Latest News

Wednesday, February 15, 2017

အောင်ဝင်းခိုင် ဘယ်သူလဲ

အောင်ဝင်းခိုင် ဘယ်သူလဲ



တရားလွှတ်တော်ရှေ့နေ ဦးကိုနီကို လုပ်ကြံရန် ငွေပေးစေခိုင်းသူကို နိုင်ငံတော် သမ္မတရုံးက ဖေဖော်ဝါရီ ၁၅ရက်  ညနေတွင် ထုတ်ပြန်လိုက်သည်။ အသက် (၄၅)နှစ်အရွယ် ဒုဗိုလ်မှူးကြီးဟောင်း အောင်ဝင်းခိုင်က ဦးကိုနီကို လုပ်ကြံရန်ငွေပေး၍ ခိုင်းစေခဲ့သည်ဟု ဖော်ပြထားသည်။ အောင်ဝင်းခိုင်သည် မည်သူဖြစ်ကြောင်း ပြည်သူအများစုက စိတ်ဝင်တစားရှိလာကြသည်။ ထို့နောက် ၎င်းနေထိုင်ရာ ဒေါပုံမြို့နယ်၊ ၀ါဆိုရပ်ကွက်၊ မဏ္ဍိုင်လမ်း၊ အိမ်အမှတ် (၃၃)အနီးသို့ 7 Day Daily ကသွားရောက် သတင်းယူခဲ့ရာ အောင်ဝင်းခိုင်ကို ဦးကိုနီလုပ်ကြံမှု မတိုင်ခင် နှစ်ရက်က နောက်ဆုံးတွေ့ခဲ့ရကြောင်း အိမ်နီးနားချင်းများက ဖြေကြားခဲ့သည်။ ၎င်းနေထိုင်ရာ သုံးထပ်တိုက်အိမ်ထဲတွင် မိသား စုရှိသည်ဟု ယူဆရသော်လည်း ခြံနှင့်အိမ်တံခါးကို ပိတ်ထားခဲ့သည်။

အောင်ဝင်းခိုင်သည် ထွက်ပြေးသွားခဲ့ပြီး မိသားစုသုံးဦးကျန်နေခဲ့သည်။ အောင်ဝင်းခိုင်နှင့် ပတ်သက်၍ ၎င်းတို့မိသားစုသည် သီးသန့်နေတတ်ပြီး ငွေကြေးချမ်းသာကာ ဆွေမျိုးအသိုင်းအ၀ိုင်းကြီးကြောင်း အိမ်နီးချင်းများက ပြောသည်။ ထို့အပြင် ရပ်ရေးရွာရေးတွင် ပါဝင်လေ့မရှိသော်လည်း အရုဏ်ဆွမ်းပုံမှန်လောင်းခြင်းနှင့် ဆွမ်းကပ်ခြင်းတို့ကို ပြုလုပ်လေ့ရှိသဖြင့် ဘာသာရေးကိုင်းရှိုင်းသူအဖြစ် အရပ်က သတ်မှတ်ထားသည်။ ကားတစ်စီးနှင့် အမြဲအပြင်သွားလေ့ရှိသဖြင့် အရပ်ထဲတွင် တွေ့ရနည်းကြောင်း၊ ထောင်ထောင်မောင်းမောင်းနှင့် ဥပဓိရုပ်ကောင်းကာအရာရှိဟောင်းဖြစ်၍ ရပ်ကွက်နေအများစုက လေးစားမှုရှိကြောင်းဆို၏။

