နှစ်စဉ် တပို့တွဲလပြည့်ရောက်ပြီဆို တစ်နိုင်ငံလုံးအနှံ့ ကျင်းပသည့် ထမနဲပွဲများနှင့်အတူ စစ်ကိုင်းမြို့မှာ သက်ဝင် လှုပ်ရှားလာသည့် ပွဲတော်တစ်ခု ရှိသည်။ တစ်နိုင်ငံလုံးမှာမှ ဒီတစ်နေရာ၊ တစ်နှစ်လုံးတွင်မှ သုံးရက်တည်း ကျင်းပသည့် ထိုပွဲသည် အနယ်နယ် အရပ်ရပ်မှ ဘုရားပွဲလာ ပြည်သူများ ပျော်ပျော်ပါးပါး ဆင်နွှဲကြသည့် ပွဲတစ်ခုလည်း ဖြစ်သည်။ ထိုပွဲကား စစ်ကိုင်းတစ်မြို့တည်းတွင်သာ ရှိသော ဘဲဥထုပွဲ။
ဧရာဝတီမြစ် အနောက်ဘက်ကမ်း ဇေယျာရွှေမြေ စစ်ကိုင်း၏ အလှသည် တပို့တွဲလပြည့်ည လရောင်အောက်မှာ ဝင်းပနေသည်။ နှာရည်ယိုရွှဲ တပို့တွဲ၊ ထမနဲထိုးသည့် တပို့တွဲ။ ထိုလပြည့်ညသည် စစ်ကိုင်းမြို့ ကြေးဘုရားကြီး၏ ဘုရားပွဲတော် ကျင်းပရာကာလလည်းဖြစ်သည်။ စစ်ကိုင်းမြို့ အစေခံ ခံတပ်အနီးရှိ ကြေးဘုရားကြီး၏ ဘုရားပွဲတော်သည် အခြားဒေသများနှင့်မတူ ထူးခြားသည်က ဘဲဥ ထုပွဲကြောင့်ဖြစ်သည်။
စစ်ကိုင်းမြို့ ဧမြဝတီရပ် ဇိနမာရ်အောင် လောကချမ်းသာ ကြေးဘုရားကြီး၏ ဘုရားပွဲတော်ကာလရောက်တိုင်း စစ်ကိုင်းသူ စစ်ကိုင်းသားများသာမက အနီးနားရှိ မြို့များမှပါမကျန် ဘဲဥထုပွဲကို လာရောက် ဆင်နွှဲလေ့ရှိကြသည်။ ဘုရားပွဲတော်ကာလမှာ တပို့တွဲလပြည့်မတိုင်မီ အဖိတ်နေ့မှစ၍ လပြည့်ကျော် ၁ ရက်အထိ သုံးရက်တိုင်တိုင် ကျင်းပလေ့ ရှိသည်။
သမိုင်းကြောင်းအရ ဘဲဥထုပွဲဟူသည် မင်းတုန်းမင်းလက်ထက် အစေခံ ခံတပ်မှ တပ်သားများ ကင်းစောင့်တာဝန် ကျချိန်အတွင်း ရိက္ခာရသော ဘဲဥပြုတ်များနှင့် အပျော်တမ်း ဆော့ကစားရာမှ ဖြစ်လာသည်ဟု ဆိုကြသည်။ ယခုအခါ စစ်ကိုင်းမြို့ ကြေးဘုရားကြီး၏ ဘဲဥထုပွဲသည် နှစ်ပေါင်း တစ်ရာကျော် သက်တမ်းရှိခဲ့ပြီ။
