညီညီထွေးက Myanmar Now ကို ပြောသည်။

“ဘယ်နေ့တွေလဲတော့ ကျွန်တော် အတိအကျ မမှတ်မိဘူး။ ဖုန်းတွေ သိမ်းသွားဖို့ ကာယကံရှင်တွေကို ခွင့်တောင်းတယ်၊ ပိုင်ရှင်နဲ့ ကျွန်တော်က လက်မှတ်ထိုးရတယ်။ ပြန်ပေးရင် ကျွန်တော့်ဆီကနေ တစ်ဆင့်ပဲ ပြန်ပေးရမှာ။ ကနေ့အထိတော့ ပြန်လာမပေးသေးဘူး”ဟု ဦးညီညီထွေးက Myanmar Now ကို ပြောသည်။

“သူတို့စစ်မေးဖို့ မြို့နယ်အုပ်ချုပ်ရေးက လူနဲ့ ကျွန်တော့်ကို ခေါ်တယ်။ ဘာတွေ စစ်မေးလဲတော့ ကျွန်တော်လည်း မသိဘူး။ ကျွန်တော်တို့ မြို့နယ် အထွေထွေ အုပ်ချုပ်ရေးမှူးကို ထူးခြားဖြစ်စဉ် သတင်းတင်ဖို့အတွက်တောင် ဘာမှ မသိရဘူး၊ ဓာတ်ပုံတောင် ရိုက်ခွင့်မရဘူး။ ကျွန်တော်က ဌာနဆိုင်ရာတွေ အဲ့ဒီအိမ်ထဲကိုဝင်ဖို့ ခွင့်တောင်းပေးရုံလောက်ပဲ” ဦးအောင်ဝင်းဇော်၏ အစ်မဖြစ်သူနှင့် ၎င်း၏ ခင်ပွန်းသည်ကလည်း လက်ကိုင်ဖုန်း သိမ်းဆည်းခံရမှုကို အတည်ပြုသည်။

ရဲတပ်ဖွဲ့က လာရောက်စဉ်  လေးလေး စားစားခွင့်တောင်းကာ စစ်ဆေးမေးမြန်း ခြင်းဖြစ်ကြောင်း၊ ဖိအားပေး ခြိမ်းခြောက် ပြောဆိုခြင်း မရှိကြောင်း၊ တခြားသော ဆွေမျိုးများကို စစ်ဆေးမေးမြန်းခြင်း ရှိ မရှိ မသိရကြောင်း ၎င်းတို့က ပြောပြသည်။

“သက်ဆိုင်ရာက ဦးအောင်ဝင်းဇော်ကို သိလားမေးတော့သိတယ်၊ ဘာလို့သိလဲလို့ ထပ်မေးတော့ အမျိုးတော်လို့ သိတယ်၊ ဒါလောက်ပါပဲ။ သူ (ဦးအောင်ဝင်းဇော်) ဘာအလုပ်လုပ်လဲ ဆိုတာလည်း သူ့မိသားစုပဲသိမှာ။ သူ့ကိစ္စကိုလည်း ကျွန်တော်တို့ ဘာမှမသိဘူး။ သူကျူးလွန်သလား၊ မကျူးလွန်ဘူးလားလည်း မသိဘူး။ သူလုပ်ရင် သူခံရမယ်၊ သူမလုပ်ရင် သူပြန်လာမှာပါ”ဟု ဦးအောင်ဝင်းဇော်၏ ယောက်ဖဖြစ်သူက ဆိုသည်။

“သူ့မိန်းမ ဘယ်မှာ ရှိနေတယ်ဆိုတာ သက်ဆိုင်ရာက မပြောဘူး။ အေးအေးချမ်းချမ်း ထားထားပါတယ်လို့ပဲ ပြောတယ်”ဟု ၎င်းက ဆိုသည်။

မိသားစုနှင့် မွေးချင်းအချို့ကို စစ်ဆေး မေးမြန်းမှုနှင့် ပတ်သက်ပြီး ရန်ကုန် တိုင်းရဲတပ်ဖွဲ့ ပြောရေးဆိုခွင့်ရှိသူ အချို့ထံ ဆက်သွယ် မေးမြန်းသော်လည်း လက်ခံ ဖြေကြားခြင်း မရှိပေ။

အမျိုးသား ဒီမိုကရေစီ အဖွဲ့ချုပ် ဥပဒေအကြံပေး ဦးကိုနီ ဇန်နဝါရီ ၂၉ ရက်နေ့က ရန်ကုန်လေဆိပ်တွင် လုပ်ကြံခံရပြီး နောက် သေနတ်သမား ဦးကြည်လင်းသည် လေဆိပ်တွင်ပင် အထိန်းသိမ်းခံလိုက်ရသည်။

လူသတ်သမား ဦးကြည်လင်းကို ငှားရမ်းသူဟု ယူဆရသည့် တပ်မတော် အရာရှိဟောင်း ဦးအောင်ဝင်းဇော်အကြောင်း စာနယ်ဇင်းများတွင် ဖော်ပြပြီးနောက်တွင် အာဏာပိုင်တို့က ဦးအောင်ဝင်းဇော်ကို ဖမ်းဆီးရမိထားပြီး ဖြစ်သည်ဟု သတင်း ထုတ်ပြန်ခဲ့သည်။

ဖြစ်စဉ်နှင့်ပတ်သက်ပြီး “သတင်း ကွင်းဆက်ရရှိရေး”အတွက် တပ်မတော်နှင့် ရဲတပ်ဖွဲ့ ပူးပေါင်း ဆောင်ရွက်နေသည်ဟု ဖေဖော်ဝါရီ ၃ ရက်နေ့ ထုတ်ပြန်ချက်တွင် ဖော်ပြထားသည်။

နိုင်ငံတကာ သတင်းဖြစ်ခဲ့သော ဤအမှုကို အများက စိတ်ဝင်စားဆဲဖြစ်ပြီး ပြစ်မှုကျူးလွန်ရာတွင် ပူးပေါင်းပါဝင်သူ၊  နောက်ကွယ်မှ စေခိုင်းသူမည်သူဖြစ်မည်ကို အမျိုးမျိုး ဝေဖန် သုံးသပ်လျက်ရှိသည်။

စစ်ကြောမှု လဝက်ခန့် ကြာပြီဖြစ်သော်လည်း ရဲတပ်ဖွဲ့က အမှုနှင့်ပတ်သက်ပြီး သတင်း အမှောင်ချထားသည်။

ရဲတပ်ဖွဲ့သည် ပြည်ထဲရေးဝန်ကြီးဌာန၏ လက်အောက်တွင်ရှိပြီး ၂၀ဝ၈ အခြေခံဥပဒေအရ ထိုဝန်ကြီးဌာနသည်  တပ်မတော် ကာကွယ်ရေး ဦးစီးချုပ်က စေလွှတ်သူတစ်ဦး၏ အုပ်ချုပ်မှုအောက်တွင် ရောက်နေသည်။

ထက်ခေါင်လင်း
(Myanmar Now)

No comments:

Post a Comment

Recent Post