၂၀၁၆ ခုနှစ်အတွင်း ဖုန်းဘီလ်ခွန် စုစုပေါင်း ကျပ် ၅၉ ဒသမ ၉၅ ဘီလျံရရှိခဲ့ကြောင်း သိရ
၂၀၁၆ ခုနှစ်အတွင်း ဖုန်းဘီလ်ခွန် စုစုပေါင်း ကျပ် ၅၉ ဒသမ ၉၅ ဘီလျံရရှိခဲ့ကြောင်း ပြည်တွင်း အခွန်များဦးစီးဌာနမှ သတင်းရရှိသည်။
ယင်းအခွန်ငွေမှာ ၂၀၁၆ ဧပြီမှ ဒီဇင်ဘာအထိ ကိုးလတာ ကာလအတွင်း ကောက်ခံရရှိခဲ့ခြင်းဖြစ်ကြောင်း သိရသည်။ ထို့ကြောင့် လစဉ်ပျမ်းမျှရရှိခဲ့သော ဖုန်းဘီလ်ခွန် ပမာဏမှာ တစ်လလျှင် ၆ ဒသမ ၆ ဘီလျံ ခန့်ရှိခဲ့ကြောင်း ပြန်လည်တွက်ချက်မှုအရ သိရသည်။
၂၀၁၆ ခုနှစ် ဒီဇင်ဘာလအတွင်း ဆက်သွယ်ရေး အော်ပရေတာသုံးခုထံမှ ကောက်ခံရရှိခဲ့သော ဖုန်းဘီလ်ခွန်မှာ ကျပ် ၇ ဒသမ ၇ ဘီလျံဖြစ်ကြောင်း သိရသည်။
ပြီးခဲ့သော နိုဝင်ဘာလအတွင်းက ရရှိခဲ့သော ဖုန်းဘီလ်ခွန်ပမာဏမှာ ကျပ် ၆ ဒသမ ၇ ဘီလျံဖြစ်သည်။
ဧပြီလအတွက် စတင်ရရှိခဲ့သော ဖုန်းဘီလ်ခွန်ဖြစ်သည့် ကျပ်သန်း ၇၅၀၀ ကို ပညာရေးကဏ္ဍအတွက် စတင်သုံးစွဲခဲ့ပြီးနောက် လများတွင်ရရှိခဲ့သည့် ဖုန်းဘီလ်ခွန်များကိုမူ နိုင်ငံတော်ဘတ်ဂျက်အဖြစ်သာ ပေးသွင်းခဲ့ကြောင်း သိရသည်။
၂၀၁၆ ခုနှစ် မေလအတွက်ရရှိသော ဖုန်းဘီလ်ခွန် ကျပ် ၈ ဒသမ ၃၇ ဘီလျံတွင် မြန်မာ့ဆက်သွယ်ရေးလုပ်ငန်းက ၄ ဒသမ ၅ ဘီလျံကျော်၊ တယ်လီနောက ကျပ်သုံးဘီလျံ နီးပါး၊ အူရီဒူးက ကျပ်သန်း ၈၀၀ ကျော်ဖြစ်ကြောင်း သိရသည်။
၂၀၁၆ ဇွန်လအတွက် ရရှိခဲ့သည့် ဖုန်းဘီလ်ခွန်မှာ ကျပ်ရှစ်ဘီလျံဖြစ်ပြီး မြန်မာ့ဆက်သွယ်ရေးလုပ်ငန်းက ၄ ဒသမ ၁ ဘီလျံ၊ တယ်လီနောက ၂ ဒသမ ၆ ဘီလျံနှင့် အူရီဒူးက ၁ ဒသ မ ၁ ဘီလျံတို့ဖြစ်သည်။
ရရှိလာသော ဖုန်းဘီလ်ခွန်များကို ပြည်သူလူထုအတွက် တိုက်ရိုက်အကျိုးပြုစေမည့် ကဏ္ဍများတွင် သုံးစွဲသွားမည်ဖြစ်ကြောင်း၊ နိုင်ငံ့ဘဏ္ဍာငွေသည် ပြည်သူ့ဘဏ္ဍာငွေဖြစ်ကြောင်း နိုင်ငံတော်သမ္မတက ပြောကြားထားသည်။
၂၀၁၆ ခုနှစ် ပြည်ထောင်စု အခွန်ဥပဒေအရ မိုဘိုင်းဝန်ဆောင်မှု သုံးစွဲသူများသည် ကုန်သွယ်လုပ်ငန်းခွန် ငါးရာခိုင်နှုန်းကို၂၀၁၆ ခုနှစ် ဧပြီ ၁ ရက်မှ စတင်ကာ ပေးဆောင်ရမည် ဖြစ်ကြောင်း ပြည်ထောင်စုလွှတ်တော်က အ တည်ပြုပြီးနောက် ဧပြီ ၁ ရက်မှစ၍ ဖုန်းဘီလ်ခွန်များကို စတင်ကောက်ခံခဲ့ခြင်းဖြစ်သည်။
ထိုသို့ကောက်ခံရာတွင် သုံးစွဲပြီးနောက် ကျသင့်ငွေထဲမှ ငါးရာခိုင်နှုန်းကို ဖြတ်တောက် ကောက်ခံခြင်းဖြစ်ကြောင်း သိရသည်။
လက်ရှိတွင် မြန်မာနိုင်ငံတွင် ဆက်သွယ်ရေးအော်ပရေတာ သုံးခုရှိပြီး ထပ်မံ၍ Mytel အမည်ရှိ ဆက်သွယ်ရေး အော်ပရေတာတစ်ခုမှာ တစ်နှစ်အတွင်း မြန်မာနိုင်ငံ၌ အကောင်အထည်ဖော်မည်ဖြစ်သည်။
နေမျိုးထွန်း
Sources; Eleven Media Group
Subscribe to:
Post Comments (Atom)
No comments:
Post a Comment