Latest News

Wednesday, February 22, 2017

ကရင်လူငယ်တွေ ပညာရေး နှိမ့်ချဆက်ဆံခံနေရ

ကရင်လူငယ်တွေ ပညာရေး နှိမ့်ချဆက်ဆံခံနေရ

ထိုင်းမြန်မာနယ်စပ်က ဒုက္ခသည်စခန်းတွေမှာ သင်ကြားခဲ့တဲ့ ပညာအရည်အချင်းတွေကို
လက်ရှိမြန်မာအစိုးရက ထိုက်ထိုက်တန်တန် အသိအမှတ်ပြုပေးပါလို့
ကရင်လူငယ်အဖွဲ့အစည်းတချို့က တောင်းဆိုလိုက်ပါတယ်။

သူတို့ရင်ဆိုင်နေရတဲ့
အခက်အခဲတွေကို  “မေ့လျှော့ခံနေရသော လူငယ်များ၏ ရင်ဖွင့်သံ” (Unrecognized
Leaders, Tomorrow’s Hope: Raising the Voices of Forgotten Youth” လို့
အမည်ပေးရိုက်ကူးထားတဲ့ မှတ်တမ်းတင် ဗီဒီယိုတခုကို ကရင်လူငယ်တွေက
ရန်ကုန်မြို့မှာ မနေ့က ထုတ်ပြန်ပြသခဲ့ပါတယ်။

အဲဒီ မှတ်တမ်းတင်ဗီဒီယိုကို ထုတ်လုပ်တင်ပြရာမှာ ပါဝင်သူတဦးဖြစ်တဲ့
ကရင်ကျောင်းသားကွန်ရက် ဥက္ကဌ စောထူးထူး စတင်း က မြန်မာပြည်တွင်းမှာ
ပြန်လည်အခြေချဖို့ သွားရောက်ခဲ့ကြတဲ့ မိမိတို့ ကရင်လူငယ်တွေကို သက်ဆိုင်ရာ
အစိုးရပညာရေးဌာနဝန်ထမ်းတွေက နယ်စပ်ဒေသ စာသင်ကျောင်းတွေမှာ ခိုလှုံနေထိုင်ရစဉ်
စနစ်တကျ သင်ကြားခဲ့တဲ့ပညာတွေကို အသိအမှတ်ပြုခြင်းမရှိဘဲ နှိမ့်ချဆက်ဆံနေတယ်လို့
RFA ကို ပြောပါတယ်။

 “စခန်းမှာ ၁ဝ တန်းအောင်ပြီး မြန်မာပြည်ပြန်တဲ့
ကရင်လူငယ်တွေ ကျောင်းပြန်တက်မယ်ဆိုတော့ အစိုးရဘက်က လက်မခံဘူး။ ဆိုပါတော့
ကျောင်းသားတဦးက မြန်မာပြည်မှာ ၆ တန်းအထိနေပြီး နယ်စပ်စခန်းမှာ ၁ဝ
တန်းအောင်သွားပေမယ့် ပြည်တွင်းပြန်သွားတဲ့အခါ ဆရာ ဆရာမတွေကသူ့ကို နင်က
မြန်မာပြည်မှာ ၆ တန်းပဲအောင်သွားတာ။ အခု ၇ တန်းပဲပြန်တက်ရမယ်၊ နင်
တက္ကသိုလ်တက်လို့မရဘူး။ ၁ဝ တန်းလည်း ပြန်တက်လို့မရဘူးလို့ပြောတယ်။
ကျနော်တို့နယ်စပ်ကျောင်းမှာ ရသွားတဲ့လက်မှတ်ကို အစိုးရက အသိအမှတ်မပြုဘူး။”

စောထူးထူးက ဒီပြသနာကို ကရင်အဖွဲ့အစည်းတွေထံ သူတို့ တင်ပြထားပေမယ့် အခုအချိန်ထိ ထူခြားမှု မရှိသေးတဲ့အတွက် နိုင်ငံတော်အကြီးအကဲတွေက
ဖြေရှင်းပေးစေလိုပါတယ်လို့လည်း ပြောပါတယ်။

နိုင်ငံတကာမှာတော့ အခုလို တခြားတိုင်းပြည်တွေက အသစ်ရောက်လာတဲ့ ကျောင်းသားတွေကို
သူတို့ရဲ့အသက်အရွယ်အလိုက် ဒေသခံတွေနဲ့တန်းတူထားပြီး ကျောင်းပညာကို
သင်ကြားစေပါတယ်။ အဲဒီလိုတက်ရောက်သင်ကြားရာမှာ လိုအပ်တဲ့ ပညာရေးကွာခြားမှုကို
ဖြည့်စည်းဖို့အတွက် သင့်တော်တဲ့ ကျောင်းသင်ခန်းစာတွေ သီးခြားသင်ကြားပေးပါတယ်။

ထိုင်းမြန်မာ နယ်စပ်ဒေသ ဒုက္ခစခန်းတွေက
ကျောင်းသူကျောင်းသားလူငယ်တွေရဲ့ဘဝပုံရိပ်တွေနဲ့ သူတို့ ဆုံးရှုံးနစ်နာနေတဲ့
ပညာရေးအခြေအနေတွေအကြောင်း ၅၅ မိနစ်ကြာ တင်ပြထားတဲ့ မှတ်တမ်းတင်
ဗီဒီယိုရုပ်ရှင်ကို ရန်ကုန်မြို့က Green Hill ဟိုတယ်မှာ မနေ့က
သတင်းစာရှင်းလင်းပွဲကျင်းပပြီး ထုတ်ပြန်ခဲ့တဲ့ အဖွဲ့အစည်း ၃ ခု ကတော့
ကရင်ကျောင်းသားကွန်ရက်(Karen Student Network) ကရင်လူငယ်အစည်းအရုံး (Karen
Youth Organization) နဲ့ ဘားမားလင့် (Burma Link) တို့ဖြစ်ပါတယ်။

နယ်စပ်က ကရင်ဒုက္ခသည်စခန်း ၇ ခုမှာ လူတသိန်းကျော် ခိုလှုံနေထိုင်ကြတဲ့အနက်
သူငယ်တန်းက ၁၂ တန်းအထိ သင်ကြားနေသူနဲ့ သင်ကြားပြီးသူ ကျောင်းသားလူငယ် ၂
သောင်းကျော် ရှိနေတယ်လို့ သက်ဆိုင်ရာ အဖွဲ့အစည်းတွေက ပြောပါတယ်။

ကရင်ကျောင်းသားကွန်ရက်(Karen Student Network) ဥက္ကဌ စောထူးထူး စတင်းနဲ့ အဖွဲ့သား ဦးခင်မောင်စိုး ဆက်သွယ်မေးမြန်းခဲ့တာကို နားဆင်ပါ။

Photo: KSNG FB

( မယ်လဒုက္ခသည်စခန်းက ကျောင်းသားတွေကို တွေ့ရစဉ် )
R F A

No comments:

Post a Comment