ရခိုင်ပြည်သူလူထုရဲ့ လူနေမှုဘဝနဲ့ သဘာဝပတ်ဝန်းကျင်ကို အကာအကွယ်ပေးပြီး အာမခံချက်ရှိစေနိုင်မယ့် ဥပဒေ၊ နည်းဥပဒေတွေမရှိသေးတာကြောင့် ကျောက်ဖြူအထူးစီးပွားရေးဇုန် စီမံကိန်းကိုရပ်တန့်ထားဖို့ စီမံကိန်းဧရိယာအတွင်းမှာပါဝင်တဲ့ ကျေးရွာပေါင်း ၂၅ ရွာက ဒေသခံ ၃၀၀ လောက်က ဒီနေ့ ကျောက်ဖြူမြို့နယ်မှာ ပြုလုပ်တဲ့ ဆွေးနွေးပွဲမှာ တောင်းဆိုလိုက်ပါတယ်။
ဒီနေ့ ဆွေးနွေးပွဲကို ကျောက်ဖြူမြို့နယ် နှမ်းဖဲတောင်ကျေးရွာမှာပြုလုပ်ခဲ့တာဖြစ်ပြီး အဲဒီအထူးစီးပွားရေးဇုန် စီမံကိန်းကြောင့် ဒေသခံတွေရဲ့ ရပိုင်ခွင့်တွေဆုံးရှုံးသွားမှာကို စိုးရိမ်တဲ့အကြောင်းကို အဓိကထား ဆွေးနွေးခဲ့တယ်လို့ ကျောက်ဖြူကျေးလက်ဒေသဖွံ့ဖြိုးရေးအသင်း ညှိနှိုင်းရေးမှူး ဦးထွန်းကြည်ကပြောပါတယ်။
ကျောက်ဖြူအထူးစီးပွားရေးဇုန် စီမံကိန်းကြောင့် အသစ်ဖြစ်ပေါ်လာမယ့် အလုပ်အကိုင်အခွင့်အလမ်းတွေမှာ ဒေသခံတွေအတွက် အလုပ်အကိုင်ရရှိနိုင်တဲ့ အခွင့်အလမ်းနည်းပါးမှာဖြစ်သလို ဗဟိုချုပ်ကိုင်မှုလွန်ကဲတဲ့ စီမံကိန်းဖြစ်တာကြောင့် ဒေသခံတွေနဲ့ ရခိုင်ပြည်သူလူထုအတွက်ပါ အကျိုးအမြတ်မရှိနိုင်ဘူးဆိုတာကို ဆွေးနွေးခဲ့ကြတယ်လို့လည်း သိရပါတယ်။
ဒီနေ့အစည်းအဝေးနဲ့ပတ်သက်ပြီး အချက် ၁၁ ချက်ပါတဲ့ ဆုံးဖြတ်ချက်ကြေငြာချက် တစ်စောင်ကိုလည်း ထုတ်ပြန်လိုက်ပါတယ်။
အဲဒီထုတ်ပြန်ချက်မှာ အထူးစီးပွားရေးဇုန် စီမံကိန်းကြောင့် မိရိုးဖလာအရပိုင်ဆိုင်လာခဲ့ကြတဲ့ မြေယာတွေ ဆုံးရှုံးခံရနိုင်တာအပြင် ဒေသခံတွေပိုင်ဆိုင်တဲ့ မြေယာတွေအတွက် သေချာတဲ့အာမခံချက် မရှိတဲ့အတွက် နိုင်ထက်စီးနင်းခံမှုတွေရှိလာမှာကို စိုးရိမ်မိကြောင်း အချက်တွေကို ဖော်ပြထားပါတယ်။
ဒီနေ့အစည်းအဝေးကို ကျောက်ဖြူအထူးစီးပွားရေးဇုန် စီမံကိန်းဧရိယာအတွင်းမှာပါဝင်တဲ့ မင်းတပ်တောင်၊ စီမော်၊ ရှောက်ချောင်း၊ ကပ်သပြေ၊ ဇင်ချောင်း၊ ချောင်းဝ၊ ကုလားပါ စတဲ့ကျေးရွာပေါင်း ၂၅ ရွာက ဒေသခံတွေ ပြုလုပ်ခဲ့ကြတာပါ။
ရခိုင်ပြည်နယ် ကျောက်ဖြူမြို့နယ်မှာ ဧကပေါင်း လေးထောင့်နှစ်ရာကျော်ကျယ်ဝန်းမယ့် အထူးစီးပွားရေးဇုန်စီမံကိန်းကို အစိုးရက မကြာခင် အကောင်အထည်ဖော်ဖို့ ပြင်ဆင်နေတာဖြစ်ပါတယ်။
Photo: Min Thein Aung/RFA
(ကျောက်ဖြူအထူးစီးပွားရေးဇုန်ကို တွေ့ရစဉ်)
Sources: :RFA
No comments:
Post a Comment