အောင်ဝင်းခိုင်သည် ဦးကိုနီ လုပ်ကြံမှုတွင်  ပူးပေါင်းပါဝင်ပြီး ဖမ်းဆီးခံထားရသော အောင်ဝင်းဇော်နှင့် ညီအရင်း တော်စပ်သူဖြစ်သည်။ ပဲခူးတိုင်းဒေသကြီး ပန်းတောင်းမြို့နယ် ဇာတိဖြစ်ပြီး ဒေါပုံမြို့နယ် ၀ါဆိုရပ်ကွက် မဏ္ဍိုင်လမ်း၊ အိမ်အမှတ် (၃၃) ၌ သုံးထပ်တိုက်ဖြင့် နေထိုင်သည်။ ၎င်းသည် တပ်မတော်တွင် ဒုတိယဗိုလ်မှူးကြီးအဆင့်ဖြင့် တာဝန်ထမ်းဆောင်ခဲ့ကာ ၂၀၁၄ တွင် မိမိသဘောဆန္ဒဖြင့် နုတ်ထွက်ခဲ့သည်။ အောင်ဝင်းခိုင် ဒုဗိုလ်မှူးကြီးရာထူးမှ နုတ်ထွက်သည့် နှစ်တွင် ၎င်း၏အစ်ကို အောင်ဝင်းဇော်နှင့်ကြည်လင်းတို့လည်း အိုးဘိုထောင်တွင် ဘုရားခိုးမှုနှင့် ပြစ်ဒဏ်ကျခံနေရာမှ သမ္မတ၏လွတ်ငြိမ်းခွင့်ဖြင့် လွတ်မြောက်လာခဲ့သောနှစ်နှင့် တိုက်ဆိုင်နေသည်။

၎င်းနေထိုင်ရာနေအိမ်သို့ ဇန်န၀ါရီ ၃၀ ရက်တွင် တိုင်းရဲ တပ်ဖွဲ့က ၀င်ရောက်စစ်ဆေးခဲ့ သည်။ ထိုနေ့တွင် တရားခံကြည် လင်း၏ ထွက်ဆိုချက်အရ အစ်ကို ဖြစ်သူ အောင်ဝင်းဇော်ကို ဖမ်းမိ ပြီးဖြစ်သည်။ သို့သော်ဝင်ရောက် စစ်ဆေးချိန်တွင် အောင်ဝင်းခိုင် သည်နေအိမ်၌ မရှိတော့ဘဲ ရဲတပ် ဖွဲ့က လက်ကိုင်ဖုန်းများနှင့် စာ ရွက်စာတမ်းအချို့ကို သိမ်းဆည်း သွားကြောင်း အဆိုပါဝါဆိုရပ် ကွက်အုပ်ချုပ်ရေးမှူး ဦးညီညီ ထွေးက ပြောသည်။

၎င်း၏အိမ်နီးနားချင်းများက အောင်ဝင်းခိုင်ကို လုပ်ကြံမှုမဖြစ် ပွားမီ နှစ်ရက်အလို ဇန်န၀ါရီ ၂၇ ရက် နေ့လယ်တွင် နေပူထဲ ထီး ဆောင်း၍ ပြန်လာသည်ကို နောက်ဆုံးတွေ့လိုက်ရကြောင်း ဆိုသည်။ ရပ်ကွက်အုပ်ချုပ်ရေး မှူး၏ ပြောဆိုချက်အရအောင်ဝင်း ခိုင်သည်အဆိုပါ ၀ါဆိုရပ်ကွက်၊ မဏ္ဍိုင်လမ်းသို့ လွန်ခဲ့သည့် သုံးနှစ်ခန့်က ပြောင်းရွှေ့လာခြင်းဖြစ်ကာ ၎င်းနှင့်ဆွေမျိုး တော်စပ်သူများသည် အဆိုပါ ရပ်ကွက်တွင် ရှိနှင့်ပြီးဖြစ်သည်။ လက်ရှိနေထိုင်သည့် သုံးထပ်တိုက်သည် အောင်ဝင်းခိုင် တပ်မတော်မှ နုတ်ထွက်ပြီးသည့် လွန်ခဲ့သော တစ်နှစ်ခန့်ကမှ ဆောက်လုပ်ပြီးစီးခြင်းဖြစ်ကာ ယင်းမတိုင်မီက အိမ်ငှား၍နေထိုင်ကြောင်း အိမ်နီးနားချင်းများကဆို သည်။

ဇနီးနှင့်ဆယ်ကျော်သက် အရွယ်သားနှစ်ဦးရှိပြီး ရပ်ကွက် အတွင်း ရံဖန်ရံခါသာ အပြင် ထွက်တတ်ကာ အဆိုပါဖြစ်စဉ်ဖြစ်ပွားသည့်နေ့ကစ၍ အိမ်အတွင်း လူရှိသော်လည်း အိမ်တံခါးကို အမြဲပိတ်ထားကြောင်း ရပ်ကွက်နေသူများက ပြောသည်။ ၎င်းတို့၏ အဆိုအရ အောင်ဝင်းခိုင်တို့မိသားစုသည် အိမ်နီးနားချင်းများနှင့် အ ကျွမ်း  တ၀င်မရှိဘဲ သီးသန့်နေထိုင်သူများဖြစ်သည်ဟုဆိုကြသည်။