အညာဘုရားပွဲများ၏ ထုံးစံအတိုင်း ကြေးဘုရားကြီး၏ ဘုရားပွဲသည် မုန့်လင်မယား၊ မုန့်သိုင်းခြုံ၊ မုန့်ရေပါးစသော မြန်မာမုန့် ရောင်းချသည့် ဈေးသည်များ ကြိတ်ကြိတ်တိုးလို့ နေသည်။ ပွဲတော်လာ ပရိသတ်ကလည်း တပို့တွဲလပြည့်၏ အအေးဒဏ်ကိုအံတုရင်း ပွဲဈေးတန်းကို သူ့ထက်ငါ တိုးခွေ့ကြသည်။ အချို့ကလည်း ပွဲခင်းထဲက ပိတ်ကားထောင် ရုပ်ရှင်ကို ဝင်ကြည့်သည်။ အချို့ကလည်း ကြေးဘုရားကြီး ဘုရားပွဲတော်ခြင်းဝိုင်းကို ဝင်ငေးသည်။
အများစုတို့၏ ဦးတည်ရာကား ကြေးဘုရားကြီးနံဘေးရှိ ဘဲဥထုပွဲ ကျင်းပရာ ပဲ့နင်းဘုရား ရင်ပြင်သို့ဖြစ်သည်။ ပေ ၃၀ ပတ်လည်ခန့်သာ ကျယ်မည်ဖြစ်သော ပဲ့နင်းဘုရား ပရဝုဏ်လေးသည် လျှပ်စစ်မီးတို့ ထိန်လင်းမနေပါ။ သို့သော် ရင်ပြင်တစ်ခုလုံး ပြည့်လုမတတ် လူအုပ်ကြီးနှင့် ဟိုတစ်စု သည်တစ်စု ဖယောင်းတိုင်မီး၊ ရေနံဆီမီး ထုထားသည့် ဘဲဥပြုတ်သည်များကို မြင်ရပေလိမ့်မည်။
ဘဲဥထုပွဲကာလ မရောက်မီ ဧမြဝတီ ရပ်ကွက်သူ ရပ်ကွက်သားများသည် ဘဲဥထုပွဲတွင် ဘဲဥပြုတ် ရောင်းချရန် အနီးအနားရှိ ဘဲခြံများမှ ဘဲဥများကို ရသလောက် စုဆောင်း ဝယ်ယူထားရသည်။ ပွဲတော်တွင် မရောင်းချမီ ဘဲဥများကို ကောက်ရိုးများဖြင့်ပြုတ်ပြီး နှီးတောင်းလေးများနှင့်ထည့်ကာ ယူဆောင်လာရသည်။ ထိုနှီးတောင်းလေးများ၏ အပေါ်မှာတော့ ဆန်ကောပြားတစ်ချပ်ပါသည်။ ညဘက်လင်းစေရန် ဖယောင်းတိုင်မီး၊ ရေနံဆီမီးခွက်တို့ပါသည်။
ဘဲဥပြုတ်တောင်း အဆင်သင့်ဖြစ်လျှင်တော့ ပဲ့နင်းဘုရား ရင်ပြင်ပေါ်မှာ ဝယ်သူကို အသင့်စောင့်ရုံပင်။ ညနေ မှောင်ရီပျိုးလာသည်နှင့် ဘုရားပွဲလာ ပရိသတ်တို့ ပဲ့နင်းဘုရား ရင်ပြင်ဆီ တရွေ့ရွေ့ ချီတက်လာကြသည်။ တစ်ခါမှ မတွေ့ဖူး မဆုံဖူးသော သူများကလည်း ဘဲဥထုပွဲသို့ ရောက်လာပြီဆိုလျှင် နှစ်ဦးနှစ်ဖက်ဆိုင် ဘဲဥထုကြရင်း မိတ်ဆွေတွေ ဖြစ်ကုန်တတ်ကြသည်။
