Latest News

Saturday, February 11, 2017

မြောင်းမြမြို့နယ်တွင် အထက်တန်းကျောင်းအုပ်ကြီး တစ်ဦးက ကျောင်းသားအချို့အား အလိုမတူဘဲ လိင်ပိုင်းဆိုင်ရာ အကြမ်းဖက်မှုများ ပြုလုပ်ဟု ကျောင်းဆရာများက သက်ဆိုင်ရာသို့ တိုင်ကြား

မြောင်းမြမြို့နယ်တွင် အထက်တန်းကျောင်းအုပ်ကြီး တစ်ဦးက ကျောင်းသားအချို့အား အလိုမတူဘဲ လိင်ပိုင်းဆိုင်ရာ အကြမ်းဖက်မှုများ ပြုလုပ်ဟု ကျောင်းဆရာများက သက်ဆိုင်ရာသို့ တိုင်ကြား


မြောင်းမြမြို့နယ် က၀က်ကျေးရွာ အခြေခံပညာ အထက်တန်းကျောင်းမှ ကျောင်းအုပ်ဆရာကြီးက ကျောင်းသားအချို့အား အလိုမတူဘဲ ဓမ္မတာနှင့် ဆန့်ကျင်ကာ လိင်ပိုင်းဆိုင်ရာ အကြမ်းဖက်မှုများ ပြုလုပ်ခဲ့သည်ဟုဆိုကာ အဆိုပါကျောင်းရှိ ကျောင်းဆရာ၊ ဆရာမများက နိုင်ငံတော်သမ္မတ၊ နိုင်ငံတော်၏ အတိုင်ပင်ခံပုဂ္ဂိုလ်နှင့် ပညာရေးဝန်ကြီးဌာန ပြည်ထောင်စုဝန်ကြီးနှင့် အခြားသော သက်ဆိုင်ရာ တာဝန်ရှိသူများထံ တိုင်ကြားခဲ့ကြောင်း သတင်းရရှိသည်။

ဖြစ်စဉ်မှာ အဆိုပါကျောင်းတွင် ညစာကျက်ဝိုင်းများ စတင်ချိန်၌ ကျောင်းသားအချို့မှာ ကျောင်းသို့လာရောက်လိုခြင်း မရှိသည်ကို ဆရာများက သိရှိရ၍ ကျောင်းသားများနှင့် ကျောင်းသားဟောင်းများထံ စုံစမ်းရာတွင် ကျောင်းအုပ်ကြီးဖြစ်သူ ဦးအောင်အောင်က ကျောင်းရှိ ကျောင်းသားအချို့အား ယမန်နှစ် ပညာသင်နှစ်တွင် ညစာကျက်ဝိုင်းများကို အကြောင်းပြကာ ကျောင်းသားအချို့အား ၎င်းနှင့်အတူ ညအိပ်စေခဲ့ကြောင်း၊ ၎င်းနှင့်အတူ ညအိပ်သော ကျောင်းသားအချို့အား ညအချိန်တွင် အလိုမတူဘဲ ဓမ္မတာနှင့် ဆန့်ကျင်ကာ လိင်ပိုင်းဆိုင်ရာ အကြမ်းဖက်မှုများ ပြုလုပ်ခဲ့ကြောင်း၊ ညစာကျက်ဝိုင်းများတွင် သာမက ကျောင်းသားများ စာမေးပွဲများ ဖြေဆိုရန်အတွက် မြောင်းမြမြို့သို့ သွားရောက်တည်းခို နေထိုင်ရာတွင်လည်း တည်းခိုနေထိုင်ရာ နေရာများ၌ ယင်းကဲ့သို့ လိင်အကြမ်းဖက်မှုများ ပြုလုပ်ခဲ့သည်ကို ကိုယ်တိုင်ကြုံတွေ့ခဲ့ရသည့် ကျောင်းသားအချို့ထံမှ သိရကြောင်း၊ အဆိုပါဖြစ်စဉ်နှင့် ကြုံတွေ့ခဲ့ရသည့် ကျောင်းသားအချို့က ကျောင်းဆက်လက် တက်ရောက်ခြင်း မရှိတော့ခြင်း၊ ဆေးဝါးကုသမှု ခံယူခဲ့ခြင်းများ ရှိခဲ့ကြောင်း သိရ၍ ထိုကဲ့သို့ ကျောင်းသားများအား ကျောင်းအုပ်ကြီးတစ်ဦး၏ ဂုဏ်သိက္ခာနှင့်မညီ လိင်အကြမ်းဖက်မှု ပြုလုပ်ခဲ့သော ကျောင်းအုပ်ဆရာကြီးအား အရေးယူ ဆောင်ရွက်ပေးပါရန် အဆိုပါကျောင်းရှိ ကျောင်းဆရာ၊ ဆရာမများဖြစ်ကြသော ဆရာဦးဇော်ဇော်လွင်၊ ဆရာဦးကျော်စိုး၊ ဆရာဦးအောင်မြတ်သူ၊ ဆရာမဒေါ်ဇင်ဇင်စော၊ ဆရာမဒေါ်ပို့ပို့အောင်တို့က ဦးဆောင်ကာ သက်ဆိုင်ရာ တာဝန်ရှိသူများထံ တိုင်ကြားခဲ့ခြင်းဖြစ်ကြောင်း ဖေဖော်ဝါရီ ၁၁ ရက်တွင် ပုသိမ်မြို့၌ အဆိုပါ ဆရာ၊ ဆရာမများ ဦးဆောင် ပြုလုပ်ခဲ့သည့် သတင်းစာ ရှင်းလင်းပွဲအရ သိရသည်။