‘‘သူတို့မိသားစုက ရပ်ကွက် ထဲက သူတွေ အတော်များများနဲ့ ထိတွေ့ဆက်ဆံမှုနည်းတယ်။ ညီ အစ်ကိုမောင်နှမတွေ ၀င်ထွက် သွားလာတာတော့ရှိတယ်။ အခု အဖမ်းခံထားရတဲ့ အောင်ဝင်း ဇော်လည်း ဒီအိမ်ကိုလာလည် တာတွေ့မြင်ဖူးတယ်။ ရပ်ကွက် မှာကတော့ သူ့အိမ်ကို ဘယ်သူ တွေ ၀င်ထွက်နေတာလဲဆိုတာ တော့ သေချာမသိဘူး။ သူစိမ်း တွေလည်း အ၀င်အထွက်နည်းပါ တယ်။ ပိုက်ဆံလည်းရှိ အရှိန် လည်းရှိတဲ့လူတွေဆိုတော့ သီး သန့်ဆန်ကြတာပေါ့။ သူ့အိမ်တံ ခါးကိုလည်း အမြဲပိတ်ထားတယ်’’ ဟု အိမ်နီးနားချင်း ကိုဇော်ဝင်းက ပြောသည်။

သို့သော် ဘာသာရေးကိုင်း ရှိုင်းသူဟု အိမ်နီးချင်းအချို့ကဆို ကြပြီး ၀ါတွင်းသုံးလ အရုဏ် ဆွမ်းလောင်းချိန်တွင် ပုံမှန်ဆွမ်း လောင်းသူဖြစ်ကာ ပဋ္ဌာန်းနှင့် တရားစာများ ရွတ်ဆိုနေလေ့ရှိ ကြောင်း ဆွမ်းလောင်းအသင်း တွင် ပါဝင်သူများကဆိုသည်။

အိမ်နီးချင်းများ၏ အဆိုအရ အောင်ဝင်းခိုင်နှင့်အောင်ဝင်းဇော် တို့ ညီအစ်ကိုနှစ်ဦးသည် သွား သွားလာလာရှိပြီး ၀ါဆိုရပ်ကွက် ထဲ၌ ကားဝပ်ရှော့လုပ်ငန်းတစ်ခု ကို ပူးပေါင်းလုပ်ကိုင်ကြသည်။ သို့သော် အဆိုပါလုပ်ကြံမှုဖြစ်စဉ် အပြီးတွင် ၀ပ်ရှော့လုပ်ငန်းကို ပိတ်သိမ်းခဲ့သည်။ ထို့အပြင် ကျောက်တံတားမြို့နယ် မဟာ ဗန္ဓုလပန်းခြံလမ်း၌လည်း ၎င်းတို့မိသားစုပိုင် လျှပ်စစ်ပစ္စည်းဆိုင်တစ်ခုရှိနေသည်ဟုဆိုသည်။

နိုင်ငံတော်သမ္မတရုံး၏ ထုတ်ပြန်ချက်အရ ဇန်န၀ါရီ ၂၈ ရက်တွင် အောင်ဝင်းခိုင်က ၎င်း ၏အစ်ကို အောင်ဝင်းဇော်ဆီသို့ ဆက်သွယ်လာပြီး ဦးကိုနီ ၂၉ ရက်နေ့တွင် လေယာဉ်ဖြင့် ပြန် လာမည်ဖြစ်ကြောင်း၊ သေနတ် အသင့်ပြင်ထားရန် ပြောကြားခဲ့ ကြောင်းသိရသည်။ ထို့အပြင် အောင်ဝင်းခိုင်သည် ရန်ကုန် လေ ဆိပ်သို့ ကိုယ်တိုင်သွားရောက်၍ ဦးကိုနီထွက်ခွာလာမည့် ဂိတ် ပေါက်နှင့်အချိန်ကို စုံစမ်းခဲ့ပြီး အဆိုပါပုံများကို လေဆိပ်စီစီတီ ဗီမှ ဖမ်းယူထားနိုင်ခဲ့သည်။ နဖူး ပြောင်နေပြီး မျက်မှန်နှင့် အသက်  (၄၅) နှစ်အရွယ် အောင်ဝင်းခိုင် သည် အရပ်ထောင်ထောင်မောင်း မောင်းရှိပြီး အဆိုပါနေ့၌ လည် ကတုံးအင်္ကျီနှင့်ပုဆိုးကိုကျကျနန ၀တ်ဆင်ထားသည်။ ထို့အပြင် တိုယိုတာ ဟာရီယာအနက် ရောင်ယာဉ်ကို ကိုယ်တိုင် မောင်း နှင်လာခြင်းဖြစ်သည်။