ရှေးအခါက ခံတပ်သားများ၊ ဘုရင့်လှေတော်သားများ၊ ကင်းစောင့်တပ်သားများ ဆင်နွှဲခဲ့ကြသော ဘဲဥထုပွဲသည် ယခုအခါတော့ ပြည်သူတွေ အချင်းချင်း ရင်းရင်းနှီးနှီး ချစ်ချစ်ခင်ခင် ကစားနိုင်သည့်ပွဲလေး ဖြစ်လာသည်။ ထုမလား၊ ထုမယ်ဟု အချင်းချင်း အချိန်းအချက်ပြုလုပ်ရင်း ဆီမီးမှိန်မှိန်နှင့် ဘဲဥပြုတ်တောင်းဘေး ကိုယ့်ဖိနပ်ကိုယ်ချွတ်ကာ ဖင်ခုထိုင်ရင်း ဘဲဥတွေ အပြိုင်ထုကြသည်။
ဘဲဥထုသည်ဟု ဆိုရာတွင် လွယ်ကူသည်ဟု ထင်ပါက မှားသွားနိုင်သည်။ ဘဲဥထုခြင်း အတတ်ပညာသည်လည်း ထုဖူးသူမှ ကျွမ်းကျင်သော ကစားနည်းတစ်မျိုးဟု ဆိုရမည်။ ဘဲဥမထုခင် ဘဲဥရွေးခြင်းကိုက ပညာသားပါလေသည်။ အခွံထူသော၊ လေမခိုသော၊ အနာအဆာ မပါသော ဘဲဥမျိုးကိုလည်း ရေနံဆီမီးရောင်အောက်မှာ ရွေးတတ်ဖို့ လိုသည်။ ထုရာတွင်လည်း ဘဲဥ၏ ပိုချွန်သည့်အပိုင်းဖြစ်သော ခေါင်းပိုင်းနှင့် တေ့ပြီးထုတတ်ဖို့လိုသည်။
ဘဲဥကိုင်ရာတွင်လည်း လက်ဝါးထဲ ဖွဖွဆုပ်ပြီး ဘဲဥခေါင်းလေး လက်တစ်သစ် စာဖော်ကာ အရှိန်ကိုဆလျက် ခွပ်ခနဲ ထုတတ်ရမည်။ ဘဲဥထုသူနှစ်ဦး သူတစ်လှည့် ကိုယ်တစ်လှည့်၊ အပေါ်တစ်လှည့် အောက်တစ်လှည့် ထားကာ ထုရသည်မို့ အခံဘက်ကမို့ အပေါ်ဘက်ကမို့ ပိုသာသည်ဆိုတာတော့ မရှိတတ်။ ထုရာတွင် ကွဲလျှင် ကွဲသည့်သူက အရှုံး။ မကွဲသူက အနိုင်။ ထိုအခါတွင် နိုင်သည့်သူက ကွဲသည့်သူ၏ ဘဲဥအကွဲကို ယူရုံ။ ရှုံးသူက ထိုဘဲဥပြုတ်ဖိုး တစ်လုံး၂၀ဝ ကို ဘဲဥသည်ဆီ ပေးချေရုံဖြစ်သည်။
ဘဲဥအပြိုင် ထုကြရင်း ဈာန်ဝင်လာကြသောအခါ ငွေကို လက်ငင်း မရှင်းတော့ဘဲ မန်ကျည်းစေ့လေးများနှင့် နို့ဆီခွက်ထဲ ထည့်မှတ်ကာ ပွဲပြီးမှ ဘဲဥဖိုး ရှင်းကြသည်များလည်း ရှိသည်။ ရှုံးသူများအတွက်တော့ ပွဲပြီးချိန်တွင် ဘဲဥပြုတ်ဖိုး နင့်ခနဲ ပေးလိုက်ရသည်များ ရှိသော်လည်း အချို့ အနိုင်ရသူများကတော့ ဘဲဥပြုတ်တွေ ကျွတ်ကျွတ်အိတ်အပြည့်နှင့် အိမ်ပြန်မျက်နှာပန်းလှတတ်ကြသည်။
