မြန်မာနိုင်ငံရုပ်ရှင်အစည်းအရုံးက ၂၀၁၆ ခုနှစ်အတွက် ရုပ်ရှင်ထူးချွန်ဆုပေးအပ်ချီးမြှင့်ပွဲမှာ ပါဝင်ကြမယ့် အကယ်ဒမီရွှေကြိုများကို ယနေ့(ဇန်နဝါရီ၁၆) ရက်မှ စတင်ပြီး လျှောက်ထားနိုင်တဲ့အကြောင်း ထုတ်ပြန် ကြေညာထားပါတယ်။
လျှောက်ထားသူများအနေနဲ့ အမျိုးသား၊အမျိုးသမီး အိမ်ထောင်ရှိသူမဖြစ်စေရ၊ အသက် ၁၆ နှစ်မှ ၂၅ နှစ်အတွင်း ဖြစ်ရမည်၊ အရပ်အမြင့်မှာ အမျိုးသား အရပ် ၅ ပေ ၆ လက်မ မှ ၆ ပေကြား၊ အမျိုးသမီး အရပ်အမြင့်မှာ ၅ ပေ ၃ လက်မ မှ၊ ၅ ပေ ၈ လက်မ ကြားရှိရမည်၊ ကျန်းမာရေးကောင်းမွန်ပြီး အကျင့်စာရိတ္တကောင်းမွန်ခြင်းနဲ့ ကိုယ်ခန္ဓာ အချိုးအစား ပြေပြစ်သူ ဖြစ်ရမည် ဆိုပြီး စည်းကမ်းချက်များ ထုတ်ပြန်ထားပါတယ်။
လျှောက်လွှာများကို မြန်မာနိုင်ငံ ရုပ်ရှင်အစည်းအရုံး အမှတ်၁၆၊ ဝင်္ကဘာလမ်းမှာ ဒီနေ့က စတင်ထုတ်ယူ လျှောက်ထားနိုင်ပြီး လျှောက်လွှာပိတ်ရက်တော့ ဇန်နဝါရီလ ၃၁ ရက်လို့ သတ်မှတ်ထားပါတယ်။ လျှောက်ထားသူများအနေနဲ့ ရုပ်ရှင်အစည်းအရုံးမှာ လူကိုယ်တိုင်လာရောက်လျှောက်ထားရမှာ ဖြစ်ပါတယ်။
ပဏာမလူတွေ့စစ်ဆေးခံရသူများကို ဖေဖော်ဝါရီ ၇ ရက်နေ့မှာ ကြေညာပေးသွားမှာ ဖြစ်ပါတယ်။ ၂၀၁၆ ခုနှစ်အတွက် မြန်မာ့ရုပ်ရှင်ထူးချွန်ဆုပေးအပ်ပွဲကိုတော့ မတ်လ (၁၈) ရက်နေ့တွင် ရန်ကုန်မြို့မှာ ကျင်းပပြုလုပ်မယ်လို့ သိရပါတယ်။
အကယ်ဒမီရွှေကြိုဆိုတာဟာ ယခင် အကယ်ဒမီဗန်းကိုင်လို့ အများသိကြပြီး အကယ်ဒမီရုပ်တုကို သယ်ဆောင် ပေးရသူများဖြစ်ပါတယ်။ ၂၀၁၃ ခုနှစ်အတွက်ပေးအပ်တဲ့ ရုပ်ရှင်ထူးချွန်ဆုပေးပွဲမှ စတင်ပြီး အကယ်ဒမီရွှေကြိုလို့ ပြောင်းလဲခေါ်ဆိုခဲ့တာ ဖြစ်ပါတယ်။
ယုမွန်ကျော်
Sources; The Irrawaddy
No comments:
Post a Comment