မွန်ပြည်နယ်ဝန်ကြီးချုပ် ဦးမင်းမင်းဦးဟာ ဝန်ကြီးချုပ်တာဝန်အပြင် ပူးတွဲတာဝန်ယူထားတဲ့ ဆောက်လုပ်ရေးဝန်ကြီးဌာန နဲ့ စည်ပင်သာယာရေးဝန်ကြီးဌာနတို့ကပါ နှုတ်ထွက်မှာဖြစ်သလို လွှတ်တော်ကိုယ်စားလှယ်နဲ့ ပါတီဝင်အဖြစ်ကနေပါ နှုတ်ထွက်သွားမယ်လို့ ဒီနေ့ ပြောကြားခဲ့ပါတယ်။
ဒီနေ့ သတင်းမီဒီယာသမားတွေနဲ့ တွေဆုံစဉ်မှာ မွန်ပြည်နယ်ဝန်ကြီးချုပ် ဦးမင်းမင်းဦးက ပြောတာဖြစ်ပါတယ်။
မွန်ပြည်နယ်ဝန်ကြီးချုပ် ဦးမင်းမင်းဦးဟာ မနေ့က မီဒီယာတစ်ခုမှာ ပါတီကိုမကြိုက်လို့ နှုတ်ထွက်တာ ဖြစ်ကြောင်း ပြောကြားထားတာ နဲ့ ပတ်သက်ပြီး ဒီနေ့ ပြုလုပ်တဲ့ သတင်းစာရှင်းလင်းပွဲ မှာ သူ့အနေနဲ့ ပါတီကို မကြိုက်လို့ နှုတ်ထွက်တာ ဖြစ်ကြောင်း ပြောကြားတာမဟုတ်ဘူးလို့ ပြောခဲ့ပါတယ်။
အဲဒီလိုပြောကြားမှုနဲ့ပတ်သက်ပြီး ရန်ကုန်မြို့က အန်အယ်လ်ဒီပါတီရုံးမှာ ပါတီဗဟိုအလုပ်အမှုဆောင် ကော်မတီဝင် ဦးဥာဏ်ဝင်း ကို မေးမြန်းရာမှာ ဦးမင်းမင်းဦးဟာ ပါတီဗဟိုက ဖွဲ့စည်းထားတဲ့ လေ့လာသုံးသပ်ရေးအဖွဲ့ရဲ့ စစ်ဆေးတွေ့ရှိချက်တွေအရ အပြစ်ရှိတဲ့အတွက် နှုတ်ထွက်တာသာ ဖြစ်တယ်လို့ ပြောပါတယ်။
ဦးမင်းမင်းဦးဟာ ပြီးခဲ့တဲ့ ဖေဖော်ဝါရီလ ၂၀ရက်နေ့က ဝန်ကြီးချုပ်တာဝန်ကနေ မိမိသဘောဆန္ဒအရ နှုတ်ထွက်ခွင့်ပြုပေးဖို့ နိုင်ငံတော်သမ္မတထံ စာတင်ထားပါတယ်။
ဝန်ကြီးချုပ်တာဝန်ကနေ နှုတ်ထွက်တာဟာ ချောင်းဆုံတံတားအမည်ပေးတဲ့ကိစ္စကြောင့်ဖြစ်ကြောင်း ပြောဆိုမှုတွေ ရှိနေတာနဲ့ပတ်သက်ပြီး အဲဒီကိစ္စတစ်ခုတည်းကြောင့် မဟုတ်ကြောင်းနဲ့ တခြားကိစ္စများစွာရှိတာကြောင့် နှုတ်ထွက်ဖို့ ဆုံးဖြတ်လိုက်တာလို့လည်း ပြောပါတယ်။
ဦးမင်းမင်းဦး ဟာ ဘီးလင်းမြို့နယ် အမျိုးသားဒီမိုကရေစီအဖွဲ့ချုပ်ပါတီ ဒုတိယဥက္ကဌ ဖြစ်ပြီး ၂၀၁၅ ရွေးကောက်ပွဲမှာ ဘီးလင်းမဲဆန္ဒနယ်အမှတ်(၂)ကနေ အနိုင်ရရှိခဲ့သူဖြစ်ပါတယ်။
ရွေးကောက်ပွဲမှာ ပြည်နယ်လွှတ်တော်ကိုယ်စားလှယ်အဖြစ် ရွေးချယ်တင်မြှောက်ခံရပြီးနောက် မွန်ပြည်နယ် လွှတ်တော် ဒုတိယဥက္ကဌအဖြစ် တာဝန်ပေးခံထားရာကနေ ပြည်နယ်ဝန်ကြီးချုပ်အဖြစ် တင်မြှောက်ခံခဲ့ရသူဖြစ်ပါတယ်။
အမျိုးသားဒီမိုကရေစီအဖွဲ့ချုပ် ပါတီဗဟိုထံ တိုင်ကြားခံရသူတွေထဲမှာ တစ်ဦးအပါအ၀င်ဖြစ်တဲ့ ဦးမင်းမင်းဦးဟာ ပြီးခဲ့တဲ့နှစ် ဒီဇင်ဘာလအတွင်း ပါတီဗဟိုက ဖွဲ့စည်းထားတဲ့ လေ့လာသုံးသပ်ရေး အဖွဲ့ရဲ့ ခေါ်ယူမေးမြန်းမှုကို ခံရသူလည်းဖြစ်ပါတယ်။
Photo: Kyaw Lwin Oo/RFA
( မွန်ပြည်နယ်ဝန်ကြီးချုပ် ဦးမင်းမင်းဦး ကို ဖေဖော်ဝါရီလ ၂ဝ ရက်နေ့က မွန်ပြည်နယ် အစိုးရရုံးမှာ တွေ့ရစဉ် )
No comments:
Post a Comment