ကြိတ်ကြိတ်တိုးစည်ကားနေသော ပဲ့နင်းဘုရား ရင်ပြင်ပေါ်မှ ဘဲဥထုပွဲသည် ဘဲဥအပြိုင်ထုသူ နှစ်ဦးနှစ်ဖက်အတွက် သာမက ဘေးက ထိုင်ကြည့်သူများအတွက်လည်း ပျော်စရာကြီးဖြစ်သည်။ အချို့ကလည်း မည်သူ့ဘက်က နိုင်လိမ့်မည်ကို ဘဲဥကြေးဖြင့် အလောင်းအစား လုပ်ကြသည်များလည်း ရှိသည်။ သူတို့လက်ထဲ ကြည့်လိုက်ပြန်လျှင်လည်း ကျွတ်ကျွတ်အိတ်အပြည့် ဘဲဥပြုတ် ကိုယ်စီနှင့်။
ညလည်းနက်၊ ပွဲလည်းစဲ၊ ဘဲဥထု၍ ကျေနပ်ကြပြီဆိုလျှင် အနိုင်ရသူများက ထိုဘဲဥအကွဲများကို လျှော့ဈေးဖြင့် ဝယ်လိုသူများထံ ပြန်ရောင်းကာ ငွေဖော်ကြသည်များလည်းရှိသည်။ ဘဲဥအကွဲ တစ်လုံး ၁၅၀ ဆိုသောဈေးက ဟင်းစားလိုချင်သူများအတွက် အဆင်ပြေသလို ဘဲဥတွေ တထောကြီး အနိုင်ရလိုက်သူအဖို့လည်း ငွေစကလေး မြတ်သည်မို့ အဆင်ပြေလှသည်။
အချို့ကလည်း ဘဲဥထုပွဲခင်းထဲမှ ထွက်သည်နှင့် ဘုရားပွဲဈေးထဲက မုန့်ဟင်းခါးဆိုင်မှာ တစ်ခါတည်း ဘဲဥပြုတ်ထည့်ကာ မုန့်ဟင်းခါး ပူပူနွေးနွေး စားပြီးမှ အိမ်ပြန်တတ်ကြသည်။ လက်ထဲမှာ ဘဲဥပြုတ်တွေ ခွာစားရင်း ဈေးတန်းပတ်ပြီး ပြန်ကြသည်။ အားလုံး ကိုယ်စီမျက်နှာမှာတော့ ဘဲဥရသည့် မျက်နှာဟုဆိုရမည်။ ပျော်တပြုံးပြုံး ရယ်မဆုံးတော့။ ဘဲဥထုတုန်းက မည်သူနှင့် မည်သို့ထုပြီး မည်သို့နိုင်ခဲ့သည်ကို ပြန်ပြောရင်း အပြုံးကိုယ်စီနှင့်။
နောက်နေ့ရောက်လျှင်တော့ ဘဲဥထုပွဲအပြန် ဘုရားပွဲလာ ပရိသတ်တို့၏ အိမ်တိုင်းရှိ ဟင်းအိုးများထဲတွင် နေရာယူတတ်ကြသည်က ဘဲဥချဉ်ရည်သာ ဖြစ်မည်ဆိုသည်တော့ ဘယ်သူမှငြင်းနိုင်မည် မထင်ပါ။ ဘဲဥချဉ်ရည်ဟင်းလေး မြုံ့ရင်း၊ ညခင်းက ဘဲဥထုပွဲအကြောင်းများကိုပြောရင်း ကိုယ်တိုင် ဝင်ရောက် စီးမျောခဲ့ကြသည့် ဘဲဥထုပွဲ အတွေ့အကြုံများကို အောက်မေ့သတိရကြဦးမည်။ နှာရည်ယိုရွှဲ တပို့တွဲလ၏ ဘဲဥထုပွဲကို ရောက်ဖူးသူတိုင်းအဖို့ နောင်နှစ်ပေါင်း များစွာတိုင်သည်အထိ ဘဲဥထုပွဲကို ဝင်ရောက်စီးမျော နေချင်တုန်း ဖြစ်ပါလိမ့်မည်။
ယဉ်ယဉ်နှောင်း
The Voice
No comments:
Post a Comment