ကြည်လင်း က ဦးကိုနီကို သေနတ်ဖြင့် တေ့ပစ်လိုက်ချိန် တွင် အောင်ဝင်းဇော်နှင့် အောင် ၀င်းခိုင်နှစ်ယောက်စလုံး အခင်း ဖြစ်ပွားရာနေရာ၌ ရှိ၊မရှိကိုသမ္မတ ရုံးထုတ်ပြန်ချက်တွင် ထည့်သွင်း မဖော်ပြထားပေ။ သို့သော် အဆို ပါလုပ်ကြံမှုတွင် မျက်မြင်သက် သေတစ်ဦးဖြစ်သည့် အငှားယာဉ် မောင်းကိုသီဟ၏ ပြောပြချက်အ ရ အောင်ဝင်းခိုင်၏ကားဟု ယူဆ ရသော ဟာရီယာအနက်ရောင် ကို အဆိုပါနေ့က တွေ့ခဲ့ကြောင်း ပြောသည်။ ကိုသီဟ၏အဆိုအရ တရားခံကြည်လင်းမှာ ဦးကိုနီကို သေနတ်ဖြင့် ပစ်ခတ်အပြီး ထို ကားအနက်ရောင်ဆီပြေးသွား ကာ မှန်ကို ပုတ်ခဲ့ကြောင်း၊ သို့ သော် အဆိုပါကားက တံခါးမ ဖွင့်ပေးကြောင်းပြောသည်။

ကိုသီဟအပါအ၀င် လေ ဆိပ်မှ မျက်မြင်သက်သေအများစု က အဆိုပါကားအနက်ရောင် အကြောင်းကို ထုတ်ပြန်ချက် ထွက်လာပြီးမှ ပြောကြားခြင်းမဟုတ်ဘဲ ဖြစ်စဉ်ဖြစ်ပွားသည့် ဇန်န၀ါရီ ၂၉ ရက်ကတည်းက ပြောကြားခြင်းဖြစ်သည်။

ရဲတပ်ဖွဲ့၏ ကနဦးစစ်ဆေး ချက်များတွင် တရားခံကြည်လင်း က ၎င်းကိုခိုင်းစေသူမှာ မြင့်ဆွေ ဟု လိမ်လည်ထွက်ဆိုခဲ့ရာ ရဲတပ် ဖွဲ့က မြင့်ဆွေဆိုသူများကို လိုက် လံဖမ်းဆီးပြီး အလုပ်များခဲ့သည်။

ဦးကိုနီအား လုပ်ကြံမှုသည် နိုင်ငံအတွင်း တည်ငြိမ်အေးချမ်းမှု ပျက်ပြားစေရန် ရည်ရွယ်ဆောင် ရွက်ခြင်းဖြစ်နိုင်ကြောင်း သုံးသပ် တွေ့ရှိရသည်ဟု သမ္မတရုံးက ဇန်န၀ါရီ ၃၀တွင် ထုတ်ပြန်ထား သည်။

ငွေပေးစေခိုင်းသော အောင် ၀င်းခိုင်သည် မည်ကဲ့သို့လူစားလဲ ဆိုသည်ကို ပြည်သူများ စိတ်ဝင် စားနေပြီး ၎င်း၏ နောက်ကွယ် တွင် မည်သူရှိသေးသလဲဆိုသည် ကို အထူးစိတ်ဝင်စားနေကြပေ သည်။



7Day News Journal

No comments:

Post a Comment

Recent Post