“ဒီနှစ် ညစာကျက်ဝိုင်းခေါ်တော့ ကလေးတွေက သိပ်ပြီးတော့ မလာချင်ကြတော့ဘူး။ ဒါနဲ့ လိုက်ပြီးတော့ စုံစမ်းကြည့်တော့ ဆရာကြီးက ကလေးတွေကို ညစာကျက်ဝိုင်းပြီးတာနဲ့ အိမ်ကိုခေါ်သွားတယ်။ ပြီးတာနဲ့ မုန့်တွေကျွေးပြီး ညဘက်ကျရင် အလိုမတူဘဲ လိင်အကြမ်းဖက်တာတွေ လုပ်တယ်လို့ ကလေးတွေ ကိုယ်တိုင်ပြန်တိုင်တာကြောင့် သိရတယ်။ ကလေးတွေရဲ့ တိုင်ကြားစာတွေ၊ ရင်ဖွင့်ထားတဲ့ အသံဖိုင်တွေလည်း ကျွန်တော်တို့မှာ သက်သေတွေအဖြစ် သိမ်းဆည်းထားတယ်။ ကျောင်းအုပ်ကြီး တစ်ယောက်အနေနဲ့ အခုလို ကလေးတွေကို လုပ်တာဟာ ကလေးတွေရဲ့ အနာဂတ်ကို ဖျက်ဆီးသလိုမျိုး ဖြစ်တာမို့ ကျွန်တော်တို့က မြို့နယ်ပညာရေးမှူးကို တိုင်ကြားပါသေးတယ်။ မထူးခြားတာကြောင့် ကျွန်တော်တို့က အခုလို ဆက်ပြီးတော့ တိုင်ကြားရတာပါ” ဟု ဆရာဦးဇော်ဇော်လွင်က ပြောကြားသည်။

ယင်းဖြစ်စဉ်နှင့် ပတ်သက်၍ မြောင်းမြမြို့နယ် ပညာရေးမှူးဖြစ်သူ ဒေါ်မြင့်မြင့်စိန်ထံ ဆက်သွယ် မေးမြန်းရာတွင် အဆိုပါတိုင်ကြားချက်နှင့် ပတ်သက်၍ သတင်းရရှိခြင်းသာ ရှိသေးပြီး သေချာစွာ မသိရှိရသေးကြောင်း၊ ယင်းဖြစ်စဉ်မျိုး ဖြစ်ပွားမည်ဟု မထင်ပါကြောင်း ပြန်လည် ဖြေကြားခဲ့သည်။

Sources : Eleven Media Group

No comments:

Post a Comment

Recent Post